ꓟꓬ˗ꓟ ꓗꓴꓷꓼ ꓗꓪ ꓗ˗ꓔꓳ˗ꓡꓲꓗ ꓘꓴ ꓜꓲꓲꓼ ꓞꓳ ꓛꓲ ꓡ ꓟ ꓚꓱꓹ ( Church history)
ꓟꓬ˗ꓟ ꓗꓴꓷꓼ ꓗꓪ ꓗ˗ꓔꓳ˗ꓡꓲꓗ ꓘꓴ ꓜꓲꓼ ꓞꓳ ꓛꓲ ꓡ ꓟ ꓠꓬ (500) ꓘꓳꓼ ꓕꓯ ꓢꓲ ꓙꓳ ꓡꓰ ꓟ ꓥ ꓡꓳ꓿ ꓟꓬ˗ꓟ ꓗꓴꓷꓼ ꓗꓪ ꓗ˗ꓔꓳ˗ꓡꓲꓗ ꓘꓴ ꓜꓲꓼ ꓞꓳ ꓛꓲ ꓡ ꓟ ꓠꓬ ꓮ ꓘꓶꓸ ꓛꓲ ꓟꓶ ꓫꓵˍ ꓟ ꓚꓺ ꓟꓲꓽ ꓓꓽ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ (3) ꓝꓲꓸ ꓗꓪ ꓐꓰ ꓐꓯ ꓟꓸ ꓖꓶ ꓓꓴ ꓥ ꓡꓳ꓿
ꓮꓓ (1500) ꓘꓳꓼ ꓛꓲ ꓔꓯ ꓟꓬ˗ꓟ ꓗꓴꓷꓼ ꓗꓪ ꓗ˗ꓔꓳ˗ꓡꓲꓗ ꓘꓴ ꓜꓲꓼ ꓞꓳ ꓛꓲ ꓔꓬ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿ ꓖꓳ ꓡꓱ ꓠꓬ ꓮ ꓡꓰ ꓐꓰ ꓟꓬ˗ꓟ ꓗꓴꓷꓼ ꓗꓪ ꓗ˗ꓔꓳ˗ꓡꓲꓗ ꓘꓴ ꓜꓲꓼ ꓞꓳ ꓛꓲ ꓡ ꓐꓯ ꓠꓬ
ꓑꓳꓔꓴꓣꓖꓴꓬ ꓶꓻ ꓡꓯꓼ ꓬꓰ ꓒꓽ ꓐꓴ ꓐꓰ ꓟꓯꓼ ꓒꓯꓼ ꓐꓴ ꓐꓰ ꓕꓲ ꓪ ꓪꓴ˗ꓢ ꓟꓬꓱꓽ ꓟꓯ ꓢꓴ ꓐꓴ ꓒ ꓡ ꓟ ꓑꓶꓸ ꓓꓴ ꓟꓬ˗ꓟ ꓗꓴꓷꓼ ꓗꓪ ꓗ˗ꓔꓳ˗ꓡꓲꓗ ꓘꓴ ꓜꓲꓼ ꓞꓳ ꓛꓲ ꓡ ꓟ ꓥ ꓡꓳ꓿
ꓖꓳ ꓡꓱ ꓠꓬ ꓟꓬ˗ꓟ ꓗꓴꓷꓼ ꓗꓪ ꓓꓽ ꓪꓴꓸ ꓪꓴ˗ꓢ ꓟꓬꓱꓽ ꓟꓯ ꓢꓴ ꓐꓴ ꓔꓬ ꓗꓷ ꓟ ꓟꓵꓽ ꓔꓶꓸ ꓠꓬ ꓟꓬ˗ꓟ ꓗꓴꓷꓼ ꓗꓪ ꓙꓳ ꓟ ꓐ˗ꓖꓴ ꓟꓵ꓾ ꓔ˗ꓡꓲ ꓟꓵꓽ ꓐꓰ ꓟꓳ˗ꓔ˗ꓟ ꓟꓵꓽ ꓬꓲꓻ ꓡꓳ ꓐꓱ ꓒ ꓕꓲ ꓗꓪ ꓡꓳ ꓒꓱ ꓮ ꓟꓬꓹ ꓗꓪ ꓔꓬ ꓗꓷ ꓐꓰ ꓢꓷꓸ ꓪ ꓡꓳ꓿
