ꓗꓴꓷꓼ ꓫꓵ ꓪꓴ ꓑꓶ ꓓꓴ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓗꓪ ꓢꓲ, ꓑꓬ ꓐꓱ ꓗꓷ ꓟ ꓑꓮꓲ ꓠꓽ ꓦꓬꓼ ꓠꓬꓲ ꓕꓯ ꓚꓳ ꓙꓰ ꓠ, ꓟ ꓔꓯ ꓟꓽ ꓬꓰ ꓟ꓾
ꓐꓶ ꓓꓳ ꓔꓲ, ꓫꓵ ꓗꓪ ꓒꓬꓱꓼ ꓔꓬ ꓟ ꓗꓴꓷꓼ ꓡꓯ ꓘꓳ ꓔꓬ ꓟ ꓑꓶ ꓓꓴ ꓕꓱ ꓕꓲꓽ ꓘꓳꓼ ꓙꓱ‐ꓣꓴ‐ꓢ‐ꓡꓱ ꓗꓪ ꓔꓬ ꓟ ꓡꓮꓔꓲꓠ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓐꓴ ꓮ ꓛꓬ ꓞꓶ ꓪꓽ ꓚꓲꓻ ꓗꓪ ꓐꓰ ꓙꓱ‐ꓣꓴ‐ꓢ‐ꓡꓱ ꓗꓪ ꓚꓳ ꓙꓰ ꓠ, ꓟ ꓡꓲꓽ ꓒꓰꓼ ꓢꓲ, ꓑꓬ ꓐꓱ ꓗꓷ ꓑꓮꓲ ꓔꓯ ꓟꓽ ꓬꓰ ꓠ, ꓟ ꓐꓯ ꓑꓶ ꓗꓷ ꓟ ꓥꓳ꓿ ꓖꓳ ꓟ ꓗꓪ ꓐꓰ ꓬꓲ ꓪ ꓐꓯ ꓖꓶ ꓔ ꓟ ꓬꓲ. ꓔꓶ. ꓗꓪ ꓡꓳ ꓒꓱ ꓐꓱ ꓶ ꓪꓽ ꓘꓴ ꓟ ꓬꓰ ꓠ, ꓟ ꓥ ꓡꓳ꓿
ꓔꓲꓺ ꓒ ꓓꓽ ꓟ ꓚꓮꓣꓓꓲꓠꓮꓡ Pierbattista Pizzaballa ꓡꓰ ꓡꓳ, ꓬꓰ ꓟ ꓡꓰ ꓐꓰ ꓞꓳ ꓜꓴ ꓞꓳ ꓟꓯꓼ ꓐꓰ ꓬꓰ ꓟꓽ ꓐ ꓡ ꓟ ꓔꓯ ꓐꓯ ꓔ ꓡꓳ꓿ ꓧꓪ ꓞꓶ ꓶ ꓥꓳ ꓙꓱ_ ꓟ꓾ ꓢꓲ ꓫꓬ ꓟ ꓠꓽ ꓥꓪꓽ ꓠꓬꓲ ꓓ ꓟ ꓟꓽ ꓛꓲ ꓢꓲ ꓠꓽ ꓡꓲ. ꓠꓬꓲ ꓕꓯ ꓬꓰ ꓔ ꓟ ꓧꓪ ꓞꓶ ꓶ ꓥꓳꓽ ꓙꓱ_ ꓟ ꓑꓮꓲ ꓠꓯꓼ ꓗꓪ ꓠꓬꓲ. ꓠ. ꓢꓲ ꓢꓯ. ꓬꓲꓼ ꓡ ꓑꓮꓲ ꓦꓬꓼ ꓠꓬꓲ ꓘꓴ ꓗꓪ ꓬꓰ ꓐ ꓡꓰ ꓠ, ꓟ ꓬꓲ. ꓙꓵ, ꓔꓯ ꓛꓵ. ꓗꓷ ꓟ ꓥꓳ꓿ ꓡꓳ ꓒꓱ ꓘꓴꓽ ꓗꓪ ꓪꓽ ꓘꓴ ꓟ꓾ ꓚꓳ ꓙꓰ ꓟ ꓔꓯ ꓟꓽ ꓬꓰ ꓥ ꓟꓲ ꓪꓽ ꓘꓴ ꓦꓲꓻ ꓔꓯ ꓠꓬ ꓒꓴ ꓖꓶ ꓔ ꓟ ꓥ ꓢꓲ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬ ꓪꓽ ꓘꓴ ꓟ ꓔꓯ ꓐ ꓡ ꓟꓬ ꓛꓲ ꓐ ꓐ ꓡꓰ ꓠ, ꓟ ꓬꓰ ꓖꓶ ꓠ, ꓟ ꓥ ꓡꓳ꓿
