ꓮ ꓙꓵ ꓠꓬ ꓢꓲ ꓡꓲ, ꓟ ꓐꓰ ꓝꓮꓲ ꓪꓽ ꓡꓯ ꓘꓳ ꓓꓴ ꓔꓯ ꓫꓬ, ꓔꓶꓻ ꓢꓴ ꓒꓬꓱꓼ ꓡꓰ ꓓ_ ꓡꓳ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓡꓳ, ꓬꓰ ꓟ ꓠꓽ ꓦꓬꓼ ꓠꓬꓲ ꓕꓯ ꓔꓳꓣꓣꓰꓦꓰꓚꓚꓧꓮꓲꓮ ꓗꓪ ꓔꓬ ꓟ ꓢꓮꓠꓔꓮ ꓟꓮꓣꓲꓮ ꓓꓰꓡꓡꓮ ꓑꓣꓰꓢꓰꓠꓔꓮꓜꓲꓳꓠꓰ ꓠꓯꓼ ꓗꓪ ꓢ‐ꓢꓲ‐ꓠ ꓟꓬꓱꓽ ꓚꓳ ꓙꓰ ꓟ ꓥꓳ꓿ꓪꓽ ꓘꓴ ꓦꓲꓻ ꓗꓪ ꓘꓴ ꓜꓲꓼ ꓞꓳ ꓢꓲꓺ ꓤ ꓐꓴ ꓕꓲ ꓦꓲꓻ ꓢꓴ ꓐꓰ ꓬꓲ. ꓪꓴ. ꓕꓲꓽ ꓧꓪ, ꓢꓲ ꓫꓬ ꓑ ꓑ ꓘꓳ, ꓣꓴ ꓢꓴ ꓤ ꓠꓱ ꓤ ꓐꓴ ꓐꓰ ꓞꓳ ꓡꓱ ꓐꓴ ꓐꓰ ꓣꓳ‐ꓟ ꓢ‐ꓢꓲ‐ꓠ ꓗꓪ ꓐꓰ ꓔꓲꓺ ꓒ ꓓꓽ Cardinal Baldo Reina꓾ ꓔꓲꓺ ꓒ ꓓꓽ Francesco Montenegro ꓐꓰ ꓕꓲ ꓪ ꓔꓲꓺ ꓒ Paolo Stacchiotti ꓐꓴ ꓠꓬ ꓔꓲꓺ ꓒ ꓪ ꓔꓲ ꓔꓯ ꓘꓳ, ꓣꓴ ꓗꓷ ꓟ ꓥꓳ꓿
ꓔꓲꓺ ꓒ ꓪ ꓔꓲ ꓠꓬ ꓖꓳ ꓗꓪ ꓛꓲ ꓬꓰ ꓕꓯ ꓤ ꓠꓱ ꓤ ꓐꓴ ꓞꓳ ꓡꓱ ꓐꓴ ꓐꓰ ꓜꓲ ꓗꓷ ꓢꓲ꓾ ꓔꓲꓺ ꓒ ꓪ ꓔꓲ ꓠꓯꓼ ꓗꓪ ꓠ ꓠꓬꓲ ꓘꓶꓽ ꓐꓳ ꓖꓶ ꓔ ꓡꓳ꓾ ꓬꓲ ꓪ ꓠꓬ ꓢꓲ ꓒꓽ ꓬꓰ‐ꓢꓴ ꓐꓰ ꓜꓲ ꓗꓷ ꓠ, ꓟ ꓮ ꓡꓰ ꓐꓰ ꓙ ꓖꓶ ꓠ, ꓟ ꓐꓰ ꓫ. ꓓꓴ ꓔꓳ, ꓜꓳ ꓡ ꓕꓯ ꓕꓲꓽ ꓣꓳ ꓐꓰ ꓕꓲꓽ ꓣꓳ ꓮ ꓡꓰ ꓐꓰ ꓬꓰ ꓙ ꓔꓳ, ꓙ ꓠ, ꓟ ꓬꓲ. ꓚꓱ, ꓟꓳ. ꓖꓶ ꓠ, ꓟ ꓶꓽ ꓓꓰ ꓗꓷ ꓟ ꓥꓳ꓿ ꓔꓲꓺ ꓒ ꓪ ꓔꓲ ꓡꓰ ꓬꓲ ꓪ ꓔꓯ ꓜꓲ ꓜꓲ ꓟꓴ ꓟꓴ ꓬꓰ_ ꓟ ꓐꓰ ꓠꓲ, ꓟ ꓟꓽ ꓪ ꓡꓯ ꓘꓳ ꓟ ꓔꓯ ꓟꓽ ꓬꓰ ꓠ, ꓟ ꓐꓰ ꓪꓽ ꓡꓯ ꓘꓳ ꓫꓱ, ꓡꓯ ꓘꓳ ꓠ, ꓟ ꓐꓱ ꓶ ꓮ ꓙꓵ ꓕꓲ ꓠꓲ, ꓕꓲ ꓪ ꓢꓯꓼ ꓕꓵꓼ ꓠ, ꓟ ꓢꓯꓼ ꓖꓶ ꓗꓷ ꓟ ꓥꓳ꓿
