ꓝꓴꓲ ꓠꓬꓲꓽ ꓫꓵ

ꓕꓽ ꓬꓰ ꓐꓯ_ ꓟ ꓔꓯ ꓬꓰ ꓗꓷ ꓟ ꓝꓴꓲ ꓐꓰ ꓬꓰ ꓠ ꓔ ꓟ ꓔꓯ ꓟꓽ ꓬꓰ ꓟ ꓝꓴꓲ ꓥ ꓡꓳ꓾ ꓕꓽ ꓬꓰ ꓐꓯ ꓟ ꓠꓬ ꓪꓴ‐ꓢ ꓙꓵꓽ ꓗ 10 ꓙꓵ ꓟ (ꓥ ꓠꓬ) ꓢꓴ ꓔꓯ ꓗꓶ. ꓟ꓾ ꓘꓴ_ ꓟ꓾ꓢꓴ ꓔꓯ ꓛꓬ, ꓟ꓾ꓢꓴ ꓤ ꓖꓴ ꓤ ꓟꓶ ꓔꓯ ꓠꓲ, ꓦꓯ._ ꓟ꓾ꓟꓽ ꓧ, ꓓꓳ ꓜ ꓟ꓾ꓣꓳ ꓢꓷ. ꓢꓷ. ꓡꓰ ꓟꓽ ꓧ, ꓟ ꓬꓰ ꓟ ꓔꓯ ꓐꓯ ꓟ ꓥ ꓡꓳ꓿

ꓟ. ꓟꓲꓽ ꓗꓪ ꓠꓬ ꓬꓲ. ꓚꓰ ꓬꓲ ꓪꓴ. ꓕꓳ ꓶ 3 ꓕꓱ ꓗꓪ ꓪꓴ‐ꓢ ꓡꓰ ꓮ‐ꓓꓯ ꓰ‐ꓪ ꓔꓯ ꓢꓶ. ꓢꓶ ꓕꓱ ꓟ ꓕꓽ ꓜ ꓐꓰ ꓐꓯ ꓔ ꓟ ꓔꓯ ꓜ ꓟ꓾ ꓕꓽ ꓬꓰ ꓕꓽ ꓜ ꓕꓽ ꓢꓪ. ꓕꓱ ꓡꓱ ꓐꓰ ꓐꓯ_ ꓟ ꓔꓯ ꓬꓰ ꓟ ꓕꓱ ꓡꓱ ꓬꓰ ꓗꓷ ꓠꓬ ꓝꓴꓲ ꓟꓶ. ꓟ ꓕꓱ ꓟ ꓥ ꓡꓳ꓿ ꓝꓮꓲ ꓕꓲ ꓫꓵ ꓠꓬ ꓕꓱ ꓟ ꓡꓰ ꓐꓰ ꓟꓽ ꓥ꓾ ꓬꓰ ꓠ ꓔ ꓟ ꓔꓯ ꓟꓽ ꓬꓰ ꓪ ꓝꓴꓲ ꓔꓯ ꓐꓯ ꓟ ꓥ ꓡꓳ꓿ ꓣꓳ ꓠꓬ ꓢꓴ ꓔꓯ ꓬꓰ ꓙ ꓠ, ꓟ ꓣꓳ ꓢꓷ. ꓥ ꓟꓲ ꓣꓳ ꓢꓷ. ꓢꓷ. ꓡꓰ ꓢꓴ ꓔꓯ ꓟꓽ ꓬꓰ ꓙ ꓟ ꓪꓽ ꓘꓴ ꓙ ꓠ, ꓟ ꓙꓳ ꓥ ꓟꓲ ꓢꓴ ꓐꓱ ꓶ ꓪꓽ ꓟꓽ ꓘꓴ ꓙ_ ꓟ ꓢꓴ ꓔꓯ ꓣꓳ ꓡꓰ ꓖꓽ ꓖꓶ ꓠ, ꓟ ꓢꓷ. ꓥ ꓟꓲ ꓣꓳ ꓠꓬ ꓟꓽ ꓖꓽ ꓖꓶ_ ꓟ ꓢꓴ ꓔꓯ ꓣꓳ ꓙꓲ ꓔꓱ, ꓠ, ꓟ ꓙꓳ ꓥ ꓟꓲ ꓣꓳ ꓠꓬ ꓢꓴ ꓔꓯ ꓟꓽ ꓜꓳ ꓟꓽ ꓙꓲ ꓔꓱ, ꓟ ꓡꓰ ꓢꓴ ꓔꓯ ꓬꓰ ꓖꓶ_ ꓟ ꓥ ꓡꓳ꓿

