ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ (St. Augustine of Hippo)
ꓠꓬꓲ. ꓠꓬꓲ ꓠꓬ ꓙꓲꓻ ꓫꓬ ꓢꓴ ꓐꓴ ꓚꓺ ꓟꓲꓽ ꓗꓪ ꓐꓰ ꓟꓬꓱꓺ ꓓꓳꓽ ꓮ ꓟꓬ, ꓙꓳ ꓟ ꓙꓲꓻ ꓫꓬ ꓢꓴ ꓕꓲ ꓣꓳ ꓥ ꓟ ꓢꓔ. ꓮꓴꓖꓴꓢꓔꓲꓠꓰ ꓚꓺ ꓟꓲꓽ ꓔꓯ ꓚꓺ ꓟ. ꓖꓶ ꓓꓴ ꓥ ꓡꓳ꓿ ꓬꓲ ꓠꓬ ꓔꓲꓺ ꓒ ꓓꓽ ꓕꓲ ꓣꓳ ꓥ ꓢꓲ ꓠꓬꓲ ꓪꓴ‐ꓢ ꓚꓱ, ꓔꓧꓰꓳꓡꓳꓖꓲꓮꓠ ꓐꓰ ꓟꓲ ꓠꓯ ꓢꓷ. ꓠꓲ, ꓮ ꓟꓬ, ꓔꓯ ꓟ. ꓖꓶ ꓢꓴ ꓕꓳ ꓶ ꓐꓳ ꓖꓶ ꓢꓴ ꓕꓲ ꓣꓳ ꓥ ꓡꓳ꓿
ꓬꓲ ꓔꓯ 354 ꓘꓳꓼ 11 ꓦ ꓟ 13 ꓠꓬꓲ ꓕꓯ ꓔꓧꓮꓖꓮꓢꓔꓰ ꓟꓬꓱꓺ ꓔ ꓟ ꓡꓳ ꓒꓱ ꓗꓪ ꓦꓵꓻ ꓗꓷꓳ꓿ ꓮ ꓟꓶ ꓟ ꓙꓵ, ꓗꓪ ꓠꓬ ꓑꓶ ꓓꓳ ꓮꓝꓣꓲꓚꓮ ꓟꓵꓽ ꓗꓪ ꓥ ꓡꓳ꓿ ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ ꓐ, ꓐ ꓠꓬ ꓓꓽ ꓪꓴ. ꓕꓯ ꓪꓴ‐ꓢ ꓟꓽ ꓦ ꓡꓱ ꓢꓴ ꓥ ꓡꓳ꓿ ꓬꓲ ꓐ, ꓐ ꓟꓬꓱꓺ ꓠꓬ ꓑꓮꓔꓣꓲꓚꓲꓴꓢ ꓥ ꓢꓲ ꓠꓬꓲ ꓗ. ꓠꓯ ꓠꓬ ꓪꓴ‐ꓢ ꓦꓻ ꓡꓱ ꓡ ꓢꓴ ꓒꓬꓱꓼ ꓡ ꓗꓷꓳ
ꓬꓲ ꓐ, ꓐ ꓠꓬ ꓙꓲꓻ ꓫꓬ ꓢꓴ ꓟꓳꓠꓲꓚꓮ ꓥ ꓢꓲ ꓠꓬꓲ ꓬꓲ ꓠꓬ ꓮ ꓘꓶ. ꓛꓲ ꓙꓵꓻ ꓠꓲ, ꓙꓳ ꓢꓴ ꓕꓲ ꓣꓳ ꓥ ꓡꓳ꓿ ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ ꓐ, ꓐ ꓠꓬ ꓬꓲ ꓙꓵ, ꓟꓶ ꓫꓵˍ ꓫꓵˍ ꓬꓲ ꓤ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷ ꓢꓲ ꓠꓬꓲ (30) ꓘꓳꓼ ꓪꓴ‐ꓢ ꓠꓯ, ꓗꓪ ꓪꓽ ꓘꓴ ꓢꓲ ꓠꓬꓲ ꓗ. ꓠꓯ ꓠꓬ ꓬꓲ ꓤ ꓠꓬ ꓓꓵꓽ ꓙ ꓒꓳ, ꓡꓶꓽ ꓡ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓬꓰ ꓢꓴ ꓔꓲꓺ ꓒ ꓓꓽ ꓒꓬꓱꓼ ꓡ ꓗꓷꓳ
ꓮꓴꓖꓴꓢꓔꓲꓠꓰ ꓠꓬ ꓮ ꓘꓶ. ꓛꓲ ꓢꓷ. ꓠꓲ, ꓓꓽ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓚꓮꓣꓔꓧꓮꓖꓰ ꓡꓳ ꓒꓱ ꓗꓪ ꓟꓲ ꓠꓯ ꓢꓷ. ꓠꓲ, ꓕꓳ ꓶ ꓔꓯ ꓢꓳꓻ ꓣꓴ ꓟꓶ ꓡꓰ ꓟ ꓥ ꓡꓳ꓿ ꓬꓲ ꓞꓲꓼ ꓣꓳ ꓟ ꓙꓵ, ꓐꓰ ꓞꓳ ꓡꓱ ꓞꓳ ꓡꓯ. ꓦꓬꓼ ꓠꓬꓲ ꓗꓪ ꓬꓲ ꓠꓬ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓥ ꓡꓳ꓿
