ꓙꓵꓻ ꓠꓲ, ꓠꓬ ꓫ. ꓙꓵ ꓟꓷꓼ ꓙꓵ ꓔꓳ, ꓜꓳ ꓔꓬ ꓢꓴ ꓐꓴ ꓠꓯꓼ ꓗꓪ ꓣꓳ ꓟꓬ ꓢꓶꓽ ꓔꓯ ꓒꓴ ꓡꓰ ꓝꓲ_ ꓡꓳ꓾
ꓠꓽ ꓦꓬꓼ ꓠꓬꓲ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓢꓲ ꓒ ꓬꓰ‐ꓢꓴ ꓠꓬ ꓟꓬ ꓢꓶꓽ ꓟꓽ ꓟꓳ_ ꓟ ꓟꓬ ꓔꓶ ꓔꓯ ꓫꓬ, ꓓ ꓡꓰ_ ꓟ ꓢꓲ ꓫꓬ ꓕꓳ ꓶ ꓬꓳ‐ꓦ 9ꓽ1‐41 ꓝꓲ. ꓗꓪ ꓐꓰ ꓓꓵꓽ ꓙ ꓔꓱ, ꓕ ꓢꓯꓼ ꓖꓶ ꓢꓲ꓾ ꓙꓵꓻ ꓠꓲ, ꓠꓬ ꓞꓳ ꓫꓵ ꓞꓳ ꓙꓰ ꓐꓰ ꓬꓲ ꓪ ꓢꓯ. ꓔꓬ ꓙ ꓫꓱꓽ ꓔꓬ ꓟ ꓔꓯ ꓪꓴ‐ꓢ ꓠꓬꓲ ꓟꓳ_ ꓟ ꓡꓰ ꓐꓰ ꓟꓳ ꓗꓴ. ꓠ, ꓟ ꓣꓳ ꓔꓯ ꓟ. ꓖꓶ ꓔ ꓡꓳ꓿
ꓡ ꓞꓳ ꓐꓴ ꓠꓬ ꓠꓯ ꓞꓲ, ꓟ ꓠꓯꓼ ꓗꓪ ꓔꓬ ꓕꓯ ꓪꓴ‐ꓢ ꓬꓲ ꓤ ꓤ ꓔꓲ ꓠꓬ ꓣꓳ ꓔꓯ ꓟꓬ ꓢꓶꓽ ꓔꓯ ꓠꓬꓲ ꓟꓳ ꓝꓲ ꓠ, ꓟ ꓬꓯꓼ ꓡ ꓟ ꓑꓶ ꓓꓴ ꓕꓱ ꓟ ꓠꓬ ꓚꓬꓴ ꓙ ꓟ ꓟꓬꓱꓽ ꓬꓲ. ꓠꓯ. ꓟ ꓔꓯ ꓟ. ꓖꓶ ꓔ ꓡꓳ꓾ ꓐꓰ ꓐꓯ ꓔ ꓡꓳ꓿ ꓪꓴ‐ꓢ ꓶꓼ ꓓꓳ ꓫꓱ. ꓓꓳ ꓢꓲ ꓫꓬ ꓕꓳ ꓶ ꓗꓪ ꓟꓬ ꓔꓶ ꓕꓲꓽ ꓣꓳ ꓡꓰ ꓐꓰ ꓣꓳ ꓥ ꓟꓲ ꓣꓳ ꓢꓷ. ꓟ ꓓꓰ ꓢ ꓟꓬ ꓠꓬꓲ ꓬꓲ. ꓠꓯ. ꓟ ꓣꓳ ꓤꓶꓻ ꓬꓲ ꓠꓯ. ꓟ ꓔꓯ ꓟꓽ ꓟꓳ ꓟꓬ ꓔꓶ ꓡꓰ ꓐꓰ ꓗꓷ ꓡꓰ ꓗꓴ. ꓡꓳ꓿
