ꓧꓪ. ꓧꓪ. ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ ꓢꓯ. ꓬꓲꓼ ꓡ ꓑꓮꓲꓽ ꓛꓲ ꓡꓺꓳ꓿ ꓖꓳ ꓡꓱ ꓠꓬꓲ ꓮ ꓙꓵꓽ ꓔꓯ Happy Easter ꓐꓯ ꓢꓲ ꓡꓯꓽ ꓒꓯ, ꓝ. ꓠꓲ, ꓫꓵˍ ꓡꓳ꓿ ꓢ. ꓠꓯ ꓵꓻ ꓠ, ꓟ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓟ. ꓟꓲꓽ ꓔꓯ ꓧꓶ. ꓕꓯ ꓠ ꓠ, ꓓꓴ ꓬꓰ ꓡꓯ꓿ (ꓬꓳ‐ꓦ 20ꓽ1‐10) ꓫꓵꓽ ꓠꓬꓲ ꓟ ꓬꓲ ꓪꓴ. ꓕꓲ ꓠꓬꓲ ꓠꓯꓼ ꓠꓯꓼ ꓠꓬꓲ ꓟꓽ ꓟꓳ ꓢꓰꓽ ꓕꓯ ꓡꓰ ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓠꓬ ꓡꓱꓼ ꓜꓴ ꓗꓪ ꓡ ꓢꓲ꓾ ꓡꓱꓼ ꓜꓴ ꓗꓪ ꓫꓱ ꓔ ꓟ ꓭ. ꓛꓲ ꓡꓱ. ꓒꓴ ꓞ, ꓟ ꓔꓯ ꓟꓳ ꓡꓰꓳ꓿

ꓖꓳ ꓡꓱ ꓠꓬꓲ ꓬꓲ ꓠꓬ ꓢꓲ‐ꓟꓴ ꓒꓲ‐ꓕꓱ ꓐꓰ ꓬꓰ‐ꓢꓴ ꓠꓲ, ꓠꓵˍ ꓟ ꓛꓳꓽ ꓒꓯ, ꓖꓳ ꓕꓲ ꓣꓳ ꓔꓬ ꓗꓪ ꓔꓷ, ꓙꓰ ꓢꓲ꓾ ꓢꓲ ꓒ ꓔꓯ ꓡꓱꓼ ꓜꓴ ꓗꓪ ꓐꓰ ꓢꓴ ꓡꓰ ꓔꓯ, ꓙꓰ ꓢꓲ ꓮ ꓡꓲ ꓗꓪ ꓗꓶ ꓔ ꓟ ꓥꓪ ꓠꓴꓽ ꓟꓽ ꓢꓷ.꓾ ꓐꓯˍ ꓡꓳ꓿ ꓖꓳ ꓡꓱ ꓠꓬꓲ ꓒꓲ‐ꓕꓱ ꓐꓰ ꓛꓳꓽ ꓒꓯ, ꓖꓳ ꓕꓲ ꓣꓳ ꓡꓱꓼ ꓜꓴ ꓗꓪ ꓔꓷ, ꓙꓰˍ ꓡꓳ꓿ ꓬꓲ ꓪ ꓠꓬꓲꓽ ꓣꓳ ꓕꓲ ꓛꓳˍ ꓐꓰ ꓔꓷ, ꓙꓰˍ ꓕꓯ ꓛꓳꓽ ꓒꓯ, ꓖꓳ ꓕꓲ ꓣꓳ ꓠꓬ ꓒꓲ‐ꓕꓱ ꓔꓯ ꓔꓷ, ꓧꓪ. ꓡꓰ ꓢꓲ ꓬꓲ ꓧꓶ. ꓕꓯ ꓡꓱꓼ ꓜꓴ ꓗꓪ ꓛꓲ ꓬꓰˍ ꓡꓳ꓿ ꓬꓲ ꓖꓳ ꓓꓱꓽ ꓗꓴ ꓢꓲ ꓠꓯ. ꓘꓪ ꓗꓪ ꓡꓳ. ꓠꓬꓲˍ ꓠꓬ ꓪꓰ ꓜꓲ ꓟꓶ ꓟꓳꓻ ꓕꓱ, ꓓꓴ ꓖꓳ ꓟ ꓓ, ꓟ ꓔꓯ ꓟꓳˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓠꓯ. ꓘꓪ ꓟꓽ ꓓꓵꓽ ꓡꓰ꓿

