ꓝꓴꓲ ꓔꓯ ꓒꓬꓱꓼ ꓡ ꓝꓲ_ ꓟ ꓬꓲ. ꓚꓱ, (7) ꓚꓱ,
ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓝꓴꓲ ꓬꓰ_ ꓡꓳ꓾ ꓝꓴꓲ ꓔꓯ ꓒꓬꓱꓼ ꓡ ꓝꓲ_ ꓟ ꓝꓴꓲ ꓚꓱ, (ꓥ ꓠꓬ) ꓝꓴꓲ ꓚꓰ (7) ꓚꓱ, ꓟ ꓔꓯ ꓠ ꓡꓳ, ꓓꓴ ꓥꓳ꓿
(1) ꓑꓣꓲꓓꓰ ꓥ ꓡꓳ꓾ ꓠꓲ, ꓖꓳꓼ ꓟ (ꓥ ꓠꓬ) ꓚꓲ ꓛꓬ ꓐꓱ ꓶ ꓡꓰ ꓢꓪ. ꓟ꓾ ꓠꓱ. ꓐꓯꓼ ꓢꓴ ꓔꓯ ꓡ ꓞꓳ ꓟꓽ ꓢꓪ. ꓟ꓾ ꓡ ꓞꓳ ꓟꓳ ꓟꓽ ꓟꓵ ꓬꓰ_ ꓟ ꓥ ꓡꓳ꓿ ꓠꓱ. ꓐꓯꓼ ꓢꓴ ꓮ ꓡꓰ ꓓ, ꓓ꓾ ꓥꓪ ꓐꓱ ꓶ ꓓ, ꓠ, ꓟ ꓣꓳ. ꓚꓵ ꓕꓱ ꓡꓱ ꓠꓲ, ꓟ ꓙꓳ ꓟ ꓥ ꓡꓳ꓿
(2) ꓖꓣꓰꓰꓓ ꓥ ꓡꓳ꓾ ꓟꓬ ꓠꓯ. ꓟ ꓥ ꓡꓳ꓾ ꓢꓴ ꓔꓯ ꓙꓳ ꓟꓽ ꓙꓳ ꓣꓳ ꓟꓽ ꓢꓷ. ꓣꓳ ꓠꓬ ꓢꓴ ꓕꓯ ꓢꓲ ꓙꓳ ꓠ, ꓟ ꓐꓱ ꓶ ꓟꓬ ꓯ. ꓟ ꓥ ꓡꓳ꓿ ꓮ ꓫꓵ ꓬꓰ ꓥ ꓟꓲ ꓟꓬ ꓠꓯ. ꓟ ꓕꓱ ꓡꓱ ꓬꓰ ꓠꓬ ꓣꓳ ꓠꓬ ꓟꓬ ꓠꓯ. ꓟ ꓗꓪ ꓐꓰ ꓣꓳ ꓢꓴ ꓔꓯ ꓛꓬ ꓡꓰ ꓗꓴ. ꓡꓳ꓿ ꓝꓴꓲ ꓒꓬꓱꓼ ꓡꓰ ꓡꓳ꓾ ꓖꓳ ꓟ ꓑꓶ ꓓꓴ ꓮ ꓘꓶ. ꓟꓬ ꓠꓯ. ꓟ ꓟꓲ ꓟꓽ ꓧ, ꓡꓳ꓿
(3) ꓰꓠꓦꓬ ꓥ ꓡꓳ꓾ ꓟꓬ ꓦꓯ. ꓟ꓾ ꓟꓬ ꓔꓳ, ꓟ ꓥ ꓡꓳ꓿ ꓢꓴ ꓜ ꓟꓲ ꓔꓬ ꓢ ꓟ ꓢꓴ ꓒꓴ ꓫꓵꓺ ꓙꓳ ꓡ ꓕꓯ ꓟꓬ ꓔꓳ, ꓟ ꓠꓲ, ꓟ ꓗꓪ ꓟꓽ ꓗ, ꓛꓲ ꓢꓴ ꓙꓳ ꓡ ꓠꓬ ꓠꓲ, ꓟ ꓗꓪ ꓔꓬ ꓟꓽ ꓢ꓾ꓕꓱ ꓡꓱ ꓗꓷ ꓥꓳ ꓐꓯ ꓠꓬ ꓕꓱ ꓟ ꓥ ꓟꓲ ꓝꓴꓲ ꓔꓯ ꓒꓬꓱꓼ ꓡ ꓝꓲ ꓡꓳ꓿