“ꓮ ꓙꓵ ꓠꓬ ꓢꓲ ꓡꓲ, ꓟ ꓔꓯ ꓫꓬ, ꓔꓶꓻ ꓢꓴ ꓒꓬꓱꓼ ꓡ ꓓ_ ꓡꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ ꓗꓷ ꓟ ꓥꓳ꓿ ꓖꓳ ꓟ ꓡꓰ ꓐꓰ ꓫꓵ ꓪꓴ ꓒꓬꓱꓼ ꓡꓰ ꓕꓯ ꓕꓲ ꓣꓳ ꓐꓰ ꓕꓲ ꓣꓳ ꓒꓴ ꓒꓴ ꓡꓯ ꓡꓯ ꓐꓰ ꓪꓽ ꓡꓯ ꓘꓳ ꓠ, ꓟ ꓐꓰ ꓢꓴ ꓔꓯ ꓛꓴꓽ ꓙꓳ ꓟ ꓠꓲ, ꓦꓶ_ ꓟ ꓟꓽ ꓙꓳ ꓟꓽ ꓬꓰ ꓠ, ꓟ ꓤ ꓠꓱ ꓤ ꓐꓴ ꓔꓯ ꓢꓯꓼ ꓖꓶ ꓗꓷ ꓟ ꓥꓳ꓿
ꓓꓽ ꓪꓴ. ꓢꓲ ꓫꓬ ꓑ ꓑ ꓘꓳ, ꓣꓴ ꓟ ꓤ ꓠꓱ ꓤ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓟꓮꓣꓲꓳ ꓓꓰꓡꓑꓲꓠꓲ ꓐꓰ ꓡꓳꓟꓐꓮꓣꓓꓬ ꓔꓲꓺ ꓒ ꓓꓽ ꓐꓴ ꓡꓰ ꓐꓳ ꓔ ꓟ (Qualcuno bussa al tuo cuore) ꓐꓯ_ ꓟ ꓕꓳ ꓶ ꓗꓪ ꓐꓰ ꓪꓽ ꓘꓴ ꓟ ꓐꓰ ꓪꓴ‐ꓢ ꓘꓴ ꓔ ꓟ ꓔꓯ ꓟꓳ. ꓟ ꓥ ꓢꓲ꓾ ꓣꓳ ꓠꓲ, ꓟ ꓗꓪ ꓬꓰ‐ꓢꓴ ꓙꓲ ꓢꓴ ꓠꓯꓼ ꓗꓪ ꓒꓴ ꓖꓶ ꓠ, ꓟ ꓤ ꓠꓱ ꓤ ꓐꓴ ꓔꓯ ꓘꓴ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓡ ꓞꓳ ꓐꓴ ꓔꓬ ꓦꓲꓻ ꓠꓲ, ꓟ ꓘꓴꓽ ꓗꓪ ꓣꓳ ꓤꓶꓻ ꓠꓯꓼ ꓗꓪ ꓬꓯꓼ ꓡ ꓡꓳ꓾ ꓙꓲ ꓢꓴ ꓢꓲ ꓤ ꓐꓴ ꓗꓪ ꓐꓰ ꓢꓲ ꓒꓽ ꓬꓯ ꓘꓳ, ꓣꓴ ꓠ, ꓟ ꓘꓴ ꓔ ꓡꓳ ꓐꓰ ꓐꓯ ꓔ ꓡꓳ꓿ ꓔꓲꓺ ꓒ ꓪ ꓔꓲ ꓡꓰ ꓤ ꓠꓱ ꓐꓴ ꓔꓯ ꓪꓽ ꓘꓴ ꓢꓲ ꓢꓲ ꓒ ꓬꓰ‐ꓢꓴ ꓐꓰ ꓫ. ꓕꓱ ꓠ, ꓟ ꓐꓰ ꓠꓻ ꓓꓴ ꓐꓬ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓬꓰ ꓙ ꓔꓳ, ꓙ ꓟꓬꓱꓽ ꓣꓱꓽ ꓢꓴ ꓐꓴ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓢꓲ ꓒꓽ ꓔꓯ ꓧꓪ ꓠ, ꓟ ꓢꓯꓼ ꓖꓶ ꓗꓷ ꓟ ꓥꓳ꓿
