ꓜꓲ ꓜꓲ ꓟꓴ ꓟꓴ ꓬꓰ ꓟ ꓑꓶ ꓓꓴ ꓟꓶꓽ ꓡꓰ ꓔꓬ ꓟ ꓥꓳ ꓡꓳ. ꓓꓴ ꓔꓯ ꓙꓲ ꓢꓴ ꓢꓲ ꓤ ꓐꓴ ꓬꓲ. ꓢꓯꓼ ꓓꓳ ꓟꓳ. ꓖꓶ ꓠ, ꓟ ꓢꓯꓼ ꓖꓶ_ ꓡꓳ꓾
“ꓟꓽ ꓔꓱ, ꓟ ꓓꓳꓽ ꓫꓵ꓾ ꓫꓵ ꓪꓴ ꓑꓶ ꓓꓴ ꓔꓱ, ꓟ ꓟꓽ ꓔꓱ, ꓟ ꓙ ꓜꓲꓼ ꓠꓲ,” ꓐꓬ ꓡꓰ ꓔꓬ ꓟ ꓕꓱ ꓟꓲ ꓠꓯ ꓗꓪ ꓙꓲ ꓢꓴ ꓢꓲ ꓤ ꓐꓴ ꓗꓪ ꓐꓰ ꓶꓼ ꓓꓳ ꓫꓱ, ꓓꓳ ꓔꓯ ꓢꓷ. ꓙ ꓟꓳ ꓙ ꓠ, ꓟ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓯꓼ ꓖꓶ ꓔ ꓡꓳ꓿
ꓢꓯ. ꓬꓲꓼ ꓡ ꓟ ꓠꓽ ꓕꓲꓽ ꓠꓬꓲ ꓕꓯ ꓢꓔ. ꓑꓰꓔꓰꓣ ꓗꓪ ꓬꓰ ꓟ ꓣꓰꓖꓲꓠꓮ ꓚꓮꓰꓡꓲ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓟꓽ ꓔꓱ, ꓟ ꓓꓳꓽ ꓫꓵ꓾ ꓫꓵꓽ ꓪꓴ ꓑꓶ ꓓꓴ ꓫ ꓙꓵ ꓟꓷꓼ ꓙꓵ ꓐꓰ ꓐꓲ. ꓞ, ꓔꓬ ꓟ ꓮ ꓟꓶ ꓤꓶꓻ ꓗꓪ ꓙꓲ‐ꓢꓴ ꓢꓲ ꓤ ꓐꓴ ꓗꓪ ꓐꓰ ꓪꓴ‐ꓢ ꓐꓯ ꓘꓶꓽ ꓶꓼ ꓓꓳ ꓫꓱ, ꓓꓳ ꓔꓯ ꓢꓷ. ꓙ ꓟꓳ ꓙ ꓠ, ꓟ ꓢꓯꓼ ꓖꓶ ꓔ ꓡꓳ꓿
ꓬꓲ ꓖꓳꓽ ꓗꓷ ꓡꓰ ꓔꓬ ꓟ ꓡꓱꓼ ꓜꓴ ꓚꓱ, ꓢꓲ ꓫꓬ ꓕꓳ ꓶ ꓔꓯ ꓝꓮꓲ ꓓꓵꓽ ꓙ ꓔꓱ, ꓕ ꓟ ꓗꓪ ꓔꓲꓺ ꓒ ꓪ ꓔꓲ ꓡꓰ ꓬꓲ ꓚꓱ, ꓕꓲꓽ ꓟ ꓗꓪ ꓐꓰ ꓟꓽ ꓪ ꓟ ꓬꓲ. ꓚꓱ, ꓠꓬꓲꓽ ꓟ ꓢꓷ. ꓡꓰ ꓓꓴ ꓔꓯ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓢꓯ. ꓬꓲꓼ ꓡ ꓟ ꓢꓲ ꓒ ꓬꓰ‐ꓢꓴ ꓐꓰ ꓜꓲ ꓗꓷ ꓢꓲ ꓢꓲ ꓒ ꓢꓯ. ꓬꓲꓼ ꓡ ꓟ ꓓꓳꓽ ꓔꓯ ꓐꓯ ꓑꓶ ꓗꓷ ꓟ ꓤ ꓟꓶ ꓤ ꓐꓴ ꓢꓷ. ꓙ ꓟꓳ ꓙ ꓟ ꓐꓰ ꓢꓲ ꓒ ꓬꓲ ꓖꓳ ꓓꓱ ꓔꓯ ꓢꓴ ꓡꓰ ꓘꓴꓽ ꓡꓰꓳ ꓐꓰ ꓐꓯ_ ꓟ ꓟꓯꓼ ꓚꓱ, ꓥ ꓡꓳ꓿ ꓕꓱ ꓟ ꓒꓬꓱꓼ ꓡꓰ ꓟ ꓬꓲ ꓚꓱ, ꓕꓲ ꓟ ꓗꓪ ꓐꓰ ꓬꓲ ꓢꓷ. ꓡꓰ ꓓꓴ ꓠꓬꓲꓽ ꓟ ꓓꓳ ꓡ ꓟ ꓥ ꓡꓳ꓿
ꓕꓱ ꓟꓽ ꓪ ꓟ ꓠꓬ ꓮ ꓟꓶ ꓗꓪ ꓛꓲ ꓣꓳ. ꓚꓵ ꓔꓬ ꓟ ꓥ ꓡꓳ꓾ ꓔꓱ, ꓟ ꓔꓯ ꓐꓯ_ ꓕꓯ ꓘꓶꓽ ꓡꓶꓽ ꓓꓴ ꓠꓬ ꓮ ꓕꓯ ꓟꓲ ꓔꓳ, ꓜꓳ ꓡ ꓟ ꓥ ꓡꓳ꓾ ꓔꓱ, ꓟ ꓔꓯ ꓛꓳ ꓫꓱ ꓟ ꓗꓪ ꓮ ꓟꓶ ꓤꓶꓻ ꓗꓪ ꓠꓬ ꓟꓽ ꓔꓱ, ꓟ ꓓꓳꓽ ꓫꓵ꓾ ꓬꓲ. ꓥꓳꓽ ꓐꓰ ꓐꓯ ꓔ ꓟ ꓟꓽ ꓔꓱ, ꓟ ꓐꓯ ꓘꓶꓽ ꓬꓲ. ꓚꓱ, ꓟꓽ ꓙꓳ ꓐꓯ ꓠꓬꓲ. ꓔ ꓟ ꓑꓶ ꓓꓴ ꓟꓶꓽ ꓡꓰ ꓔꓬ ꓟ ꓬꓲ ꓚꓱ, ꓟꓲ ꓮ ꓕꓯ ꓟꓲ ꓒꓬꓱꓼ ꓡꓰ ꓔꓬ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ “ꓚꓺ ꓟꓲꓽ ꓔꓯ ꓐꓬ ꓡꓰ ꓝꓲ_ ꓟ꓾ ꓔꓱ, ꓟ꓾ ꓥꓳꓽ ꓟ ꓠꓲ, ꓟ ꓔꓯ ꓓꓵꓽ ꓙ ꓟꓬ ꓡꓰ ꓝꓲ_ ꓟ ꓟꓽ ꓙꓲ_ ꓟ ꓗꓪ ꓐꓰ ꓠꓬꓲ. ꓞ, ꓟꓶ ꓡꓰ ꓢꓴ” ꓐꓴ ꓠꓯꓼ ꓗꓪ ꓶꓼ ꓓꓳ ꓫꓱ, ꓓꓳ ꓬꓲ ꓔꓱ, ꓟ ꓬꓲ ꓪ ꓠꓯꓼ ꓗꓪ ꓛꓲ ꓬꓰ ꓠ, ꓟ ꓣꓳ. ꓚꓵ ꓟ ꓔꓯ ꓬꓲꓼ ꓠꓬꓲ. ꓐꓯ ꓔ ꓡꓳ꓿ ꓢꓯ. ꓬꓲꓼ ꓡ ꓑꓮꓲ ꓬꓲ. ꓠꓯ. ꓟ ꓠꓬ “ꓐꓯ ꓘꓶꓽ ꓗꓪ ꓐꓰ ꓥ ꓟꓲ ꓟꓬꓱꓽ ꓗꓪ ꓐꓰ ꓥ ꓟꓲ” ꓥꓳ ꓡꓳ. ꓓꓴ ꓐꓱ ꓶ “ꓣꓳ ꓢꓯꓼ ꓔꓯ ꓓꓳ ꓢꓲ ꓟꓳ. ꓖꓶ ꓠ, ꓟ” ꓐꓯ ꓔ ꓡꓳ꓿
