ꓠꓽ ꓕꓲꓽ ꓠꓬꓲ ꓕꓯ꓾ ꓖꓴ ꓪꓴ. ꓘꓴ ꓜꓲꓼ ꓞꓳ ꓔꓯ ꓟꓳ. ꓢꓲꓽ ꓒ ꓟꓬꓱꓽ ꓣꓱꓽ ꓖꓴ (Dicastery for Easten Churches) ꓬꓲ ꓢꓲꓽ ꓒ ꓥ ꓟ Cardinal Claudio Gugerotti ꓠꓬ ꓢꓲꓽ ꓫꓬˍ ꓟ ꓟꓵꓽ (Holy Land) ꓐꓱ ꓶ ꓬꓰˍ ꓟ ꓠꓽ ꓥꓪꓽ ꓠꓬꓲ ꓓꓽ ꓟ (Good Friday) ꓔꓲꓺ ꓒꓴ ꓖꓳˍ ꓟ ꓗꓪ ꓐ ꓠ, ꓟ ꓕꓵꓼ ꓪꓽ ꓖꓶˍ ꓟ ꓕꓳꓽ ꓶ ꓕꓲ ꓒꓬꓽ ꓔꓯ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓙꓳˍ ꓟ ꓔꓲꓺ ꓒ ꓓꓽ ꓐꓴ ꓔꓬ ꓗꓪ ꓖꓶ ꓩꓴ ꓗꓷꓳ꓿
ꓕꓳꓽ ꓶ ꓖꓳ ꓟ ꓠꓯꓸꓼ ꓗꓪ ꓚꓮꓣꓓꓲꓠꓮꓡ ꓡꓰ ꓕꓲ ꓟꓲ ꓠꓯ ꓡꓱ ꓗꓪ ꓙꓳˍ ꓟ ꓗ‐ꓔꓳ‐ꓡꓲꓗ ꓢꓲ ꓤ ꓐꓴ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓬꓰ ꓔꓬ ꓟ “ꓠꓽ ꓥꓪꓽ ꓠꓬꓲ ꓓꓽ ꓟ ꓖꓳ ꓟꓶ ꓔˍ ꓟ ꓔꓲꓺ ꓒꓴ” (Good Friday Collection) ꓗꓪ ꓐ ꓡˍ ꓗꓪ ꓛꓲ ꓔꓲꓺ ꓖꓶ ꓠ, ꓟ ꓕꓵꓼ ꓪ ꓖꓶ ꓔ ꓡꓳ꓿
ꓔꓲꓺ ꓒꓴ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓟꓲ ꓠꓯ ꓗꓪ ꓔꓬ ꓕꓯ ꓔꓬ ꓗꓷ ꓟ ꓢꓲꓽ ꓫꓬˍ ꓟ ꓟꓵꓽ ꓔꓯ ꓗꓪꓽ ꓫꓵꓼ ꓠ, ꓟ ꓐꓰ ꓖꓳ ꓗꓪ ꓟ ꓘꓴ ꓜꓲꓼ ꓞꓳ ꓐꓴ ꓡꓰ ꓶꓼ ꓓꓳꓽ ꓫꓱ, ꓓꓳꓽ ꓟꓬꓱꓽ ꓬꓰˍ ꓟ ꓬꓰ ꓙ ꓔꓳ, ꓙ ꓓꓴ ꓐꓱ ꓶ “ꓢꓲꓽ ꓫꓬˍ ꓟ ꓟꓵꓽ (Good Friday)” ꓔꓯ ꓗꓪꓽ ꓫꓵꓼˍ ꓟ ꓜꓴꓻ ꓗꓪ ꓖꓶ ꓩꓴ ꓓꓴ ꓥ ꓡꓳ꓿
ꓮ ꓡꓴ ꓒꓴ ꓔꓲꓺ ꓒꓴ ꓬꓲ. ꓬꓲ ꓢꓲ
ꓒꓴ ꓡꓴˍ ꓟ ꓠꓬ ꓕꓯꓽ ꓢꓲ ꓗꓪ ꓐꓰ ꓡꓳ. ꓠꓬꓲ ꓗꓷ ꓠꓬ ꓣꓳꓺˍ ꓡꓳ ꓐꓰ ꓚꓬ, ꓪˍ ꓥ ꓟꓲ ꓚꓵ ꓚꓵ ꓠꓽ ꓮ ꓗꓶ. ꓬꓳ. ꓚꓵˍ ꓟ ꓓꓵꓽ ꓙꓽ ꓞꓷ, ꓓꓴ ꓕꓲ ꓟ ꓥ ꓟ ꓔꓯ ꓔꓲꓺ ꓒ ꓓꓽ ꓚꓮꓣꓓꓲꓠꓮꓡ ꓡꓰ ꓐꓯˍ ꓡꓳ꓿ ꓕꓲ ꓫꓵꓽ ꓫꓵꓽ ꓟꓽ ꓬꓰ ꓬꓰ ꓔꓬ ꓟ ꓠꓬ ꓟꓲ ꓠꓯ ꓐꓬ ꓡꓰ ꓔꓬ ꓟ ꓔꓯ ꓬꓲ ꓘꓶꓽ ꓬꓲ ꓡꓯꓼ ꓗꓪ ꓐꓰ ꓡꓳ. ꓠꓬꓲ ꓔꓬ ꓟ ꓡꓰꓽ ꓟꓽ ꓞꓲꓺ ꓐꓬ ꓡꓰ ꓠ ꓢꓯꓼ ꓖꓶ ꓔꓬ ꓟ ꓔꓯ ꓫꓱ.ˍ ꓡꓳ꓾ꓲ ꓐꓰ ꓬꓲꓼ ꓠꓬꓲ. ꓖꓶ ꓔ ꓡꓳ꓿
