ꓦ‐ꓐ ꓟꓵꓽ ꓗꓪ ꓙꓰ ꓠ, ꓟ ꓐꓱ ꓶ ꓔꓶꓻ ꓙꓱ ꓙꓳ ꓢꓴ Elon Musk (Elon Musk)
ꓧꓪ. ꓧꓪ ꓠꓬꓲ. ꓠꓬꓲ ꓟꓲ ꓠꓯ ꓟꓬꓱꓺ ꓓꓳꓽ ꓢꓴ ꓐꓴ ꓚꓺ ꓟꓲꓽ ꓚꓱ, ꓗꓪ ꓐꓰ ꓦ‐ꓐ ꓟꓵꓽ ꓗꓪ ꓙꓰ ꓠ, ꓟ ꓐꓱ ꓶ ꓔꓶꓻ ꓙꓱ ꓙꓳ ꓢꓴ ꓰꓡꓳꓠ ꓟꓴꓢꓗ ꓚꓱ, ꓔꓯ ꓚꓺ ꓟ. ꓖꓶ ꓓꓴ ꓥ ꓡꓳ꓿ ꓰꓡꓳꓠ ꓟꓴꓢꓗ ꓠꓬ ꓟꓲ ꓠꓯ ꓡ ꓞꓳ ꓐꓴ ꓮ ꓘꓶ. ꓛꓲ ꓟꓽ ꓓꓴ ꓙ ꓔ ꓟ ꓔꓯ ꓬꓰ ꓢꓴ ꓥ ꓡꓳ꓿ ꓬꓲ ꓠꓬ ꓟꓳ ꓓꓳ ꓧꓪꓽ ꓞꓲ ꓐꓱ ꓶ ꓮ. ꓔꓳ ꓙ ꓐꓮꓔꓔꓰꓣꓬ ꓣꓱ ꓢꓲ ꓠꓬꓲ ꓙꓰ ꓪ ꓠ, ꓟ ꓝꓮꓲ ꓲꓠꓔꓰꓣꓠꓰꓚꓔ ꓔꓯ ꓪꓽ ꓛꓲ ꓡꓳ ꓘꓳ ꓮ ꓙꓵꓽ ꓗꓪ ꓣꓱ ꓙꓲ ꓠ, ꓟ ꓢꓯꓼ ꓕꓵꓼ ꓢꓴ ꓥ ꓡꓳ꓿
ꓰꓡꓳꓠ ꓟꓴꓢꓗ ꓞꓲꓼ ꓣꓳ ꓟ ꓙꓵ,
ꓰꓡꓳꓠ ꓟꓴꓢꓗ ꓞꓲꓼ ꓣꓳ ꓟ ꓙꓵ, ꓕꓯ ꓐꓱ ꓓꓵ ꓮꓝꓣꓲꓚꓮ ꓗꓴꓷꓼ ꓗꓪ ꓬꓲ ꓔꓯ ꓐꓬꓱ ꓟꓳ ꓗꓷꓳ꓿ ꓝꓮꓲ ꓬꓲ ꓠꓬ ꓞꓲꓼ ꓣꓳ ꓟ ꓙꓵ, ꓕꓯ ꓡꓰ ꓕꓳ ꓶ ꓵꓻ ꓠ, ꓟ ꓔꓯ ꓮ ꓘꓶ. ꓛꓲ ꓠꓲ, ꓟ ꓐ ꓢꓴ ꓕꓲ ꓣꓳ ꓥ ꓡꓳ꓿ ꓝꓮꓲ ꓬꓲ ꓠꓬ ꓕꓲ ꓠꓬꓲ ꓘꓴꓽ ꓗꓪ ꓬꓲ ꓙꓵ, ꓟꓶ ꓫꓵˍ ꓫꓵˍ ꓕꓳ ꓶ ꓵꓻ ꓢꓲ ꓠꓬꓲ ꓬꓲ ꓙꓵ, ꓖꓴ ꓢꓴ ꓕꓲ ꓣꓳ ꓥ ꓡꓳ꓿
ꓕꓲ ꓧꓪ, ꓧꓪ ꓬꓲ ꓠꓬ ꓟꓲ ꓠꓯ ꓘꓴꓽ ꓗꓪ ꓢꓷ. ꓡꓲ ꓓꓴ ꓚꓱ, ꓮ ꓟꓬ, ꓐꓳ ꓔ ꓟ ꓕꓳ ꓶ ꓔꓯ ꓵꓻ ꓟ ꓔꓯ ꓠꓲ, ꓟ ꓐ ꓢꓴ ꓕꓲ ꓣꓳ ꓥ ꓡꓳ꓿
ꓬꓲ ꓞꓲꓼ (12) ꓘꓳꓼ ꓙꓳ ꓡ ꓟ ꓙꓵ, ꓕꓯ ꓬꓲ ꓠꓬ ꓬꓲ ꓚꓲ. ꓛꓬ ꓚꓳꓟꓑꓴꓔꓰꓣ ꓖꓮꓟꓰ ꓕꓲ ꓟ ꓐꓳ ꓢꓲ ꓠꓬꓲ ꓪꓴꓽ ꓜꓽ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓠꓬ ꓬꓲ ꓠꓬ ꓞꓲꓼ ꓣꓳ ꓟ ꓙꓵ, ꓕꓯ ꓡꓰ ꓬꓲ ꓠꓬ ꓚꓳꓟꓑꓴꓔꓰꓣ ꓔꓯ ꓮ ꓘꓶ. ꓛꓲ ꓢꓷ. ꓠ, ꓟ ꓗꓪ ꓛꓲ ꓣꓳ ꓣꓴ ꓔ ꓢꓴ ꓕꓲ ꓣꓳ ꓥ ꓡꓳ꓿
ꓬꓲ ꓞꓲꓼ (17) ꓣꓳ ꓘꓳꓼ ꓙꓳ ꓡ ꓟ ꓙꓵ, ꓕꓯ ꓬꓲ ꓠꓬ ꓟꓯꓼ ꓒ ꓬꓰ ꓠꓲ, ꓟꓽ ꓫꓵˍ ꓟ ꓑꓶ. ꓓꓴ ꓚꓮꓠꓮꓠꓓꓮ ꓗꓴꓷꓼ ꓗꓪ ꓔꓬ ꓗꓷꓳ꓿ ꓝꓮꓲ ꓬꓲ ꓠꓬ ꓴꓢꓮ ꓗꓴꓷꓼ ꓗꓪ ꓔꓬ ꓗꓷꓳ꓿ ꓬꓲ ꓠꓬ ꓴꓢꓮ ꓗꓴꓷꓼ ꓗꓪ ꓟꓴ ꓔꓲ ꓢꓳꓻ ꓦꓲꓻ ꓗꓪ ꓕꓳ ꓶ ꓔꓯ ꓢꓳꓻ ꓣꓴ ꓟꓶ ꓡꓰ ꓟ ꓥ ꓡꓳ꓿
ꓬꓲ ꓠꓬ ꓟꓴ ꓔꓲ ꓢꓳꓻ ꓦꓲꓻ ꓗꓪ ꓐꓰ ꓕꓳ ꓶ ꓢꓳꓻ ꓓꓳ ꓡꓰ ꓗ. ꓠꓯ ꓬꓲ ꓠꓬ ꓲꓠꓔꓰꓣꓠꓰꓚꓔ ꓔꓯ ꓶꓼ ꓡꓯꓼ ꓬꓰ ꓠ, ꓟ ꓐꓱ ꓶ ꓟꓬꓱꓽ ꓬꓰ ꓗꓷꓳ꓿ ꓝꓮꓲ ꓬꓲ ꓠꓬ ꓬꓲ ꓚꓲ. ꓛꓬ ꓚꓳꓟꓑꓮꓠꓬ ꓒꓴ ꓢꓲ ꓠꓬꓲ ꓜꓲꓑ2 ꓟꓬꓱꓺ ꓔ ꓟ ꓚꓳꓟꓑꓮꓠꓬ ꓔꓯ ꓪꓴꓽ ꓜ ꓗꓷ ꓢꓲ ꓠꓬꓲ ꓴꓢꓮ ꓒꓴ ꓮ ꓟꓬ, ꓗꓪ ꓐꓰ ꓪꓴꓽ ꓜ ꓗꓷꓳ꓿
ꓝꓮꓲ ꓬꓲ ꓠꓬ ꓳꓠꓡꓲꓠꓰ ꓐꓮꓠꓗ ꓕꓲ ꓟ ꓒꓴ ꓢꓲ ꓠꓬꓲ ꓶꓻ ꓡꓯꓼ ꓮ ꓟꓬ, ꓬꓰ ꓗꓷ ꓟ ꓥ ꓡꓳ꓿ ꓕꓱ ꓚꓳꓟꓑꓮꓠꓬ ꓟꓬꓱꓺ ꓠꓬ ꓑꓮꓬꓑꓮꓡ ꓟꓬꓱꓺ ꓔ ꓟ ꓥ ꓢꓲ ꓠꓬꓲ ꓖꓳ ꓟ ꓔꓯ ꓥ ꓟꓲ ꓪꓴꓽ ꓜ ꓗꓷ ꓟ ꓙꓵ, ꓔꓯ ꓴꓢꓮ ꓒꓴ ꓮ ꓟꓬ, ꓪ ꓡꓰ ꓟ ꓥ ꓡꓳ꓿
ꓰꓡꓳꓠ ꓟꓴꓢꓗ ꓠꓬ ꓒꓴ ꓪ ꓡꓰ ꓗ. ꓠꓯ ꓟꓬꓱꓽ ꓠꓽ ꓡꓰ ꓢꓴ ꓟꓽ ꓥ ꓬꓲ ꓠꓯ, ꓗꓪ ꓮ ꓘꓶ. ꓛꓲ ꓪꓴꓽ ꓟ ꓔꓶꓻ ꓙꓱ ꓙꓳ ꓟ ꓥ ꓡꓳ꓿
