ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓦ ꓕꓲ ꓒꓳ, ꓟꓶꓼ ꓢꓲꓼ ꓔꓬ ꓟ ꓔꓯ ꓐꓳ ꓡꓰ ꓝꓲ_ ꓡꓳ꓿
ꓜ ꓚꓲ. ꓚꓲ. ꓟ ꓢ ꓠꓽ ꓕꓲꓽ ꓠꓽ ꓠꓽ ꓦꓬꓼ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓬꓲꓻ ꓙꓬ ꓘꓴ ꓒ ꓕꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓢ‐ꓟ‐ꓡꓲ ꓤ ꓟꓶ ꓤ ꓕꓲꓽ ꓣꓳ ꓐꓰ ꓜꓲ ꓗꓷ ꓟ ꓚꓱ, ꓢꓲ ꓫꓬ ꓕꓳ ꓶ ꓝꓲ. ꓥ ꓡꓳ꓿ꓢꓲ ꓒ ꓬꓰ‐ꓢꓴ ꓠꓬ ꓦ ꓕꓲ ꓒꓳ, ꓟꓶꓼ ꓢꓲꓼ ꓟ ꓔꓯ ꓮ ꓡꓰ ꓐꓰ ꓖꓶ ꓟ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓠꓬꓲ ꓙ ꓡꓳ. ꓙ ꓟ꓾ ꓔꓱ, ꓟ ꓛꓳꓽ ꓒꓯ, ꓗꓷ ꓟ ꓐꓰ ꓦ ꓕꓲꓽ ꓒꓳ, ꓗꓪ ꓒꓳ, ꓡꓶ. ꓠ, ꓟ ꓐꓱ ꓶ ꓮ ꓡꓰ ꓐꓰ ꓘꓴ ꓔ ꓟ ꓔꓯ ꓐꓯ ꓖꓶ ꓢꓲ꓾ “ꓢꓲ ꓒ ꓬꓰ‐ꓢꓴ ꓐꓰ ꓜꓲ ꓡꓯ ꓘꓳ ꓗꓷ ꓟ ꓠꓬ ꓡ ꓞꓳ ꓮ ꓙꓵ ꓬꓲ. ꓠꓯ. ꓟ ꓠꓲ, ꓟ ꓘꓴꓽ ꓠꓯꓼ ꓗꓪ ꓕꓲꓽ ꓞꓲꓼ ꓕꓲ ꓑ ꓢꓯꓼ ꓟꓬ ꓬꓲꓻ ꓓꓳ ꓠ, ꓟ ꓬꓲꓻ ꓙꓬ ꓘꓴ ꓔꓯ ꓡꓵ, ꓔꓴ ꓖꓶ_ ꓡꓳ꓾” ꓐꓰ ꓐꓯ ꓔ ꓡꓳ꓿
ꓜ ꓚꓲ. ꓚꓲ. ꓦꓬꓼ ꓠꓬꓲ ꓠꓬ ꓪꓴ‐ꓢ ꓣꓱ ꓛꓰ ꓘꓳ, ꓣꓴ ꓟꓶ ꓟ ꓗꓪ ꓐꓰ ꓣꓳ ꓔꓯ ꓗꓽ ꓕ ꓔ ꓟ ꓘꓶꓽ ꓡꓶꓽ ꓓꓴ ꓗꓪ ꓐꓰ ꓣꓳ ꓠꓲ, ꓟ ꓔꓯ ꓡꓲ, ꓙꓰ ꓠ, ꓟ” ꓬꓲ ꓚꓱ, ꓖꓶ ꓡ ꓡꓳ꓿ ꓖꓳ ꓟ ꓡꓰ ꓐꓰ ꓙꓰꓪꓲꓢꓧ ꓕꓳ ꓶ ꓐꓳ ꓟ ꓰꓔꓔꓬ ꓧꓲꓡꓡꓰꓢꓴꓟ ꓬꓲ. ꓐꓯ ꓘꓶꓽ ꓗꓪ ꓐꓰ “ꓪꓴ‐ꓢ ꓠꓬ ꓡꓳ ꓓꓰ ꓐꓰ ꓘꓶ ꓛꓲ ꓠꓯꓼ ꓗꓪ ꓐꓲ. ꓞ, ꓔꓬ ꓡꓳ ꓐꓰ ꓓꓵ ꓙ ꓟꓶ ꓗꓪ ꓛꓲ ꓢꓲ ꓒꓽ ꓔꓯ ꓝꓮꓲ ꓧꓪ ꓟꓰ, ꓠ ꓔ ꓡꓳ꓾” ꓐꓰ ꓐꓳ ꓔ ꓡꓳ꓿