ꓢꓲ‐ꓟꓴ ꓒꓲ‐ꓕꓱ ꓠꓬ ꓬꓲ ꓗ ꓠꓯ. ꓢꓲ ꓗꓪ ꓛꓲ ꓡ ꓢꓲ ꓡꓱꓼ ꓜꓴ ꓗꓪ ꓓꓵꓽ ꓡꓰˍ ꓡꓳ꓿ ꓖꓳ ꓡꓱ ꓢꓲ ꓪꓰ ꓜꓲ ꓟꓶ ꓟꓳꓻ ꓕꓱ, ꓓꓴ ꓖꓳ ꓟ ꓓ, ꓟ ꓐꓰ ꓬꓰ‐ꓢꓴ ꓪꓴ. ꓓꓵ ꓗꓪ ꓡꓲ ꓖꓶ ꓗꓷ ꓟ ꓟꓶ ꓛ ꓠꓬ ꓪꓰ ꓜꓲ ꓟꓶ ꓟꓳꓻ ꓕꓱ, ꓓꓴ ꓐꓰ ꓕꓲ ꓪˍ ꓟꓽ ꓓ, ꓓ, ꓬꓲ ꓔꓱ, ꓬꓲ ꓕꓲ ꓔꓶ. ꓗꓪ ꓓꓱ ꓗꓶ ꓔ ꓟ ꓔꓯ ꓟꓳˍ ꓡꓳ꓿ ꓖꓳ ꓕꓯ ꓡꓱꓼ ꓜꓴ ꓗꓪ ꓬꓲ ꓪꓴ. ꓛꓲ ꓬꓰ ꓟ ꓛꓳꓽ ꓒꓯ, ꓖꓳ ꓕꓲ ꓣꓳ ꓓꓵꓽ ꓡꓰ ꓠꓬ ꓟꓳ ꓡꓰ ꓢꓲ ꓙꓵˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓠꓽ ꓫꓵˍ ꓗꓪ ꓐꓰ ꓢꓯ. ꓬꓲꓼ ꓡ ꓠ ꓗ, ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓳ ꓔ ꓟ ꓔꓯ ꓬꓲ ꓪ ꓟꓽ ꓙꓽ ꓜꓲꓼ ꓡꓰ꓿ ꓖꓳ ꓗ ꓠꓯ. ꓛꓳꓽ ꓒꓯ, ꓐꓴ ꓠꓬ ꓬꓲ ꓪ ꓔꓬ ꓖꓴ ꓦꓲ ꓗꓪ ꓬꓲꓼ ꓙꓰˍ ꓡꓳ꓿ ꓕꓱ ꓟ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓥ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟ. ꓟꓲꓽ ꓕꓱ ꓟ ꓗꓪ ꓣꓳ ꓡꓳ. ꓠꓬꓲˍ ꓕꓯ ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓠꓬ ꓬꓲ ꓧꓶ. ꓕꓯ ꓡꓱꓼ ꓜꓴ ꓗꓪ ꓙꓰˍ ꓡꓳ꓿ ꓖꓳ ꓗꓪ ꓙꓰ ꓗꓷ ꓕꓯ ꓡꓱꓼ ꓜꓴ ꓔꓯ ꓫꓱ ꓔ ꓟ ꓭ. ꓛꓲ ꓒꓴ ꓓ, ꓟ ꓟꓳˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓛꓳꓽ ꓒꓯ, ꓒꓲ‐ꓕꓱ ꓐꓰ ꓬꓳ‐ꓦ ꓔꓯ ꓐꓯ ꓖꓶˍ ꓡꓳ꓿ ꓒꓲ‐ꓕꓱ ꓐꓰ ꓬꓳ‐ꓦ ꓥˍ ꓟꓲ ꓡꓱꓼ ꓜꓴ ꓗꓪ ꓔꓷ, ꓙꓰˍ ꓡꓳ꓿ ꓬꓲ ꓪ ꓔꓷ, ꓙꓰˍ ꓟ ꓬꓲ. ꓬꓲ ꓢꓲ ꓠꓬ ꓢꓲ ꓒ ꓔꓯ ꓬꓲ ꓪ ꓧꓪˍ ꓟ ꓬꓲ ꓪ ꓟꓳ ꓠꓲ, ꓫꓵˍ ꓟ ꓠꓲ, ꓟ ꓔꓯ ꓟꓳ. ꓖꓶ ꓔꓬ ꓡꓳ꓿

