ꓮ ꓫꓵꓽ ꓑꓶ. ꓓꓴ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓚꓱ, (Global warming)
ꓧꓪ. ꓧꓪ ꓠꓬꓲ ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓖꓡꓳꓐꓮꓡ ꓪꓮꓣꓟꓲꓠꓖ ꓐꓯ ꓟ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬꓽ ꓠꓬ ꓞ ꓡ ꓔꓬ ꓡ ꓐꓰ ꓡꓳ. ꓠꓬꓲ ꓕꓯ (3) ꓝꓲ. ꓗꓪ ꓐꓰ ꓡꓳ. ꓟꓳ ꓓ ꓡꓳ꓿
ꓓꓽ ꓪꓴ. ꓕꓲ ꓠꓬꓲ ꓟꓲ ꓠꓯ ꓠꓬ ꓫꓵꓻ ꓠ ꓗꓪ ꓛꓲ ꓠꓻ ꓒꓬ ꓓꓴ ꓔꓳ, ꓜꓳ ꓔꓬ ꓡꓳ ꓐꓯ ꓟ ꓚꓱ, ꓔꓯ ꓡꓳ. ꓠꓬꓲ ꓓꓴ ꓬꓰ ꓡꓯ꓿
ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓽ ꓡ ꓟ ꓬꓲ ꓚꓰ. ꓠꓬ ꓖꓣꓰꓰꓠ ꓧꓳꓴꓢꓰ ꓐꓯ ꓟ (ꓟꓳ‐ꓖ) ꓦꓲꓻ ꓫꓬ ꓢꓲ ꓠꓬꓲ ꓪꓳꓽ ꓒꓬ ꓪꓳꓽ ꓟꓬ ꓔꓶ. ꓟ ꓑꓶ. ꓓꓴ ꓥ ꓡꓳ ꓐꓰ ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓐꓯ ꓔ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ ꓟꓳ‐ꓖ ꓪꓴ ꓦꓲꓻ ꓫꓬ, ꓢꓲ ꓠꓬꓲ ꓪꓳꓽ ꓒꓬ ꓪꓳ ꓟꓬ ꓔꓶ. ꓟ ꓦꓲꓻ ꓗꓪ ꓟꓲ ꓟꓲ ꓛꓲ ꓡꓯꓼ ꓠꓬ ꓬꓲ ꓐ ꓢꓲ ꓠꓬꓲ ꓓꓳ ꓡꓰ ꓟꓽ ꓓ ꓗꓽ ꓕꓽ ꓔ ꓟ ꓡꓵ ꓔ ꓟ ꓪꓴ. ꓠꓬꓲ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓝꓮꓲ ꓮ ꓟꓶ ꓟ ꓙꓵ, ꓗꓪ ꓟꓳ ꓓꓳ ꓧꓪ ꓞꓶ ꓔꓯ ꓮ ꓟꓬ, ꓛꓲ ꓣꓱ ꓟ ꓑꓶ. ꓓꓴ ꓟꓲ ꓠꓯ ꓞ ꓡ ꓟ ꓥ ꓡꓳ꓿ ꓙꓼ ꓦꓲꓻ ꓓꓽ ꓫꓬ, ꓢꓲ ꓠꓬꓲ ꓮꓽ ꓔꓳ ꓦ ꓠ, ꓟ ꓐꓱ ꓶ ꓫꓬ, ꓔ ꓥ ꓟꓲ ꓕꓱ ꓟ ꓘꓴꓽ ꓗꓪ ꓣꓱ ꓟ ꓠꓬ ꓟꓽ ꓙꓲ ꓟ ꓮ ꓔꓳ ꓟꓵꓽ ꓘꓴꓽ ꓮ ꓘꓶ. ꓛꓲ ꓓꓳ ꓡ ꓟ ꓑꓶ. ꓓꓴ ꓟꓲ ꓠꓯ ꓞ ꓡ ꓓꓴ ꓒꓬꓱꓼ ꓡ ꓟ ꓥ ꓡꓳ꓿