ꓟꓬ˗ꓟ ꓗꓴꓷꓼ ꓗꓪ ꓪꓴ˗ꓢ ꓟꓬꓱꓽ ꓟꓯ ꓢꓴ ꓐꓴ ꓜꓴꓻ ꓠꓬ ꓝꓣꓮꓠꓚꓲꓢꓚꓮꓠ ꓔꓲꓺ ꓒ ꓜꓴꓻ ꓝꓮꓲ ꓓꓳꓟꓲꓠꓲꓚꓮꓠ ꓔꓲꓺ ꓒ ꓜꓴꓻ ꓐꓴ ꓠꓬ ꓓꓽ ꓪꓴꓸ ꓬꓲ ꓪꓴꓸ ꓟꓬ˗ꓟ ꓗꓴꓷꓼ ꓗꓪ ꓪꓴ˗ꓢ ꓟꓬꓱꓽ ꓟꓯ ꓗꓷ ꓢꓴ ꓐꓴ ꓔꓲꓺ ꓒ ꓜꓴꓻ ꓐꓴ ꓥ ꓡꓳ ꓐꓰ ꓢꓷꓸ ꓪ ꓡꓳ꓿
ꓪꓴ˗ꓢ ꓟꓬꓱꓽ ꓟꓯ ꓟ ꓙꓵꓹ ꓕꓯ ꓮ ꓘꓶꓸ ꓛꓲ ꓪꓴꓽ ꓟꓴ ꓡ ꓟ ꓙꓵꓹ ꓠꓬ 1700 ꓘꓳꓼ ꓕꓯ ꓥ ꓡꓳ꓿
1722 ꓘꓳꓼ ꓕꓯ ꓟꓬ˗ꓟ ꓗꓴꓷꓼ ꓗꓪ ꓪꓴ˗ꓢ ꓟꓬꓱꓽ ꓟꓯ ꓢꓴ ꓐꓴ ꓔꓲꓺ ꓒ ꓜꓴꓻ ꓐꓴ ꓔꓯ ꓗ˗ꓔꓳ˗ꓡꓲꓗ ꓘꓴ ꓜꓲꓼ ꓞꓳ ꓬꓲ ꓚꓰꓸ ꓥ ꓟ ꓣꓳ˗ꓟ ꓗꓴꓷꓼ ꓦꓮꓔꓲꓚꓮꓠ ꓗꓪ ꓔꓬ ꓟ ꓔꓲꓺ ꓒ ꓪ ꓔꓲ ꓡꓰ ꓮ ꓘꓶꓸ ꓛꓲ ꓬꓰ ꓙ ꓔꓳ ꓙ ꓗꓷ ꓟ ꓑꓶꓸ ꓓꓴ ꓟꓬ˗ꓟ ꓗꓴꓷꓼ ꓗꓪ ꓪꓴ˗ꓢ ꓟꓬꓱꓽ ꓟꓯ ꓢꓴ ꓐꓴ ꓮ ꓟꓬꓹ ꓝꓲꓸ ꓩꓴ ꓗꓷꓳ꓿
ꓖꓳ ꓡꓱ ꓥ ꓟ ꓑꓶꓸ ꓓꓴ ꓟꓬ˗ꓟ ꓗꓴꓷꓼ ꓗꓪ ꓪꓴ˗ꓢ ꓟꓬꓱꓽ ꓢꓴ ꓔꓲꓺ ꓒ ꓜꓴꓻ ꓥ ꓟ ꓐꓮꓣꓠꓮꓐꓲꓔꓰ ꓔꓲꓺꓒ ꓜꓴꓻ ꓐꓴ ꓠꓬ ꓟꓬ˗ꓟ ꓗꓴꓷꓼ ꓲ˗ꓪ ꓟꓵꓽ ꓬ˗ꓖꓳꓥ ꓐꓰ ꓐ˗ꓖꓴ ꓟꓵꓽ ꓗꓪ ꓔꓬ ꓢꓲ ꓠꓬꓲ ꓪꓴ˗ꓢ ꓟꓬꓱꓽ ꓟꓯ ꓗꓷꓳ꓿
ꓝꓮꓲ ꓪꓴ˗ꓢ ꓟꓬꓱꓽ ꓟꓯ ꓢꓴ ꓐꓴ ꓠꓬ ꓟꓬ˗ꓟ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓮ ꓙꓵꓽ ꓔꓯ ꓟꓲ ꓠꓯ ꓢꓷꓸ ꓠꓲꓹ ꓟꓸ ꓖꓶ ꓚꓱꓹ ꓗꓪ ꓮ ꓘꓶꓸ ꓚꓲ ꓢꓯꓼ ꓕꓵꓼ ꓗꓷꓳ꓿ ꓟꓲ ꓠꓯ ꓢꓷꓸꓠꓲꓹ ꓟꓸ ꓖꓶ ꓟ ꓙꓵꓹ ꓕꓯ ꓪꓴ˗ꓢ ꓦꓻ ꓡꓱ ꓢꓴ ꓟꓽ ꓦꓻ ꓡꓱ ꓢꓴ ꓟꓽ ꓘꓶꓽ ꓮ ꓙꓵꓽ ꓔꓯ ꓟꓸ ꓖꓶ ꓗꓷꓳ꓿
ꓕꓱ ꓡꓰ ꓐꓰ ꓪꓴ˗ꓢ ꓟꓬꓱꓽ ꓢꓴ ꓔꓲꓺ ꓒ꓾ ꓔꓲꓺ ꓟ ꓐꓴ ꓟꓸ ꓒ ꓟꓸ ꓟ ꓐꓴ ꓡꓰ ꓠꓯꓻ ꓞꓲꓼ ꓢꓷꓸ ꓠꓲꓹ ꓟꓲ ꓠꓯ ꓢꓷꓸ ꓠꓲꓹ ꓮ ꓟꓬꓹ ꓫꓵꓽ ꓔꓯ ꓟꓬ˗ꓟ ꓗꓴꓷꓼ ꓗꓪ ꓔꓬ ꓟ ꓢꓳꓻ ꓒ ꓢꓳꓻ ꓟ ꓐꓴ ꓔꓯ ꓟꓸ ꓖꓶ ꓗꓷꓳ꓿
