ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓴ ꓪ ꓤꓶꓻ ꓠꓯꓸꓼ ꓗꓪ ꓫ. ꓙꓵ ꓟꓶ ꓙꓵ ꓔꓳ, ꓜꓳꓽ ꓠꓬꓲ꓾ ꓟꓬ ꓐꓲ ꓞꓰ ꓠꓬꓲ꓾ ꓮ ꓡꓲ ꓬꓰ ꓠꓯ, ꓥ ꓟꓽ ꓢꓷ. ꓢꓷ. ꓠꓲ, ꓟ ꓫ. ꓠꓬꓲ ꓐꓰ ꓔꓳ, ꓜꓳꓽ ꓔꓬ ꓡ꓿ ꓮ ꓡꓰ ꓫꓪ. ꓞꓷ, ꓠꓯ, ꓥ ꓟꓽ ꓢꓷ. ꓢꓷ. ꓓˍ ꓥꓳ ꓐꓯˍ ꓠꓬ ꓠꓴ ꓪ ꓕꓽ ꓙꓳ꓿ ꓠꓬꓲ. ꓠꓬꓲ ꓠꓴ ꓪ ꓔꓯꓺ ꓢꓳ ꓓꓴ ꓧˍ ꓟ ꓞꓳ ꓤ ꓕꓲ ꓣꓳ ꓔꓯ ꓐꓯ ꓟꓳ. ꓖꓶ ꓠꓲ, ꓫꓵˍ ꓡꓳ꓿ ꓞꓳ ꓤ ꓕꓱ ꓕꓲ ꓣꓳ ꓠꓬ (ꓟ‐ꓕꓲ 1ꓽ18‐24) ꓗꓪ ꓟ ꓥ ꓡꓳ꓿ ꓟ. ꓟꓲꓽ ꓝꓲ. ꓗꓪ ꓟ ꓬꓲ ꓠꓬ ꓮꓽ ꓟ ꓥ ꓡ ꓐꓯˍ ꓠꓬ ꓝꓲ ꓓꓴ ꓬꓳ‐ꓢꓷ ꓥ ꓡꓳ꓿

ꓬꓳ‐ꓢꓷ ꓤꓶꓻ ꓔꓯ ꓣꓳ ꓡꓳ. ꓠꓬꓲ ꓡꓯ꓿ ꓬꓲ ꓤꓶꓻ ꓠꓯꓸꓼ ꓗꓪ ꓥˍ ꓟꓲ ꓮ ꓘꓶ. ꓓꓵꓽ ꓙꓽ ꓫ. ꓠꓬꓲ ꓬꓲ ꓙꓵ, ꓕꓱ ꓡꓱ ꓐꓰ ꓛꓲ ꓡ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ ꓬꓲ ꓐꓰ ꓠꓲ, ꓒꓴ ꓔˍ ꓟ ꓟ‐ꓡꓲ ꓬꓲ ꓖꓳ ꓓꓱꓽ ꓗꓪ ꓤ ꓶꓻ ꓔꓬ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓟ‐ꓡꓲ ꓐꓰ ꓬꓳ‐ꓢꓷ ꓠꓬ ꓕꓲ ꓡꓰ,ꓼ ꓟꓽ ꓔꓬ ꓗꓷ ꓥ ꓟꓲ ꓟ‐ꓡꓲ ꓖꓳ ꓓꓱꓽ ꓗꓪ ꓤ ꓶꓻ ꓡꓰ ꓟ ꓔꓯ ꓟꓳˍ ꓕꓯ ꓠꓬ ꓝꓲ ꓓꓴ ꓬꓳ‐ꓢꓷ ꓮ ꓡꓲ ꓬꓰ ꓠꓯ, ꓥ ꓟꓽ ꓢꓷ. ꓢꓷ. ꓬꓲ ꓤꓶꓻ ꓠꓯꓸꓼ ꓗꓪ ꓮ ꓘꓶ. ꓓꓵꓽ ꓙꓽ ꓫ. ꓟ ꓥ ꓡꓳ꓿