ꓝꓮꓲ ꓬꓲ ꓙꓵ, ꓟꓶ ꓫꓵˍ ꓫꓵˍ ꓙꓳ ꓟ ꓢꓲ, ꓜꓲ ꓢꓲ, ꓟꓬ ꓔꓯ ꓘꓶꓽ ꓗꓷ ꓟ ꓪꓴꓽ ꓤ ꓗꓷ ꓟ ꓑꓶ. ꓓꓴ ꓟꓵꓽ ꓘꓳꓼ ꓒꓳ, ꓡ ꓓꓴ ꓒꓬꓱꓼ ꓡ ꓟ ꓥ ꓡꓳ꓿ ꓢꓲ, ꓜꓲ ꓠꓬ ꓟꓽ ꓙꓲ ꓟ ꓟꓲꓽ ꓦꓲꓻ ꓔꓯ ꓣꓴ ꓔꓯꓺ ꓙꓰ ꓟ ꓢꓯꓼ ꓪ ꓙꓳ ꓟ ꓥ ꓢꓲ ꓠꓬꓲ ꓙꓲ ꓟ ꓟꓲꓽ ꓦꓲꓻ ꓔꓯ ꓖꓶ ꓐ ꓡ ꓟ ꓥ ꓡꓳ꓿
ꓝꓮꓲ ꓢꓲ, ꓜꓲ ꓢꓲ, ꓟꓲ ꓟꓽ ꓙꓳ ꓡꓰ ꓠꓬ ꓟꓲꓽ ꓞ ꓞ ꓟ ꓔꓯ ꓗꓽ ꓕꓽ ꓟꓽ ꓐ ꓗꓷ ꓡꓰ ꓢꓲ ꓠꓬꓲ ꓟꓲ ꓠꓯ ꓗꓪ ꓟꓲ ꓞ ꓞ ꓡ ꓟ ꓮ ꓘꓶ. ꓞ ꓡ ꓟ ꓥ ꓡꓳ꓿ ꓖꓳ ꓡꓰ ꓟ ꓟꓽ ꓞꓲ ꓡ ꓞꓳ ꓐꓴ ꓡꓰ ꓟꓶ ꓛꓵꓽ ꓔꓯ ꓡꓳ. ꓗꓷ ꓟ ꓗꓪ ꓐꓰ ꓓꓳ ꓡ ꓟ ꓬꓲ ꓢꓯꓼ ꓠꓬ ꓟꓵꓽ ꓘꓳꓼ ꓒꓳ, ꓡ ꓝꓲ ꓓꓴ ꓙꓳ ꓡ ꓟ ꓥꓡꓳ꓿
ꓖꓳ ꓡꓱ ꓠꓬ ꓣꓳ ꓮ ꓡꓰ ꓐꓰ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓔꓯ ꓗꓽ ꓕꓽ ꓠ, ꓟ ꓣꓱ ꓬꓰ ꓠ, ꓔ ꓡ ꓐꓯ ꓠꓬ
ꓟꓲ ꓠꓯ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓠꓬ ꓠꓴ ꓥꓪ ꓐꓰ ꓮ ꓫꓵꓽ ꓖꓳ ꓙꓰ ꓙꓳ ꓡ.? ꓮ ꓫꓵꓽ ꓟꓽ ꓢꓯ ꓟꓳ ꓕꓽ ꓓꓴ ꓙ ? ꓣꓳ ꓔꓬ ꓟ ꓟꓬ‐ꓟ ꓗꓴꓷꓼ ꓗꓪ ꓟꓶ ꓞ ꓮ ꓘꓶ. ꓞ ꓡ ꓟ ꓥ ꓡꓳ꓿
ꓞ ꓝꓲ. ꓗꓪ ꓟꓬ‐ꓟ ꓗꓴꓷꓼ ꓗꓪ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓮ ꓘꓶ. ꓞ ꓡ ꓡꓳ ꓐꓰ ꓢꓷ. ꓠꓲ, ꓙ ꓳ ꓢꓴ ꓡꓰ ꓐꓯ ꓖꓶ ꓔ ꓡꓳ꓿ ꓝꓮꓲ ꓟꓵꓽ ꓘꓳꓼ ꓒꓳ, ꓡ ꓢꓲ ꓠꓬꓲ ꓬꓲ ꓙꓵ, ꓟꓽ ꓥ ꓬꓲꓻ ꓙꓬ ꓙꓵꓽ ꓟ ꓟꓵꓽ ꓡꓶꓽ ꓟ ꓫ. ꓓꓴ ꓮ ꓟꓬ, ꓫꓵꓽ ꓔꓳ, ꓜꓳ ꓗꓷ ꓟ ꓥ ꓡꓳ꓿
