ꓢꓲ ꓒ ꓠꓯꓸꓼ ꓗꓪ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓗꓪ ꓣꓳ ꓢꓯꓼ ꓪ ꓣꓴ ꓠ ꓔˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓬꓳ‐ꓦ 5ꓽ1‐16) ꓥ ꓡꓳ꓿
ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲ ꓒ ꓬꓰ‐ꓢꓴ ꓡꓰ (38) ꓘꓳꓼ ꓠꓻ ꓔꓬ ꓢꓴ ꓕꓲ ꓣꓳ ꓔꓯ꓾ ꓠꓴ ꓓꓻ ꓡꓰ ꓠꓲ, ꓫꓵˍ ꓡ꓾ ꓐꓰ ꓐꓯ ꓖꓶˍ ꓡꓳ꓿ ꓞꓳ ꓠꓻ ꓖꓳ ꓕꓲ ꓣꓳ ꓟ ꓠꓬ 38 ꓘꓳꓼ ꓠꓻ ꓔꓬ ꓢꓲ ꓠꓬꓲ꓾ ꓓꓻ ꓡꓰ ꓟꓶ ꓠ, ꓟ ꓐꓱ ꓶ ꓦꓴꓻ ꓠꓬ, ꓔꓬ ꓢꓴ ꓡꓳ. ꓠꓬ, ꓔꓬ ꓢꓴ ꓥ ꓡꓳ꓿ ꓡ ꓞꓳ ꓕꓱ ꓕꓲ ꓣꓳ ꓠꓬ ꓮ ꓟꓬ, ꓘꓳꓼ ꓠꓻ ꓓꓻ ꓡꓰˍ ꓟ ꓔꓯ ꓥꓳ ꓡꓳ. ꓢꓲ ꓠꓬꓲ ꓬꓲꓻ ꓙꓬ ꓘꓶꓽ ꓗꓪ ꓡꓳ ꓠꓬ, ꓔꓬ ꓡꓳ꓿ ꓬꓲꓻ ꓡꓴ ꓐꓱ ꓗꓪ ꓬꓲꓻ ꓙꓬ ꓡꓵ ꓡ ꓕꓯ ꓬꓲ ꓔꓯ ꓬꓲꓻ ꓐꓱ ꓗꓪ ꓧꓳꓽ ꓓꓵꓽ ꓡꓰ ꓢꓴ ꓟꓽ ꓙꓳ ꓠꓬꓲ ꓬꓲ ꓠꓽ ꓠꓲ, ꓟ ꓙꓬ ꓠꓬꓲ ꓐꓰ ꓝꓮꓲ ꓕꓲ ꓧꓪ, ꓬꓲ ꓙꓬ ꓡꓵ ꓡ ꓟ ꓔꓯ ꓡꓳ. ꓠꓬ, ꓔꓬ ꓪ ꓡꓰꓳ꓿ ꓖꓳ ꓡꓱ ꓬꓰ ꓔꓬ ꓟ 38 ꓘꓳꓼ ꓗꓪ ꓛꓲ ꓡꓺꓳ꓿
ꓢꓲ ꓒ ꓬꓰ‐ꓢꓴ ꓛꓲ ꓡ ꓕꓯ ꓬꓲ ꓔꓯ ꓠꓻ ꓫꓬ, ꓖꓶ ꓗꓷꓳ꓿ ꓖꓳ ꓕꓯ ꓬꓲ ꓠꓬ ꓛꓲ ꓫꓵꓻ ꓡꓯ ꓫꓵꓻˍ ꓟ ꓗꓪ ꓐꓰ ꓓꓻ ꓡꓰ ꓢꓲ ꓞꓳ ꓧꓺ ꓕꓲ ꓣꓳ ꓡꓰ ꓐꓰ ꓙꓻ ꓖꓴ ꓫꓱꓽ ꓐ ꓡ ꓗꓷꓳ꓿