ꓟ‐ꓡꓲ ꓔꓯ ꓣꓴ ꓠꓯ, ꓡ꓾ ꓟꓽ ꓣꓴ ꓠꓯ, ꓡ꓾ ꓮ ꓡꓲ ꓬꓰ ꓠꓯ, ꓡ꓾ ꓟ‐ꓡꓲ ꓔꓯ ꓮ ꓡꓲ ꓐꓰ ꓡꓳ ꓒꓰ, ꓗꓷ ꓠꓯ, ꓡ꓾ ꓐꓰ ꓫꓪ. ꓫ. ꓔꓬ ꓡꓳ꓿ ꓕꓱ ꓟ ꓑꓶ. ꓓꓴ ꓬꓲ ꓠꓬ ꓕꓰ ꓡꓰ ꓟ‐ꓡꓲ ꓔꓯ ꓢꓲ ꓡꓲ ꓡꓲˍ ꓐꓰ ꓡꓳ ꓔꓲ. ꓬꓰ ꓢꓲ ꓠꓬꓲ ꓥꓪ ꓠꓬ ꓙꓰˍ ꓥꓳ꓾ ꓐꓰ ꓓꓵꓽ ꓙꓽ ꓔꓬ ꓡꓳ꓿

(ꓟ‐ꓕꓲ 1ꓽ18‐24) ꓬꓰ-ꓢꓴ ꓙꓲ-ꓢꓴ ꓔꓯ ꓦꓵꓻˍ ꓟ ꓚ ꓟꓲꓽ ꓠꓬ ꓕꓱ ꓡꓱ ꓥꓳ꓿ ꓟ-ꓡꓲ ꓠꓬ ꓬꓳ-ꓢꓷ ꓔꓯ ꓠꓲꓹ ꓒꓴ ꓗꓷ ꓗꓸ ꓠꓯ꓾ ꓬꓲ ꓪꓽ ꓟꓽ ꓝꓱꓺ ꓡꓯꓽ ꓘꓳ ꓢꓰ ꓕꓯ ꓡꓰ꓾ ꓢꓲ-ꓫꓬ-ꓟ-ꓦ ꓗꓪ ꓐꓰ ꓟ-ꓡꓲ ꓖꓳ ꓓꓱ ꓗꓪ ꓤ ꓠꓱ ꓶꓻ ꓞꓹ ꓟ ꓢꓷꓸ ꓡꓰꓳ꓿ ꓬꓲ ꓤ ꓖꓴ ꓬꓳ-ꓢꓷ ꓠꓬ ꓔꓱꓹ ꓜꓳꓽ ꓢꓴ ꓕꓲ ꓣꓳ ꓥ ꓢꓲ꓾ ꓟ-ꓡꓲ ꓔꓯ ꓞꓳ ꓜꓴ ꓟꓲꓽ ꓙꓬ ꓗꓪ ꓫꓸ ꓔꓳ ꓡꓰ ꓝꓲ ꓠꓲꓹ ꓟꓽ ꓫꓵꓺ ꓠꓬꓲ꓾ ꓬꓲ ꓔꓯ ꓘꓳ ꓫꓱ ꓫꓱˍ ꓒꓰꓻ ꓗꓷ ꓠꓹ ꓟ ꓓꓵꓽ ꓙˍ ꓡꓳ꓿