ꓖꓳ ꓡꓱ ꓠꓬ 2002 ꓘꓳꓼ ꓕꓯ ꓢꓑꓮꓚꓰ ꓫ ꓟꓬꓱꓺ ꓔ ꓟ ꓚꓳꓟꓑꓮꓠꓬ ꓔꓯ ꓒꓴ ꓗꓷ ꓢꓲ ꓠꓬꓲ ꓦ‐ꓐ ꓟꓵꓽ ꓗꓪ ꓙꓰ ꓠꓲ, ꓫꓵˍ ꓢꓴ ꓐꓴ ꓔꓯ ꓒꓴ ꓮ ꓟꓬ, ꓟꓽ ꓖꓴ ꓡꓰ ꓠ, ꓟ ꓐꓱ ꓶ ꓬꓲ ꓪ ꓚꓳꓟꓑꓮꓠꓬ ꓗꓪ ꓐꓰ ꓟꓬꓱꓽ ꓬꓰ ꓖꓶ ꓗꓷꓳ꓿
ꓓꓽ ꓪꓴ. ꓕꓯ ꓬꓲ ꓚꓳꓟꓑꓮꓠꓬ ꓗꓪ ꓐꓰ ꓦ‐ꓐ ꓟꓵꓽ ꓗꓪ ꓒꓶ ꓩꓴ ꓟ ꓙꓼ ꓮ ꓟꓬ, ꓠꓬ ꓟꓲ ꓠꓯ ꓗꓪ ꓞꓰ ꓗꓷ ꓟ ꓪꓴ. ꓠꓬꓲ ꓠꓲ, ꓟ ꓮ ꓘꓶ. ꓐꓬ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓠꓬ ꓠꓲ, ꓟ ꓟꓽ ꓐꓬ ꓢꓑꓮꓠꓚꓰ ꓫ ꓚꓳꓟꓑꓮꓠꓬ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓮ ꓘꓶ. ꓛꓲ ꓙꓲ ꓟ ꓦ‐ꓐ ꓟꓵꓽ ꓗꓪ ꓒꓶ. ꓩꓴ ꓠ, ꓟ ꓙꓼ ꓔꓯ ꓫꓬ, ꓝꓲ ꓢꓲ ꓠꓬꓲ ꓛꓬ, ꓗꓷ ꓟ ꓙꓵ, ꓕꓯ ꓬꓲ ꓟꓶ ꓠꓬ ꓧꓪ. ꓡꓰ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓦ‐ꓐ ꓟꓵꓽ ꓗꓪ ꓶꓻ ꓜ ꓦ ꓟ ꓟꓬꓱꓽ ꓝꓮꓲ ꓢꓷ. ꓠꓲ, ꓚꓱ, ꓲꓠꓔꓰꓣꓠꓰꓚꓔ ꓟꓬꓱꓽ ꓮ ꓟꓬ, ꓫꓵꓽ ꓔꓯ ꓒꓴ ꓮ ꓟꓬ, ꓟꓽ ꓖꓴ ꓡꓰ ꓬꓰ ꓐ ꓡ ꓟ ꓥ ꓡꓳ꓿
ꓝꓮꓲ ꓬꓲ ꓠꓬ ꓔꓰꓢꓡꓮ ꓟꓳ‐ꓓꓳ ꓚꓳꓟꓑꓮꓠꓬ ꓔꓯ ꓒꓴ ꓢꓲ ꓠꓬꓲ ꓟꓬꓱꓽ ꓬꓰ ꓟ ꓗꓷ ꓟ ꓥ ꓡꓳ꓿ ꓬꓲ ꓟꓳ ꓔꓳ ꓠꓬ ꓟꓲꓽ ꓟꓲ ꓮ. ꓔꓳ ꓔꓯ ꓣꓱ ꓢꓲ ꓠꓬꓲ ꓐꓮꓔꓔꓰꓣꓬ ꓡꓰ ꓙꓰ ꓙꓲ ꓟ ꓟꓳ‐ꓓꓳ ꓥ ꓡꓳ꓿ ꓕꓱ ꓟꓳ ꓓꓳ ꓠꓬ ꓟꓲ ꓠꓯ ꓗꓪ ꓡ ꓞꓳ ꓮ ꓟꓬ, ꓠꓵ, ꓟ ꓣꓱ ꓟ ꓟꓳ‐ꓓꓳ ꓒꓬꓱꓼ ꓡ ꓟ ꓥ ꓡꓳ꓿