ꓣꓳ ꓚꓳ ꓡꓳ ꓗꓪ ꓞꓳ ꓟꓳꓽ ꓠꓬꓲꓽ ꓣꓳ ꓔꓷ, ꓔꓬ ꓟ ꓠꓴ ꓓꓵꓽ ꓙꓽ ꓠꓬꓲ꓿ ꓮꓽ ꓔꓳ ꓔꓳ ꓔꓷ, ꓔꓬ ꓟ ꓟꓽ ꓙꓳ꓿ ꓬꓲ ꓪ ꓠꓬ ꓢꓯꓼ ꓕꓵꓼ ꓢꓲ ꓔꓷ, ꓔꓬ ꓡꓳ꓿ ꓬꓲ ꓪ ꓫ. ꓔꓳ ꓟꓽ ꓘꓴ꓿ ꓮ ꓡꓲ ꓗ, ꓠꓬꓲ ꓥ ꓡ ꓐꓯˍ ꓠꓬ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓟꓳ ꓠꓲ, ꓫꓵˍ ꓟ ꓡꓰꓽ ꓢꓷ.ˍ ꓡꓳ꓿ ꓖꓳ ꓡꓱ ꓠꓬꓲ ꓡꓱꓼ ꓜꓴ ꓗꓪ ꓛꓲ ꓬꓰˍ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓖꓳ ꓗꓪ ꓟꓽ ꓔꓬ꓿

ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓡꓱꓼ ꓜꓴ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓧꓪ ꓔꓬ ꓟ ꓡꓰ ꓐꓰ ꓣꓳ ꓤꓶꓻ ꓗꓪ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓡꓱꓼ ꓜꓴ ꓗꓪ ꓧꓪ ꓙꓰ ꓗꓴ.ˍ ꓡꓳ꓿ ꓡꓱꓼ ꓜꓴ ꓐꓯˍ ꓟ ꓠꓬ ꓪꓳꓽ ꓔꓳ ꓛꓵꓽ ꓓ, ꓟ꓾ ꓞꓳ ꓤ ꓬꓲ ꓛꓵꓽ ꓓ, ꓟ꓾ ꓡꓱꓼ ꓜꓴ ꓐꓯˍ ꓟ ꓠꓬ ꓠꓲ, ꓫ. ꓓꓴ ꓠꓲ, ꓥꓴ ꓓꓴ ꓕꓱ ꓡꓱ ꓫꓵꓽˍ ꓡꓰꓽ ꓓ, ꓟ ꓬꓲ ꓔꓶ. ꓕꓲ ꓔꓶ. ꓥ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓕꓲ ꓖ ꓕꓲ ꓧꓪ, ꓠꓬꓲ. ꓠꓬꓲ ꓝꓲ ꓓꓴ ꓐꓴ ꓫꓱ. ꓫꓱ.ˍ ꓡꓰꓽ ꓖꓳ ꓗꓪ ꓧꓪ ꓬꓰ ꓗꓴ.ˍ ꓡꓳ꓿ ꓣꓳ ꓠꓯꓸꓼ ꓗꓪ ꓐꓰ ꓥ ꓠꓬ꓾ ꓥꓳ ꓡꓳ. ꓓꓴ ꓟꓽ ꓙꓳ ꓟ ꓠꓯꓸꓼ ꓘꓴꓽ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓧꓪ ꓗꓴ.