(4) ꓮꓠꓖꓰꓣ ꓥ ꓡꓳ꓾ ꓠꓲ, ꓟ ꓦꓶ_ ꓟ ꓥ ꓡꓳ꓿ ꓠꓲ, ꓟ ꓮ ꓘꓶ. ꓪꓴ꓾ ꓠꓲ, ꓟ ꓮ ꓘꓶ. ꓧꓶ ꓠꓬꓲ ꓢꓴ ꓔꓯ ꓟꓬ ꓢꓶꓽ ꓗꓪ ꓟꓽ ꓟꓳ ꓐꓰ ꓟꓽ ꓜꓳ ꓟꓽ ꓙꓲ ꓢꓴ ꓔꓯ ꓐꓯ ꓟ ꓔꓲ. ꓟ ꓓꓶ ꓟ ꓒꓬꓱꓼ ꓡ ꓟ ꓑꓶ ꓓꓴ ꓕꓱ ꓟ ꓥ ꓟꓲ ꓝꓴꓲ ꓔꓯ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
(5) ꓡꓴꓢꓔ ꓥ ꓡꓳ꓾ ꓦꓯ. ꓠꓲ, ꓙꓵ_ ꓟ (ꓥ ꓠꓬ) ꓠꓲ, ꓦꓯ. ꓟ ꓥ ꓡꓳ꓿ ꓢꓴ ꓤ ꓖꓴ ꓤ ꓟꓶ (ꓥ ꓠꓬ) ꓢꓴ ꓖꓴ ꓙꓴ ꓔꓯ ꓟꓶ ꓠꓲ, ꓫꓵ_ ꓟ ꓠꓵꓻ ꓠꓲ, ꓫꓵ_ ꓟ ꓠꓲ, ꓟ ꓙꓳ ꓥꓳ ꓐꓯ ꓠꓬ ꓕꓱ ꓟ ꓥ ꓟꓲ ꓝꓴꓲ ꓔꓯ ꓒꓬꓱꓼ ꓡ ꓝꓲ ꓥꓳ꓿
(6) ꓖꓡꓴꓔꓔꓳꓠꓬ ꓥ ꓡꓳ꓾ ꓜ ꓟꓬ ꓠꓯ. ꓟ ꓥ ꓡꓳ꓾ ꓣꓳ ꓜ ꓐꓳ ꓗꓪ ꓛꓲ ꓪꓴ‐ꓢ ꓠꓬ ꓖꓶ ꓜ ꓡꓳ꓾ ꓖꓳ ꓡꓱ ꓥ ꓟꓲ ꓐꓳ ꓓ ꓟ ꓕꓯ ꓢꓲ ꓮ ꓟꓬ ꓜ ꓟꓬ ꓠꓯ. ꓟ ꓥ ꓡꓳ꓿ ꓕꓱ ꓡꓱ ꓥ ꓟꓲ ꓝꓴꓲ ꓔꓯ ꓒꓬꓱꓼ ꓡ ꓝꓲ ꓟ ꓥ ꓡꓳ꓿ ꓮ ꓫꓵ ꓑꓶ ꓓꓴ ꓐꓯ ꓠꓬ ꓣꓳ ꓜ ꓐꓳ ꓡꓰ ꓕꓯ ꓠꓬ ꓠꓱ. ꓐꓯꓼ ꓢꓴ ꓙꓰ ꓓ_ ꓟ ꓔꓯ ꓢꓴ ꓔꓯ ꓥ ꓟꓲ ꓖꓶ ꓜ ꓠ ꓔ ꓡꓳ꓿ ꓣꓳ ꓔꓯ ꓙꓳ_ ꓟ ꓮ ꓙꓵ ꓔꓯ ꓠꓬ ꓣꓳ ꓡꓰ ꓟꓽ ꓥ ꓠꓱ. ꓐꓯꓼ ꓔꓯ ꓖꓶ ꓠ, ꓟ꓾ ꓖꓳ ꓡꓱ ꓥ ꓟꓲ ꓣꓳ ꓠꓬ ꓜ ꓟꓬ ꓠꓯ. ꓟ ꓑꓶ ꓓꓴ ꓠꓱ. ꓐꓯꓼ ꓢꓴ ꓔꓯ ꓣꓳ ꓟꓽ ꓟꓳ꓾ ꓠꓱ. ꓐꓯꓼ ꓢꓴ ꓔꓯ ꓣꓳ ꓠꓬꓲ. ꓜꓲ ꓥꓳ ꓐꓯ ꓠꓬ ꓕꓱ ꓟ ꓥ ꓟꓲ ꓝꓴꓲ ꓔꓯ ꓒꓬꓱꓼ ꓡ ꓝꓲ ꓡꓳ꓿
(7) ꓢꓡꓳꓔꓧ (ꓥ ꓠꓬ) ꓡꓮꓜꓲꓠꓰꓢꓢ ꓥ ꓡꓳ꓾ ꓡꓯꓼ ꓙꓴ ꓟꓽ ꓔꓰ, ꓟ (ꓥ ꓠꓬ) ꓐꓴ_ ꓟ ꓥ ꓡꓳ꓾ ꓣꓳ ꓠꓬ ꓣꓳ ꓬꓰ ꓠ ꓔ ꓟ ꓔꓯ ꓟꓽ ꓬꓰ ꓬꓰ ꓮ ꓔꓳ ꓔꓬ ꓟ ꓡꓯꓼ ꓜꓴ ꓟꓽ ꓔꓲ, ꓔꓲ, ꓟꓽ ꓬꓰ ꓟ ꓥꓳ ꓐꓯ ꓠꓬ ꓣꓳ ꓔꓯ ꓦ ꓡꓱ ꓐꓳ ꓔꓬ ꓢꓴ ꓥ ꓠꓬ ꓣꓳ ꓠꓬ ꓮꓽ ꓐ ꓕꓲ ꓣꓳ ꓐꓯ ꓠꓬ ꓣꓳ ꓔꓯ ꓦ ꓡꓱ ꓐꓳ ꓔꓬ ꓢꓴ ꓦꓲꓻ ꓘꓴ ꓢꓴ ꓠꓬ ꓜꓽ ꓟꓽ ꓪ ꓜ ꓗꓷ ꓠꓬ ꓣꓳ ꓬꓰ ꓠ ꓔ ꓟ ꓔꓯ ꓟꓽ ꓬꓰ ꓟ ꓑꓶ ꓓꓴ ꓮ ꓔꓳ ꓔꓬ ꓟ ꓑꓶ ꓓꓴ ꓐꓴ_ ꓟ ꓑꓶ ꓓꓴ ꓕꓱ ꓟ ꓥ ꓟꓲ ꓝꓴꓲ ꓔꓯ ꓒꓬꓱꓼ ꓡ ꓝꓲ ꓥꓳ꓿
ꓝꓴꓲ ꓔꓯ ꓒꓬꓱꓼ ꓡꓰ ꓝꓲ_ ꓟ (7) ꓚꓱ, ꓔꓯ ꓠ ꓬꓲ. ꓠꓬꓲ ꓠ ꓡꓳ, ꓓꓳ ꓡꓰ ꓖꓳ ꓑꓳ. ꓣꓳ ꓥ ꓟꓲ ꓕꓱ ꓟ ꓕꓯ ꓤ ꓟꓳ ꓠ, ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓡꓯ꓿