ꓮ ꓟꓶ ꓟ ꓤꓶꓻ ꓗꓪ ꓮ ꓟꓬ ꓛꓲ ꓫꓵ ꓪꓴ ꓐꓰ ꓘꓶ ꓡꓶꓽ ꓔꓬ ꓥ ꓟꓲ ꓔꓱ, ꓜꓳ ꓟ ꓠꓬ ꓟꓶꓽ ꓡꓰ ꓓꓴ ꓟꓽ ꓥ ꓐꓰ ꓐꓯ ꓔ ꓡꓳ꓿ “ꓕꓽ ꓙꓳ꓾ ꓙꓰ ꓢꓲ ꓐꓯ ꓖꓶ ꓬꓰ” ꓐꓯ_ ꓟ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓔꓯ ꓓꓵꓽ ꓙ ꓓꓴ ꓬꓰ꓾ ꓕꓱ ꓟ ꓠꓬ ꓙꓲ ꓢꓴ ꓢꓲ ꓤ ꓐꓴ ꓢꓷ. ꓙ ꓟꓳ ꓙ ꓟ ꓠꓯꓼ ꓗꓪ ꓣꓳ. ꓚꓵ_ ꓟ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ꓿
ꓟꓵꓽ ꓗꓳ. ꓓꓵ ꓓꓵ ꓗꓪ ꓔꓳ, ꓜꓳ ꓔꓬ ꓟ ꓫ ꓙꓵ ꓟꓷꓼ ꓙꓵ ꓟ ꓬꓲ. ꓚꓱ, ꓮ ꓟꓬ, ꓔꓯ ꓬꓲꓼ ꓠꓬꓲ. ꓐꓯ ꓔ ꓡꓳ꓿ ꓟꓬ ꓠꓬꓲ ꓠꓬ ꓗꓴꓷꓼ ꓫꓵ ꓪꓴ ꓔꓳ, ꓜꓳ ꓔꓬ ꓟ ꓑ ꓫꓬ ꓐꓴ ꓚꓲ ꓛꓬ ꓙꓵꓻ ꓠꓲ, ꓑꓶ ꓓꓴ ꓫ ꓙꓵ ꓟꓷꓼ ꓙꓵ ꓔꓳ, ꓜꓳ ꓔꓬ ꓟ ꓙꓲ ꓢꓴ ꓢꓲ ꓤ ꓐꓴ ꓐꓰ ꓢꓷ. ꓠꓲ, ꓟꓽ ꓢꓳ ꓪ ꓡꓰ ꓟ ꓤ ꓠꓱ ꓤ ꓐꓴ ꓔꓯ ꓬꓲꓼ ꓠꓬꓲ. ꓐꓯ ꓔ ꓡꓳ꓿
“ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓬꓲ. ꓠꓯ. ꓟ ꓔꓯ ꓐꓯ ꓘꓶꓽ ꓗꓪ ꓐꓰ ꓥ ꓟꓲ ꓟꓬꓱꓽ ꓗꓪ ꓐꓰ ꓥ ꓟꓲ ꓢꓷ. ꓙ ꓟꓳ ꓙ ꓟ ꓠꓬ ꓥꓳ ꓡꓳ. ꓓꓴ ꓐꓱ ꓶ ꓢꓯꓼ ꓕꓲꓽ ꓟ ꓔꓯ ꓓꓳ ꓟꓳ. ꓖꓶ_ꓟ ꓥ ꓡꓳ” ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓕꓱ ꓥꓳ ꓡꓳ. ꓓꓴ ꓠꓬ ꓮ ꓕꓯ ꓟꓲ “ꓫ ꓙꓵ ꓟꓷꓼ ꓙꓵ ꓠꓬꓲ. ꓞ, ꓔꓳ, ꓜꓳ ꓔꓬ ꓢꓴ ꓐꓴ “ ꓥꓳ ꓡꓳ. ꓓꓴ ꓥ ꓡꓳ꓿
ꓪꓴ‐ꓢ ꓐꓯ ꓘꓶꓽ ꓶꓼ ꓓꓳ ꓫꓱ, ꓓꓳ ꓔꓯ ꓒꓵꓽ ꓛꓳ ꓢꓲ ꓢꓷ. ꓙ ꓟꓳ ꓙ ꓟ ꓮ ꓰ ꓕꓲ ꓖ ꓗꓪ ꓥ ꓟꓲ ꓕꓱ ꓪꓴ‐ꓢ ꓐꓯ ꓘꓶꓽ ꓕꓯ ꓠꓯꓻ ꓞꓲ, ꓟ ꓗꓪ ꓐꓰ ꓠꓬꓲ ꓟꓳ ꓓꓴ ꓠꓯꓼ ꓗꓪ ꓧꓳꓽ ꓔꓯ, ꓙꓰ ꓖꓶ ꓢꓲ꓾ ꓘꓶꓽ ꓡꓶꓽ ꓓꓴ ꓗꓪ ꓐꓰ ꓔꓱ, ꓟ ꓔꓯ ꓝꓮꓲ ꓖꓶ ꓐ ꓡ ꓥꓳ ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓳ, ꓬꓰ ꓟ ꓘꓳꓼ ꓢꓯ. ꓬꓲꓼ ꓡ ꓟ ꓠꓽ ꓕꓲꓽ ꓠꓬꓲ ꓕꓯ ꓢꓲ ꓒ ꓠꓯꓼ ꓗꓪ ꓬꓲꓼ ꓟꓶ ꓡꓰ ꓟ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓔꓯ ꓓꓵꓽ ꓙ ꓠ, ꓟ ꓘꓴ ꓔ ꓡꓳ꓿ ꓔꓲꓺ ꓒ ꓪ ꓔꓲ “ꓬꓲ ꓙꓵꓻ ꓠꓲ, ꓐꓰ ꓠꓵꓻ ꓠꓲ, ꓢꓷ. ꓙ ꓟꓳ ꓙ ꓟ” ꓔꓯ ꓝꓮꓲ ꓓꓵꓽ ꓙ ꓢꓲ ꓠꓬꓲ ꓟ, ꓟ ꓟ‐ꓡꓲ ꓗꓪ ꓐꓰ ꓶ ꓓꓰ ꓪꓽ ꓘꓴ ꓖꓶ ꓠ, ꓟ ꓶ ꓓꓰ ꓗꓷ ꓟ ꓥꓳ꓿ “ ꓣꓳ ꓠꓬ ꓔꓱ, ꓟ ꓔꓯ ꓑꓶ. ꓑꓶ. ꓡꓰ ꓚꓺ ꓒꓬꓱꓽ ꓐ ꓡ ꓢꓴ ꓒꓬꓱꓼ ꓡꓰ ꓠ, ꓟ ꓪꓽ ꓘꓴ ꓓꓴ ꓬꓰ ꓡꓯ” ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