ꓢ‐ꓟ‐ꓡꓲ ꓤ ꓟꓶ ꓤ ꓐꓰ ꓢꓲ ꓒ ꓬꓰ‐ꓢꓴ ꓫ. ꓕꓱ ꓘꓶꓽ ꓠꓯꓼ ꓗꓪ ꓝꓲ ꓓꓴ ꓐꓴ ꓓꓵꓽ ꓙ ꓟꓶ ꓟ ꓐꓰ ꓢꓲ ꓒꓽ ꓬꓲ ꓢ‐ꓢꓲ‐ꓠ ꓟꓬꓱꓽ ꓔꓯ ꓘꓳ, ꓣꓴ ꓠ, ꓟ ꓚ, ꓔꓬ ꓢꓲ ꓟ ꓔꓯ ꓔꓱ, ꓕ ꓢꓲ ꓔꓲꓺ ꓒ ꓪ ꓔꓲ ꓡꓰ “ꓚꓲ. ꓛꓬ ꓗꓳ, ꓡꓳ ꓗꓪ ꓠꓬꓲ. ꓠ.꓾ ꓜ ꓫ ꓠ, ꓟ ꓜ ꓟꓲ ꓗꓪ ꓮ ꓡꓰ ꓐꓰ ꓟꓲ ꓔꓬ ꓟ ꓔꓯ ꓠꓬꓲ. ꓠ.” ꓐꓰ ꓢꓲ ꓒꓽ ꓐꓯ ꓔ ꓡꓳ꓾ ꓪꓴ‐ꓢ ꓣꓱ ꓛꓰ ꓔꓯ ꓞ ꓞ ꓟꓽ ꓟꓳ ꓟ ꓔꓶ. ꓗꓪ ꓧꓪ ꓠ, ꓟ ꓣꓱ ꓬꓯꓼ ꓡꓳ꓾ ꓢꓲ ꓒ ꓬꓰ‐ꓢꓴ ꓡꓰ ꓫꓱ. ꓤ ꓡ ꓟ꓾ ꓠꓬꓲ ꓙ ꓡ ꓟ ꓐꓰ ꓠꓱ. ꓐꓯꓼ ꓢꓴ ꓔꓯ ꓐꓯ ꓟꓴ ꓘꓶ ꓓꓴ ꓟꓽ ꓙꓳ_ ꓟ ꓠꓬ ꓙꓲ ꓢꓴ ꓢꓲ ꓤ ꓐꓴ ꓐꓱ ꓶ ꓔꓯ ꓢꓳ ꓓꓴ ꓥ ꓟ ꓔꓯ ꓐꓯ ꓔ ꓡꓳ꓿
ꓪꓴ‐ꓢ ꓐꓯ ꓘꓶ ꓔꓯ ꓢꓷ. ꓙ ꓟꓳ ꓙ ꓟ ꓤ ꓟꓶ ꓤ ꓗꓪ ꓐꓰ ꓓ ꓪꓴ. ꓥ ꓟ ꓢ‐ꓟ‐ꓡꓲ ꓤ ꓟꓶ ꓤ ꓬꓲ ꓚꓱ, ꓔꓯ ꓔꓲꓺ ꓒ ꓪ ꓔꓲ ꓡꓰ ꓔꓱ, ꓕ ꓢꓲ꓾ ꓬꓲ ꓢꓷ. ꓙ ꓟꓳ ꓙ ꓟ ꓠꓬ ꓬꓲ ꓗꓳ, ꓡꓳ ꓗꓪ ꓙꓵꓻ ꓠꓲ, ꓔꓯ ꓖꓶ_ ꓡꓳ꓾ “ꓣꓳ ꓐꓰ ꓜꓲ ꓡꓯ ꓘꓳ ꓔꓬ ꓢꓴ ꓔꓯ ꓣꓳ ꓠꓬꓲ ꓙ ꓖꓶ ꓠ, ꓟ ꓐꓱ ꓶ ꓬꓲ. ꓙꓵ, ꓔꓯ ꓟꓲ ꓡꓰ ꓔꓬ ꓟ ꓠꓬ ꓮ ꓟꓬ ꓛꓲ ꓡꓳ. ꓐꓲ_ ꓡ꓾”
ꓔꓲꓺ ꓒ ꓪ ꓔꓲ ꓡꓰ “ꓪꓴ‐ꓢ ꓐꓯ ꓘꓶꓽ ꓐꓰ ꓔꓱ, ꓟ ꓔꓯ ꓟꓷꓼ ꓢꓰꓼ ꓔꓬ ꓢꓴ ꓐꓴ” ꓐꓱ ꓶ ꓪꓴ‐ꓢ ꓟꓬꓱꓽ ꓟꓯ ꓔꓬ ꓟ ꓗꓪ ꓢ‐ꓢꓲ‐ꓠ ꓟ, ꓟ ꓥ ꓟ ꓟ, ꓟ‐ꓡꓲ ꓪꓽ ꓘꓴ ꓙ ꓖꓶ ꓟ ꓔꓯ ꓪ ꓟꓶ ꓠ, ꓟ ꓢꓯꓼ ꓖꓶ ꓢꓲ꓾ ꓪꓴ‐ꓢ ꓟꓬꓱꓽ ꓬꓰ ꓟ ꓗꓪ ꓟꓽ ꓫꓱ, ꓔꓯ ꓔꓯ ꓗꓳ. ꓙꓰ ꓐ ꓡ ꓠ, ꓟ ꓥ ꓢꓲ꓾ ꓥꓪ ꓐꓰ ꓠꓴ ꓐꓯ_ ꓟ ꓙꓽ ꓘꓶ_ ꓟ ꓟꓽ ꓙꓳ ꓠ, ꓟ꓾ ꓪꓴ‐ꓢ ꓔꓯ ꓙꓵꓻ ꓢꓲ ꓠꓬ ꓦ ꓕꓲꓽ ꓒꓳ, ꓐꓰ ꓔꓱ, ꓟ ꓔꓯ ꓙꓵꓻ ꓢꓲ꓾ ꓢꓲ ꓡꓲ, ꓟ ꓔꓯ ꓢꓯꓼ ꓕꓵꓼ ꓟ ꓤ꓾ ꓤ ꓟꓶ ꓤ ꓐꓴ ꓒꓬꓱꓼ ꓠ, ꓟ ꓥ ꓡꓳ꓾” ꓐꓰ ꓢꓯꓼ ꓖꓶ ꓔ ꓡꓳ꓿
