ꓢꓲꓺ ꓒ ꓬꓰ‐ꓢꓴ ꓔꓯ ꓘ‐ꓡꓲꓳ ꓬꓴ‐ꓔ ꓡꓰ ꓪꓴꓽ ꓗꓷ ꓟ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ ꓠꓬ ꓢꓲꓽ ꓫꓬ ꓟ ꓠꓽ ꓢꓽ ꓠꓬꓲ ꓥ ꓢꓲ ꓠꓬꓲ ꓛꓲ ꓡ ꓟ ꓠꓽ ꓛꓳꓼ ꓠꓬꓲ ꓠꓬ ꓢꓯꓼ ꓬꓯꓼ ꓡ ꓑꓮꓲꓽ ꓓꓽ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 26ꓽ14‐25 ꓝꓲ. ꓗꓪ ꓠꓬ ꓘ‐ꓡꓲꓳ ꓬꓴ‐ꓔ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴꓽ ꓜ ꓗꓷ ꓟ ꓢꓲꓽ ꓫꓬ ꓕꓳ ꓶ ꓥ ꓡꓳ꓿
ꓢꓲꓽ ꓫꓬ ꓕˍ ꓡ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴꓽ ꓒ ꓟ. ꓐꓰ ꓢꓲꓺ ꓒ ꓬꓰ‐ꓢꓴ ꓬꓲ ꓟꓶ ꓟꓶꓼ ꓘꓶꓼ ꓜ ꓜ ꓑꓮꓲꓽ ꓬꓰ ꓟ ꓚꓱ, ꓔꓯ ꓡꓳ. ꓟꓳ ꓓꓽ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓣꓳ ꓐꓱ ꓶ ꓫꓵꓻ ꓙ ꓗꓷ ꓟ ꓙ ꓖꓴ ꓠꓬ ꓮ ꓘꓶ. ꓛꓲ ꓠꓲ, ꓟ ꓟꓽ ꓢ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓘꓴꓽ ꓗꓪ ꓐꓰ ꓬꓲ ꓮ ꓘꓶ. ꓠꓲ, ꓟ ꓝꓲ ꓓꓴ ꓕꓲ ꓣꓳ ꓡꓰ ꓬꓲ ꓔꓯ ꓪꓴꓽ ꓜ ꓗꓷ ꓟ ꓔꓯ ꓢꓷ. ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓐ, ꓐ ꓪꓴ‐ꓢ ꓔꓯ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓠ ꓡꓳ ꓗꓷ ꓥ ꓟ ꓡꓳ꓿
ꓘ‐ꓡꓲꓳ ꓒ ꓬꓴ‐ꓔ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴꓽ ꓜ ꓗꓷ ꓟ ꓐꓰ ꓣꓳ ꓤꓶꓻ ꓠꓯ, ꓗꓪ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓘ‐ꓡꓲꓳ ꓒꓽ ꓬꓴ‐ꓔ ꓠꓬ ꓢꓲꓺ ꓒ ꓬꓰ‐ꓢꓴ ꓐꓰ ꓢꓽ ꓘꓳꓼ ꓕꓲ ꓪ ꓔꓬ ꓔꓬ ꓜ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓪꓴ‐ꓢ ꓐꓯ ꓘꓶꓽ ꓔꓯ ꓢꓳꓻ ꓣꓴ ꓟꓶ ꓡꓰ ꓢꓴ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓕꓲ ꓣꓳ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓬꓲ ꓠꓬ ꓟꓲ ꓠꓯ ꓗꓪ ꓢꓽ ꓢꓽ ꓔꓬ ꓠꓲ, ꓫꓵˍ ꓟꓲ ꓠꓯ ꓤ ꓠꓬꓲ ꓫꓵꓽ ꓠꓬꓲ ꓓꓴ ꓔꓳ, ꓜꓳ ꓗꓷ ꓢꓲ ꓠꓬꓲ ꓒꓴ ꓫꓵˍ ꓔꓯ ꓡꓰ ꓡꓳ. ꓟꓳ ꓗꓷ ꓟ ꓑꓶ. ꓓꓴ ꓬꓲ ꓟ. ꓒ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓽ ꓘ ꓟ. ꓒ ꓐꓴ ꓔꓯ ꓪꓴꓽ ꓜ ꓗꓷ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓤꓶꓻ ꓠꓯ, ꓗꓪ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓟꓬꓱꓺ ꓣꓴ ꓔ ꓢꓴ ꓐꓴ ꓥ ꓟꓲ ꓪꓴ‐ꓢ ꓟꓬꓱꓽ ꓗꓪ ꓟꓲ ꓠꓯ ꓒꓴ ꓫꓵ ꓔꓯ ꓡꓰ ꓡꓳ. ꓟꓳ ꓢꓴ ꓐꓴ ꓒꓬꓱꓼ ꓔꓬ ꓡ ꓚꓲ. ꓛꓬ ꓚꓱ, ꓔꓯ ꓓꓵꓽ ꓙ ꓫꓪ ꓠꓬꓲ ꓓꓴ ꓬꓰ ꓡꓯ꓿ ꓣꓳ ꓠꓬ ꓢꓲꓺ ꓒ ꓡꓰ ꓟ. ꓖꓶ ꓔ ꓟ ꓚꓱ, ꓔꓯ ꓧ, ꓡꓰ ꓟ ꓧꓶ. ꓡꓰ ꓢꓴ ꓒꓬꓰꓼ ꓔꓬ ꓡ?
