ꓡ‐ꓢ‐ꓣꓴ ꓡꓰ ꓐꓰ ꓣꓳ ꓥ ꓟꓲ ꓤꓶꓻ ꓫꓵꓼ ꓠꓯꓼ ꓗꓪ ꓘꓴ ꓔ ꓟ ꓢꓲ ꓒꓽ ꓢꓯꓼ ꓔꓯ ꓑ ꓙ ꓪ ꓟꓶ ꓡꓰ ꓝꓲ꓾
ꓜ ꓚꓲ. ꓚꓲ. ꓡꓲ ꓠꓽ ꓕꓲ ꓠꓽ ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲ ꓒ ꓬꓰ‐ꓢꓴ ꓡ‐ꓢ‐ꓣꓴ ꓔꓯ ꓢꓯ. ꓬꓲꓼ ꓡ ꓝꓲ_ ꓟ ꓚꓱ, ꓔꓯ ꓟꓳ. ꓟ. ꓖꓶ ꓔ ꓡꓳ꓿ “ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓫꓵꓻ ꓟ ꓔꓯ ꓧꓪ. ꓡꓰ ꓟ ꓐꓰ ꓖꓳ ꓓꓱ ꓔꓲ, ꓟ ꓗꓪ ꓐꓰ ꓣꓳ ꓪ ꓟꓶ ꓡ ꓟ ꓕꓲ ꓞꓲꓼ ꓕꓲ ꓑ ꓣꓱ ꓛꓰ ꓔꓯ ꓟ. ꓖꓶ_ ꓟ ꓬꓲ. ꓚꓱ, ꓥ ꓟꓲ ꓥ ꓡꓳ꓾” ꓕꓱ ꓟ ꓠꓬ ꓣꓳ ꓔꓯ ꓐꓲ ꓜꓲꓼ ꓡꓰ ꓟ ꓢꓯꓼ ꓟꓬ ꓠꓯꓼ ꓗꓪ ꓘꓴ ꓔ ꓡꓳ꓾ ꓪꓴ‐ꓢ ꓣꓱ ꓛꓰ ꓗꓪ ꓐꓰ ꓬꓲ. ꓫꓵꓼ ꓒꓳ, ꓡꓶ. ꓢꓲ ꓠꓬꓲ ꓟꓳ ꓓꓴ ꓠꓯꓼ ꓗꓪ ꓛꓳ ꓫꓱꓽ ꓠ, ꓟ ꓐꓰ ꓢꓲ ꓒꓽ ꓪꓴ ꓓꓰ ꓡꓰ ꓟ ꓫꓱ. ꓤ ꓠꓵꓻ ꓠꓲ, ꓔꓯ ꓢꓷ. ꓠ, ꓟ ꓢꓯꓼ ꓖꓶ ꓔ ꓟ ꓥꓳ꓿
ꓡ‐ꓢ‐ꓣꓴ ꓬꓲ ꓮ ꓝꓲ ꓟ‐ꓕꓲ ꓔꓯ ꓐꓯ ꓖꓶ ꓔ ꓟ ꓡꓰ ꓐꓰ ꓠꓬꓲ. ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ “ꓥꓪ ꓠꓽ ꓢꓯ. ꓬꓲꓼ ꓡ ꓟ ꓐꓰ ꓢꓯꓼ ꓟꓬ ꓥ ꓡꓳ꓾ ꓥꓪ ꓔꓯ ꓙꓵꓻ ꓢꓴ ꓠꓬ ꓫꓵꓻ ꓥ ꓟꓲ ꓢꓯ. ꓬꓲꓼ ꓡ ꓥꓳ꓾ ꓢꓯ. ꓔꓬ ꓢꓲ ꓥꓪ ꓔꓯ ꓙꓵꓻ ꓢꓴ ꓥ ꓕ ꓑꓳ ꓠꓬ ꓕꓲ ꓞꓲꓼ ꓟꓽ ꓫꓵꓻ꓿” ꓐꓰ ꓐꓯ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓢꓲ ꓫꓬ ꓟ ꓕꓲꓽ ꓠꓽ ꓟꓽ ꓛꓲ ꓢꓲ ꓕꓯ ꓛꓲ ꓡ ꓟ ꓥ ꓢꓲ꓾ ꓡ ꓠ, ꓟ ꓕꓲꓽ ꓫꓵ ꓠꓽ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓫ ꓙꓵ ꓟꓷꓼ ꓙꓵ ꓟ꓾ ꓬꓲ ꓟꓶꓽ ꓜ ꓜ ꓟ꓾ ꓧꓳꓽ ꓔꓯ, ꓙꓰ ꓟ꓾ ꓡꓯꓼ ꓐꓳ ꓔꓶ. ꓓꓴ ꓗꓪ ꓕꓯꓼ ꓔꓶ. ꓫꓵꓻ ꓟ꓾ ꓔꓵ._ ꓟ ꓔꓯ ꓝꓮꓲ ꓓꓵꓽ ꓙ ꓡꓰ ꓝꓲ_ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓕꓱ ꓟ ꓗꓪ ꓐꓰ ꓣꓳ ꓠꓬ ꓚꓲ ꓛꓬ ꓔꓱ, ꓚꓲ ꓛꓬ ꓓꓵ ꓙ ꓔꓱ, ꓕ ꓢꓲ ꓕꓱ ꓟ ꓔꓯ ꓣꓳ ꓟꓬ ꓠꓬꓲ ꓙ ꓜꓲꓼ ꓢꓲ ꓖꓶ ꓡ ꓟ ꓣꓱ ꓛꓰ ꓔꓯ ꓘꓳ, ꓣꓴ ꓠ, ꓟ ꓥ ꓡꓳ꓿
ꓕꓱ ꓟ ꓠꓬ ꓢꓯ. ꓬꓲꓼ ꓡ ꓟ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓐꓲ ꓜꓲꓼ ꓡꓰ ꓟ ꓥ ꓡꓳ꓿ ꓢꓲ ꓒ ꓠꓬ ꓫꓵꓻ ꓟ ꓔꓯ ꓧꓪ. ꓡꓰ ꓢꓲ꓾ ꓣꓳ ꓔꓯ ꓚꓬꓴ ꓙ ꓟ ꓐꓰ ꓐꓲ ꓜꓲꓼ ꓟ ꓢꓯꓼ ꓟꓬ ꓐꓱ ꓶ ꓖꓳ ꓓꓱ ꓔꓲ, ꓟ ꓗꓪ ꓐꓰ ꓣꓳ ꓠꓯꓼ ꓗꓪ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
ꓪꓴ‐ꓢ ꓣꓱ ꓛꓰ ꓠꓬ ꓟꓲ ꓠꓯ ꓔꓯ ꓠꓬꓲ ꓟꓳ ꓓꓴ ꓖꓶ ꓥ ꓟꓲ ꓣꓳ ꓠꓬ ꓔꓱ, ꓟ ꓗ, ꓛꓲ ꓓꓴ ꓔꓯ ꓖꓶ ꓟꓽ ꓐ ꓡ ꓟ ꓔꓯ ꓡꓰ ꓧꓪ ꓢꓲ ꓙ ꓖꓴ ꓟꓶꓽ ꓡꓰ ꓔꓬ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓬꓲ. ꓙꓵ,꓾ ꓢꓯꓼ ꓪ꓾ ꓬꓲ. ꓒꓵꓽ ꓒꓵ ꓟ ꓐꓰ ꓠꓱ. ꓐꓯꓼ ꓢꓴ ꓔꓯ ꓙꓳ_ ꓟ ꓫꓱ. ꓤ ꓠꓲ, ꓖꓴ ꓡꓰ ꓝꓲ_ ꓟ ꓔꓯ ꓡꓰ ꓧꓪ ꓔꓬ ꓢꓲ ꓙ ꓖꓴ ꓟꓶꓽ ꓡꓰ ꓗꓴ. ꓡꓳ꓿ ꓟꓬꓱꓺ ꓓꓳ ꓙꓳ ꓟ꓾ ꓕꓲ ꓑ, ꓞ ꓗ, ꓛꓲ_ ꓟ ꓠꓬ ꓣꓳ ꓠꓲ, ꓟ ꓔꓯ ꓐꓲ ꓜꓲꓼ ꓡꓰ ꓝꓲ ꓥ ꓟꓲ ꓟꓽ ꓥ ꓠꓬ ꓣꓳ ꓔꓯ ꓫꓵꓻ ꓡꓰ ꓝꓲ ꓟꓽ ꓐ ꓡ ꓟ ꓐꓰ ꓓꓵꓽ ꓙ ꓥꓳꓽ ꓢꓲ ꓖꓳ ꓟ ꓠꓯꓼ ꓗꓪ ꓡꓰ ꓧꓪ ꓢꓲ ꓛꓳ ꓫꓱꓽ ꓔꓬ ꓫꓵ ꓙꓳ_ ꓡꓳ꓿