ꓖꓳ ꓟ ꓑꓶ ꓓꓴ ꓪꓴ‐ꓢ ꓣꓱ ꓛꓰ ꓗꓪ ꓐꓰ ꓚꓰꓼ ꓔ ꓟ ꓣꓳ ꓞꓳ ꓫꓵ ꓞꓳ ꓙꓰ ꓥ ꓟ ꓟꓲ ꓠꓯ ꓡ ꓞꓳ ꓐꓴ ꓐꓯ_ ꓟ ꓠꓱ. ꓦꓵ ꓠꓬ ꓠꓬꓲ ꓟꓳ ꓓꓴ ꓫꓵꓼ ꓕꓲꓽ ꓟ ꓔꓯ ꓪ ꓟꓶ ꓠ, ꓟ꓾ ꓠꓱ. ꓐꓯꓼ ꓢꓴ ꓐꓰ ꓪꓴ‐ꓢ ꓔꓯ ꓔꓱ, ꓔꓱ, ꓐꓰ ꓟꓳ ꓐ ꓡꓰ ꓠ, ꓟ ꓐꓱ ꓶ ꓪꓴ‐ꓢ ꓠꓬ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓟꓲ ꓠꓯ ꓗꓪ ꓬꓯꓼ ꓡ ꓟ ꓥ ꓡꓳ꓿
ꓙꓵꓻ ꓠꓲ, ꓐꓯ_ ꓟ ꓠꓬ ꓟꓬ ꓢꓶꓽ ꓐꓲ. ꓢꓲ ꓙꓵꓻ ꓠ, ꓟ ꓥ ꓡꓳ꓾ ꓐꓯ_ ꓟ ꓠꓯ ꓞꓲ, ꓟ ꓠꓯꓼ ꓗꓪ ꓔꓷ, ꓞꓱ ꓐꓯ_ ꓟ ꓐꓯ ꓘꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓙꓲ ꓢꓴ ꓐꓰ ꓬꓲ ꓐꓯ ꓘꓶꓽ ꓢꓯꓼ ꓪ ꓔꓯ ꓣꓳ ꓘꓳ, ꓣꓴ ꓪ ꓟꓶ ꓟ ꓠꓬ ꓡꓳ, ꓬꓰ ꓟ ꓙꓵ, ꓗꓪ ꓮ ꓕꓯ ꓥ ꓟꓲ ꓟꓽ ꓟꓳ ꓠꓬꓲ_ ꓟ ꓚꓱ, ꓐꓰ ꓣꓳ ꓟꓬ ꓢꓶꓽ ꓔꓯ ꓠꓬꓲ ꓟꓳ ꓡꓰ ꓝꓲ_ ꓡꓳ꓿
ꓙꓵꓻ ꓠꓲ, ꓐꓯ_ ꓟ ꓠꓬ ꓟꓬ ꓔꓶ ꓡꓰ ꓐꓰ ꓬꓰ_ ꓟ ꓕꓲꓽ ꓟ ꓟꓽ ꓥ꓾ ꓓꓵꓽ ꓙ ꓔꓱ, ꓕ ꓠꓲ, ꓔꓯ ꓒꓰ, ꓗꓷ ꓟ ꓟꓽ ꓥ꓾ ꓟꓲ ꓠꓯ ꓔꓯ ꓟꓽ ꓠꓬꓲ. ꓠ. ꓝꓲ_ ꓟ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓓꓵꓽ ꓡꓰ ꓝꓲ_ ꓟ ꓟꓽ ꓥ꓾ ꓖꓳ ꓟ ꓗꓪ ꓐꓰ ꓙꓵꓻ ꓠꓲ, ꓠꓬ “ꓢꓲ ꓒ ꓬꓰ‐ꓢꓴ ꓬꓲ ꓚꓲ ꓛꓬ ꓠꓬꓲ ꓟꓳ_ ꓟ ꓡꓰ ꓐꓰ ꓢꓲ ꓒ ꓟꓬ ꓢꓶꓽ ꓐꓰ ꓮ ꓙꓵ ꓔꓯ ꓠꓬꓲ ꓟꓳ ꓠ, ꓟ ꓬꓰ ꓙ_ ꓡꓳ꓿
