ꓟꓬ‐ꓟ ꓗꓴꓷꓼ ꓢꓲ ꓡꓲ, ꓟꓶ ꓠ, ꓟ ꓐꓱ ꓶ 3 ꓦ ꓟ 26 ꓠꓬꓲ ꓗꓪ ꓪꓽ ꓘꓴ ꓠ, ꓟ ꓐꓱ ꓶ ꓟꓬ‐ꓟ ꓗꓴꓷꓼ ꓗꓪ ꓔꓲꓺ ꓒ ꓓꓽ ꓐꓴ ꓡꓰ ꓐꓯ ꓒꓶ ꓗꓷ ꓟ ꓓꓳꓽ

ꓛꓲ ꓡ ꓟ 3 ꓦ ꓟ 26 ꓠꓬꓲ 2026 ꓘꓳꓼ ꓕꓯ ꓟꓬ‐ꓟ ꓗꓴꓷꓼ ꓢꓲ ꓡꓲ, ꓟꓶ ꓠ, ꓟ ꓐꓱ ꓶ ꓪꓽ ꓘꓴ ꓟ ꓦꓬꓼ ꓠꓬꓲ ꓬꓰ ꓠ, ꓟ ꓚꓱ, ꓔꓯ ꓟꓬ‐ꓟ ꓗꓴꓷꓼ ꓗ‐ꓔ‐ꓡꓲꓗ ꓔꓲꓺ ꓒ ꓓꓽ ꓐꓴ ꓡꓰ ꓐꓯ ꓒꓶ ꓗꓷ ꓟ ꓥ ꓡꓳ꓿ ꓟꓬ‐ꓟ ꓗꓴꓷꓼ ꓔꓲꓺ ꓒ ꓓꓽ ꓜꓴꓻ ꓥ ꓟ ꓚꓐꓚꓟ ꓜꓴꓻ ꓗꓪ ꓐꓰ ꓛꓲ ꓡ ꓟ 3 ꓦ ꓟ 26 ꓠꓬꓲ ꓗꓪ ꓜ ꓚꓲ. ꓚꓲ. ꓢꓲ ꓠꓬꓲ ꓟꓬ‐ꓟ ꓗꓴꓷꓼ ꓢꓲ ꓡꓲ, ꓟꓶ ꓠ, ꓟ ꓐꓱ ꓶ ꓮ ꓘꓶ. ꓛꓲ ꓪꓽ ꓘꓴ ꓠ, ꓟ ꓔꓯ ꓐꓯ ꓒꓶ ꓗꓷꓳ꓿

ꓟꓬ‐ꓟ ꓗꓴꓷꓼ ꓔꓲꓺ ꓒ ꓓꓽ ꓜꓴꓻ ꓔꓯ ꓧꓳꓽ ꓪꓴ. ꓟꓴ ꓔꓬ ꓟ ꓚꓮꓣꓓꓲꓠꓮꓡ ꓚꓧꓮꓡꓰꓢ ꓐꓳ ꓡꓰ ꓮ ꓟꓶ ꓟ ꓙꓵ, ꓠꓬ ꓢꓲꓽ ꓫꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓦꓬꓼ ꓠꓬꓲ ꓥ ꓟ ꓪꓴ. ꓠꓬꓲ ꓜ ꓚꓲ. ꓚꓲ. ꓙꓵ, ꓐꓰ ꓪꓴ‐ꓢ ꓠꓯꓼ ꓗꓪ ꓮ ꓘꓶ. ꓛꓲ ꓪꓽ ꓘꓴ ꓠ, ꓟ ꓬꓲ ꓙꓵ, ꓟꓲ ꓥ ꓡꓳ꓿

ꓝꓮꓲ ꓥꓳꓽ ꓡꓰ ꓟ ꓛꓬ ꓡꓰ ꓟ ꓝꓴꓲ ꓔꓯ ꓒꓰ, ꓗꓷ ꓢꓲ ꓠꓬꓲ ꓪꓴ‐ꓢ ꓠꓯꓼ ꓗꓪ ꓡ ꓠ, ꓟ ꓬꓲ ꓙꓵ, ꓟꓲ ꓥ ꓡꓳ ꓐꓰ ꓔꓲꓺ ꓒ ꓓꓽ ꓚꓮꓣꓓꓲꓠꓮꓡ ꓡꓰ ꓐꓯ ꓔ ꓡꓳ꓿

ꓝꓮꓲ ꓮ ꓟꓶ ꓟ ꓙꓵ, ꓗꓪ ꓟꓬ‐ꓟ ꓗꓴꓷꓼ ꓢꓲ ꓡꓲ, ꓠ, ꓟ ꓐꓰ ꓗꓴꓷꓽ ꓘꓴꓽ ꓗꓪ ꓫ. ꓓꓴ ꓟꓷꓼ ꓓꓴ ꓮ ꓟꓬ, ꓛꓲ ꓔꓳ, ꓜꓳ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓐꓱ ꓶ ꓮ ꓘꓶ. ꓛꓲ ꓪꓽ ꓘꓴ ꓠ, ꓟ ꓬꓲ ꓙꓵ, ꓥ ꓟ ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿

ꓛꓲ ꓡ ꓟ 26 ꓠꓬꓲ ꓗꓪ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓓ. ꓪꓴ. ꓠꓬ ꓮ‐ꓢꓲ‐ꓢꓲ ꓡꓳ ꓒꓱ ꓗꓪ ꓐꓰ ꓙꓲꓻ ꓫꓬ ꓢꓴ ꓝꓣꓮꓠꓚꓲꓢ ꓡꓰ ꓟ. ꓖꓶ ꓔ ꓟ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓪꓽ ꓘꓴ ꓓꓴ ꓔꓯ ꓪꓽ ꓘꓴ ꓠ , ꓟ꓾

2. ꓜꓽ ꓚꓲ. ꓚꓲ. ꓢꓲ ꓠꓬꓲ ꓗꓴꓷꓼ ꓢꓲ ꓡꓲ, ꓟꓶ ꓠ, ꓟ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓐꓱ ꓶ ꓮ ꓘꓶ. ꓛꓲ ꓪꓽ ꓘꓴ ꓠ, ꓟ꓾

3. ꓫ. ꓢꓴ ꓟꓷꓼ ꓢꓴ ꓐꓴ ꓐꓰ ꓠꓲ, ꓫ. ꓟꓬ ꓫ. ꓔꓳ, ꓜꓳ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓠ, ꓟ ꓔꓯ ꓬꓰ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿ ꓝꓮꓲ ꓮ ꓟꓶ ꓟ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ (14) ꓗꓪ ꓐꓰ ꓥ ꓟꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓚꓱ, ꓗꓪ ꓪꓴ‐ꓢ ꓠꓵꓻ ꓠꓲ, ꓐꓰ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓟꓬꓱꓽ ꓬꓰ ꓠ, ꓟ ꓢꓯꓼ ꓕꓵꓼ ꓠ, ꓟ ꓔꓯ ꓐꓯ ꓖꓶ ꓔ ꓡꓳ ꓐꓰ ꓢꓷ. ꓪ ꓡꓳ꓿