ꓣꓳ ꓮ ꓙꓵ ꓠꓲ, ꓟ ꓘꓴꓽ ꓠꓯꓽ ꓗꓪ “ꓕꓲ ꓞꓲꓼ ꓕꓲ ꓑ ꓔꓯ ꓡꓰ ꓥꓳ ꓡꓳ. ꓔꓬ ꓫꓵ ꓙꓳ_ ꓡꓳ꓾” ꓕꓱ ꓟ ꓔꓯ ꓠꓬ ꓟꓶꓽ ꓡꓰ ꓗꓴ. ꓟ ꓐꓬ ꓡꓰ ꓗꓴ. ꓟ ꓶ ꓤꓼ ꓗꓪ ꓐꓰ ꓖꓶ ꓟꓽ ꓐ ꓡ ꓟ ꓔꓯ ꓐꓯ ꓔ ꓡꓳ꓿ ꓢꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ “ꓣꓳ ꓠꓬ ꓪꓴ‐ꓢ ꓐꓱ ꓶ ꓚꓰꓼ ꓔ ꓟꓶ ꓢꓴ ꓥ ꓢꓲ꓾ ꓬꓲ ꓠꓯꓼ ꓗꓪ ꓪꓴ ꓧꓶ ꓟꓽ ꓠ ꓠꓬ ꓣꓳ ꓠꓯꓼ ꓗꓪ ꓢꓲ ꓡꓲ, ꓟ ꓟꓽ ꓟꓶ꓾” ꓐꓰ ꓐꓯ ꓔ ꓟ ꓐꓯ ꓘꓶꓽ ꓗꓪ ꓐꓰ ꓢꓯꓼ ꓖꓶ ꓔ ꓟ ꓥ ꓡꓳ꓿
ꓬꓲ ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓡ‐ꓢ‐ꓣꓴ ꓢꓯ. ꓬꓲꓼ ꓡ ꓟ ꓠꓬ ꓢꓲ‐ꓫꓬ‐ꓟ‐ꓦ ꓬꓲ ꓢꓯꓼ ꓪ ꓗꓪ ꓐꓰ ꓣꓳ ꓔꓯ ꓢꓯꓼ ꓖꓶ ꓟ ꓔꓯ ꓐꓯ ꓔ ꓡꓳ꓿ ꓠꓲ, ꓦꓯ. ꓟ꓾ ꓟꓲ ꓠꓯ ꓒꓴ ꓫꓵꓺ꓾ ꓜꓲ ꓜꓲ ꓟꓴ ꓟꓴ ꓬꓰ ꓟ꓾ ꓮ ꓟꓴ ꓕꓲ ꓕ ꓡꓰ ꓥ ꓟ ꓡꓱꓼ ꓜꓴ ꓘꓴꓽ ꓗꓪ ꓣꓳ ꓔꓯ ꓐꓲ. ꓔ ꓟ ꓡꓳ ꓓꓰ ꓡꓰ ꓐꓰ ꓟꓽ ꓙꓲ_ ꓟ ꓫꓱ, ꓔꓯ ꓣꓳ ꓠꓲ, ꓟ ꓗꓪ ꓐꓰ ꓣꓴ ꓡꓳ ꓗꓷ ꓠ, ꓟ ꓡꓲ, ꓙꓰ ꓪ ꓟꓶ ꓡꓰ ꓝꓲ꓾
ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓥ ꓟꓲ “ꓓꓳ ꓡꓯ꓾” ꓐꓰ ꓘꓴ ꓔ ꓡꓳ꓿ ꓖꓳ ꓣꓳꓺ ꓟ ꓔꓶ. ꓗꓪ ꓐꓰ ꓡꓲ, ꓙꓰ ꓠ, ꓟ ꓢꓲ ꓒ ꓣꓱ ꓛꓰ ꓗꓪ ꓐꓰ ꓬꓲ. ꓫꓵꓼ ꓒꓳ, ꓠ, ꓟ꓾ꓫꓱ. ꓤ ꓠꓵꓻ ꓠꓲ, ꓠꓬꓲ ꓟꓳ ꓓꓴ ꓠꓯꓼ ꓗꓪ ꓛꓳ ꓫꓱꓽ ꓠ, ꓟ꓾ ꓢꓯꓼ ꓖꓶ ꓔ ꓡꓳ꓿
ꓢꓲ ꓫꓬ ꓟ ꓕꓲ ꓫꓵ ꓠꓽ ꓗꓪ ꓟ, ꓟ ꓟ‐ꓡꓲ ꓬꓲ ꓙꓵꓻ ꓠꓲ,꓾ ꓔꓱ, ꓟ ꓐꓰ ꓢꓯ. ꓔꓬ ꓠ, ꓟ ꓟ, ꓟ ꓟ‐ꓡꓲ ꓠꓯꓼ ꓗꓪ ꓶ ꓓꓰ ꓓꓴ ꓬꓰ ꓡꓯ꓾ ꓢꓯ. ꓬꓲꓼ ꓡ ꓟ ꓤ ꓔꓲ ꓐꓰ ꓜꓲ ꓡꓯ ꓘꓳ ꓟ ꓪꓴ ꓓꓰ ꓡꓰ ꓟ ꓬꓲ ꓚꓱ, ꓠꓬ ꓣꓳ ꓠꓯꓼ ꓘꓴꓽ ꓗꓪ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓬꓲ. ꓫꓵꓼ ꓗꓷ ꓡꓰ ꓔꓬ ꓟ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ꓿