ꓠꓱ. ꓐꓯꓼ ꓢꓴ ꓫ. ꓓꓴ ꓟꓷꓼ ꓓꓴ ꓡ ꓞꓳ ꓐꓴ ꓫ. ꓙꓵ ꓟꓷꓼ ꓙꓵ ꓓꓴ ꓔꓯ ꓟꓳ ꓐ ꓡꓰ ꓠ, ꓟ ꓣꓳ ꓟꓬ ꓢꓶꓽ ꓔꓯ ꓒꓴ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓢꓯꓼ ꓖꓶ ꓔ ꓡꓳ꓿ ꓣꓳ ꓟꓲ ꓠꓯ ꓗꓪ ꓢꓰꓼ ꓡꓯ ꓘꓳ ꓓꓴ ꓐꓰ ꓑꓲ. ꓞ, ꓔꓬ ꓟ ꓙꓵ, ꓗꓪ ꓙꓲ ꓢꓴ ꓢꓲ ꓤ ꓐꓴ ꓠꓬ ꓣꓳ ꓗꓳ ꓡꓳ ꓗꓪ ꓟꓽ ꓔꓱ, ꓟ꓾ ꓜꓲ ꓜꓲ ꓟꓴ ꓟꓴ ꓬꓰ_ ꓟ ꓐꓰ ꓫ. ꓙꓵ ꓓꓴ ꓐꓰ ꓟꓬ ꓔꓬ ꓟ ꓙꓵ, ꓘꓴꓽ ꓗꓪ ꓥ ꓟꓲ “ ꓧꓪ. ꓛꓲ ꓟ꓾ꓕꓲꓺ ꓢꓲꓽ_ ꓟ꓾ ꓟꓶꓽ ꓠꓷ, ꓝ_ ꓟ ꓡꓰ ꓐꓰ” ꓙꓵꓻ ꓠꓲ, ꓔꓯ ꓢꓷ. ꓙ ꓟꓳ ꓙ ꓠ, ꓟ ꓥ ꓡꓳ꓿
“ꓙꓵꓻ ꓠꓲ, ꓠꓬ ꓟꓲ ꓠꓯ ꓠꓯ ꓞꓲ, ꓟ ꓠꓯꓼ ꓗꓪ ꓣꓳ ꓟꓬ ꓢꓶꓽ ꓔꓯ ꓒꓴ ꓡꓰ ꓝꓲ ꓠ, ꓟ ꓥ ꓟ ꓡꓰ ꓐꓰ ꓢꓲ ꓡꓲ, ꓟ꓾ ꓔꓱ, ꓟ ꓐꓰ ꓕꓲ ꓠꓲ, ꓕꓲ ꓪ ꓗꓷ ꓠ, ꓟ ꓐꓱ ꓶ ꓣꓳ ꓕꓵꓼ ꓪ ꓗꓪ ꓐꓰ ꓕꓲ ꓝ. ꓠꓱ. ꓐꓯꓼ ꓢꓴ ꓔꓯ ꓶ ꓓꓳ ꓫꓱ, ꓓꓳ ꓠꓬꓲ ꓟꓳ ꓓꓴ ꓔꓯ ꓖꓶ ꓠ, ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ꓿
ꓬꓲ. ꓟꓶꓽ ꓗꓪ ꓐꓰ ꓙꓲ ꓢꓴ ꓠꓬ ꓣꓳ ꓠꓲ, ꓟ ꓔꓯ ꓒꓴ ꓖꓶ ꓢꓲ ꓔꓱ ꓔꓱ, ꓐꓰ ꓢꓯꓼ ꓙꓳ ꓙꓳ ꓡꓰ ꓢꓲ ꓒ ꓔꓯ ꓢꓷ. ꓙ ꓟꓳ ꓙ ꓠ, ꓟ ꓬꓰ ꓙ ꓠ, ꓟ ꓟ, ꓟ ꓟ‐ꓡꓲ ꓗꓪ ꓐꓰ ꓪꓽ ꓘꓴ ꓙ ꓖꓶ ꓠ, ꓟ ꓐꓱ ꓶ ꓔꓲꓺ ꓒ ꓪ ꓔꓲ ꓡꓰ ꓶꓽ ꓓꓰ ꓗꓷ ꓟ ꓥꓳ꓿
