ꓟꓲ ꓠꓯ ꓗꓪ ꓢꓯꓸ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓑꓶ ꓓꓲ ꓡꓯꓻ ꓓꓲ ꓐꓴ ꓟꓶ ꓡꓰ ꓟ ꓚꓱꓹ (Biodiversity losses)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓒꓳ, ꓡ ꓟ ꓚꓱ, ꓗꓪ ꓐꓰ ꓟꓲ ꓠꓯ ꓕꓯ ꓢꓲ ꓢꓯ. ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓐꓰ ꓟꓶ ꓓꓲ ꓡꓯ ꓓꓲ ꓐꓴ ꓟꓶ ꓡꓰ ꓟ ꓚꓱ, Biodiversity lost ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓞꓳ ꓙꓳ ꓢꓯ. ꓔꓬ ꓟ ꓟꓲ ꓠꓯ ꓕꓯ ꓢꓲ ꓗꓪ ꓪꓴ‐ꓢ ꓡꓰ ꓚꓰꓼ ꓔ ꓟ ꓢꓯ. ꓫꓵꓽ ꓢꓯ. ꓙꓰ ꓮ ꓟꓬ, ꓔꓯ ꓡꓳ. ꓟꓳ ꓓ ꓟ ꓥ ꓡꓳ꓿ ꓖꓳ ꓟ ꓠꓬ ꓟꓵꓽ ꓗꓪ ꓙꓳ ꓟ ꓢꓲ, ꓜꓲ ꓑꓶ. ꓓꓲ ꓡꓯ ꓓꓲ ꓐꓰ ꓟꓶ ꓛꓵꓽ ꓝꓮꓲ ꓬꓲꓻ ꓙꓬ ꓐꓰ ꓟꓵꓽ ꓗꓪ ꓙꓳ ꓟ ꓮ ꓙꓵꓽ ꓠꓬ ꓟꓲ ꓠꓯ ꓡ ꓞꓳ ꓐꓱ ꓶ ꓪꓴ‐ꓢ ꓡꓰ ꓚꓰꓼ ꓖꓶ ꓔ ꓟ ꓥ ꓡꓳ꓿
ꓝꓮꓲ ꓣꓳ ꓟ ꓑꓶ ꓓꓲ ꓗꓪ ꓐꓰ ꓮ ꓘꓶ. ꓛꓲ ꓪꓴꓽ ꓟ ꓟꓶ ꓘꓶꓽ ꓦ‐ꓟ ꓐꓴ ꓗꓪ ꓛꓲ ꓮ ꓙꓵꓽ ꓠꓬ ꓐꓲꓳꓓꓲꓦꓰꓣꓢꓲꓔꓬ ꓐꓯ ꓟ ꓟꓲ ꓠꓯ ꓕꓯ ꓢꓲ ꓢꓯ. ꓔꓬ ꓟ ꓮ ꓙꓵꓽ ꓔꓯ ꓟꓬꓱꓺ ꓖꓶ ꓔ ꓟ ꓥ ꓡꓳ꓿
ꓕꓱ ꓟ ꓮ ꓙꓵꓽ ꓠꓬ ꓪꓴ‐ꓢ ꓡꓰ ꓣꓳ ꓟꓲ ꓠꓯ ꓡ ꓞꓳ ꓔꓯ ꓖꓶ ꓔ ꓟ ꓬꓲ ꓒꓵꓽ ꓮ ꓘꓶ. ꓒꓵꓽ ꓟ ꓡꓯ ꓫꓴ ꓓꓽ ꓥ ꓡꓳ꓿ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯꓼ ꓦꓻ ꓟ ꓙꓲ ꓟ ꓟꓲ ꓦꓲꓻ ꓝꓮꓲ ꓣꓳ ꓜ ꓓꓴ ꓓꓳ ꓓꓴ ꓮ ꓙꓵꓽ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓑꓶ ꓓꓴ ꓡꓯ ꓓꓲ ꓮ ꓙꓵꓽ ꓠꓬ ꓕꓲ ꓟ ꓐꓰ ꓕꓲ ꓟ ꓠꓬ ꓝ. ꓔꓬ ꓟ ꓬꓲ ꓙ ꓡꓯꓽ ꓘꓳ, ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓢꓯ. ꓫꓵꓽ ꓢꓯ. ꓙꓵꓽ ꓐꓴ ꓟꓶ ꓡꓰ ꓐꓬ ꓡꓰ ꓔꓬ ꓡꓳ꓿
ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓠꓲ, ꓟ ꓟꓽ ꓢꓽ ꓓꓴ ꓓꓽ ꓟ ꓠꓬ ꓟꓲ ꓠꓯ ꓕꓯ ꓢꓲ ꓠꓬꓲ ꓢꓯ. ꓔꓬ ꓟ ꓢꓯ. ꓫꓵꓽ ꓢꓯ. ꓙꓰ ꓑꓶ ꓓꓲ ꓡꓯ ꓓꓲ ꓠꓬ ꓐꓬ ꓡꓰ ꓟ ꓟꓶ ꓡꓰ ꓟ ꓔꓯ ꓡꓳ. ꓟꓳ ꓪ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓠꓲ, ꓟ ꓟꓽ ꓢ ꓓꓴ ꓐꓬ ꓡꓰ ꓙꓳ ꓡꓳ ꓐꓰ ꓢꓷ. ꓠꓲ, ꓙꓳ ꓒꓽ ꓐꓴ ꓡꓰ ꓐꓯ ꓔ ꓟ ꓥ ꓡꓳ꓿
ꓟꓲ ꓠꓯ ꓕꓯ ꓢꓲ ꓗꓪ ꓢꓯ. ꓫꓵꓽ ꓢꓯ. ꓙꓵꓽ ꓐꓴ ꓬꓲ ꓫꓲ. ꓟꓶ ꓡꓰ ꓟ ꓮ ꓟꓬ, ꓙꓳ ꓟ ꓥ ꓡꓳ꓿ ꓔꓯ ꓥꓳꓽ ꓐꓬ ꓠꓬ ꓟꓬ‐ꓟ ꓗꓴꓷꓼ ꓗꓪ ꓮ ꓘꓶ. ꓛꓲ ꓒꓵꓽ ꓟ ꓬꓲꓻ ꓙꓬ ꓳ ꓑ ꓡ‐ꓖꓪ꓾ ꓮ ꓘꓶ. ꓛꓲ ꓡꓳ. ꓐꓲ ꓟ ꓪꓳꓽ ꓒꓽ꓾ ꓡꓽ ꓟ꓾ ꓝꓮꓲ ꓟꓵꓽ ꓗꓪ ꓔꓬ ꓟ ꓠꓬ ꓫꓵꓽ ꓠꓬ ꓙꓵꓽ ꓮ ꓟꓬ, ꓥ ꓟꓲ ꓬꓲ ꓫꓲ. ꓟꓶ ꓡꓰ ꓠ, ꓛꓲ ꓔꓳ, ꓜꓳ ꓔꓬ ꓡꓳ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿
ꓕꓱ ꓡꓱ ꓗꓷ ꓡꓰ ꓟ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓟꓵꓽ ꓗꓪ ꓔꓬ ꓟ ꓢꓯ. ꓫꓵꓽ ꓢꓯ. ꓙꓲ ꓐꓴ ꓔꓬ ꓔꓶ. ꓟꓽ ꓙꓳ ꓡꓰ ꓟ ꓝꓮꓲ ꓡ ꓞꓳ ꓐꓴ ꓡꓰ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪ ꓙꓰ ꓐꓴ ꓔꓯ ꓢꓰꓼ ꓢꓲ ꓠꓬꓲ ꓪꓴꓽ ꓜ ꓟ꓾ ꓑꓶ. ꓓꓴ ꓢꓯ. ꓫꓵꓽ ꓮ ꓟꓬ, ꓠꓬ ꓬꓲ ꓫꓲ. ꓟꓶ ꓡꓰ ꓞꓰꓼ ꓡꓰ ꓓꓴ ꓔꓳ, ꓜꓳ ꓔꓬ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓟꓵꓽ ꓗꓪ ꓔꓬ ꓟ ꓢꓯ. ꓫꓵꓽ ꓔꓲ ꓫꓵꓽ ꓟꓶ ꓡꓰ ꓫꓵꓻ ꓞꓰ ꓡꓰ ꓠ, ꓟ ꓠꓱ. ꓐꓯꓼ ꓥ ꓟꓲ ꓟꓶ ꓡꓰ ꓟ ꓥ ꓡꓳ꓿ ꓔꓯ ꓥꓳꓽ ꓐꓯ ꓠꓬ ꓐꓬ ꓙꓬ ꓟꓽ ꓔꓬ ꓗꓷ ꓡꓰ ꓠꓬ ꓟꓵꓽ ꓗꓪ ꓢꓲ, ꓜꓲ ꓐꓴ ꓬꓲ ꓢꓶꓽ ꓟꓽ ꓓꓱ ꓗꓷ ꓡꓰ ꓥꓳ꓿ ꓝꓮꓲ ꓟꓵꓽ ꓗꓪ ꓢꓲ, ꓜꓲ ꓟꓽ ꓙꓳ ꓗꓷ ꓡꓰ ꓠꓬ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓙꓲ ꓟ ꓟꓲꓽ ꓦꓲꓻ ꓟꓽ ꓪ ꓡ ꓓꓴ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓟꓲ ꓠꓯ ꓡ ꓞꓳ ꓐꓴ ꓟꓲ ꓠꓯ ꓕꓯ ꓢꓲ ꓗꓪ ꓢꓯ. ꓫꓵꓽ ꓢꓯ. ꓙꓵꓽ ꓑꓶ ꓓꓲ ꓡꓯ ꓓꓲ ꓐꓴ ꓔꓯ ꓮꓽ ꓔꓳ ꓟꓽ ꓢꓰꓼ ꓠ, ꓟ ꓣꓳ ꓚꓵˍ ꓡꓳ꓿
