ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓳ‐ꓦ ꓕꓳꓽ ꓶ 9ꓽ1‐41 ꓗꓪ ꓣꓳ ꓮ ꓫꓵꓽ ꓟꓳꓻ ꓪˍ ꓡ ꓐꓰ ꓐꓯˍ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓟꓬ ꓔꓶ ꓢꓴ ꓕꓲ ꓣꓳ ꓔꓯ ꓟꓷꓽ ꓶꓻ ꓔꓲ. ꓧꓳꓽ ꓢꓲ ꓟꓬ ꓢꓶꓽ ꓠꓬꓲ ꓟꓳ ꓡ ꓝꓲˍ ꓟ ꓚꓱ, ꓔꓯ ꓣꓳ ꓡꓳ. ꓟꓳˍ ꓡꓳ꓿

ꓝꓲ ꓓꓴ ꓐꓴ ꓡꓰ ꓬꓲ ꓔꓯ꓾ ꓢꓲꓺ ꓒꓽꓳ꓾ ꓡ ꓞꓳ ꓕꓱ ꓕꓲ ꓣꓳ ꓦꓵꓻˍ ꓕꓯ ꓡꓰ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓟ ꓠꓬ ꓬꓲ ꓚꓲ. ꓛꓬ ꓝꓴꓲ. ꓥ ꓡ꓾ ꓟꓽ ꓥ ꓠꓬ ꓬꓲ ꓮꓽ ꓐ ꓮ ꓟ ꓬꓰ ꓗꓷ ꓟ ꓝꓴꓲ. ꓑꓶ. ꓓꓴ ꓥ ꓡ꓾ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓠ ꓠꓬꓲˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ꓾ ꓬꓲ ꓚꓲ. ꓛꓬ ꓝꓴꓲ. ꓗꓪ ꓐꓰˍ ꓟꓲ ꓟꓽ ꓥ꓿ ꓬꓲ ꓮꓽ ꓐ ꓮ ꓟ ꓝꓴꓲ. ꓗꓪ ꓐꓰˍ ꓟꓲ ꓟꓽ ꓥ꓿ ꓪꓴ‐ꓢ ꓬꓲ ꓟꓬꓱ ꓓꓳꓽ ꓓꓳ ꓠ, ꓟ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓟꓷꓽ ꓶꓻ ꓔꓲ. ꓢꓲ ꓠꓬꓲ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓢꓴ ꓖꓳ ꓕꓲ ꓣꓳ ꓬꓲ ꓟꓬ ꓢꓶꓽ ꓗꓪ ꓟꓷꓽ ꓶꓻ ꓡꓰ ꓟꓰꓻ ꓖꓶ ꓢꓲ ꓠꓬꓲ ꓓꓻ ꓡꓰ ꓝꓲˍ ꓟ ꓥ ꓡꓳ꓿

ꓟꓬ ꓔꓶ ꓢꓴ ꓖꓳ ꓕꓲ ꓣꓳ ꓠꓬ ꓬꓲ ꓠꓬ ꓟꓬ ꓔꓶ ꓢꓴ ꓥ ꓟ ꓑꓶ. ꓓꓴ ꓪꓽ ꓘꓴ ꓦꓲ ꓘꓴꓽ ꓗꓪ ꓥˍ ꓟꓲ ꓙꓰ ꓟꓽ ꓓꓻ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓒ‐ꓡꓲ‐ꓢꓷ ꓐꓴ ꓙꓵꓽ ꓗ ꓟ. ꓒ ꓐꓴ ꓠꓬ ꓕꓱ ꓡꓱ ꓫꓵꓽ ꓟꓽ ꓙꓲꓻ ꓟꓽ ꓐꓲ ꓟ꓾ ꓛꓲ ꓫꓳ. ꓡꓯ ꓫꓳ. ꓢꓴ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓢꓴ ꓔꓯ ꓪꓽ ꓘꓴ ꓦꓲ ꓘꓴꓽ ꓗꓪ ꓟꓽ ꓓꓵꓽ ꓙꓰ ꓝꓲ꓿ ꓖꓳ ꓡꓱ ꓠꓬꓲ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓟ ꓖꓳ ꓕꓲ ꓣꓳ ꓠꓬ ꓟꓬ ꓢꓶꓽ ꓠꓬꓲ ꓟꓳꓻ ꓡ ꓢꓲ ꓠꓬꓲ ꓪꓽ ꓘꓴ ꓦꓲ ꓘꓴꓽ ꓗꓪ ꓓꓵꓽ ꓡꓰˍ ꓕꓯ ꓒ‐ꓡꓲ‐ꓢꓷ ꓐꓴ ꓮ ꓟꓬ, ꓠꓬ ꓬꓲ ꓔꓯ ꓠ ꓠꓬꓲ ꓘꓶꓽ ꓮ ꓟꓬ, ꓠ ꓠꓬꓲˍ ꓡꓳ꓿ ꓠꓴ ꓠꓬ ꓮ ꓡꓲ ꓐꓰ ꓟꓬ ꓢꓶꓽ ꓠꓬꓲ ꓟꓳ ꓡ ꓡ꓾ ꓠꓴ ꓔꓯ ꓮꓽ ꓟ ꓫꓬ, ꓖꓶ ꓡˍ ꓡ꓾ ꓮ ꓡꓲ ꓫꓵꓽ ꓥ ꓡ꓾ ꓐꓰ ꓬꓲ ꓔꓯ ꓠ ꓠꓬꓲˍ ꓡꓳ꓿

