ꓙꓱ ꓦꓲꓻ ꓠꓬ ꓢꓰꓼ ꓡꓯ ꓘꓳ ꓟ ꓐꓰ ꓐꓬ ꓡꓰ ꓝꓲ ꓟ ꓔꓯ ꓟꓽ ꓥ꓾ ꓢꓲ ꓡꓲ, ꓟ ꓔꓯ ꓡꓰ ꓧꓳꓽ ꓔꓯ, ꓖꓶ ꓠ ꓔ ꓡꓳ꓾
ꓔꓲꓺ ꓒ ꓪ ꓔꓲ ꓡꓰ ꓬꓲ ꓔꓯ ꓢ‐ꓢꓲ‐ꓠ ꓝꓲ ꓓꓴ ꓟꓬꓱꓽ ꓗꓪ ꓧꓳꓽ ꓔꓯ, ꓖꓶ ꓡ ꓟ ꓲꓔꓮ ꓙꓱ ꓦꓲꓻ ꓚꓱ, ꓔꓯ ꓫ ꓟꓳ ꓘꓶꓽ ꓐꓯ ꓢꓲ꓾ ꓗꓴꓷꓼ ꓫꓵ ꓪꓴ ꓗꓷ ꓔꓬ ꓟ ꓠꓯꓼ ꓗꓪ ꓙꓱ ꓦꓲꓻ ꓔꓯ ꓫꓵꓻ ꓡꓰ ꓝꓲ ꓟ ꓶ ꓤꓼ ꓐꓰ ꓐꓬ ꓡꓰ ꓝꓲ ꓟ ꓔꓯ ꓡꓰ ꓧꓳꓽ ꓔꓯ, ꓡ ꓟ ꓠꓯꓼ ꓗꓪ ꓠꓲ, ꓟ ꓟꓽ ꓢ ꓚꓱ, ꓐꓯ ꓔ ꓡꓳ꓿
ꓮꓝꓣꓲꓚꓮ ꓗꓴꓷꓼ ꓗꓪ ꓢ‐ꓢꓲ‐ꓠ ꓶ ꓓꓳ ꓫꓱ, ꓓꓳ ꓟꓽ ꓙꓰ ꓟ ꓟꓲ ꓕꓯ 20 ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓲꓔꓮ ꓙꓱ ꓦꓲꓻ ꓚꓱ, ꓐꓰ Lufthansa Group ꓗꓪ ꓐꓰ ꓟꓬꓱ ꓬꓰ ꓢꓴ ꓐꓴ ꓐꓰ ꓜꓲ ꓗꓷ ꓟ ꓥꓳ꓿ ꓔꓲꓺ ꓒ ꓪ ꓔꓲ ꓡꓰ ꓔꓲꓺ ꓒ ꓪ ꓔꓲ ꓢꓔ. ꓑꓮꓴꓡ (6) ꓡꓯ ꓒꓯ, ꓗꓪ ꓐꓰ ꓖꓶ_ ꓟ ꓲꓔꓮ Airways ꓐꓰ Alitalia ꓙꓱ ꓦꓲꓻ ꓚꓱ, ꓔꓯ ꓫ ꓟꓳ ꓘꓶꓽ ꓫ ꓕꓱ ꓗꓷ ꓟ ꓥꓳ꓿
ꓢ‐ꓢꓲ‐ꓠ ꓟꓬꓱꓽ ꓗꓪ ꓓꓳꓽ ꓫꓵ ꓣꓴ ꓠ, ꓟ ꓕꓲ ꓪ ꓙꓰ ꓡ ꓟ ꓓꓳꓽ ꓫꓵ ꓣꓴ ꓢꓴ ꓐꓴ ꓐꓱ ꓶ “ꓢꓲ ꓡꓲ, ꓟ ꓬꓲ ꓢꓯꓼ” ꓔꓯ ꓫꓬ, ꓖꓶ ꓟ “ꓐꓲ ꓜꓲꓼ ꓟ ꓓ ꓡꓰ ꓢꓴ ꓢꓷ. ꓠꓲ, ꓙꓳ ꓢꓴ ꓐꓴ” ꓔꓯ ꓥ ꓟꓲ ꓫꓱ. ꓖꓶ ꓘꓶꓽ ꓫ ꓕꓱ ꓗꓷ ꓟ ꓥꓳ꓿ ꓲꓔꓮ ꓙꓱ ꓦꓲꓻ ꓚꓱ, ꓠꓬ ꓔꓲꓺ ꓒ ꓪ ꓔꓲ ꓶ ꓓꓳ ꓫꓱ, ꓓꓳ ꓚꓳ ꓙꓰ ꓟ ꓠꓮꓽ ꓗꓪ ꓥ ꓟꓲ “ꓒꓵꓽ ꓛꓳ ꓟ ꓠꓲ, ꓡꓱ ꓟ ꓐꓰ ꓕꓲ ꓦꓲꓻ ꓡ ꓞꓳ ꓡꓰ ꓐꓰ ꓢꓯꓼ ꓪ” ꓐꓴ ꓐꓰ ꓐꓲ ꓜꓲꓼ ꓠ ꓬꓰ ꓙ ꓟ ꓔꓯ ꓐꓯ ꓔ ꓡꓳ꓿
“ꓮ ꓟꓶ ꓡꓰ ꓐꓰ ꓜ ꓪ ꓟ ꓠꓬ ꓕꓱ ꓡꓱ ꓮ ꓘꓶ. ꓒꓵ_ ꓟ ꓬꓰ ꓙ ꓟ ꓐꓱ ꓶ ꓥꓪ ꓚꓲ ꓛꓬ ꓐꓰ ꓦꓮꓔꓲꓚꓮꓠ ꓗꓴꓷꓼ ꓗꓪ ꓐꓰ ꓠꓲ, ꓡꓱ ꓡꓱ ꓫ ꓟꓳ ꓡꓳ꓾” ꓐꓰ ꓐꓯ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓙꓰ ꓟ ꓙꓱ ꓦꓲꓻ ꓚꓱ, ꓠꓬ “ꓢꓲ ꓡꓲ, ꓟ ꓝꓲ ꓓꓴ” ꓕꓲ ꓣꓳ ꓡꓰ ꓐꓰ ꓕꓲ ꓗꓴꓷꓼ ꓡꓲ ꓕꓲ ꓗꓴꓷꓼ ꓗꓪ ꓮ ꓕꓯ ꓟꓲ ꓙꓰ ꓟ ꓢꓲ ꓫꓬ ꓢꓴ ꓒꓱ‐ꓕꓱ ꓬꓲ ꓙꓵꓽ ꓪ ꓔꓯ ꓘꓳ, ꓣꓴ ꓟ ꓢ‐ꓢꓲ‐ꓠ ꓟꓬꓱꓽ ꓔꓯ ꓬꓰ ꓟ ꓬꓲ ꓚꓱ, ꓕꓲ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿ “ꓔꓲꓺ ꓒ ꓪ ꓔꓲ ꓬꓲ ꓚꓱ, ꓠꓬ ꓮ ꓕꓯ ꓟꓲ ꓙꓳ ꓠ ꓔ ꓟ ꓖꓪ ꓙꓱ ꓡꓯ ꓘꓳ ꓟ꓾ ꓜꓲ ꓡꓯ ꓘꓳ ꓟ ꓐꓰ ꓬꓲꓼ ꓠꓬꓲ ꓤ ꓠꓲ, ꓟ ꓙꓳ ꓟ ꓓꓽ ꓖꓴ ꓡꓰ ꓥ ꓡꓳ꓾” ꓖꓳ ꓡꓱ ꓥ ꓟꓲ ꓗꓴꓷꓼ ꓢꓰꓼ ꓡꓯ ꓘꓳ ꓟ ꓬꓲ. ꓔꓶ. ꓗꓪ ꓙꓱ ꓦꓲꓻ ꓔꓯ ꓠꓬ ꓐꓬ ꓡꓰ ꓝꓲ ꓟ ꓐꓰ ꓙꓳꓺ ꓓꓴ ꓔꓯ ꓡꓰ ꓒꓬꓱꓼ ꓡꓰ ꓝꓲ ꓟ ꓮ ꓕꓯ ꓟꓲ ꓣꓱ ꓔꓬ ꓟ ꓔꓯ ꓐꓯ ꓔ ꓡꓳ꓿
