ꓟꓲ‐ꓚꓲ‐ꓠ ꓢꓽ‐ꓢꓶ ꓟꓲ‐ꓚꓲ‐ꓠ ꓡꓳ ꓒꓱ꓾ ꓮꓴꓠꓖ‐ꓠꓮꓠ ꓙꓲꓻ ꓫꓬ ꓢꓴ ꓚꓳꓡꓴꓟꓐꓮꓠ ꓪꓽ ꓘꓴ ꓦꓲ ꓗꓪ 4 ꓦ 2 ꓠꓬꓲ 2026 ꓘꓳꓼ꓾ ꓠꓽ ꓡꓲ. ꓠꓬꓲ ꓕꓯ ꓛꓲ ꓒꓯ, ꓞꓲꓽˍ ꓟ ꓐꓰ ꓢꓲꓽ ꓫꓬ ꓑ ꓑ ꓚꓰꓼˍ ꓟ ꓑꓮꓲꓽ ꓔꓯ ꓟꓶꓽ ꓘꓶ 5ꓽ00 ꓙꓵ, ꓕꓯ ꓬꓰ ꓗꓷꓳ꓿
ꓑꓮꓲ ꓟꓲ‐ꓢ ꓕꓱ ꓟ ꓔꓯ ꓟꓲ‐ꓚꓲ‐ꓠ ꓔꓲꓺ ꓒ ꓓꓽ ꓙꓳꓧꓠ ꓡꓮ ꓢꓮꓟ ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓬꓰ ꓗꓷ ꓟ ꓥ ꓡꓳ꓿
ꓔꓲꓺ ꓒ ꓓꓽ ꓡꓰ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓗꓪ꓾ “ꓠꓬꓲ. ꓠꓬꓲ ꓑꓮꓲ ꓕꓱ ꓟ ꓔꓯ ꓬꓰˍ ꓟ ꓗꓪ ꓐꓰ ꓣꓳ ꓔꓯ 3 ꓫꓵꓽ ꓢꓷ. ꓡꓰ ꓝꓲˍ ꓡꓳ꓿ ꓬꓲ ꓪꓴ. ꓕꓲ ꓫꓵꓽ ꓟ ꓠꓬ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓢꓲ ꓒ ꓬꓰ‐ꓢꓴ ꓚꓰꓼ ꓔˍ ꓟ ꓥ ꓡꓳ꓾ ꓐꓯˍ ꓟ ꓔꓯ ꓓꓵꓽ ꓙꓽ ꓟꓶ ꓡꓰ ꓝꓲˍ ꓡꓳ꓿ ꓝꓮꓲ ꓕꓲ ꓫꓵꓽ ꓠꓬ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓚꓰꓼˍ ꓟ ꓔꓲꓺ ꓒ ꓐꓯˍ ꓟ ꓔꓲꓺ ꓒ ꓤꓶꓻ ꓔꓯ ꓓꓵꓽ ꓙ ꓟꓶ ꓡꓰ ꓝꓲˍ ꓡꓳ꓿ ꓡꓳ, ꓬꓰˍ ꓕꓲ ꓫꓵꓽ ꓟ ꓠꓬ ꓔꓲꓺ ꓒ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓣꓱꓽ ꓙˍ ꓟ꓾ ꓙꓽ ꓣꓳˍ ꓟ ꓐꓰ ꓠ ꓡꓳ.ˍ ꓟ ꓕꓱ 3 ꓙꓰꓽ ꓗꓪ ꓐꓰ ꓢꓲ ꓒ ꓬꓲ ꓟꓬꓱꓽ ꓔꓯ ꓬꓰ ꓔꓬ ꓡꓳ꓾ ꓐꓯˍ ꓟ ꓔꓯ ꓓꓵꓽ ꓙꓽ ꓟꓶ ꓡꓰ ꓝꓲˍ ꓡꓳ꓿” ꓐꓰ ꓐꓯˍ ꓡꓳ꓿
ꓔꓲꓺ ꓒ ꓓꓽ ꓠꓬ ꓘꓴ ꓜꓲꓼ ꓞꓳ ꓢꓲ ꓤ 12 ꓣꓳ ꓬꓲ ꓪ ꓛꓲ ꓒꓯ, ꓔꓯ ꓞꓲꓽ ꓗꓷ ꓢꓲ꓾ ꓬꓲꓻ ꓙꓬ ꓫꓵ, ꓖꓶ꓾ ꓐꓳꓼ ꓖꓶ꓾ ꓬꓰˍ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ 12 ꓣꓳ ꓔꓯ ꓬꓰ ꓖꓶ ꓗꓷ ꓟ ꓬꓲ ꓔꓯꓺ ꓐꓬꓱꓽ ꓥ ꓡꓳ꓿
ꓛꓲꓽ ꓒꓯ, ꓞꓲꓽˍ ꓟ꓾ ꓢꓲꓽ ꓫꓬ ꓖꓳ ꓓꓱꓽ ꓚꓰꓼˍ ꓟ ꓬꓰ ꓓꓳ ꓡꓰ ꓗ ꓠꓯ. ꓢꓲꓽ ꓫꓬ ꓖꓳꓽ ꓓꓱꓽ ꓔꓯ ꓒꓵꓽ ꓗ ꓬꓰ ꓪꓴ. ꓓꓵ ꓕꓱꓽˍ ꓟ ꓗꓪ ꓐꓰ ꓑꓮꓲ ꓕꓱ ꓟ ꓔꓯ ꓬꓲ ꓟꓶꓽ ꓢꓰꓼ ꓗꓷꓳ꓿