ꓖꓳ ꓗꓪ ꓐꓰ ꓔꓲꓺ ꓒ ꓝꓮꓔꓧꓰꓣ ꓑꓰꓣꓚꓳꓔꓳ ꓟꓬꓱꓺ ꓢꓴ ꓔꓲꓺ ꓒ ꓠꓬ ꓟꓬ˗ꓟ ꓡꓳ˗ꓟꓲ ꓥꓳꓽ ꓐꓰ ꓡ˗ꓔꓲꓠ ꓥꓳꓽ ꓒꓳꓹ ꓠꓹ ꓟ ꓕꓳ ꓶ ꓓꓲꓚꓔꓲꓳꓠꓮꓣꓬ ꓔꓯ ꓐꓳ ꓖꓶ ꓗꓷꓳ꓿ ꓝꓮꓲ ꓟꓬ˗ꓟ ꓥꓳꓽ ꓡꓳ˗ꓟꓲ ꓥꓳꓽ ꓗꓪ ꓐꓰ ꓢꓲꓽ ꓫꓬ ꓕꓳ ꓶ ꓕꓲ ꓐꓱ ꓔꓯ ꓐꓳ ꓖꓶ ꓗꓷꓳ꓿
1900 ꓘꓳꓼ ꓗꓪ ꓛꓲ ꓡ ꓟ ꓙꓵꓹ ꓕꓯ ꓟꓬ˗ꓟ ꓗꓴꓷꓼ ꓗꓪ ꓪꓴ˗ꓢ ꓟꓬꓱꓽ ꓬꓰ ꓟ ꓠꓬ ꓮ ꓘꓶꓸ ꓛꓲ ꓪꓴꓽ ꓟꓴ ꓡ ꓓꓴ ꓙꓳ ꓡ ꓪ꓿
1900 ꓘꓳꓼ ꓗꓪ ꓛꓲ ꓡ ꓟ ꓙꓵꓹ ꓕꓯ ꓟꓬ˗ꓟ ꓗꓴꓷꓼ ꓗꓪ ꓪꓴ˗ꓢ ꓟꓬꓱꓽ ꓬꓰ ꓠꓹ ꓟ ꓔꓯ (ꓟꓰꓑ) ꓝꓳꓣꓰꓲꓖꓠ ꓟꓲꓢꓢꓲꓳꓠꓢ ꓳꓝ ꓑꓮꓣꓲꓢ) ꓜꓴꓻ ꓗꓪ ꓐꓰ ꓪꓴ˗ꓢ ꓟꓬꓰꓽ ꓬꓰ ꓗꓷꓳ꓿
ꓬꓲ ꓪ ꓜꓴꓻ ꓠꓬ ꓟ˗ꓓꓲ˗ꓡꓯ ꓐꓰ ꓬ˗ꓖꓳꓥ ꓗꓪ ꓔꓬ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓔꓯ ꓪꓴꓽ ꓟꓴ ꓡ ꓠꓹ ꓟ ꓐꓱ ꓶ ꓮ ꓘꓶꓸ ꓛꓲ ꓢꓯꓼ ꓕꓵꓼ ꓗꓷꓳ꓿
ꓖꓳ ꓡꓱ ꓥ ꓟꓲ ꓪꓴ˗ꓢ ꓟꓬꓱꓽ ꓟꓯ ꓢꓴ ꓐꓴ ꓔꓯ ꓜ ꓓꓴ ꓟꓷ ꓓꓴ ꓔꓳꓹ ꓜꓳ ꓝꓲꓸ ꓟ ꓠꓬ ꓟꓲ ꓠꓯ ꓟꓶ ꓙꓼ (ꓪꓳꓣꓡꓓ ꓪꓮꓣ 2) ꓙꓵꓹ ꓐꓰ ꓟꓯꓼ ꓢꓰꓼ ꓡꓯꓽ ꓘꓳꓹ ꓓꓴ ꓓꓳ ꓡꓰ ꓟ ꓙꓵꓹ ꓕꓯ ꓗꓴꓷꓼ ꓙꓵꓽ ꓚꓱꓹ ꓮ ꓘꓶꓸ ꓛꓲ ꓟꓽ ꓪ ꓓꓴ ꓙꓳ ꓡ ꓟ ꓑꓶꓸ ꓓꓴ ꓮ ꓘꓶꓸ ꓛꓲ ꓔꓬ ꓫꓸ ꓡꓰ ꓢꓲ ꓠꓬꓲ ꓪꓴ˗ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓗꓷꓳ꓿