ꓝꓴꓲ ꓕꓱ ꓠꓬꓲꓽ ꓟ ꓟ ꓠꓬ ꓮꓽ ꓟ ꓪꓴꓽ_ ꓡ? ꓕꓽ ꓬꓰ ꓐꓯ ꓟ ꓔꓯ ꓬꓰ_ ꓟ ꓑꓶ ꓓꓴ ꓒꓬꓱꓼ ꓡ ꓟ ꓝꓴꓲ ꓐꓰ ꓬꓰ ꓐꓯ ꓟ ꓔꓯ ꓟꓽ ꓬꓰ ꓟ ꓝꓴꓲ ꓠꓬ ꓕꓲ ꓡꓲ, ꓥ ꓡꓳ꓿ ꓬ‐ꓗꓴ 4ꓽ 17 ꓗꓪ “ꓮꓽ ꓟ ꓥ ꓟꓲ ꓙꓲ_ ꓟ꓾ ꓧ, ꓟ꓾ ꓔꓱ, ꓟ ꓔꓯ ꓢꓷ. ꓢꓲ ꓠꓬꓲ ꓟꓽ ꓬꓰ ꓠꓬ ꓬꓲ ꓠꓬ ꓖꓳ ꓟ ꓠꓬ ꓝꓴꓲ ꓟꓶ. ꓥꓳ” ꓐꓰ ꓟ. ꓟꓲꓽ ꓗꓪ ꓥ ꓟꓲ ꓕꓱ ꓡꓱ ꓐꓯ ꓔ ꓡꓳ꓿ ꓖꓳ ꓟ ꓑꓶ ꓓꓴ ꓟꓽ ꓬꓰ ꓟ ꓥ ꓟꓲ ꓙꓲ_ ꓟ ꓔꓯ ꓬꓰ ꓠ ꓔ ꓟ ꓔꓯ ꓢꓷ. ꓥ ꓟꓲ ꓟꓽ ꓬꓰ ꓐꓯ ꓠꓬ ꓝꓴꓲ ꓙꓳ ꓟ ꓡꓰ ꓐꓰ ꓕꓽ ꓬꓰ ꓐꓯ ꓟ ꓔꓯ ꓬꓰ ꓥ ꓟꓲ ꓝꓴꓲ ꓟꓶ. ꓟ ꓥ ꓡꓳ꓿

ꓠꓲ, ꓠꓵ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓟꓬ ꓠꓬꓲ ꓢꓷ. ꓟ ꓠꓬ ꓪꓴ‐ꓢ ꓡꓰ ꓕꓽ ꓬꓰ ꓪꓴ‐ꓢ ꓙꓵꓽ ꓗ 10 ꓙꓵ ꓪꓴ‐ꓢ ꓡꓰ ꓕꓽ ꓬꓰ ꓐꓯ_ ꓟ ꓔꓯ ꓡꓰ ꓛꓳ ꓫꓱꓽ ꓔꓬ ꓡ꓾ ꓕꓱ ꓟ ꓡꓰ ꓐꓰ ꓪꓴꓽ ꓟ ꓝꓴꓲ ꓥ ꓟꓲ ꓙꓳ_ ꓡꓳ꓿ꓕꓱ ꓟ ꓠꓬ ꓣꓳ ꓬꓰ ꓠ ꓔ ꓟ ꓕꓯ ꓪꓴ‐ꓢ ꓡꓰ ꓣꓳ ꓔꓯ ꓬꓰ ꓝꓲ ꓠꓲ, ꓫꓵ_ ꓟ ꓔꓯ ꓣꓳ ꓬꓰ ꓪ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓔꓯ ꓝꓴꓲ ꓗꓪ ꓐꓰ ꓡꓲ, ꓗꓷ ꓐ ꓡ ꓟ ꓐꓰ ꓝꓴꓲ ꓔꓯ ꓣꓳ ꓟꓽ ꓬꓰ ꓠ ꓟ ꓐꓱ ꓶ ꓣꓳ ꓔꓯ ꓟ. ꓖꓶ ꓔꓬ ꓟ ꓥ ꓡꓳ꓿