ꓟꓵꓽ ꓗꓪ ꓔꓬ ꓟ ꓢꓯ. ꓫꓵꓽ ꓢꓯ. ꓙꓵꓽ ꓟꓬꓽ ꓢꓶ ꓗꓪ ꓐꓰ ꓡꓳ. ꓟꓳ ꓟꓽ ꓓ ꓟꓽ ꓑꓶ ꓓꓲ ꓡꓯ ꓓꓲ ꓔꓯ ꓗꓽ ꓕꓽ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓯ ꓗꓽ ꓕꓽ ꓖꓶ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓟꓲ ꓠꓯ ꓡ ꓞꓳ ꓐꓴ ꓮ ꓡꓰ ꓐꓰ ꓗꓽ ꓕꓽ ꓟ ꓟꓬꓱꓽ ꓬꓰ ꓐ ꓡ ꓢꓲ ꓐꓯ ꓠꓬ
- ꓠꓬ ꓪꓴ‐ꓢ ꓡꓰ ꓚꓰꓼ ꓖꓶ ꓔ ꓟ ꓮ ꓙꓵꓽ ꓔꓯ ꓠꓲ, ꓠꓵ ꓠ, ꓔ ꓟ ꓥ ꓡꓳ꓿ ꓟꓵꓽ ꓗꓪ ꓔꓬ ꓟ ꓢꓯ. ꓫꓵꓽ ꓐꓴ ꓔꓯ ꓶꓻ ꓡꓯꓼ ꓐꓱ ꓶ ꓢꓰꓼ ꓟ ꓚꓱ, ꓔꓯ ꓠꓽ ꓗꓷ ꓠ, ꓟ ꓢꓯꓼ ꓕꓵꓼ ꓡꓯ꓿ ꓮ ꓔꓳ ꓙ ꓣꓱ ꓢꓲ ꓠꓬꓲ ꓥꓪ ꓢꓰꓼ ꓟ꓾ ꓠꓱ. ꓐꓯꓼ ꓮ ꓟꓬ, ꓫꓵꓽ꓾
- ꓠꓬ ꓢꓳꓚꓲꓮꓡ ꓟꓰꓓꓲꓮ ꓣꓱ ꓢꓲ ꓠꓬꓲ ꓟꓵꓽ ꓗꓪ ꓔꓬ ꓟ ꓢꓯ. ꓫꓵꓽ ꓢꓯ. ꓙꓵꓽ ꓔꓯ ꓗꓽ ꓕꓽ ꓟ ꓢꓷ.ꓠꓲ, ꓚꓳ ꓬꓲ ꓖꓶ ꓟ ꓢꓴ ꓔꓯ ꓐꓯ ꓟ. ꓖꓶ ꓠ, ꓟ ꓐꓱ ꓶ ꓢꓯꓼ ꓕꓵꓽ ꓡꓯ꓿
- ꓠꓬ ꓑꓡꓮꓢꓔꓲꓚ ꓣꓱ ꓟ ꓔꓯ ꓤ ꓟꓳ ꓠ, ꓟ ꓢꓯꓼ ꓕꓵꓼ ꓡꓯ꓿ ꓑꓡꓮꓢꓔꓲꓚ ꓔꓯ ꓮꓽ ꓔꓳ ꓬꓲꓻ ꓙꓬ ꓘꓴꓽ ꓗꓪ ꓡꓳ ꓗꓷ ꓠꓬ ꓬꓲꓻ ꓙꓬ ꓘꓴꓽ ꓗꓪ ꓢꓯ. ꓔꓬ ꓟ ꓥꓪ. ꓐꓰ ꓳ‐ꓑ‐ꓡ‐ꓖꓪ ꓠꓬ ꓫꓵꓻ ꓡꓰ ꓟ ꓥ ꓡꓳ꓿
ꓟꓲ ꓠꓯ ꓔꓯ ꓣꓳ ꓕꓲ ꓒ ꓤ ꓥꓪ. ꓢꓲ ꓠꓬꓲ ꓢꓯ. ꓔꓬ ꓟ ꓟꓽ ꓥ ꓣꓳ ꓤ ꓠꓱ ꓐꓴ ꓐꓱ ꓶ ꓮ ꓘꓶ. ꓛꓲ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓫꓬ, ꓖꓶ ꓠ, ꓟ ꓣꓳ ꓚꓵ ꓟ ꓥ ꓡꓳ꓿ ꓕꓱ ꓟ ꓡꓰ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓕꓯ ꓣꓳ ꓤ ꓠꓱ ꓤ ꓐꓴ ꓔꓯ ꓖꓶ ꓐ ꓡ ꓠ, ꓟ ꓢꓯꓼ ꓕꓵꓼ ꓡꓯ꓿ ꓕꓱ ꓡꓱ ꓙꓲ ꓖꓴ ꓙꓳ ꓟ ꓚꓱ, ꓮ ꓟꓬ, ꓬꓰ ꓐ ꓡ ꓠ, ꓟ ꓐꓱ ꓶ
ꓡꓲꓗꓰ ꓮꓠꓓ ꓢꓧꓮꓣꓰ ꓮ ꓟꓬ, ꓖꓶ ꓓꓴ ꓬꓰ ꓡꓯ ꓫ. ꓟꓳ ꓪ꓿