ꓝꓴꓲ ꓠꓬ ꓞꓼ ꓞꓼ ꓛꓲ ꓡ ꓟ ꓟꓽ ꓥ ꓣꓳ ꓠꓲ, ꓟ ꓗꓪ ꓮ ꓤ ꓤ ꓬꓲ ꓔꓶ. ꓣꓴ ꓡ ꓟ ꓔꓯ ꓘ‐ꓡꓲꓳ ꓬꓴ‐ꓔ ꓚꓱ, ꓗꓪ ꓐꓰ ꓣꓳ ꓡꓳ. ꓟꓳ ꓟ ꓥ ꓡꓳ꓿
ꓦꓲ‐ꓘꓳ‐ꓑꓮꓲ ꓬꓰ ꓟ
ꓢꓲꓺ ꓒ ꓬꓰ‐ꓢꓴ ꓠꓬ ꓦꓲꓼ ꓘꓳꓼ ꓑꓮꓲꓽ ꓬꓰ ꓠ, ꓟ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓖꓶ ꓟ ꓙꓵ, ꓕꓯ ꓬꓲ ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓟ. ꓖꓶ ꓡ ꓟ ꓚꓱ, ꓔꓯ ꓙ ꓣꓳ ꓟ ꓠꓲ, ꓟ ꓗꓪ ꓐꓰ ꓛꓳꓽ ꓢꓲ ꓠꓬꓲ ꓬꓰ ꓗꓷ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓠꓬꓲ. ꓠꓬꓲ ꓣꓳ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓟꓶ ꓟꓶꓼ ꓘꓶꓼ ꓜ ꓜ ꓑꓮꓲꓽ ꓥ ꓟ ꓟꓲ‐ꓢ ꓔꓶ. ꓓꓴ ꓔꓯ ꓣꓳ ꓔꓯ ꓖꓶ ꓔ ꓟ ꓥ ꓡꓳ꓿ ꓟꓲ‐ꓢ ꓔꓶ ꓙꓵ, ꓗꓪ ꓠꓬ ꓔꓲꓺ ꓒ ꓐꓴ ꓡꓰ ꓶꓻ ꓥꓳꓽ ꓙꓱ ꓖꓶ ꓗꓷ ꓠꓬ ꓙꓱꓼ ꓡꓱꓼ ꓙꓵꓽ ꓐꓰ ꓑ, ꓑ ꓠꓬ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓼ ꓒꓬꓱꓼ ꓡ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓟꓲ‐ꓢꓲ ꓔꓶ. ꓟ ꓙꓵ, ꓗꓪ ꓒ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓐꓴ ꓡꓰ ꓐꓰ ꓣꓳ ꓠꓲ, ꓟ ꓔꓯ ꓙ ꓖꓶ ꓔ ꓢꓲ ꓠꓬꓲ ꓢꓲꓺ ꓒ ꓜꓽ ꓜ ꓑꓮꓲꓽ ꓗꓪ ꓐ ꓠ, ꓟ ꓟꓲ‐ꓢ ꓔꓶ. ꓟ ꓗꓪ ꓐ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓘ‐ꓡꓲꓳ ꓒ ꓬꓴ‐ꓔ ꓔꓯ ꓠꓲ, ꓟ ꓡꓶ.ꓠ, ꓟ ꓐꓱ ꓶ ꓬꓲ ꓙꓵ, ꓖꓶ ꓟ