ꓬꓲ ꓕꓱ ꓡꓱ ꓓꓵꓽ ꓙ ꓞꓷꓹ ꓗꓷ ꓗ ꓠꓯ꓾ ꓢꓲ ꓒꓽ ꓬꓲ ꓝꓲ ꓓꓴ ꓕꓲ ꓣꓳ ꓬꓲ ꓔꓯ ꓬꓲꓼ ꓟꓬ ꓘꓳꓻ ꓟ ꓗꓪ ꓐꓰ ꓟꓳꓸ ꓖꓶ ꓡ ꓢꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓬꓳ-ꓢꓷꓽꓳ꓾ ꓟ-ꓡꓲˍ ꓐꓰ ꓝꓱꓺ ꓡꓯꓽ ꓘꓳ ꓠꓹ ꓟ ꓕꓽ ꓓꓵꓽ ꓙ ꓟꓬ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓢꓲ-ꓫꓬ-ꓟ-ꓦ ꓗꓪ ꓐꓰ ꓤꓽ ꓶꓻ ꓡꓰ ꓟ ꓥ ꓡꓳ꓿ ꓬꓲ ꓠꓬ ꓤ ꓕꓲ ꓣꓳ ꓦꓵꓻ ꓡ ꓥꓳ꓿ ꓤꓽ ꓖꓳ ꓕꓲ ꓣꓳ ꓠꓬ ꓬꓲ ꓑ ꓫꓬꓼ ꓐꓴ ꓔꓯ ꓝꓴꓲ ꓗꓪ ꓐꓰ ꓚꓬꓴ ꓓꓳ ꓡ ꓠ ꓗꓹ ꓢꓴ ꓥ ꓠꓬꓲ꓾ ꓠꓴ ꓬꓲ ꓔꓯ꓾ ꓬꓰ-ꓢꓴ꓾ ꓟꓬꓱꓺ ꓖꓶ ꓠ ꓗꓹ ꓡꓳ꓾ ꓐꓯˍ ꓡꓳ꓿

ꓕꓱ ꓟꓬ ꓫꓵꓽ ꓒꓬꓱꓼ ꓡ ꓟ ꓠꓬ ꓢꓲ ꓒꓽ ꓡꓰ ꓬꓲ ꓟꓷꓽ ꓠꓷꓹ ꓝꓸ ꓢꓴ ꓗꓪ ꓐꓰ ꓐꓯ ꓗꓷ ꓟ꓾ꓠꓬꓲ ꓠꓹ꓾ ꓤ ꓟꓶ ꓡꓯꓸ ꓚꓵ ꓠꓬ ꓤ ꓠꓱ ꓶꓻ ꓡꓰ ꓢꓲ ꓤ ꓕꓲ ꓣꓳ ꓦꓵꓻ ꓡ ꓥꓳ꓿ ꓬꓲ ꓪꓽ ꓡꓰ ꓬꓲ ꓔꓯ ꓲ-ꓟ-ꓠꓴ-ꓡꓲ ꓟꓬꓱ ꓖꓶˍ ꓥꓳ꓾ ꓐꓰ ꓐꓯ ꓔ ꓟ ꓐꓲꓺ ꓡꓰ ꓝꓲ ꓠꓹ ꓟ ꓥ ꓡꓳ꓿ (ꓲ-ꓟ-ꓠꓴ-ꓡꓲ ꓐꓯˍ ꓟ ꓠꓬ꓾ ꓪꓴ-ꓢ ꓣꓳꓽˍ ꓐꓰ ꓔꓬ ꓡꓳ꓾ ꓐꓯˍ ꓟ ꓥꓳ꓿) ꓬꓳ-ꓢꓷ ꓬꓲꓼ ꓟꓶ ꓧꓪꓸ ꓛꓲꓽ ꓡ ꓠꓬ꓾ ꓢꓲ ꓒꓽ ꓬꓲ ꓝꓲ ꓓꓴ ꓡꓰ ꓐꓯˍ ꓟ ꓔꓯ ꓛꓳ ꓢꓲ꓾ ꓟ-ꓡꓲ ꓔꓯ ꓬꓲ ꓦꓲ ꓢꓲ ꓟ ꓬꓰ ꓠꓹ ꓟ ꓘꓳ ꓣꓴ ꓗꓷˍ ꓡꓳ꓿