ˍ ꓡꓳ꓿ ꓠꓬꓲ. ꓠꓬꓲ ꓗ, ꓛꓲꓽ ꓓꓴ ꓓꓳꓽ ꓕꓲ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓡꓱꓼ ꓜꓴ ꓗꓪ ꓟꓽ ꓔꓬꓳ꓿ ꓬꓲ ꓠꓬ ꓡꓱꓼ ꓜꓴ ꓗ ꓘꓶꓽ ꓗꓪ ꓫꓱ ꓔ ꓟ ꓭ. ꓛꓲ ꓔꓯ ꓒꓴ ꓦ ꓗꓷꓳ꓿ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡˍ ꓟ ꓬꓲ ꓔꓶ ꓙꓱꓼ ꓠꓬ ꓕꓱ ꓟ ꓥ ꓡꓳ꓿

ꓠꓬꓲ. ꓠꓬꓲ ꓠꓴ ꓥꓪ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓛꓵꓽ ꓓ, ꓟ ꓮ ꓙꓵꓽ ꓔꓯ ꓢꓲ ꓒ ꓬꓰ‐ꓢꓴ ꓬꓲ ꓒꓴ ꓖꓶ ꓘꓴˍ ꓡꓳ꓿ ꓡꓱꓼ ꓜꓴ ꓗꓪ ꓫꓱ ꓔˍ ꓟ ꓭ. ꓛꓲ ꓔꓯ ꓒꓴ ꓗꓷˍ ꓟ ꓡꓰ ꓐꓰ ꓠꓬꓲ. ꓠꓬꓲ ꓠꓴ ꓥꓪ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓛꓵꓽ ꓓ, ꓟ꓾ ꓣꓱꓽ ꓛꓰꓽ ꓔꓯ ꓛꓵꓽ ꓓ, ꓟ꓾ ꓝꓴꓲ. ꓥ ꓠꓬ ꓠꓲ, ꓫ. ꓓꓴ ꓠꓲ, ꓥꓴ ꓓꓴ꓾ ꓟꓬ ꓐꓲ ꓞꓰ ꓓꓴ ꓮ ꓙꓵꓽ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓫꓴ, ꓣꓴ ꓖꓶ ꓗꓷꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓧꓮꓑꓑꓬ ꓰꓮꓢꓔꓰꓣ ꓐꓯˍ ꓟ ꓕꓱ ꓟ ꓔꓯ ꓐꓯˍ ꓡꓳ꓿ ꓗ, ꓛꓲꓽ ꓠꓬꓲ ꓠꓲ, ꓒꓴ ꓠꓬꓲ ꓬꓰ ꓡꓯ꓿ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓠꓴ ꓐꓰ ꓥꓪ ꓐꓱ ꓶ ꓢꓯ. ꓬꓲꓼ ꓡꓺꓳ꓿ ꓬꓲ ꓕꓲ ꓣꓳˍ ꓡꓰꓽ ꓫꓵꓻ ꓓꓴꓽ ꓗ ꓘꓶ ꓔꓯ ꓒꓴ ꓗꓷ ꓢꓴ ꓥ ꓡꓳ꓿