ꓝꓮꓲ ꓠꓬ ꓙꓼ ꓪꓴ. ꓠꓬꓲ ꓣꓱ ꓢꓲ ꓠꓬꓲ ꓟꓲ ꓠꓯ ꓢꓷ. ꓠꓲ, ꓚꓱ, ꓠꓯꓼ ꓞꓲꓼ ꓟꓬꓱꓽ ꓗꓪ ꓮ ꓘꓶ. ꓛꓲ ꓪꓴꓽ ꓟꓴ ꓡ ꓠ, ꓟ ꓐꓱ ꓶ ꓬꓰ ꓖꓶ ꓗꓷꓳ꓿ ꓝꓮꓲ ꓢꓔꓮꓣꓡꓲꓠꓗ ꓚꓳꓟꓑꓮꓠꓬ ꓥ ꓟꓲ ꓲꓠꓔꓰꓣꓠꓰꓚꓔ ꓣꓱ ꓢꓴ ꓐꓴ ꓐꓱ ꓶ ꓮ ꓘꓶ. ꓛꓲ ꓙꓲ ꓖꓴ ꓙꓳ ꓟ ꓥ ꓡꓳ꓿
ꓰꓡꓳꓠ ꓟꓴꓢꓗ ꓠꓬ ꓠꓬꓲ. ꓠꓬꓲ 2026 ꓘꓳꓼ ꓗꓪ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓒꓴ ꓫꓵˍ ꓙꓳ ꓢꓴ ꓡꓳ ꓐ ꓒꓽ ꓥ ꓡꓳ꓿ ꓬꓲ ꓠꓬ ꓧꓪ. ꓡꓰ ꓟ ꓔꓯ ꓢ ꓢ ꓡꓰ ꓘꓳ, ꓣꓴ ꓪ ꓢꓴ ꓟꓽ ꓥ ꓟꓬꓱꓽ ꓬꓰ ꓟ ꓙꓵ, ꓕꓯ ꓮ ꓟꓬ, ꓧꓪ. ꓠꓲ, ꓟ ꓐꓬ ꓡꓰ ꓟ ꓟꓯꓼ ꓡꓰ ꓗꓪ ꓛꓲ ꓔꓳ, ꓜꓳ ꓗꓷ ꓥ ꓟꓲ ꓬꓲ ꓟꓶ ꓠꓬ ꓧꓪ. ꓡꓰ ꓟ ꓔꓯ ꓘꓳ, ꓣꓴ ꓪ ꓢꓴ ꓥ ꓡꓳ꓿
ꓖꓳ ꓡꓱ ꓠꓬ ꓠꓬꓲ. ꓠꓬꓲ ꓣꓳ ꓞꓲꓼ ꓣꓴ ꓢꓴ ꓞꓳ ꓡꓯ. ꓐꓴ ꓠꓬꓲ. ꓠꓬꓲ ꓗꓪ ꓐꓰ ꓣꓳ ꓠꓲ, ꓟ ꓐ ꓟ ꓣꓳ ꓬꓰ ꓐ ꓡ ꓟ ꓟꓬꓱꓽ ꓔꓯ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓰꓡꓳꓠ ꓟꓴꓢꓗ ꓡꓰ ꓐꓰ ꓢꓯꓼ ꓕꓵꓼ ꓡꓯ꓿ ꓬꓲ ꓟꓶ ꓠꓬ ꓧꓪ. ꓡꓰ ꓟ ꓔꓯ ꓣꓳ ꓘꓳ, ꓣꓴ ꓪ ꓓꓴ ꓥꓳ꓿ ꓰꓡꓳꓠ ꓟꓴꓢꓡ ꓡꓰ ꓐꓰ ꓕꓳ ꓶ ꓮ ꓟꓬ, ꓵꓻ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
