ꓢꓴ ꓡꓰ ꓠꓴ ꓔꓯ ꓮꓽ ꓔꓳ ꓪꓴꓽ ꓜꓽ ꓒꓬˍ ꓟ ꓔꓯ ꓔꓳ, ꓜꓳꓽ ꓠꓬꓲˍ ꓡ꓿ ꓖꓳ ꓕꓯ ꓠꓴ ꓠꓲ, ꓟ ꓗꓪ ꓮ ꓡꓲ ꓒꓬꓱꓼ ꓡˍ ꓡ꓿ ꓠꓲ, ꓟ ꓫ. ꓥꓳ꓾ ꓠꓲ, ꓟ ꓙꓬ ꓡꓰˍ ꓥꓳ ꓟꓽ ꓥ ꓡ꓿ ꓕꓲ ꓖ ꓕꓲ ꓧꓪ ꓗꓪ ꓠꓽ ꓠꓲ, ꓟ ꓡꓰ. ꓦꓶ ꓡˍ ꓡꓳ꓿ ꓥꓪ ꓔꓯ ꓕꓱ ꓡꓱ ꓟꓽ ꓬꓰ ꓐꓰ ꓓꓵꓽ ꓙꓽ ꓟꓶ ꓔ ꓢꓴ ꓕꓲ ꓣꓳ ꓡꓰ ꓣꓳ ꓔꓯ ꓪꓴꓽ ꓜꓽ ꓡ ꓕꓯ꓾ ꓣꓳ ꓟꓬꓱ ꓓꓳꓽ ꓒꓲꓼ ꓡꓰ ꓠ ꓬꓰ ꓡˍ ꓕꓯ꓾ ꓣꓳ ꓔꓯ ꓟꓽ ꓒꓵꓽ ꓟꓽ ꓚꓬ, ꓬꓰ ꓡˍ ꓕꓯ꓾ ꓕꓱ ꓟ ꓠꓽ ꓮ ꓘꓶ. ꓜꓲꓽ ꓫˍ ꓟ ꓕꓲ ꓫꓵꓽ ꓥ ꓡꓳ꓿
ꓬꓰ‐ꓢꓴ ꓥˍ ꓟꓲ ꓕꓱ ꓟ ꓔꓯ ꓔꓳ, ꓜꓳꓽ ꓗꓷꓳ꓿ ꓬꓴ‐ꓓ ꓠꓬ ꓬꓰ‐ꓢꓴ ꓔꓯ ꓪꓴꓽ ꓜꓽ ꓗꓷꓳ꓿
ꓒꓲ‐ꓕꓱ ꓥˍ ꓟꓲ ꓬꓰ‐ꓢꓴ ꓔꓯ ꓥꓪ ꓟꓽ ꓢꓷ. ꓐꓰ ꓐꓯ ꓗꓷꓳ꓿ ꓕꓲ ꓧꓪ, ꓟꓽ ꓥ꓾ ꓠꓬꓲꓽ ꓧꓪ,꓾ ꓢꓺ ꓧꓪ, ꓐꓯ ꓗꓷꓳ꓿
ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓬꓲ ꓠꓲ, ꓟ ꓗꓪ ꓦꓶ ꓠꓲ, ꓟꓽ ꓙꓳ꓿ ꓠꓲ, ꓙꓳˍ ꓟˍ ꓟꓲ ꓟꓽ ꓙꓳ꓿ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓬꓲ ꓢꓯꓼ ꓟꓬ ꓔꓯ ꓖꓶ ꓔꓬ ꓟ ꓙꓵ, ꓕꓯ ꓬꓰ‐ꓢꓴ ꓕꓱ ꓡꓱ ꓪꓽ ꓘꓴˍ ꓡꓳ꓿
“ꓐ, ꓐꓽꓳ꓾ ꓬꓲ ꓪ ꓮ ꓫꓵꓽ ꓬꓰ ꓔꓬ ꓟ ꓬꓲ ꓪ ꓟꓽ ꓢꓷ. ꓬꓲ ꓪ ꓝꓴꓲ. ꓖꓽ ꓖꓶ ꓡꓯ꓿“ (ꓡꓴ‐ꓘ 23ꓽ34) ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓘꓶꓽ ꓠꓬ ꓬꓲ ꓔꓯ ꓪꓴꓽ ꓜꓽ ꓗꓷ ꓢꓴ꓾ ꓬꓲ ꓔꓯ ꓘꓶꓻ ꓙꓵ ꓢꓴ ꓐꓴ ꓐꓱ ꓶˍ ꓡꓰꓽ ꓟꓽ ꓥ꓿ ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓗꓪ ꓟ ꓣꓳ ꓐꓴ ꓐꓱ ꓶˍ ꓟꓲ ꓥ ꓡꓳ꓿