ꓬꓲ ꓡꓰ ꓬꓲ ꓔꓯ ꓫꓬ, ꓖꓶ ꓢꓴ ꓠꓬ ꓮꓽ ꓟ ꓥ ꓟ ꓬꓲ ꓟꓽ ꓢꓷ.꓿ ꓢꓲ ꓒ ꓬꓰ‐ꓢꓴ ꓥ ꓟ ꓬꓲ ꓟꓽ ꓢꓷ.꓿ ꓖꓳ ꓡꓱ ꓥˍ ꓟꓲ ꓬꓲ ꓢꓷ.ˍ ꓟ ꓠꓬ ꓬꓲ ꓠꓬ ꓒꓬꓱꓽ ꓟꓳ ꓡ ꓕꓯ ꓡꓰ ꓟꓬ ꓢꓶꓽ ꓠꓬꓲ ꓟꓽ ꓟꓳ ꓢꓴ ꓕꓲ ꓣꓳ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ ꓒ‐ꓡꓲ‐ꓢꓷ ꓐꓴ ꓠꓬ ꓬꓲ ꓔꓯ ꓬꓲ ꓙꓲ ꓐꓰ ꓠ ꓠꓬꓲ ꓢꓲ꓾ ꓠꓴ ꓔꓯ ꓠꓻ ꓫꓬ, ꓖꓶ ꓢꓴ ꓖꓳ ꓕꓲ ꓣꓳ ꓠꓬ ꓮꓽ ꓟ ꓥ ꓡ꓿ ꓝꓴꓲ. ꓙꓳ ꓢꓴ ꓔꓯ ꓠꓬ ꓪꓴ‐ꓢ ꓟꓽ ꓠ ꓡꓳ.꓿ ꓠꓴ ꓔꓯ ꓟ ꓠꓬ ꓪꓴ‐ꓢ ꓐꓯ ꓘꓶꓽ ꓟꓽ ꓥ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓟꓬ ꓔꓶ ꓢꓴ ꓖꓳ ꓕꓲ ꓣꓳ ꓡꓰ꓾ ꓬꓲ ꓠꓬ ꓝꓴꓲ. ꓙꓳ ꓢꓴ ꓥ ꓟꓽ ꓥ ꓥꓪ ꓟꓽ ꓢꓷ.꓿ ꓥꓪ ꓟꓬ ꓢꓶꓽ ꓠꓬꓲ ꓟꓳ ꓡ ꓟ ꓔꓯ ꓡꓰꓽ ꓥꓪ ꓢꓷ.ˍ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟ. ꓟꓲꓽ ꓕꓱ ꓟ ꓗꓪ ꓐꓰ ꓮ ꓟꓶ (4) ꓠꓽ ꓕꓲ ꓠꓽ ꓜꓻ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽˍ ꓟ ꓠꓬ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ ꓟꓳꓻ ꓓꓴ ꓚꓵ ꓥ ꓡꓳ꓾ ꓐꓯˍ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓠꓲ, ꓫꓵˍ ꓡꓳ꓿ ꓟꓵꓽ ꓚꓰꓼ ꓟꓲ ꓚꓰꓼ ꓕꓯ ꓡꓰ ꓦꓵˍ ꓗꓪ ꓚꓳ. ꓟꓬ ꓢꓶꓽ ꓠꓬꓲ ꓟꓳꓻ ꓡꓺꓳ ꓐꓯˍ ꓟ ꓟꓽ ꓙꓳ ꓡꓰ꓿ ꓒꓬꓱꓼˍ ꓟꓲ ꓟꓽ ꓒꓬꓱꓼ ꓗꓳ. ꓬꓰ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓛꓲ ꓡ ꓕꓯ ꓟꓬ ꓢꓶꓽ ꓠꓬꓲ ꓟꓽ ꓟꓳ ꓢꓴ ꓔꓯ ꓟꓬ ꓢꓶꓽ ꓠꓬꓲ ꓟꓳ ꓡ ꓝꓲˍ ꓡꓳ꓿ ꓠ. ꓑꓳ ꓟꓽ ꓑ ꓙꓽ ꓢꓴ ꓔꓯ ꓑ ꓙꓽ ꓡꓰ ꓝꓲˍ ꓡꓳ꓿ ꓞꓳ ꓫꓵꓻ ꓔꓯ ꓥ ꓟꓲ ꓢꓯ. ꓬꓲꓼ ꓡ ꓐ ꓡ ꓝꓲˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓮ ꓫꓵꓽˍ ꓟꓲ ꓬꓰ ꓐ ꓡ ꓢꓴ ꓥ ꓡꓳ꓾ ꓬꓲ ꓚꓲ. ꓛꓬ ꓡꓰ ꓠꓬꓲ ꓟꓳ ꓓꓴ ꓥ ꓡꓳ꓾ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿

ꓣꓳ ꓤꓶꓻ ꓗꓪ ꓥˍ ꓟꓲ ꓣꓳ ꓧꓪꓽ ꓖꓳ ꓓꓱꓽ ꓟꓬ ꓢꓶꓽ ꓠꓬꓲ ꓟꓳ ꓓ ꓥ ꓟꓲ ꓦ ꓕꓲ ꓛꓱꓽ ꓗꓪ ꓟꓬ ꓔꓶ ꓓ, ꓫꓵꓽ ꓮ ꓟꓬ, ꓙꓳˍ ꓡꓳ꓿ ꓮ ꓫꓵꓽ ꓪꓴ. ꓠꓬꓲ ꓣꓳ ꓦ ꓟꓬ ꓢꓶꓽ ꓟꓽ ꓒꓴ ꓓ, ꓡ꓾ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓕꓯ ꓝꓴꓲ. ꓑꓶ. ꓓꓴ꓾ ꓣꓳ ꓟꓬ ꓠꓯ. ꓟ ꓑꓶ. ꓓꓴ꓾ ꓦꓯ. ꓠꓲ, ꓙꓵꓽˍ ꓟ ꓑꓶ. ꓓꓴ꓾ ꓝꓮꓲ ꓮ ꓘꓶ. ꓠꓲ, ꓟ ꓦꓶ ꓗꓴ.ˍ ꓟ꓾ ꓣꓳ ꓚꓲ. ꓛꓬ ꓣꓳ ꓡꓰꓽ ꓮ ꓟꓴ. ꓟꓴ ꓚꓬ, ꓔ ꓢꓲ ꓠꓬꓲ ꓞꓳ ꓙꓳˍ ꓟ꓾ ꓕꓱ ꓡꓱ ꓫꓵꓽ ꓗꓪ ꓐꓰ ꓣꓳ ꓠꓬ Spiritual Blindness ꓐꓰ ꓐꓯˍ ꓟ ꓦ ꓕꓲ ꓚꓱ, ꓗꓪ ꓟꓬ ꓔꓶ ꓓ, ꓫꓵꓽ ꓮ ꓟꓬ, ꓧꓪ, ꓙꓳˍ ꓥꓳ꓿

ꓕꓱ ꓟ ꓠꓬ ꓣꓳ ꓚꓲ. ꓛꓬ ꓧꓪꓽ ꓖꓳ ꓓꓱꓽ ꓟꓬ ꓢꓶꓽ ꓢꓶ. ꓟꓽ ꓞꓲꓺ ꓣꓳ ꓔꓯ ꓫ. ꓙꓵ ꓡꓰ ꓝꓲˍ ꓟ ꓥ ꓡꓳ꓿ ꓣꓳ ꓟꓬ ꓢꓶꓽ ꓠꓬꓲ ꓟꓽ ꓟꓳꓻ ꓠꓬ ꓬꓲ ꓐꓽ ꓗꓪ ꓙꓳˍ ꓟ ꓔꓯ ꓡꓰꓽ ꓣꓳ ꓟꓽ ꓟꓳꓻ꓿ ꓖꓳ ꓡꓱ ꓐꓯ ꓥˍ ꓟꓲ ꓣꓳ ꓦ ꓟꓬ ꓢꓶꓽ ꓠꓬꓲ ꓟꓽ ꓟꓳ ꓔꓯ ꓠꓽ ꓮ ꓫꓵꓽ ꓔꓯ ꓥˍ ꓟꓲ ꓣꓳ ꓟꓽ ꓟꓳꓻꓳ꓿ ꓮ ꓕꓯ ꓥ ꓟꓲ ꓠꓲ, ꓟ ꓫ. ꓓꓴ꓾ ꓠꓲ, ꓥꓴꓻ ꓓꓴ ꓡꓰꓽ ꓙꓳˍ ꓥꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ ꓠꓯ ꓞꓲˍ ꓟ ꓘꓴ ꓠꓯꓸꓼ ꓗꓪ ꓞꓳ ꓙꓳ ꓔꓬ ꓟ ꓑꓶ. ꓓꓴ ꓗ, ꓛꓲꓽ ꓓꓴ ꓕꓲ ꓫꓵꓽˍ ꓟꓲ  ꓟꓽ ꓙꓳ꓿

ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓟꓬ ꓢꓶꓽ ꓒꓴ ꓖꓶ ꓡ ꓔꓬ ꓡꓳ꓿ ꓣꓳ ꓖꓳ ꓓꓱꓽ ꓟꓬ ꓢꓶꓽ ꓒꓴ ꓓ, ꓟ ꓡꓰ ꓐꓰ ꓣꓳ ꓦ ꓟꓬ ꓢꓶꓽ ꓥˍ ꓟꓲ ꓒꓴ ꓖꓶ ꓠ, ꓟ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓓꓰꓽ ꓠ ꓗ, ꓡꓳ꓿ ꓣꓳ ꓠꓯ ꓞꓲ, ꓟ ꓤꓶꓻ ꓠꓯꓸꓼ ꓗꓪ ꓠꓬ ꓐꓲ ꓜꓲꓼˍ ꓟ ꓗ, ꓛꓲꓽ ꓠꓲ, ꓔꓯ ꓧꓪ ꓟꓶ ꓟꓽ ꓓꓻ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓠꓯ ꓞꓲ, ꓟ ꓗꓪ ꓠꓬ ꓮ ꓫꓵꓽ ꓗ, ꓛꓲꓽ ꓓꓴ ꓟꓽ ꓙꓳ꓿ ꓠꓯ ꓞꓲ, ꓟ ꓠꓯꓸꓼ ꓗꓪ ꓠꓬ ꓮ ꓫꓵꓽ ꓡꓰ. ꓬꓰ ꓟꓽ ꓠ꓿ ꓮ ꓕꓯ ꓥˍ ꓟꓲ ꓠꓲ, ꓫ. ꓟˍ ꓡꓰꓽ ꓙꓳˍ ꓡꓳ꓿

ꓐꓱ ꓓꓴꓽ ꓗꓪ ꓐꓱ ꓔ ꓢꓴ ꓔꓯ ꓠꓬ ꓠꓯ ꓞꓲ, ꓟ ꓗꓪ ꓔꓬ ꓝꓲˍ ꓟ ꓔꓯ ꓬꓲ ꓪ ꓮ ꓘꓶ. ꓙꓳꓺˍ ꓡꓳ꓿ ꓮ ꓫꓵꓽ ꓪꓴ. ꓠꓬꓲ ꓥ ꓡ ꓐꓯˍ ꓠꓬ ꓮ ꓫꓵꓽ ꓔꓯˍ ꓟꓲ ꓟꓳ ꓟꓽ ꓓꓻ ꓓꓻ ꓬꓲ ꓠꓽ ꓢꓴ. ꓔꓬ ꓝꓲˍ ꓕꓯ ꓞꓳ ꓤ ꓠꓬ ꓪꓴ. ꓡꓰˍ ꓡꓳ꓿ ꓖꓳ ꓡꓱ ꓠꓬꓲ ꓠꓬꓲꓺ ꓟꓳ ꓓꓴ ꓐꓯˍ ꓟ ꓮ ꓘꓶ. ꓬꓳ. ꓚꓰꓽˍ ꓡꓳ꓿ ꓣꓳ ꓤꓶꓻ ꓗꓪ ꓥˍ ꓟꓲ ꓠꓬꓲ ꓟꓳ ꓓꓴ ꓙꓳ ꓠ, ꓟ ꓬꓳ. ꓚꓰꓽˍ ꓡꓳ꓿ ꓟꓬꓽ ꓠꓬꓲ ꓣꓳ ꓠꓬ ꓟꓬ ꓢꓶꓽ ꓠꓬꓲ ꓟꓳˍ ꓟ ꓔꓯ ꓡꓰꓽ ꓠꓲ, ꓘꓪꓽ ꓫꓵ ꓔꓬ ꓗꓴ.ˍ ꓡꓳ꓿ ꓚꓵ ꓚꓵ ꓐꓯˍ ꓠꓬ ꓣꓳ ꓠꓲ, ꓟ ꓟꓬ ꓢꓶꓽ ꓮ ꓕꓯ ꓟꓲ ꓒꓴ ꓗꓴ. ꓠ, ꓟ ꓢꓲ ꓒ ꓬꓰ‐ꓢꓴ ꓔꓯ ꓓꓰꓽ ꓓꓴ ꓬꓰ ꓡꓯ꓿