ꓐ, ꓐ ꓪꓴ‐ꓢ ꓐꓰ ꓮ‐ꓐꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓕꓲ ꓡꓰ ꓥ ꓟ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 5ꓽ 17‐36 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐ, ꓐ ꓪꓴ‐ꓢ ꓐꓰ ꓮ‐ꓐꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓕꓲ ꓡꓰ ꓥ ꓟ ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓥꓪ ꓐ, ꓐ ꓠꓬ ꓮ ꓟꓶ ꓗꓪ ꓛꓲ ꓟꓬꓱꓽ ꓬꓰ ꓔꓬ ꓠꓬꓲ ꓥꓪ ꓟꓲ ꓟꓬꓱꓽ ꓬꓰˍ ꓡꓳ꓿ ꓐꓰ ꓐꓯ ꓖꓶ ꓡꓳ꓿ ꓕꓱ ꓟ ꓠꓬ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓠꓬ ꓚꓵˍ ꓚꓵˍ ꓔꓬ ꓟ ꓪꓴ‐ꓢ ꓥ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓐ, ꓐ ꓪꓴ‐ꓢ ꓐꓰ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓟꓽ ꓪ ꓡꓯꓽ ꓘꓳ, ꓠ, ꓟ ꓟꓬꓱꓽ ꓬꓰ ꓔꓬ ꓟ ꓟꓽ ꓥ ꓬꓲ ꓪ ꓠꓬ ꓕꓲ ꓠꓲ, ꓬꓲ ꓪ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓟꓬꓱꓽ ꓬꓰ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓣꓳ ꓦꓻ ꓕꓲ ꓒꓳ, ꓗꓪ ꓚꓲ. ꓛꓬ ꓠꓲ ꓡꓶꓽ ꓗꓪ ꓐꓰ ꓞꓳ ꓫꓱ, ꓟ ꓟꓽ ꓥ ꓪꓴ‐ꓢ ꓠꓲ, ꓡꓶꓽ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓗꓪ ꓐꓰ ꓞꓳ ꓫꓱ, ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓟꓬ ꓖꓶ ꓐ ꓡ ꓟ ꓪꓴ‐ꓢ ꓐꓰ ꓐꓯ ꓟꓴ ꓘꓶꓽ ꓟ ꓪꓴ‐ꓢ ꓥ ꓟ ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓢꓴ ꓔꓯ ꓥ ꓟꓲ ꓢꓯ. ꓡ ꓝꓲ. ꓐ ꓡ ꓟ ꓪꓴ‐ꓢ ꓢꓯꓼ ꓪ ꓙꓳ ꓟ ꓥ ꓡꓳ꓿ ꓝꓮꓲ ꓬꓲ ꓠꓬ ꓞꓳ ꓫꓵꓽ ꓞꓳ ꓙꓲ ꓐꓴ ꓔꓯ ꓐꓯ ꓟꓴ ꓘꓶꓽ ꓠ, ꓟ ꓙꓵꓽ ꓪ ꓙꓳ ꓢꓴ ꓟꓲ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓦꓻ ꓕꓲ ꓒꓳ, ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓪꓲ‐ꓢ ꓶꓼ ꓓꓳ ꓫꓱ, ꓓꓳ ꓔꓯ ꓠ ꓡꓳ. ꓢꓲ ꓠꓬꓲ ꓞꓳ ꓫꓱ, ꓠꓬ ꓬꓲ ꓔꓯ ꓙꓵꓻ ꓢꓴ ꓠꓬ ꓫꓵꓻ ꓥ ꓟꓲ ꓢꓯ. ꓬꓲꓼ ꓡ ꓟ ꓚꓱ, ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿
ꓖꓳ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓟ ꓥ ꓟꓲ ꓝꓴꓲ ꓔꓲ ꓠ, ꓟ ꓣꓳ ꓚꓵˍ ꓟ ꓔꓯ ꓐꓯ ꓖꓶ ꓔ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓢꓴ ꓐꓰ ꓢꓯ. ꓢꓴ ꓐꓴ ꓐꓱ ꓶ ꓐꓯ ꓟꓴ ꓘꓶꓽ ꓠ, ꓟ꓾ ꓙꓲ ꓢꓴ ꓐꓴ ꓟꓽ ꓙꓲ ꓢꓴ ꓐꓴ ꓔꓯ ꓐꓯ ꓟꓴ ꓘꓶꓽ ꓠ, ꓟ ꓚꓱ, ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿
ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓚꓵˍ ꓚꓵˍ ꓥ ꓟ ꓔꓯ ꓢꓷ. ꓡꓰ ꓠ, ꓟ ꓖꓳ ꓓꓱ ꓔꓲ ꓒꓽ ꓬꓳ‐ꓦ ꓡꓰ ꓬꓲ ꓠꓬ ꓠꓬꓲ ꓟꓳ ꓓꓴ ꓐꓱ ꓶ ꓢꓷ, ꓙ ꓟꓳ ꓙ ꓠ, ꓟ ꓡ ꓢꓴ ꓥ ꓟ ꓚꓱ꓾ ꓢꓲꓺ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓢꓷ. ꓡꓰ ꓓꓴ ꓮ ꓟꓬ, ꓬꓰ ꓗꓷ ꓟ ꓚꓱ꓾ ꓐ, ꓐ ꓪꓴ‐ꓢ ꓬꓲ ꓚꓲ. ꓛꓬ ꓮ‐ꓐꓲ ꓬꓰ‐ꓢꓴ ꓐꓱ ꓶ ꓢꓷ. ꓙ ꓟꓳ ꓙ ꓟ꓾ ꓘꓶꓽ ꓫꓵꓼ ꓡꓵ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓝꓴꓲ ꓙꓳ ꓢꓴ ꓔꓯ ꓚꓬꓴ ꓠ, ꓟ ꓢꓲꓺ ꓒ ꓥ ꓟ ꓔꓯ ꓐꓳ ꓖꓶ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓖꓶ ꓡ ꓟ ꓐꓯ ꓘꓶꓽ ꓔꓯ ꓠ ꓠ, ꓔꓬ ꓡ? ꓢꓲꓽ ꓫꓬ ꓕꓳ ꓶ ꓘꓴꓽ ꓗꓪ ꓢꓲꓺ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓙꓵꓻ ꓢꓲ ꓠꓬꓲ ꓢꓯ. ꓔꓬ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓪ ꓟ ꓚꓱ, ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿ ꓠꓴ ꓥꓪ ꓠꓬ ꓞꓳ ꓔꓬ ꓡ?
ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓪ ꓠ, ꓟ ꓣꓳ ꓢꓯꓼ ꓕꓵꓼ ꓡꓯ꓿ ꓢꓲꓺ ꓒ ꓐꓯ ꓘꓶꓼ ꓔꓯ ꓣꓳ ꓠ ꓠ, ꓡꓯ꓿