ꓕꓱ ꓡꓱ ꓗꓷ ꓡꓰ ꓟ ꓠꓬ ꓟꓵꓽ ꓗꓪ ꓙꓳ ꓟ ꓢꓲ, ꓜꓲ ꓢꓲ, ꓟꓲ ꓔꓯ ꓘꓰ ꓗꓷ ꓟ ꓑꓶ. ꓓꓴ ꓝꓮꓲ ꓫꓵꓺ ꓮ ꓘꓶ. ꓛꓲ ꓚꓴ. ꓗꓷ ꓟ ꓑꓶ. ꓓꓴ ꓟꓵꓽ ꓐꓬ ꓡꓰ ꓟ ꓑꓶ. ꓓꓴ ꓟꓵꓽ ꓘꓳꓼ ꓒꓳ, ꓡ ꓢꓲ ꓠꓬꓲ ꓡ ꓞꓳ ꓐꓴ ꓔꓯ ꓫꓵꓽ ꓪꓴ ꓓ ꓟ ꓖꓶ ꓡ ꓟ ꓥ ꓡꓳ꓿
ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓪꓴ. ꓠꓬꓲ ꓬꓲꓻ ꓡꓳ ꓐꓱ ꓗꓪ ꓬꓲꓻ ꓙꓬ ꓠꓬ ꓮ ꓘꓶ. ꓛꓲ ꓕꓯ ꓡ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓮ ꓡꓰ ꓐꓰ ꓟꓵꓽ ꓘꓳꓼ ꓒꓳ, ꓡ ꓔꓯ ꓗꓽ ꓕꓽ ꓓꓴ ꓮ ꓡꓰ ꓬꓰ ꓠꓯ, ꓡ ꓐꓯ ꓠꓬ
ꓮ ꓟꓶ ꓟꓲ ꓠꓯ ꓗꓪ ꓞꓳ ꓙꓳ ꓢꓯ. ꓔꓬ ꓟ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓠꓬ ꓟꓵꓽ ꓘꓳꓼ ꓒꓳ, ꓡ ꓟ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓮ ꓟꓬ ꓔꓳ, ꓜꓳ ꓗꓷ ꓢꓴ ꓐꓴ ꓥ ꓟ ꓡꓰ ꓟꓽ ꓞꓲ ꓟꓵꓽ ꓘꓳꓼ ꓒꓳ, ꓡ ꓟ ꓟꓲ ꓠꓯ ꓞ ꓡ ꓟ ꓚꓱ, ꓔꓯ ꓗꓽ ꓕꓽ ꓓꓴ ꓟꓬꓱꓽ ꓬꓰ ꓐ ꓡ ꓢꓴ ꓐꓴ ꓥ ꓡꓳ꓿
ꓖꓳ ꓡꓱ ꓠꓬ ꓣꓳ ꓟꓵꓽ ꓘꓳꓼ ꓒꓳ, ꓡ ꓓꓴ ꓟꓲ ꓠꓯ ꓞ ꓡ ꓓꓴ ꓔꓯ ꓗꓽ ꓕꓽ ꓠ, ꓟ ꓣꓱ ꓬꓰ ꓠ, ꓟ ꓟꓬꓱꓽ ꓠꓬ
- ꓣꓱ ꓟꓽ ꓬꓯꓼ ꓬꓯꓼ ꓮ. ꓔꓳ ꓔꓯ ꓮꓽ ꓔꓳ ꓔꓳ ꓒꓴ ꓔ ꓟ ꓔꓯ ꓤ ꓟꓳ ꓓꓴ ꓬꓰ ꓡꓯ꓿ ꓮ ꓔꓳ. ꓙ ꓔꓯ ꓙ ꓖꓴ ꓙꓳ ꓙꓳ ꓣꓱ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓡꓯ꓿
- ꓢꓲ, ꓜꓲ ꓢꓲ ꓟꓲ ꓔꓶ ꓢꓲ ꓬꓲ ꓠꓲ, ꓚꓵˍ ꓟ ꓟꓵꓽ ꓒꓬꓱꓼ ꓡ ꓝꓲ ꓠ, ꓟ ꓢꓯꓼ ꓕꓵꓼ ꓠ, ꓟ ꓥ ꓡꓳ꓿ ꓟꓲ ꓠꓯ ꓕꓲ ꓠꓬꓲ ꓡꓰ ꓕ꓾ ꓠꓬꓲ ꓞ ꓡ ꓟ ꓔꓯ ꓗꓽ ꓕꓽ ꓠ, ꓟ ꓐꓱ ꓶ ꓢꓲ, ꓜꓲ ꓔꓯ ꓮ ꓘꓶ. ꓛꓲ ꓔꓶ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓣꓳ ꓦꓲꓻ ꓒ ꓕꓲ ꓗꓪ ꓢꓲ, ꓜꓲ ꓮ ꓟꓬ, ꓔꓶ ꓔ ꓠꓬ ꓮꓲꓣ ꓚꓳꓠ ꓔꓯ ꓣꓱ ꓟꓽ ꓛꓲ ꓠꓬ ꓟꓲ ꓠꓯ ꓞ ꓡ ꓟ ꓔꓯ ꓗꓽ ꓕꓽ ꓟ ꓥ ꓡꓳ꓿
