ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ Palm Sunday ꓐꓰ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓧꓪ. ꓡꓰ ꓟ ꓐꓰ ꓓꓵꓽ ꓙꓰˍ ꓟ꓾ ꓮ ꓟꓴꓽ ꓜꓶꓽ ꓢꓲ ꓓꓵꓽ ꓙꓰˍ ꓟ ꓑꓮꓲꓽ ꓔꓯ ꓣꓳ ꓬꓰ ꓔꓬ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓮ ꓟꓴꓽ ꓜꓶꓽ ꓢꓲ ꓓꓵꓽ ꓙꓰˍ ꓡꓳ꓿ ꓖꓳ ꓡꓱ ꓓꓵꓽ ꓙꓰˍ ꓕꓯ ꓙ ꓖꓴ ꓙ ꓚꓱ, ꓗꓪ ꓢꓲ, ꓒꓬꓽ ꓘꓳꓽ ꓢꓴ ꓘꓳꓽ꓾ ꓐꓵꓻ ꓞꓶꓽ ꓘꓳꓽ ꓢꓴ ꓘꓳꓽ ꓢꓲ ꓒ ꓬꓰ‐ꓢꓴ ꓔꓯ “ꓧꓳ‐ꓢ‐ꓠ꓾ ꓧꓳ‐ꓢ‐ꓠ” ꓐꓰ ꓐꓯ ꓢꓲ ꓠꓬꓲ ꓛꓵ ꓣꓴˍ ꓡꓳ꓿ ꓢꓲ ꓒ ꓬꓲ ꓟꓬꓱ ꓗꓪ ꓐꓰ ꓡ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓾ ꓐꓰ ꓐꓯ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓓꓳ ꓟꓴˍ ꓡꓳ꓿
ꓑꓮꓲ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓙꓲꓻ ꓟ ꓔꓯ ꓙꓲˍ ꓟ ꓗꓪ ꓐꓰ ꓧꓪ. ꓡꓰˍ ꓟ ꓑꓮꓲꓽ ꓐꓰˍ ꓟꓲ ꓣꓳ ꓐꓯ ꓔꓬ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ ꓟ. ꓟꓲꓽ ꓑꓷꓠꓽ ꓗꓪ ꓓꓯ, ꓟ ꓡꓰ ꓐꓰ ꓮ ꓣꓳ ꓠꓬ ꓬꓲ ꓔꓯ ꓢꓰꓼ ꓔꓶ. ꓗꓪ ꓧꓳꓽ ꓔꓯ, ꓙꓰˍ ꓥ ꓟꓲ ꓬꓲ ꓠꓬ ꓮ ꓫꓵꓽ ꓟꓽ ꓢꓷ.꓾ ꓐꓰ ꓬꓲ‐ꓢ‐ꓬ ꓕꓳꓽ ꓶ ꓗꓪ ꓐꓳ ꓔ ꓟ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓮ ꓣꓳ ꓕꓲ ꓟˍ ꓡꓰ ꓐꓰ ꓓꓵꓽ ꓙꓰˍ ꓡꓳ꓿ ꓬꓲ ꓠꓯꓸꓼ ꓗꓪ ꓮ. ꓕꓽ ꓕꓲ ꓛꓲ ꓟꓽ ꓚꓬꓼ꓾ ꓑꓳ ꓕꓲ ꓟˍ ꓟꓲ ꓟꓽ ꓓ,꓿ ꓪꓳꓼ ꓕꓲ ꓟˍ ꓟꓲ ꓟꓽ ꓓꓯ,꓿ ꓬꓲ ꓠꓬ ꓮ. ꓣꓳ ꓕꓲ ꓟˍ ꓡꓰ ꓐꓰ ꓪꓴꓽˍ ꓟ ꓠꓵꓻ ꓠꓲ, ꓡꓰ ꓓꓵꓽ ꓙꓰˍ ꓡꓳ꓿ ꓕꓱ ꓟ ꓠꓬ ꓟꓽ ꓙꓲ ꓟ ꓔꓯ ꓙꓲˍ ꓟ ꓡꓰ ꓧꓪ. ꓡꓰˍ ꓟ ꓑꓮꓲꓽ ꓕꓲ ꓑꓮꓲꓽ ꓥ ꓡꓳ꓿ ꓠꓲ, ꓙꓳꓺ ꓠꓲ, ꓦꓯ. ꓟ ꓔꓯ ꓧꓪ. ꓡꓰˍ ꓟ ꓑꓮꓲꓽ ꓕꓲ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓟꓵꓽ ꓗꓳ, ꓓꓵ ꓓꓵ ꓔꓯ ꓙꓵꓽˍ ꓟ ꓪ ꓔꓲ. ꓖꓳ ꓟ ꓠꓬ ꓮ ꓫꓵꓽ ꓒꓴ ꓤ ꓫꓵꓺ ꓤ꓾ ꓑꓳ ꓤ ꓟꓽ ꓔꓯ, ꓔꓯ, ꓐꓰ ꓙ ꓣꓳˍ ꓟ ꓐꓰ ꓧꓪ. ꓡꓰˍ ꓟ ꓡꓰ ꓐꓰ ꓙꓱ‐ꓣꓴ‐ꓢ‐ꓡꓱ ꓗꓪ ꓓꓵꓽ ꓙꓰˍ ꓡꓳ꓿ ꓕꓱ ꓡꓱ ꓓꓵꓽ ꓙꓰˍ ꓕꓯ ꓞꓳ ꓤ ꓮ ꓟꓬ, ꓠꓬ ꓬꓲ ꓔꓯ ꓛꓵ, ꓣꓴˍ ꓡꓳ꓿ “ꓧꓳ‐ꓢ‐ꓠ꓾ ꓧꓳ‐ꓢ‐ꓠ꓾ ꓢꓲ ꓒ ꓬꓲ ꓟꓬꓱ ꓗꓪ ꓐꓰ ꓡ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ”꓾ ꓐꓰ ꓐꓯ ꓢꓲ ꓠꓬꓲ ꓛꓵ, ꓣꓴˍ ꓡꓳ꓿ ꓮ ꓫꓵꓽ ꓙꓳ ꓢꓴ ꓮ ꓫꓵꓽ ꓘꓳꓽ ꓖꓶˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓚꓵ ꓚꓵ ꓠꓲ, ꓠꓵˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓠꓲ, ꓠꓵˍ ꓡ ꓐꓰ ꓐꓯˍ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓣꓳ‐ꓟ ꓡꓯꓽ ꓒꓯ, ꓗꓪ ꓐꓰ ꓣꓴ ꓩꓴ ꓖꓶ ꓢꓴ ꓥ꓿ ꓬꓲ ꓪ ꓔꓯ ꓙꓲˍ ꓟ ꓗ, ꓛꓲꓽˍ ꓟ ꓖꓶ ꓢꓴ ꓥ ꓐꓰ ꓐꓯ ꓢꓲ ꓠꓬꓲ ꓛꓵ, ꓣꓴ ꓔꓬ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓟꓽ ꓟꓶ ꓫꓵ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓓꓵꓽ ꓙꓽ ꓔ ꓟ ꓡꓰ ꓐꓰ ꓬꓲ ꓪ ꓔꓯ ꓒꓴ ꓫꓵ ꓖꓶ ꓢꓴ꓾ ꓬꓲ ꓪ ꓔꓯ ꓚꓬꓴ. ꓢꓴ꓾ ꓟꓯꓼ ꓙ ꓗꓪ ꓐꓰ ꓚꓬꓴ. ꓢꓴ ꓟꓽ ꓥ ꓥ ꓐꓰ꓾ ꓦ ꓕꓲ ꓚꓱ, ꓗꓪ ꓐꓰ ꓚꓬꓴ. ꓢꓴ ꓥ ꓟ ꓬꓲ ꓪ ꓢꓷ. ꓡꓰ ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓧꓳ‐ꓢ‐ꓠ ꓧꓳ‐ꓢ‐ꓠ ꓐꓯ ꓢꓴ ꓠꓬ “ꓢꓲ ꓒ ꓬꓰ‐ꓢꓴ ꓔꓯ ꓢꓰꓼ ꓗꓷ꓾ ꓢꓲ ꓒ ꓬꓰ‐ꓢꓴ ꓔꓯ ꓡꓯꓼ ꓐꓳ ꓔꓶ. ꓓꓴ ꓕꓯꓼ ꓔꓶ. ꓗꓷ” ꓐꓯˍ ꓟ ꓒꓬꓱꓼ ꓙꓰꓳ ꓐꓯˍ ꓟ ꓡꓳ. ꓟꓳˍ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓢꓲ ꓒ ꓬꓰ‐ꓢꓴ ꓙꓱ‐ꓣꓴ‐ꓢ‐ꓡꓱ ꓗꓪ ꓮ ꓒ ꓓꓵꓽ ꓡˍ ꓕꓯ ꓬꓲ ꓪ ꓠꓬ “ꓢꓲ ꓒ ꓬꓲ ꓟꓬꓱ ꓗꓪ ꓐꓰ ꓡ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ” ꓐꓰ ꓐꓯ ꓢꓲ ꓠꓬꓲ ꓛꓵ, ꓣꓴ ꓔꓬ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓢꓴ ꓡꓰ ꓣꓴ ꓗꓷ ꓞꓳ, ꓗꓷ ꓕꓯ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓡꓯꓼ ꓐꓳ ꓔꓶ. ꓓꓴ ꓗꓪ ꓕꓯꓼ ꓢꓰꓼ ꓗꓷ ꓐꓰ ꓘꓴꓻ ꓢꓴ ꓗꓷ ꓡꓰꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓬꓲ ꓪ ꓥꓳ ꓡꓳ. ꓔˍ ꓟ ꓡꓰ ꓐꓰ ꓟꓽ ꓥ꓿ ꓬꓲ ꓪ ꓓꓵꓽ ꓙꓽ ꓔˍ ꓟ ꓡꓰ ꓬꓲ ꓪ ꓔꓯ ꓒꓴ ꓫꓵꓺ ꓖꓶ ꓢꓴ꓾ ꓬꓲ ꓪ ꓔꓯ ꓗ, ꓛꓲꓽ ꓠꓲ, ꓖꓶ ꓢꓴ ꓟꓽ ꓥ ꓟ ꓑꓶ. ꓓꓴ꓾ ꓬꓲ ꓪ ꓓꓵꓽ ꓙꓽ ꓔˍ ꓟ ꓡꓰ ꓐꓰ ꓟꓯꓼ ꓔꓯ ꓢꓰꓼ ꓢꓴ ꓟꓽ ꓥ ꓟ ꓑꓶ. ꓓꓴ ꓬꓲ ꓪ ꓠꓬ ꓠꓲ, ꓟ ꓫ. ꓡꓳ꓿
ꓖꓳ ꓡꓱ ꓠꓬꓲ ꓟ. ꓟꓲꓽ ꓕꓱ ꓟ ꓣꓳ ꓔꓯ ꓟ. ꓖꓶ ꓡˍ ꓟ ꓠꓬ ꓠꓬꓲ. ꓠꓬꓲ ꓗꓪ ꓛꓲ ꓞꓳ ꓫꓵꓽ ꓞꓳ ꓙꓰꓽ ꓖꓳ ꓕꓲ ꓙꓰꓽ ꓟ ꓙꓳˍ ꓢꓰꓽ ꓡꓳ꓿ ꓮ ꓡꓲ ꓥ ꓡ ꓐꓯˍ ꓠꓬ ꓬꓲ ꓪ ꓗꓳ. ꓢꓻˍ ꓕꓲ ꓑ, ꓗꓪ꓾ ꓬꓲ ꓪ ꓜꓽ ꓢꓻˍ ꓕꓲ ꓑ, ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓚꓵ ꓚꓵ ꓦ ꓡꓱˍ ꓡꓳ꓿ ꓪꓽ ꓘꓴˍ ꓡꓳ꓿ ꓫ. ꓟꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓫ. ꓙꓵ ꓟꓶ ꓙꓵˍ ꓟ ꓔꓳ, ꓜꓳꓽˍ ꓕꓯ꓾ ꓡꓯꓼ ꓐꓳ ꓔꓶ. ꓓꓴ ꓖꓳ ꓟ ꓔꓯ ꓟꓳ ꓡꓰˍ ꓕꓯ ꓬꓲ ꓪ ꓠꓬ ꓙꓳˍ ꓡꓳ꓾ ꓪꓴ‐ꓢ ꓔꓯ ꓙꓱꓽˍ ꓡꓳ꓿ ꓧ‐ꓡꓰ‐ꓡꓴ‐ꓬ ꓐꓰ ꓘꓴ ꓟꓽ ꓐ ꓡ꓾ ꓪꓴ‐ꓢ ꓔꓯ ꓫ. ꓟꓳ ꓐꓰ ꓣꓷꓠ. ꓟꓽ ꓐ ꓡꓺꓳ꓿ ꓕꓱ ꓟ ꓠꓬ ꓞꓳ ꓜꓴ ꓖꓳ ꓕꓲ ꓜꓴ ꓟ ꓔꓯ ꓫꓱ.ˍ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ,꓾ ꓢꓲ ꓒ ꓬꓰ‐ꓢꓴ ꓬꓲ ꓚꓱ, ꓠꓬ ꓣꓳ ꓓꓵꓽ ꓙꓽ ꓔˍ ꓟ ꓡꓰ ꓐꓰ ꓟꓽ ꓥ ꓕꓯ ꓥˍ ꓟꓲ꓾ ꓮ ꓡꓲ ꓕꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓘꓳ ꓣꓴ ꓠ ꓗ, ꓡꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
ꓣꓳ ꓢꓲ ꓒ ꓬꓰ‐ꓢꓴ ꓬꓲ ꓚꓱ, ꓔꓯ ꓡꓳ. ꓠꓬꓲˍ ꓔꓯ ꓬꓲ ꓠꓬ ꓖꓳ ꓕꓲ ꓑ, ꓗꓪ ꓚꓵ ꓚꓵ ꓠꓲ, ꓫ. ꓟ ꓔꓳ, ꓜꓳꓽ ꓔꓬ ꓡꓳ꓿ ꓬꓲ ꓮ ꓘꓶ. ꓠꓲ, ꓠꓵˍ ꓟ ꓬꓲ ꓛꓳꓽ ꓒꓯ, ꓐꓴ ꓥˍ ꓟꓲ ꓬꓲ ꓔꓯ ꓡꓳ, ꓒꓰ, ꓔꓲ. ꓬꓰꓳ꓿ ꓠꓲ, ꓠꓵ ꓓꓰ ꓡꓰˍ ꓟ ꓘ‐ꓡꓳ‐ꓒ ꓬꓴ‐ꓓ ꓥˍ ꓟꓲ ꓬꓲ ꓔꓯ ꓪꓴꓽ ꓜꓽ ꓗꓷꓳ꓿ ꓢꓷ. ꓠꓲ, ꓢꓷ. ꓢꓴ ꓒ‐ꓡꓲ‐ꓢꓷ ꓐꓴ ꓥˍ ꓟꓲ ꓬꓲ ꓔꓯ ꓡꓯꓼ ꓙꓱ ꓗꓷꓳ꓿ ꓣꓳ‐ꓟ ꓡ ꓞꓳ ꓥˍ ꓟꓲ ꓬꓲ ꓔꓯ ꓓꓶꓽ ꓠꓬꓲ ꓔꓲ. ꓠꓬꓲ ꓕꓱ ꓡꓱ ꓐꓰ ꓔꓳ, ꓜꓳꓽ ꓔꓬ ꓡꓳ꓿ ꓠꓲ, ꓫ. ꓟ ꓐꓯˍ ꓟ ꓠꓬ ꓐꓯ ꓖꓴ ꓟꓽ ꓓꓻꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓢꓲ ꓒ ꓬꓰ‐ꓢꓴ ꓬꓲ ꓛꓲ ꓓꓴ ꓚ ꓠ ꓗ, ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓙꓲ ꓟ ꓔꓯ ꓙꓲˍ ꓟ ꓗꓪ ꓐꓰ ꓧꓪ. ꓡꓰꓳ꓿ ꓟꓽ ꓙꓵꓻ ꓟ ꓔꓯ ꓙꓵꓻ ꓠꓲ, ꓡꓰ ꓧꓪ. ꓡꓰꓳ꓿ ꓦꓶ ꓠꓲ, ꓔꓯ ꓠꓵꓻ ꓠꓲ, ꓡꓰ ꓧꓪ. ꓡꓰꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓣꓳ ꓐꓱ ꓶ ꓕꓱ ꓘꓶ ꓛꓲ ꓠꓻ ꓜꓲꓽ ꓗꓷꓳ꓿ ꓣꓳ ꓐꓱ ꓶ ꓬꓲ ꓠꓬ ꓕꓱ ꓘꓶ ꓛꓲ ꓫ. ꓙꓵ ꓜꓲꓽ ꓢꓲ ꓫꓵꓻ ꓘꓪ ꓡꓰ ꓢꓲ ꓠꓬꓲ ꓚꓬꓴ. ꓙ ꓗꓷꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼˍ ꓟ ꓦꓬꓼ ꓠꓬꓲ ꓗꓪ ꓢꓻˍ ꓥ ꓟꓲ꓾ ꓫ. ꓥˍ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓕꓶ ꓕꓶ ꓡꓰꓽ ꓪꓳ ꓔ ꓡꓯ꓿ ꓣꓳ ꓟꓽ ꓢꓷ. ꓟꓽ ꓗꓴ.꓿ ꓣꓳ ꓪꓴ. ꓠꓶ. ꓟꓽ ꓙꓳ ꓟ ꓦꓬꓼ ꓠꓬꓲ ꓗꓪ ꓣꓳ ꓓꓵꓽ ꓙꓽ ꓟꓽ ꓗꓴ. ꓟ ꓦꓬꓼ ꓠꓬꓲ ꓗꓪˍ ꓟꓲ ꓪꓴ‐ꓢ ꓔꓯ ꓙꓵꓻ ꓠ, ꓟ ꓠꓴ ꓕꓽ ꓓꓵꓽ ꓙꓽ ꓟꓬꓽ꓿ ꓮ ꓕꓯ ꓥ ꓟꓲ ꓪꓴ‐ꓢ ꓔꓯ ꓪꓳ ꓔ ꓢꓲ ꓠꓬꓲ꓾ ꓢꓲ ꓒꓽꓳ ꓠꓴ ꓠꓲ, ꓡꓶꓽ ꓒꓬꓱꓼ ꓡ ꓝꓲ ꓐꓯ ꓢꓲ ꓠꓬꓲ ꓬꓰ ꓘꓴˍ ꓟ ꓞꓳ ꓤ ꓒꓬꓱꓼ ꓡ ꓝꓲ ꓡꓯ꓿ ꓠꓬꓲ. ꓠꓬꓲ ꓑꓮꓡꓟ ꓢꓴꓠꓓꓮꓬ ꓐꓯˍ ꓟ ꓕꓱ ꓟ ꓠꓬ ꓣꓳ ꓠꓬ ꓠꓵꓻ ꓠꓲ, ꓔꓯ ꓪ ꓜꓲ ꓟꓳ. ꓖꓶ ꓠ, ꓟ꓾ ꓮ ꓡꓲ ꓫꓵꓽ ꓔꓳ, ꓜꓳꓽ ꓡˍ ꓥ ꓟꓲ ꓠꓵꓻ ꓠꓲ, ꓔꓯ ꓡꓰꓽ ꓢꓲꓺ ꓠ, ꓟ꓾ ꓙꓵˍ ꓟ ꓐꓰ ꓟꓽ ꓙꓵ ꓟ ꓔꓳ, ꓜꓳꓽ ꓡ ꓕꓯ ꓙꓵ ꓠꓲ, ꓔꓯˍ ꓡꓰꓽ ꓢꓲ ꓠ, ꓟ꓾ ꓠꓵꓻ ꓠꓲ, ꓐꓰ ꓦꓶ ꓠꓲ, ꓔꓳ, ꓜꓳꓽ ꓡ ꓕꓯ ꓥ ꓟꓲ ꓠꓵꓻ ꓠꓲ, ꓔꓯ ꓡꓰꓽ ꓢꓲꓺ ꓢꓲ ꓠꓬꓲ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓮ ꓫꓵꓽ ꓗꓪ ꓥˍ ꓟꓲ ꓪꓴ‐ꓢ ꓟꓬꓱ ꓓꓳꓽ ꓔꓯˍ ꓡꓰꓽ ꓢꓲꓺ ꓢꓲ ꓠꓬꓲ ꓬꓰ ꓐ ꓡˍ ꓟ ꓞꓳ ꓤ ꓒꓬꓱꓼ ꓡ ꓝꓲ ꓡꓯ꓿ ꓮ ꓕꓯ ꓥ ꓟꓲ ꓢꓲ ꓒ ꓔꓯ ꓧ‐ꓡꓰ‐ꓡꓴ‐ꓬ ꓘꓴ ꓐ ꓡˍ ꓟ꓾ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓐ ꓡˍ ꓟ ꓞꓳ ꓤ ꓒꓬꓱꓼ ꓡ ꓝꓲ ꓡꓯ꓾ ꓐꓰ ꓬꓲꓼ ꓠꓬꓲ. ꓖꓶ ꓠꓲ, ꓫꓵˍ ꓡꓳ꓿