ꓔꓲꓺ ꓒ ꓪ ꓔꓲ ꓡꓰ ꓫ ꓓꓴ ꓔꓳ, ꓜꓳ ꓔꓬ ꓢꓴ ꓕꓲ ꓦꓲꓻ ꓡ ꓞꓳ ꓐꓴ ꓐꓰ ꓠꓻ ꓔꓬ ꓢꓴ ꓐꓴ ꓔꓯ ꓜꓲ ꓗꓷ ꓟ ꓥꓳ꓿ ꓖꓳ ꓟ ꓡꓰ ꓐꓰ ꓠꓲ, ꓡꓱ ꓡꓱ ꓘꓳ, ꓣꓴ ꓡ ꓟ ꓑꓶ ꓓꓴ ꓫ ꓟꓳ ꓘꓶꓽ ꓫ ꓕꓱ ꓗꓷ ꓟ ꓥꓳ꓿ ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓟꓲ‐ꓢ ꓪꓽ ꓘꓴ ꓖꓶ ꓢꓲ ꓢꓲ ꓒ ꓬꓰ‐ꓢꓴ ꓐꓰ ꓢ‐ꓟ‐ꓡꓲ ꓤ ꓟꓶ ꓤ ꓜꓲ ꓡꓯ ꓘꓳ ꓗꓷ ꓟ ꓢꓲ ꓫꓬ ꓕꓳ ꓶ ꓗꓪ ꓐꓰ ꓢꓯꓼ ꓖꓶ ꓗꓷ ꓟ ꓥꓳ꓿”ꓢ‐ꓢꓲ‐ꓠ ꓟꓬꓱꓽ ꓠꓬ ꓡ ꓞꓳ ꓐꓴ ꓔꓯ ꓐꓯ ꓟꓴ ꓘꓶꓽ ꓠ, ꓟ ꓟꓽ ꓥ꓾ ꓘꓳ, ꓣꓴ ꓖꓶ ꓢꓲ꓾ ꓠ ꓠ, ꓖꓶ ꓢꓲ ꓬꓰ ꓙ ꓔꓳ, ꓙ ꓟ꓾ “ꓟ, ꓟ” ꓡꓰ ꓐꓰ ꓥ ꓟ ꓘꓴ ꓜꓲꓼ ꓞꓳ ꓢ‐ꓢꓲ‐ꓠ ꓟꓬꓱ ꓥ ꓡꓳ꓾ ꓐꓰ ꓢꓯꓼ ꓖꓶ ꓗꓷ ꓟ ꓥꓳ꓿ ꓬꓲ. ꓟꓶꓽ ꓗꓪ ꓐꓰ ꓚꓮꓣꓲꓔꓮꓢ ꓬꓰ ꓬꓰ ꓙ ꓔꓳ, ꓙ ꓔꓬ ꓢꓴ ꓐꓴ ꓔꓯ ꓜꓲ ꓗꓷ ꓢꓲ꓾ ꓞꓲꓼ ꓪꓴ ꓢꓴ꓾ ꓠꓻ ꓔꓬ ꓢꓴ꓾ ꓦꓲꓻ ꓚꓵ. ꓡ ꓢꓴ ꓐꓴ ꓫ. ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓟ ꓑꓶ ꓓꓴ ꓫ ꓟꓳ ꓘꓶꓽ ꓫ. ꓕꓱ ꓗꓷ ꓟ ꓥꓳ꓿ ꓡ ꓞꓳ ꓮ ꓙꓵ ꓠꓬ ꓪꓴ‐ꓢ ꓒꓬꓱꓽ ꓡꓰ ꓐꓰ ꓚꓰꓼ ꓔ ꓟꓶ ꓢꓴ ꓡꓰ ꓥ ꓢꓲ꓾ ꓪꓴ‐ꓢ ꓤ ꓠꓱ ꓤ ꓗꓷ ꓡꓰ ꓐꓮ ꓟ ꓟꓬꓱꓺ ꓓꓳꓽ ꓕꓲ ꓠꓲ, ꓕꓲ ꓪ ꓘꓳ, ꓣꓴ ꓟꓶ ꓟ ꓑꓶ ꓓꓴ ꓮ ꓙꓵ ꓠꓬ ꓬꓲ. ꓒꓵꓽ ꓙꓳ_ ꓡꓳ꓾ ꓐꓯ_ ꓟ ꓔꓯ ꓓꓵꓽ ꓙ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓗꓷ ꓟ ꓥꓳ꓿