“ꓙꓱ ꓦꓲꓻ ꓐꓴ ꓠꓬ ꓮ ꓕꓯ ꓟꓲ ꓢꓲ ꓡꓲ, ꓟ ꓔꓯ ꓧꓳꓽ ꓔꓯ, ꓠ, ꓟ ꓡꓰ ꓥ ꓢꓲ ꓢꓰꓼ ꓡꓯ ꓘꓳ ꓓꓴ ꓐꓱ ꓶ ꓒꓬꓱꓼ ꓡꓰ ꓟꓽ ꓓ꓾ ꓟꓴ ꓗꓪ ꓗꓪ ꓐꓰ ꓫꓵꓻ ꓡꓰ ꓝꓲ ꓟ ꓐꓰ ꓐꓬ ꓡꓰ ꓓꓴ ꓖꓶ ꓡ ꓟ ꓔꓯ ꓮ ꓟ ꓥ ꓟꓲ ꓙꓳꓺ ꓡꓰ ꓝꓲ ꓟꓽ ꓓ꓾” ꓐꓰ ꓐꓯ ꓔ ꓡꓳ꓿ꓟꓲ ꓠꓯ ꓗꓪ ꓢꓰꓼ ꓡꓯ ꓘꓳ ꓓꓴ ꓐꓰ ꓮ ꓟꓶ ꓗꓪ ꓛꓲ ꓢꓰꓼ ꓡꓯ ꓘꓳ ꓓꓴ ꓒꓬꓱꓼ ꓔꓬ ꓟ ꓗꓪ ꓙꓱ ꓦꓲꓻ ꓐꓰ ꓐꓳꓽ ꓐꓶ ꓔꓬ ꓟ ꓔꓯ ꓓꓵꓽ ꓙ ꓡꓰ ꓝꓲ ꓡꓳ꓿ ꓙꓲ_ ꓟ ꓪꓴꓽ ꓟꓴ ꓡ ꓟ ꓠꓯꓼ ꓗꓪ ꓗꓴꓷꓼ ꓢꓰꓼ ꓡꓯ ꓘꓳ ꓓꓴ ꓐꓱ ꓶ ꓣꓱꓽ ꓔꓬ ꓡꓳ꓾ ꓕꓱ ꓟ ꓠꓬ ꓪꓴ ꓟꓴ ꓡ ꓟ ꓟꓽ ꓥ꓾ ꓐꓬ ꓡꓰ ꓝꓲ ꓟ ꓡꓰ ꓥ ꓡꓳ꓿
ꓬꓲ. ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓶ ꓓꓳ ꓫꓱ, ꓓꓳꓽ ꓚꓺ ꓒꓬꓱꓽ ꓙꓰ ꓟ ꓗꓪ ꓬꓰ ꓙ ꓡ ꓟ ꓲꓔꓮ ꓙꓱ ꓦꓲꓻ ꓚꓱ, ꓟꓬꓱꓽ ꓬꓰ ꓢꓴ ꓐꓴ ꓔꓯ ꓫ ꓟꓳ ꓘꓶꓽ ꓝꓮꓲ ꓫ ꓕꓱ ꓗꓷ ꓟ ꓥꓳ꓿ “ꓮ ꓟꓶ ꓗꓪ ꓟꓴ ꓗꓪ ꓗꓪ ꓐꓰ ꓢꓲ ꓡꓲ, ꓟ ꓚꓱ, ꓔꓯ ꓖꓶ ꓠ, ꓟ ꓠꓬ ꓟꓬ ꓠꓬꓲ ꓣꓳ. ꓚꓵ_ ꓡꓳ꓾ ꓪꓴ‐ꓢ ꓠꓬ ꓣꓳ ꓔꓯ ꓡꓯ ꓙꓱ ꓔ ꓟ ꓕꓱ ꓢ‐ꓢꓲ‐ꓠ ꓟꓬꓱꓽ ꓗꓪ ꓠꓴ ꓪ ꓔꓯ ꓥ ꓟꓲ ꓦ ꓡꓱ ꓓ ꓟ ꓑꓶ ꓓꓴ ꓫ ꓟꓳ” ꓐꓰ ꓐꓯ ꓔ ꓡꓳ꓿