ꓮ ꓡꓴ ꓒꓴ ꓔꓲꓺ ꓒꓴ ꓖꓳ ꓔꓬ ꓟ ꓙꓵ, ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓫꓵꓻ ꓙ ꓗꓷ ꓟ ꓠꓽ ꓥꓪꓽ ꓓꓽ ꓟ ꓥ ꓟ ꓑꓶ. ꓓꓴ ꓞꓳ ꓫꓵꓽ ꓞꓳ ꓙꓰꓽ ꓕꓯ ꓢꓲ ꓙꓳˍ ꓟ ꓪꓴ‐ꓢ ꓬꓲ ꓙꓽ ꓖꓶ ꓔˍ ꓟ ꓐꓰ ꓗꓴ. ꓙꓲꓽ ꓙꓳ ꓔꓬ ꓟ꓾ ꓣꓳꓺ ꓓꓰˍ ꓟ ꓙꓲ‐ꓢꓴ ꓢꓲ ꓤ ꓐꓴ ꓬꓲ ꓪ “ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯꓼ ꓕꓵꓼ ꓔˍ ꓟ” ꓔꓯ ꓞꓳ ꓤ ꓮ ꓟꓬ, ꓢꓷ. ꓐ ꓡ ꓠ, ꓟ ꓬꓲ ꓔꓯ ꓐꓬꓱꓽ ꓐꓰ ꓮ ꓟꓶ ꓞꓲꓼ ꓙ ꓡꓯ ꓘꓳ ꓓꓴ ꓙꓼ ꓚꓱ, ꓔꓯ ꓣꓱꓽ ꓠ, ꓟ ꓔꓲꓺ ꓒ ꓓꓽ ꓐꓴ ꓔꓯ ꓕꓵꓼ ꓪ ꓖꓶ ꓗꓷꓳ꓿
ꓮ ꓡꓴ ꓒꓴ ꓕꓱ ꓟ ꓠꓬ ꓢꓲ ꓡꓲ ꓟ ꓐꓱ ꓶ ꓔꓲꓺ ꓒ ꓪ ꓔꓲ. ꓬꓲ ꓓꓰꓽ ꓘꓶꓽ ꓔꓯ ꓔꓱ, ꓔꓱ,ˍ ꓡꓰꓽ ꓒꓳ, ꓖꓶˍ ꓟ ꓥ ꓡꓳ꓿
ꓮ ꓡꓴ ꓒꓴ ꓕꓱ ꓟ ꓠꓬ ꓬꓲꓻ ꓡꓴꓽ ꓐꓱ ꓘꓴꓽ ꓗꓪ ꓟ ꓬꓲ ꓙꓬ ꓬꓲ ꓙꓬˍ ꓡꓰ ꓐꓰ ꓚꓬ, ꓪˍ ꓥ ꓟꓲ ꓬꓲꓻ ꓙꓬ ꓖꓳ ꓟ ꓟꓽ ꓙꓳ ꓠꓬ ꓬꓲꓻ ꓡꓴꓽ ꓐꓱ ꓠꓬ ꓡꓲ ꓛꓲ ꓟꓵꓽ ꓛꓱ ꓗꓷ ꓡꓰˍ ꓥꓳ꓾ ꓐꓰ ꓐꓯˍ ꓡꓳ꓿
ꓕꓲ ꓣꓳ ꓡꓰ ꓕꓲ ꓣꓳ ꓣꓳꓺ ꓓꓰˍ ꓟ ꓮ ꓡꓴ ꓠꓬ ꓢꓲꓽ ꓫꓬˍ ꓟ ꓟꓵꓽ (Good Friday) ꓐꓱ ꓶ ꓖꓳ ꓓꓱꓽ ꓐꓰ ꓦ ꓕꓲ ꓒꓳ, ꓗꓪ ꓞꓳ ꓙꓳ ꓢꓯ. ꓔꓬ ꓠ, ꓟ ꓟꓽ ꓙꓳ ꓟꓽ ꓓꓻ ꓣꓱꓽ ꓞ,ˍ ꓟ ꓥ ꓡꓳ꓿
Photo Credit: Vatican News
Original Link: https://www.vaticannews.va/en/vatican-city/news/2026-03/cardinal-gugerotti-eastern-churches-holy-land-collection-appeal.html