ꓝꓮꓲ ꓠꓬꓲ. ꓠꓬꓲ ꓬꓲ ꓝꓲ ꓓꓴ ꓐꓴ ꓐꓰ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓫꓵꓻ ꓢꓴ ꓠꓬꓲꓽ ꓗꓴ. ꓚꓸꓼ ꓗꓪ ꓧꓪ ꓬꓰˍ ꓟ ꓡꓰꓽ ꓟꓽ ꓞꓲ ꓖꓳ ꓟ ꓕꓯꓽ ꓢꓲ ꓗꓪ ꓬꓲ ꓟꓳꓻ ꓟꓽ ꓘꓴ꓿ ꓬꓲ ꓠꓲ, ꓫ. ꓟꓬ ꓫˍ ꓟ ꓡꓰꓽ ꓢꓷ.ˍ ꓡꓳ꓿ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓟꓽ ꓔꓬ ꓟ ꓡꓰꓽ ꓢꓷ.ˍ ꓡꓳ꓿ ꓖꓳ ꓡꓱ ꓥ ꓟꓲ ꓕꓱ ꓟ ꓠꓬ ꓶꓼ ꓓꓳꓽ ꓫꓱ, ꓓꓳꓽ ꓒꓬꓱꓼ ꓡˍ ꓟ ꓬꓲ ꓟꓽ ꓢꓷ.꓿ ꓡꓱꓼ ꓜꓴ ꓗꓪ ꓢꓲ ꓒ ꓬꓰ‐ꓢꓴ ꓟꓽ ꓔꓬ ꓟ ꓑꓶ. ꓓꓴ ꓠꓲ, ꓟ ꓫ. ꓠ, ꓟ ꓡꓰꓽ ꓬꓲ ꓢꓷ.ˍ ꓡꓳ꓿ ꓚꓵ ꓚꓵ ꓥꓳ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓡꓱꓼ ꓜꓴ ꓠꓯꓸꓼ ꓗꓪ ꓟꓽ ꓔꓬ ꓟ ꓑꓶ. ꓓꓴ ꓗ, ꓛꓲꓽ ꓠ ꓔˍ ꓡꓳ꓿ ꓮ ꓡꓲꓳ ꓐꓯˍ ꓠꓬ ꓬꓲ ꓠꓬ ꓢꓯ. ꓬꓲꓼ ꓙꓰ ꓟ ꓥ ꓡꓳ꓿ ꓔꓯꓺ ꓥꓳꓽ ꓢꓲ ꓒ ꓬꓰ‐ꓢꓴ ꓡꓱꓼ ꓜꓴ ꓘꓴꓽ ꓗꓪ ꓔꓬ ꓢꓰꓽ ꓠꓬ ꓪ ꓜꓲ ꓠꓲ, ꓟ ꓫ. ꓓꓴ ꓟꓽ ꓥ ꓡ꓿

ꓖꓳ ꓡꓱ ꓠꓬꓲ ꓣꓳ ꓤꓶꓻ ꓗꓪ ꓥˍ ꓟꓲ ꓕꓲ ꓖ ꓕꓲ ꓧꓪ, ꓣꓳ ꓠꓬ ꓠꓲ, ꓟ ꓫ. ꓓꓴ ꓥ ꓐꓰ ꓓꓵꓽ ꓙꓽ ꓔˍ ꓟ ꓫꓵꓽ ꓪꓴ ꓕꓲ ꓫꓵꓽ꓾ ꓣꓳ ꓤꓶꓻ ꓗꓪ ꓕꓱ ꓟ ꓠꓬ ꓠ ꓖꓼ ꓟꓽ ꓧ꓾ ꓕꓱ ꓟ ꓠꓬ ꓟꓽ ꓙꓲ ꓔꓷꓼ ꓡꓰꓳ ꓐꓰ ꓐꓯ ꓢꓲ ꓠꓬꓲ ꓠꓲ, ꓥꓴ ꓓꓴ ꓕꓲ ꓫꓵꓽ ꓓꓳ ꓡ ꓔꓯ ꓣꓳ ꓠꓬ ꓠꓲ, ꓟ ꓫ. ꓗꓴ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓖꓳ ꓟ ꓒꓬꓱꓼ ꓗꓳ. ꓙꓰ ꓠꓬ ꓮ ꓘꓶ. ꓙꓲˍ ꓟ꓾ ꓮ ꓘꓶ. ꓐꓲˍ ꓟ ꓣꓳ ꓪ ꓡꓰ ꓗꓴ.