ꓜ ꓚꓲ. ꓚꓲ. ꓦꓬꓼ ꓠꓬꓲ ꓐꓰ ꓢꓯ. ꓬꓲꓼ ꓡ ꓑꓮꓲ ꓔꓯ ꓕꓲ ꓪ ꓬꓰ ꓟꓽ ꓐ ꓡ ꓟ ꓠꓬ ꓟꓯꓼ ꓢꓰꓼ ꓡꓯ ꓘꓳ ꓟ ꓑꓶ ꓓꓴ ꓔꓳ, ꓜꓳ ꓔꓬ ꓟ ꓠꓻ ꓓꓴ ꓓꓰ ꓢ ꓠꓱ. ꓐꓯꓼ ꓠꓻ ꓓꓴ ꓕꓲꓽ ꓟ ꓥ ꓡꓳ꓾ ꓖꓳ ꓡꓱ ꓥ ꓟꓲ ꓠꓲ, ꓟ ꓟꓽ ꓐꓬ ꓪꓽ ꓘꓴ ꓟ ꓔꓯ ꓟꓽ ꓠꓽ ꓠ, ꓟ ꓢꓯꓼ ꓖꓶ ꓔ ꓡꓳ꓿
3 ꓦ ꓟ 28 ꓠꓬꓲ ꓠꓽ ꓛꓳꓼ ꓠꓬꓲ ꓕꓯ ꓮ ꓙꓵ ꓗꓪ ꓐꓰ ꓕꓲ ꓦꓲꓻ ꓢꓴ꓾ ꓘꓴ ꓜꓲꓼ ꓞꓳ ꓜꓴꓻ ꓗꓪ ꓐꓰ ꓢꓲ ꓡꓲ, ꓗ, ꓛꓲ ꓠ, ꓟꓐꓱ ꓶ ꓪꓽ ꓘꓴ ꓠ, ꓟ ꓬꓲꓼ ꓠꓬꓲ. ꓘꓴ ꓔ ꓡꓳ꓿ ꓣꓳꓢꓮꓣꓬ ꓪꓽ ꓘꓴ ꓟ꓾ ꓟꓬ ꓠꓬꓲ ꓗꓴꓷꓼ ꓫꓵ ꓪꓴ ꓑꓶ ꓓꓴ ꓫ ꓙꓵ ꓟꓷꓼ ꓙꓵ ꓔꓬ ꓢꓴ ꓐꓱ ꓶ ꓢꓲ ꓡꓲ, ꓗ, ꓛꓲ ꓓꓴ ꓙꓳ ꓠ, ꓟ ꓣꓳꓢꓮꓣꓬ ꓪꓽ ꓘꓴ ꓠ, ꓟ ꓢꓯꓼ ꓖꓶ ꓔ ꓡꓳ꓿ ꓧꓪ ꓖꓳ ꓓꓱ ꓕꓲ ꓒꓳ, ꓗꓪ ꓐꓬ ꓡꓰ ꓔꓬ ꓥ ꓟꓲ ꓪꓽ ꓘꓴ ꓟ ꓗꓪ ꓐꓰ ꓕꓲ ꓣꓳ ꓐꓰ ꓕꓲ ꓣꓳ ꓕꓲ ꓠꓲ, ꓕꓲ ꓪ ꓥ ꓟ ꓔꓯ ꓢꓷ. ꓠ, ꓟ ꓔꓶꓻ ꓙꓱꓼ ꓙꓳ ꓟ ꓥ ꓡꓳ꓿
ꓕꓱ ꓡꓱ ꓥ ꓟꓲ ꓢꓮ. ꓬꓲꓼ ꓡ ꓟ ꓥꓳ ꓡꓳ. ꓓꓴ ꓠꓬ ꓢꓯ. ꓔꓬ ꓟ ꓥ ꓡꓳ꓿ ꓚꓮꓣꓓꓲꓠꓮꓡ ꓡꓰ “ꓮ ꓡꓰ ꓠꓯ ꓞꓲ, ꓟ꓾ ꓗꓴꓷꓼ ꓑꓶ ꓓꓴ ꓠꓯꓻ ꓞꓲ, ꓓꓴ ꓔꓳ, ꓜꓳ ꓥ ꓟꓲ ꓬꓲ. ꓟꓶꓽ ꓟꓽ ꓥ꓾ꓧꓪ. ꓡꓰ ꓘꓴ ꓟꓽ ꓐ꓾ ꓐꓰ ꓐꓯ ꓔ ꓡꓳ꓾ ꓢꓯ. ꓬꓲꓼ ꓡ ꓟ ꓠꓬ ꓛꓴꓽ ꓙꓳ ꓟ ꓠꓯꓼ ꓗꓪ ꓢꓯ. ꓔꓬ ꓟ ꓗꓪ ꓧꓪ. ꓡꓰ ꓓꓴ ꓥ ꓟ ꓔꓯ ꓐꓯ ꓔ ꓡꓳ꓿
ꓙꓱ‐ꓣꓴ‐ꓢ‐ꓡꓱ ꓗꓪ ꓔꓬ ꓟ ꓝꓣꓮꓠꓚꓲꓢꓚꓮꓠ ꓔꓲꓺ ꓒ ꓜꓴꓻ ꓐꓴ ꓠꓬ ꓢꓲ ꓫꓬ, ꓟ ꓡꓱꓼ ꓜꓴ ꓗꓪ ꓪꓽ ꓘꓴ ꓟ ꓔꓯ ꓟꓽ ꓠꓽ ꓠꓽ ꓬꓰ ꓔꓬ ꓟ ꓥ ꓡꓳ꓿ꓕꓲ ꓟꓲ ꓠꓯ ꓡꓱꓼ ꓔꓬ ꓟ ꓗ‐ꓕꓳ‐ꓡꓲꓗ ꓘꓴꓽ ꓜꓲꓼ ꓞꓳ ꓕꓲꓽ ꓟ ꓡꓱꓼ ꓔꓯ ꓔꓯꓺ ꓢꓲ ꓢꓲ ꓡꓲ, ꓟ ꓐꓰ ꓝꓮꓲ ꓪꓽ ꓡꓯ ꓗꓳ ꓫꓱ, ꓡꓯ ꓘꓳ ꓠ, ꓟ ꓐꓱ ꓶ ꓪꓽ ꓘꓴ ꓖꓶ ꓔꓬ ꓟ ꓥ ꓡꓳ꓿
