Plastic ꓣꓱ ꓟ ꓑꓶ. ꓓꓴ ꓟꓲ ꓠꓯ ꓔꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓟ ꓚꓱ, (Plastic pollution)ꓫ
ꓧꓪ. ꓧꓪ ꓠꓬꓲ. ꓠꓬꓲ ꓣꓳ ꓓꓳ ꓗꓷ ꓟ ꓬꓲꓻ ꓙꓬ ꓐꓴ ꓠꓬ ꓣꓳ ꓕꓲ ꓒ ꓤ ꓓꓳ ꓗꓷ ꓢꓲ ꓠꓬꓲ ꓡꓳ ꓗꓷ ꓥ ꓟꓲ ꓟꓲ ꓠꓯ ꓕꓯ ꓢꓲ ꓠꓬꓲ ꓟꓽ ꓛꓵꓽ ꓟꓽ ꓐꓬ ꓡꓰ (400) ꓘꓳꓼ ꓛꓲ ꓙꓳ ꓟ ꓔꓯ ꓣꓳ ꓓꓵ ꓙ ꓧꓪ ꓛꓲ ꓠꓬꓲ ꓡ? ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓑꓡꓮꓢꓔꓲꓚ ꓑꓳꓡꓡꓴꓔꓲꓳꓠ ꓐꓯ ꓟ ꓑꓡꓮꓢꓔꓲꓚ ꓣꓱ ꓟ ꓑꓶ. ꓓꓴ ꓟꓲ ꓠꓯ ꓟꓽ ꓢꓲꓽ ꓟꓽ ꓫꓬ ꓗꓷ ꓡꓰ ꓚꓱ, ꓔꓯꓐꓯ ꓟ. ꓖꓶ ꓓꓴ ꓥ ꓡꓳ꓿
ꓮ ꓟꓶ ꓟ ꓙꓵ, ꓗꓪ ꓑꓡꓮꓢꓔꓲꓚ ꓣꓱ ꓟ ꓑꓶ. ꓓꓴ ꓟꓲ ꓠꓯ ꓔꓯ ꓟꓽ ꓢꓲ ꓫꓬ ꓡꓰ ꓝꓲˍ ꓟ ꓠꓬ ꓣꓳ ꓟꓲ ꓠꓯ ꓢꓲ ꓗꓪ ꓛꓲ ꓡ ꓟ ꓡꓰ ꓟꓽ ꓞꓲ ꓣꓳ ꓜ ꓔꓬ ꓟ ꓓꓳ ꓔꓬ ꓟ ꓜ ꓫꓵꓽ ꓓꓳ ꓫꓵꓽ ꓝꓮꓲ ꓣꓳ ꓢꓯꓼ ꓦꓻ ꓔꓬ ꓟ ꓟꓲ ꓠꓯ ꓗꓪ ꓛꓲ microꓑꓡꓮꓢꓔꓲꓚ ꓐꓯ ꓟ ꓐ ꓔꓬ ꓡꓳ ꓐꓰ ꓢꓷ. ꓠꓲ, ꓙꓳ ꓒ ꓐꓴ ꓡꓰ ꓐꓯ ꓔ ꓟꓥ ꓡꓳ꓿
ꓕꓱ ꓟ ꓠꓬ ꓣꓳ ꓔꓬ ꓟ ꓟꓵꓽ ꓗꓪ ꓫꓵꓽ ꓪꓴꓽ ꓡꓰ ꓟꓽ ꓛꓲ ꓡ ꓠ, ꓟ ꓦꓬꓼ ꓠꓬꓲ ꓗꓪ ꓣꓳ ꓤ ꓠꓱ ꓤ ꓐꓴ ꓐꓱ ꓶ ꓫꓵꓽ ꓪꓴꓽ ꓓꓽ ꓟ ꓕꓲ ꓟ ꓥ ꓡꓳ꓿
ꓡ ꓞꓳ ꓕꓲ ꓐꓱ ꓠꓬ ꓐꓯ ꓖꓴ ꓟ ꓙꓳ ꓟ ꓥ ꓡꓳ꓿ ꓥꓪ ꓕꓲ ꓣꓳ ꓡꓰ ꓑꓡꓮꓢꓔꓲꓚ ꓟꓽ ꓣꓱ ꓢꓲ ꓔꓬ ꓠꓬ ꓮ ꓫꓵꓽ ꓒꓬꓱꓼ ꓡ ꓓ ꓢꓲ꓾ ꓐꓰ ꓐꓯ ꓖꓴ ꓟ ꓙꓳ ꓟ ꓥꓡꓳ꓿ ꓙꓲ ꓟ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓕꓲ ꓣꓳ ꓔꓵꓼ ꓗꓪ ꓗꓪ ꓪꓴ. ꓕꓴ ꓠ, ꓟ ꓥ ꓡꓳ꓿
ꓣꓳ ꓣꓳ ꓡꓯ. ꓐꓴ ꓥ ꓟꓲ ꓑꓡꓮꓢꓔꓲꓚ ꓣꓱ ꓟ ꓔꓯ ꓤ ꓟꓳ ꓠ, ꓟ ꓣꓳ ꓬꓰ ꓐ ꓡ ꓟ ꓥꓡꓳ꓿ ꓑꓡꓮꓔꓲꓚ ꓔꓯ ꓟꓽ ꓣꓱ ꓟ ꓠꓬ ꓪꓴꓽ ꓟꓴ ꓡ ꓟ ꓟꓲ ꓠꓯ ꓤꓶꓻ ꓦꓬꓼ ꓠꓬꓲ ꓔꓯ ꓟꓽ ꓛꓳ ꓟꓽ ꓥ꓿ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱ ꓔꓬ ꓟ ꓑꓡꓮꓢꓔꓲꓚ ꓑꓶ. ꓓꓴ ꓬꓲꓻ ꓡꓳ ꓐꓱ ꓓꓽ ꓘꓴꓽ ꓗꓪ ꓔꓬ ꓟ ꓥꓪ ꓐꓰ ꓢꓯ. ꓫꓵꓽ ꓮ ꓟꓬ, ꓫꓵꓻ ꓡꓰ ꓟ ꓥ ꓡꓳ꓿
ꓝꓮꓲ ꓑꓡꓮꓢꓔꓲꓚ ꓑꓶ. ꓓꓴ ꓬꓲꓻ ꓙꓬ ꓙꓬ ꓚꓱ, ꓟꓽ ꓙꓲ ꓗꓷ ꓡꓰ ꓢꓲ ꓠꓬꓲ ꓬꓲꓻ ꓙꓬ ꓟꓶ ꓡ ꓓꓴ ꓙꓳ ꓡ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓟꓬꓱꓺ ꓬꓰ ꓠ, ꓟ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓠꓯ, ꓗꓪ ꓶꓻ ꓙꓳ ꓟ ꓥ ꓡꓳ꓿
ꓝꓮꓲ ꓑꓡꓮꓢꓔꓲꓚ ꓣꓱ ꓟ ꓔꓯ ꓠꓽ ꓗꓷ ꓠ, ꓟ ꓮ ꓡꓰ ꓐꓰ ꓟꓬꓱꓺ ꓬꓰ ꓠꓯ, ꓡ?
- ꓣꓰꓝꓴꓢꓰ ꓑꓡꓮꓢꓔꓲꓚꓰ ꓣꓱ ꓟꓽ ꓛꓲ ꓠꓬ ꓟꓽ ꓣꓱ ꓠ, ꓟ ꓫ. ꓕꓱ ꓓꓴ ꓬꓰ ꓡꓯ꓿
- ꓣꓰꓴꓢꓰ ꓐꓯ ꓟ ꓠꓬ ꓣꓳ ꓣꓱ ꓗꓷ ꓟ ꓔꓯ ꓮ ꓟꓬ, ꓧꓪ, ꓣꓱ ꓠ, ꓟ ꓐꓰ ꓚꓲ. ꓛꓬ ꓙꓲ ꓪꓴˍ ꓟ ꓙꓵ, ꓕꓯ ꓚꓲ. ꓛꓬ ꓶꓻ ꓤ ꓗꓷ ꓓꓴ ꓔꓯꓺ ꓙꓰ ꓠ, ꓟ ꓥ ꓡꓳ꓿
- ꓢꓷ. ꓠꓲ, ꓪ ꓠ, ꓟ ꓐꓱ ꓶ ꓛꓳ ꓒꓯ, ꓐꓴ ꓐꓰ ꓕꓲ ꓦꓲꓻ ꓡ ꓞꓳ ꓐꓴ ꓔꓯ ꓐꓯ ꓟ. ꓖꓶ ꓠ, ꓟ ꓢꓯꓼ ꓕꓵꓼ ꓡꓯ꓿
ꓛꓲ ꓡ ꓟ ꓦꓬꓼ ꓠꓬꓲ ꓠꓬ ꓞꓳ ꓡꓱ ꓞꓳ ꓡꓯ. ꓐꓴ ꓡꓯꓽ ꓒꓯ, ꓗꓪ ꓙꓳ ꓟ ꓥ ꓡꓳ꓿ ꓑꓡꓮꓢꓔꓲꓚ ꓡꓰ ꓐꓲ ꓔꓬ ꓟ ꓟꓲ ꓠꓯ ꓐꓰ ꓟꓵꓽ ꓘꓳꓼ ꓦꓬꓼ ꓠꓬꓲ ꓣꓳ ꓘꓳ, ꓣꓴ ꓠ, ꓟ ꓠꓲ, ꓫꓵˍ ꓡ?
ꓖꓳ ꓡꓱ ꓟꓽ ꓥ ꓠꓬ ꓙꓲ ꓟ ꓟꓵꓽ ꓘꓳꓼ ꓔꓯ ꓘꓳ, ꓣꓴ ꓪ ꓠ, ꓟ ꓐꓱ ꓶ ꓣꓳ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓡꓯ꓿ ꓠꓬꓲ. ꓠꓬꓲ ꓗꓪ ꓐꓰ ꓠꓴ ꓥꓪ ꓑꓡꓮꓢꓔꓲꓚ ꓣꓱ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓘꓳ, ꓣꓴ ꓪ ꓝꓲ꓿ ꓮ ꓙꓵꓽ ꓢꓴ ꓔꓯ ꓫ. ꓟꓳ ꓪ꓿