ˍ ꓡꓳ꓿ ꓕꓱ ꓟ ꓠꓬ ꓣꓳ ꓐꓱ ꓶ ꓰꓮꓢꓔꓰꓣ ꓟꓰꓢꓢꓮꓖꓰ ꓐꓰ ꓐꓯˍ ꓟ ꓢꓯ. ꓬꓲꓼ ꓡ ꓑꓮꓲꓽ ꓬꓲ ꓓꓳꓽ ꓕꓲ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓡꓱꓼ ꓜꓴ ꓗꓪ ꓢꓲ ꓒ ꓬꓰ‐ꓢꓴ ꓟꓽ ꓔꓬ ꓟ ꓑꓶ. ꓓꓴ ꓠꓲ, ꓫ. ꓔꓬ ꓟ ꓡꓰ ꓐꓰ ꓣꓳ ꓠꓬ ꓫ. ꓗꓴ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓡꓱꓼ ꓜꓴ ꓘꓴꓽ ꓗꓪ ꓟꓽ ꓔꓬ ꓟ ꓑꓶ. ꓓꓴ ꓗ, ꓛꓲꓽ ꓓꓴ ꓥ ꓟ ꓬꓲ ꓪ ꓚꓬ, ꓟꓽ ꓪ꓿ ꓣꓳ ꓤꓶꓻ ꓗꓪ ꓥˍ ꓟꓲ ꓣꓳ ꓠꓬ ꓕꓲ ꓖ ꓕꓲ ꓧꓪ, ꓟꓽ ꓙꓲ ꓟꓽ ꓧ ꓐꓯ ꓔ ꓥ ꓟꓲ ꓖꓳ ꓟ ꓕꓯꓽ ꓢꓲ ꓗꓪ ꓣꓳ ꓘꓳ ꓙ ꓙꓰˍ ꓕꓯ ꓮ ꓘꓶ. ꓗ, ꓛꓲꓽˍ ꓟ ꓬꓲ ꓔꓶ. ꓕꓲ ꓔꓶ. ꓓꓳ ꓡ ꓟ ꓣꓳ ꓙꓵꓻ ꓠ ꓗ, ꓡꓳ꓿ ꓖꓳ ꓟ ꓠꓬ ꓠꓬꓲ. ꓠꓬꓲ ꓠꓴ ꓥꓪ ꓐꓱ ꓶ ꓥꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓠꓬ ꓮ ꓡꓲ ꓫꓵꓽ ꓠꓲ, ꓟ ꓫ. ꓔꓬ ꓥ ꓟꓲ ꓠꓴ ꓔꓬ ꓟ ꓡꓱꓼ ꓜꓴ ꓔꓯ ꓬꓲ ꓒꓴ ꓐ ꓡˍ ꓡꓳ ꓐꓯˍ ꓟ ꓔꓯ ꓙꓵꓻ ꓢꓲ ꓠꓬꓲ ꓢꓯ. ꓬꓲꓼ ꓡ ꓟ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓪꓳ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓛꓳˍ ꓙꓰ ꓡꓯ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡꓺꓳ꓿ ꓬꓲ ꓔꓯ ꓠꓬ ꓮꓽ ꓟ ꓥˍ ꓟꓲ ꓗꓽ ꓕ. ꓟꓽ ꓐ ꓡꓺꓳ꓿ ꓬꓲ ꓠꓬ ꓠꓬꓲ. ꓠꓬꓲ ꓠꓴ ꓐꓰ ꓥꓪ ꓕꓲ ꓛꓳˍ ꓔꓬ ꓢꓲ ꓠꓬꓲ ꓮ ꓕꓯ ꓥ ꓟꓲ ꓣꓳ ꓐꓰ ꓕꓲ ꓪˍ ꓞꓳ ꓙꓳ ꓔꓬ ꓡꓳ꓿ ꓢꓯꓼ ꓙꓳ ꓪꓽ ꓠꓬꓲ ꓠꓬꓲ ꓡꓰꓽ ꓢꓯꓼ ꓕꓵꓼ ꓙꓰ ꓡꓯ꓿ ꓡꓯꓼ ꓙꓴ ꓙꓳ ꓙꓳ ꓡꓰꓽ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓪˍ ꓞꓳ ꓙꓳ ꓙꓰ ꓡꓯ꓿