- ꓣꓱ ꓓꓳ ꓡꓰ ꓟ ꓑꓶ. ꓚꓵꓽ ꓔꓯ ꓝꓮꓲ ꓣꓱ ꓠ, ꓟ ꓐꓱ ꓶ ꓣꓰꓚꓬꓚꓡꓰ ꓔꓯ ꓣꓱ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓡꓯ꓿
- ꓝꓮꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓱ ꓔꓬ ꓟ ꓢꓳꓚꓲꓮꓡ ꓟꓰꓓꓲꓮ ꓗꓪ ꓐꓰ ꓟꓵꓽ ꓘꓳꓼ ꓒꓳ, ꓡ ꓟ ꓟꓲ ꓠꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞ ꓡ ꓟ ꓔꓯ ꓗꓽ ꓕꓽ ꓠ, ꓟ ꓢꓷ. ꓠꓲ, ꓙꓳ ꓚꓵ ꓕꓳ ꓶ ꓔꓯ ꓢꓧꓮꓣꓰ ꓖꓶ ꓠ, ꓟ ꓣꓳ ꓚꓵˍ ꓡꓳ꓿
ꓟꓲ ꓠꓯ ꓕꓯ ꓢꓲ ꓠꓬꓲ ꓮ ꓫꓵꓽ ꓥ ꓟꓲ ꓮꓽ ꓔꓳ ꓔꓳꓽ ꓙꓳ ꓟ ꓕꓲ ꓫꓵꓽ ꓟꓲ ꓟꓽ ꓙꓳ ꓟ ꓥ ꓡꓳ꓿ ꓪꓴ‐ꓢ ꓡꓰ ꓚꓰꓼ ꓔ ꓟ ꓮ ꓙꓵꓽ ꓠꓬ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓙꓲ ꓖꓴ ꓙꓳ ꓟ ꓡꓰ ꓥ ꓡꓳ꓿ ꓢꓲ, ꓜꓲ ꓕꓲ ꓢꓲ, ꓬꓲꓻ ꓙꓬ ꓝꓮꓲ ꓮ ꓔꓳ ꓙ ꓮ ꓙꓵꓽ ꓠꓬ ꓣꓳ ꓟꓲ ꓠꓯ ꓗꓪ ꓞꓳ ꓙꓳ ꓢꓯ. ꓔꓬ ꓟ ꓙꓵ, ꓔꓯ ꓣꓳ ꓚꓵˍ ꓟ ꓡꓰ ꓥ ꓡꓳ꓿
ꓣꓳ ꓡꓱ ꓠꓬ ꓛꓲ ꓡ ꓟ ꓣꓳ ꓤ ꓣꓳ ꓠꓱ ꓐꓴ ꓔꓯ ꓙꓲ ꓟ ꓟꓲ ꓠꓯ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓐꓴ ꓔꓯ ꓖꓶ ꓐ ꓡ ꓢꓴ ꓐꓴ ꓒꓬꓱꓼ ꓡ ꓠ, ꓟ ꓣꓳ ꓠꓬꓲ. ꓠꓬꓲ ꓢꓯꓼ ꓕꓵꓼ ꓡꓯ꓿ ꓣꓳ ꓮ ꓙꓵꓽ ꓢꓴ ꓕꓲ ꓠꓲ, ꓕꓲ ꓪ ꓟꓬꓱꓽ ꓬꓰ ꓠꓬ ꓮ ꓙꓵꓽ ꓒꓬꓱꓼ ꓡ ꓓ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓔꓯ ꓮ ꓘꓶ. ꓫ. ꓟꓳ ꓪ꓿ ꓡꓲꓗꓰ ꓮꓠꓓ ꓢꓧꓮꓣꓰ ꓬꓰ ꓙ ꓖꓶ ꓡꓯ꓿