ꓠꓴ ꓪ ꓔꓯ ꓥꓪ ꓔꓱ, ꓔꓱ, ꓐꓯ ꓖꓶ ꓠꓬꓲ꓾ ꓠꓴ ꓪ ꓗꓪ ꓟ ꓕꓲ ꓣꓳ ꓡꓰ ꓥꓪ ꓔꓯ ꓪꓴꓽ ꓜꓽ ꓗꓷˍ ꓥꓳ꓾ ꓐꓯ ꓖꓶ ꓡꓳ꓿ ꓖꓳ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓝꓲ ꓓꓲ ꓐꓴ ꓮ ꓡꓲ ꓕꓲ ꓣꓳ ꓡꓰ ꓬꓲ ꓔꓯ ꓪꓴꓽ ꓜ ꓗꓷ ꓟ ꓟꓬꓱꓽ ꓔꓯ ꓟꓽ ꓐꓯ꓾ ꓖꓳ ꓟ ꓔꓯ ꓬꓲ ꓔꓯ ꓪꓴꓽ ꓜ ꓗꓷ ꓢꓴ ꓔꓯ ꓓꓵꓽ ꓙ ꓧꓪ ꓛꓲ ꓢꓲ ꓠꓬꓲ ꓝꓴꓲ ꓬꓰ ꓟ ꓗꓪ ꓐꓰ ꓠꓲ, ꓟ ꓡꓶ. ꓡ ꓒꓳ, ꓡꓲ ꓡ ꓠ, ꓟ ꓬꓲ ꓙꓵ, ꓖꓶ ꓟ ꓥ ꓡꓳ꓿
ꓪꓴ‐ꓢ ꓠꓬ ꓠꓴ ꓥꓪ ꓔꓯ ꓝꓴꓲ ꓬꓰ ꓔꓬ ꓟ ꓔꓯ ꓢꓷ. ꓥ ꓟꓲ ꓣꓳ ꓔꓯ ꓝꓴꓲ ꓠꓯ, ꓗꓪ ꓐꓰ ꓓꓵꓽ ꓙ ꓒꓳ, ꓡꓶꓽꓡ ꓠ, ꓟ ꓬꓲ ꓠꓯ, ꓗꓪ ꓡ ꓠ, ꓟ ꓬꓲ ꓙꓵ, ꓖꓶ ꓢꓴ ꓪꓴ‐ꓢ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓠꓴ ꓥꓪ ꓔꓯ ꓮ ꓡꓲ ꓐꓰ ꓙ ꓫꓱ, ꓠ, ꓟ ꓚꓲ. ꓛꓬ ꓚꓱ, ꓔꓯ ꓚꓲ. ꓛꓬ ꓓꓵꓽ ꓙ ꓠ, ꓟ ꓚꓱ, ꓔꓯ ꓢꓲ ꓠ, ꓟ ꓣꓳ ꓔꓯ ꓙꓵꓽ ꓪ ꓖꓶ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓢꓲꓺ ꓒ ꓬꓰ‐ꓢꓴ ꓔꓯ ꓚꓵ ꓚꓵˍ ꓠꓲ, ꓠꓵ ꓔꓬ ꓡ? ꓝꓮꓲ ꓢꓲꓺ ꓒ ꓬꓰ‐ꓢꓴ ꓔꓯ ꓟꓲ ꓠꓯ ꓒꓴ ꓫꓵ ꓗꓪ ꓐꓰ ꓪꓴꓽ ꓜ ꓔꓬ ꓢꓴ ꓒꓬꓱꓼ ꓔꓬ ꓡ?
ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓔꓯ ꓪꓴꓽ ꓤ ꓗꓷ ꓟ ꓔꓯ ꓢꓷ. ꓢꓷ. ꓟꓲ ꓠꓯ ꓡ ꓞꓳ ꓔꓯ ꓠꓲ, ꓠꓵ ꓟ ꓑꓶ. ꓓꓴ ꓟꓲ ꓠꓯ ꓡ ꓞꓳ ꓐꓴ ꓝꓴꓲ ꓐꓱ ꓶ ꓫꓵꓻ ꓙ ꓗꓷ ꓢꓴ ꓢꓲꓺ ꓒ ꓥ ꓡꓳ꓿ ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓢꓲꓺ ꓒ ꓠꓵꓻ ꓠꓲ, ꓔꓯ ꓣꓳ ꓘꓳ, ꓣꓴ ꓓꓴ ꓬꓰ ꓡꓯ꓿