ꓣꓳ ꓤꓶꓻ ꓗꓪ ꓥˍ ꓟꓲ ꓕꓱ ꓟ ꓡꓰ ꓐꓰ ꓔꓳ, ꓜꓳꓽ ꓡˍ ꓡꓳ꓿ ꓫ. ꓙꓵ ꓓꓴ꓾ ꓠꓲ, ꓫ. ꓓꓴ ꓮ ꓟꓬ, ꓙꓳˍ ꓟ ꓠꓯꓸꓼ ꓗꓪ ꓟꓶ ꓤ ꓛꓵꓽ ꓓ, ꓡꓳ꓿ ꓠꓲ, ꓫ. ꓓꓴ ꓬꓲ ꓪꓻ ꓠꓯꓸꓼ ꓗꓪ ꓟꓶ ꓤ ꓪꓴ ꓓ, ꓡꓳ꓿ ꓬꓰ ꓙ ꓠ, ꓟ ꓓꓰꓽ ꓠ, ꓟ꓾ ꓖꓳ ꓟ ꓗꓪ ꓐꓰ ꓡꓲ, ꓓꓳ ꓙꓰ ꓠ, ꓟ ꓠꓽ ꓢꓯꓼ ꓕꓵꓼ ꓟꓽ ꓑꓶ. ꓑꓶ. ꓔꓬ ꓡꓳ꓿ ꓖꓳ ꓡꓱ ꓔꓳ, ꓜꓳꓽ ꓡˍ ꓕꓯ ꓢꓲ ꓒ ꓬꓰ‐ꓢꓴ ꓬꓲ ꓠꓺ ꓠꓬꓲ ꓘꓶꓽ ꓔꓯ ꓓꓵꓽ ꓙꓽ ꓟꓶ ꓗꓷ꓿ “ꓠꓴ ꓓꓻ ꓡꓰ ꓠꓲ, ꓫꓵˍ ꓡ”꓿
ꓠꓺ ꓠꓬꓲ ꓘꓶꓽ ꓕꓱ ꓟ ꓠꓬ ꓣꓳ ꓖꓳ ꓓꓱꓽ꓾ ꓠꓲ, ꓟ ꓐꓱ ꓶ ꓠꓻ ꓫꓬ, ꓖꓶˍ ꓟ ꓟꓶ ꓠ, ꓟ ꓠꓲ, ꓡꓶꓽ ꓔꓯ ꓐꓯ ꓟ. ꓖꓶ ꓠ, ꓟ ꓓꓱꓽ ꓖꓶˍ ꓟ ꓐꓯ ꓘꓶꓽ ꓕꓲ ꓟ ꓥ ꓡꓳ꓿ ꓮ ꓘꓶ. ꓠꓲ, ꓫ. ꓪˍ ꓟ ꓠꓯꓸꓼ ꓗꓪ ꓐꓰ ꓡꓲ, ꓓꓳ ꓐ ꓡ ꓠ, ꓟ ꓢꓯꓼ ꓪ ꓕꓲ ꓟ ꓥ ꓡꓳ꓿ ꓒꓳ, ꓡꓶ. ꓡˍ ꓟ ꓔꓯ ꓘꓳ ꓣꓴ ꓐ ꓡ ꓠ, ꓟ ꓐꓱ ꓶ ꓣꓳ ꓠꓲ, ꓟ ꓠꓯꓸꓼ ꓗꓪ ꓟ ꓠꓻ ꓓꓻ ꓡꓰ ꓠꓲ, ꓫꓵˍ ꓟ ꓣꓳ ꓠꓲ, ꓡꓶꓽ ꓠꓬ ꓬꓳ. ꓚꓰꓽˍ ꓟ ꓥ ꓡꓳ꓿
ꓣꓳ ꓢꓷ. ꓔ ꓠ ꓗ, ꓟ ꓠꓬ ꓠꓻ ꓫꓬ, ꓟ ꓐꓯˍ ꓟ ꓠꓬ ꓗꓳ. ꓡ ꓟ ꓫꓵꓽ ꓪꓴ ꓔꓯ ꓡꓳ ꓩꓴ ꓗꓷ ꓐ ꓡˍ ꓟ ꓥ ꓡꓳ꓿ ꓬꓲ ꓪꓴ. ꓟ ꓛꓲ ꓦꓽ ꓕꓲ ꓦꓽ ꓔꓯ ꓦꓽ ꓩꓴ ꓠ, ꓟ ꓐꓱ ꓶ ꓔꓼ ꓝꓲ ꓣꓱꓽ ꓞ, ꓡꓳ꓿ ꓬꓰ ꓑꓶ.ˍ ꓟ ꓠꓲ, ꓟ꓾ ꓟꓽ ꓙꓳꓺ ꓟ ꓠꓲ, ꓟ ꓣꓱꓽ ꓞ, ꓡꓳ꓿ ꓖꓳ ꓟ ꓙꓳˍ ꓕꓯ ꓡꓰꓽ ꓣꓳ ꓟꓲ ꓙꓬ ꓢꓲ ꓟ ꓤꓶꓻ ꓗꓪ ꓡꓯꓼ ꓫꓵ ꓞꓳ ꓙꓳ ꓐ ꓡˍ ꓥꓳ꓿