ꓮ ꓡꓲꓳ ꓐꓯ ꓠꓬ ꓢ‐ꓓꓯ ꓡꓰ ꓫꓵꓽ ꓠꓬꓲˍ ꓟ ꓪꓴ. ꓠꓬꓲ ꓣꓳ ꓥˍ ꓟꓲ ꓟꓽ ꓠꓽ ꓠꓽ ꓢꓲ ꓒ ꓔꓯ ꓟꓽ ꓣꓷꓠ. ꓗꓷ ꓡꓰ ꓗꓴ.ˍ ꓡꓳ꓿ ꓢꓲ ꓒ ꓙ ꓖꓴ ꓗꓪ ꓐꓰ ꓶꓽ ꓤ ꓗꓳ. ꓞ, ꓙꓰˍ ꓡꓳ꓿
Betray ꓐꓰ ꓐꓯˍ ꓟ ꓪꓴꓽ ꓜꓽˍ ꓟ ꓠꓬ ꓞꓽ ꓞꓽ ꓬꓰ ꓓꓳ ꓡˍ ꓟ ꓟꓽ ꓥ꓿ ꓕꓱ ꓟ ꓠꓬ ꓠꓲ, ꓟ ꓗꓪ ꓐꓰ ꓪꓴ. ꓔꓴ ꓡ ꓟ ꓥ ꓡꓳ꓿ ꓟꓽ ꓙꓲꓻ ꓟ ꓓꓵꓽ ꓙꓽ ꓚꓱ,꓾ ꓟꓽ ꓙꓲꓻ ꓟ ꓚꓵ, ꓣꓴ ꓓꓴ꓾ ꓕꓱ ꓡꓱ ꓫꓵꓽ ꓔꓯ ꓠꓲ, ꓟ ꓗꓪ ꓘꓳ ꓣꓴ ꓗꓷ ꓕꓯ ꓡꓳ, ꓬꓰ ꓕꓯ ꓠꓽ ꓞꓳ ꓤ ꓕꓲ ꓣꓳ ꓔꓯ ꓬꓲ ꓚꓱ, ꓥꓳꓽ ꓡꓰ ꓛꓬ ꓡꓰ ꓝꓲ ꓐ ꓡˍ ꓡꓳ꓿
ꓖꓳ ꓟ ꓑꓶ. ꓓꓴ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓢꓲ ꓒ ꓬꓰ‐ꓢꓴ ꓪꓽ ꓘꓴˍ ꓟ ꓠꓬ ꓣꓳ ꓐꓱ ꓶˍ ꓟꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬˍ ꓟ ꓠꓽ ꓧꓳꓡꓬ ꓪꓰꓰꓗ ꓠꓽ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓬꓰ ꓛꓬ ꓗꓷ ꓟ ꓔꓯ ꓓꓵꓽ ꓙꓽ ꓠꓬꓲ ꓡꓯ꓿ ꓢꓲ ꓒ ꓬꓰ‐ꓢꓴ ꓔꓯ ꓟꓳ. ꓒꓳ, ꓙꓰ ꓓꓴ ꓬꓰ ꓡꓯ꓿ ꓢꓲ ꓒ ꓔꓬ ꓗꓪ ꓣꓳ ꓝꓴꓲ. ꓖꓽ ꓖꓶ ꓟꓶ ꓠ, ꓟ ꓓꓰꓽ ꓡꓯ꓿ ꓬꓲ ꓔꓬ ꓗꓪ ꓠꓻ ꓫꓬ, ꓟꓶ ꓠ, ꓟ ꓓꓰꓽ ꓓꓴ ꓬꓰ ꓡꓯ꓿ ꓖꓳ ꓟ ꓡꓰꓽ ꓟꓽ ꓞꓲ ꓣꓳ ꓡꓰ ꓠꓻ ꓡꓰ ꓝꓲ ꓗꓷ ꓢꓴ ꓔꓬ ꓗꓪˍ ꓟꓲ ꓖꓽ ꓖꓶ ꓠ, ꓟ ꓓꓰꓽ ꓢꓲ ꓠꓵꓻ ꓠꓲ, ꓔꓯ ꓝꓮꓲ ꓫꓬ, ꓜꓶ ꓡꓯ꓿ ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓬꓲ ꓠꓵꓻ ꓠꓲ, ꓠꓬ ꓣꓳ ꓝꓴꓲ. ꓕꓯꓽ ꓢꓲ ꓪ ꓜꓲ ꓪꓴꓽˍ ꓟ ꓑꓶ. ꓓꓴ ꓥ ꓡꓳ꓿