ꓙꓵꓻ ꓠꓲ, ꓢꓲꓺ ꓤ ꓒꓬꓱꓼ ꓡ ꓟ
ꓮꓴꓖꓴꓢꓔꓲꓠꓰ ꓠꓬ ꓟꓲ ꓠꓯ ꓢꓷ. ꓠꓲ, ꓢꓳꓻ ꓣꓴ ꓟꓶ ꓡꓰ ꓗ. ꓠꓯ ꓲꓔꓮꓡꓬ ꓗꓴꓷꓼ ꓟꓲꓡꓮꓠ ꓡꓳ ꓒꓱ ꓗꓪ ꓟꓬꓱꓽ ꓬꓰ ꓠ,ꓟ ꓐꓱ ꓶ ꓡ ꓗꓷ ꓟ ꓥ ꓡꓳ꓿ ꓖꓳ ꓕꓲ ꓙꓵ, ꓗꓪ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓢꓴ ꓔꓲꓺ ꓒ ꓓꓽ ꓥ ꓟ ꓢꓔ. ꓮꓟꓐꓣꓳꓢꓰ ꓐꓰ ꓡꓳ. ꓟꓳ ꓡꓰ ꓗ. ꓠꓯ ꓢꓔ. ꓮꓴꓖꓴꓢꓔꓲꓠꓰ ꓠꓬ ꓪꓴ‐ꓢ ꓔꓯ ꓦꓻ ꓡꓱ ꓡ ꓢꓴ ꓒꓬꓱꓼ ꓡ ꓗꓷꓳ꓿ ꓬꓲ ꓟ, ꓟ ꓡꓰ ꓪꓽ ꓘꓴ ꓙ ꓟ ꓑꓶ. ꓓꓴ ꓮ ꓤ ꓤ ꓬꓲ ꓠꓬ ꓪꓴ‐ꓢ ꓠꓯ, ꓗꓪ ꓓꓵꓽ ꓙ ꓒꓳ, ꓡꓶꓽ ꓡ ꓢꓴ ꓒꓬꓱꓼ ꓡꓰꓳ꓿
ꓮꓓ 387 ꓘꓳꓼ ꓕꓯ ꓙꓲ‐ꓢꓴ ꓢꓲꓺ ꓤ ꓒꓬꓱꓼ ꓡ ꓢꓲ ꓠꓬꓲ ꓝꓴꓲ ꓔꓲ ꓟꓶ ꓡꓰꓳ꓿ ꓮꓓ (395)ꓘꓳꓼ ꓕꓯ ꓧꓲꓑꓑꓳ ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓒꓬꓱꓼ ꓡꓰꓳ꓿
ꓬꓲ ꓠꓬ ꓔꓲꓺ ꓒ ꓓꓽ ꓕꓲ ꓣꓳ ꓥ ꓟ ꓪꓴ. ꓠꓬꓲ ꓪꓴ‐ꓢ ꓡꓰ ꓟꓲ ꓠꓯ ꓡ ꓞꓳ ꓔꓯ ꓮ ꓘꓶ. ꓛꓲ ꓠꓲ, ꓠꓵ ꓟ ꓚꓱ, ꓔꓯ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟ. ꓖꓶ ꓗꓷꓳ꓿ ꓝꓮꓲ ꓬꓲ ꓠꓬ ꓫ. ꓢꓴ ꓟꓷ ꓢꓴ ꓔꓯ ꓬꓰ ꓙ ꓔ ꓙ ꓢꓲ ꓠꓬꓲ ꓙꓵꓻ ꓠꓲ, ꓔꓯ ꓗꓽ ꓕꓽ ꓖꓶ ꓗꓷꓳ꓿ ꓬꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓮ ꓘꓶ. ꓛꓲ ꓣꓳ ꓚꓵˍ ꓟ ꓕꓳ ꓶ ꓮ ꓟꓬ, ꓔꓯ ꓐꓳ ꓖꓶ ꓗꓷꓳ꓿
ꓬꓲ ꓡꓰ ꓐꓳ ꓔ ꓟ ꓕꓳ ꓶ ꓑꓷꓠ ꓠꓬ Confessions (about his life and conversion) ꓬꓲ ꓮ ꓡꓰ ꓐ ꓪꓴ‐ꓢ ꓦꓻ ꓡꓱ ꓡ ꓢꓴ ꓒꓬꓱꓼ ꓡ ꓟ ꓚꓱ, ꓔꓯ ꓐꓳ ꓔ ꓟ ꓕꓳ ꓶ ꓥ ꓡꓳ꓿ ꓝꓮꓲ ꓔꓧꓰ ꓚꓲꓔꓬ ꓳꓝ ꓖꓳꓓ ꓪꓴ‐ꓢ ꓗꓴꓷꓼ ꓐꓰ ꓟꓲ ꓠꓯ ꓡ ꓞꓳ ꓐꓴ ꓔꓬ ꓟ ꓚꓺ ꓟꓲꓽ ꓕꓳ ꓶ ꓥ ꓡꓳ
ꓬꓲ ꓠꓬ 430 ꓘꓳꓼ 8 ꓦ ꓟ 28 ꓠꓬꓲ ꓕꓯ ꓢꓲꓺ ꓒ ꓠꓯ, ꓗꓪ ꓬꓲꓼ ꓟꓶ ꓡꓰꓳ꓿ ꓬꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳ ꓢꓴ ꓔꓲꓺ ꓒ ꓓꓽ ꓕꓲ ꓣꓳ ꓥ ꓡꓳ꓿ ꓝꓮꓲ ꓬꓲ ꓠꓬ ꓘꓴ ꓜꓲꓼ ꓞꓳ ꓐꓱ ꓶ ꓮ ꓘꓶ. ꓛꓲ ꓪꓴ‐ꓢ ꓚꓱ, ꓢꓷ. ꓠꓲ, ꓢꓷ. ꓢꓴ ꓥ ꓡꓳ꓿