ꓝꓮꓲ ꓟꓬ˗ꓟ ꓗꓴꓷꓼ ꓗꓪ ꓐꓰ ꓪꓴ˗ꓢ ꓟꓬꓱꓽ ꓟꓯ ꓢꓴ ꓔꓲꓺ ꓒ ꓔꓲꓺ ꓟ ꓟꓸ ꓒ ꓟꓸ ꓟ ꓮ ꓟꓬꓹ ꓙꓳ ꓡ ꓟ ꓑꓶꓸ ꓓꓴ ꓮ ꓘꓶꓸ ꓛꓲ ꓫꓸ ꓓꓴ ꓟꓷ ꓓꓴ ꓔꓳꓹ ꓜꓳ ꓥ ꓟꓲ ꓟꓽ ꓟꓶ ꓡꓰ ꓟꓽ ꓐꓬ ꓡꓰ ꓙꓳ ꓟ ꓥ ꓡꓳ꓿
ꓮ ꓟꓶ ꓟ ꓙꓵꓹ ꓕꓯ ꓟꓬ˗ꓟ ꓗꓴꓷꓼ ꓗꓪ ꓗ˗ꓔꓳ˗ꓡꓲ ꓘꓴ ꓜꓲꓼ ꓞꓳ ꓙꓳ ꓟ ꓢ˗ꓢꓲ˗ꓠ (16) ꓟ ꓗꓪ ꓙꓳ ꓟ ꓥ ꓡꓳ꓿
ꓝꓮꓲ 2017 ꓘꓳꓼ ꓕꓯ ꓟꓬ˗ꓟ ꓗꓴꓷꓼ ꓗꓪ ꓓꓽ ꓪꓴꓸ ꓕꓲ ꓧꓪ ꓟ ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡ ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓟꓬ˗ꓟ ꓗꓴꓷꓼ ꓗ˗ꓔꓳ˗ꓡꓲꓗ ꓘꓴ ꓜꓲꓼ ꓞꓳ ꓚꓺ ꓟꓲꓽ ꓗꓪ ꓮ ꓘꓶꓸ ꓛꓳ ꓣꓳ ꓚꓵˍ ꓟ ꓕꓲ ꓟ ꓥ ꓡꓳ꓿ ꓮ ꓟꓶ ꓟ ꓙꓵꓹ ꓗꓪ ꓟꓬ˗ꓟ ꓗꓴꓷꓼ ꓗꓪ ꓔꓬ ꓟ ꓗ˗ꓔꓳ˗ꓡꓲꓗ ꓙꓲ˗ꓢꓴ ꓢꓲꓺꓤ ꓐꓴ ꓔꓯ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓡꓰ ꓧꓳꓽ ꓪꓴꓸ ꓟꓴ ꓔꓬ ꓟ ꓥ ꓡꓳ꓿
2026 ꓘꓳꓼ ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓔꓲꓺ ꓒ ꓓꓽ (22) ꓣꓳ ꓥ ꓢꓲ ꓠꓬꓲ ꓔꓲꓺ ꓒ (1005) ꓣꓳ ꓐꓰ ꓔꓲꓺ ꓟ ꓐꓴ (2362) ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓟ. ꓒ ꓟ. ꓟ ꓐꓴ ꓠꓬ (2763) ꓣꓳ (2025) 1 ꓦ ꓕꓯ ꓢꓷ. ꓪ ꓟ ꓥ ꓡꓳ꓿
