ꓐꓶ ꓓꓳ ꓔꓱ, ꓫꓵ ꓟꓵꓽ ꓗꓪ ꓢꓰꓼ ꓡꓯ ꓘꓳ ꓑꓳ ꓡꓯ ꓘꓳˍ ꓟ ꓮ ꓘꓶ. ꓟꓬꓽ ꓡ ꓔꓬ ꓟ ꓠꓬ “ꓞꓳ ꓫ. ꓐꓴ ꓔꓯ ꓬꓰ ꓙˍ ꓟ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓐꓰ ꓶꓻ ꓡꓯꓼ ꓚꓱ, ꓐꓴ ꓗꓪ ꓮ ꓘꓶ. ꓫ. ꓡꓰ ꓓꓴ” ꓔꓯ ꓒꓬꓱꓼ ꓡ ꓝꓲ ꓐ ꓡˍ ꓟ ꓔꓯ꓾ ꓮꓢꓲꓮ ꓗꓴꓷꓼ ꓜꓴ ꓗꓪ ꓟ ꓔꓲꓺ ꓒ ꓓꓽ ꓐꓴ ꓙꓳꓺ ꓔꓬ ꓡꓳ ꓐꓰ ꓐꓯ ꓗꓷ ꓢꓲ ꓠꓬꓲ꓾ ꓑꓳ ꓡꓯ ꓘꓳˍ ꓟ ꓠꓲ, ꓞꓼ ꓠꓽ ꓗꓷ ꓠ, ꓟ ꓓꓰꓽ ꓗꓷꓳ꓿
ꓮꓢꓲꓮ ꓔꓲꓺ ꓒ ꓓꓽ ꓜꓴ ꓚꓰꓺ (ꓝꓮꓐꓚ) ꓠꓬ 3 ꓦ 3 ꓠꓬꓲ ꓕꓯ ꓕꓮꓲ, ꓗꓴꓷꓼ꓾ ꓐꓮꓠꓖꓗꓳꓗ ꓡꓳ ꓒꓱ ꓗꓪ ꓐꓰ ꓐꓶ ꓓꓳ ꓔꓱ, ꓫꓵ ꓗꓪ ꓑꓳ ꓡꓯ ꓘꓳ ꓔꓬ, ꓟ ꓠꓲ, ꓞꓼ ꓠꓽ ꓗꓷ ꓠ, ꓟ ꓓꓰꓽ ꓘꓶꓽ ꓕꓲ ꓟ ꓐꓯ ꓑꓶ ꓗꓷꓳ꓿
ꓔꓲꓺ ꓒ ꓓꓽ ꓐꓴ ꓠꓬ ꓟꓲ ꓠꓯ ꓗꓪ ꓪꓽ ꓠꓬꓲˍ ꓟ ꓗꓴꓷꓼ ꓐꓴ ꓗꓪ ꓟꓽ ꓟꓶ ꓫꓵˍ ꓕꓯ ꓐꓳꓽ ꓩꓴ ꓢꓲ ꓢꓰꓼ ꓡꓯ ꓘꓳˍ ꓟ ꓐꓰ ꓝꓮꓲ ꓚꓱ, ꓡꓲ. ꓢꓲ ꓢꓰꓼ ꓡꓯ ꓘꓳˍ ꓟ ꓔꓯ. ꓟꓳ. “ꓐꓶ ꓓꓳ ꓔꓱ, ꓫꓵ ꓗꓪ ꓢꓰꓼ ꓡꓯ ꓘꓳˍ ꓟ ꓝꓮꓲ ꓕꓲ ꓧꓪ, ꓒꓬꓱꓼ ꓡ ꓔꓬ ꓟ ꓔꓯ ꓠꓲ, ꓟ ꓟꓽ ꓢꓻ ꓗꓷ ꓡꓰ ꓢꓲ꓾ ꓠꓲ, ꓟ ꓮ ꓘꓶ. ꓫ. ꓔꓬ ꓡꓳ” ꓐꓰ ꓐꓯ ꓔ ꓡꓳ꓿
ꓝꓮꓐꓚ ꓠꓬ ꓔꓲꓺ ꓒ ꓪ ꓔꓲ. ꓡꓰꓳ (14) ꓐꓯ ꓘꓶꓽ ꓔꓯ ꓢꓷ. ꓙ ꓟꓳ ꓙ ꓗꓷ ꓢꓲ ꓠꓬꓲ “ꓐꓬ ꓡꓰˍ ꓟ꓾ ꓠꓻ ꓡꓰˍ ꓟ ꓐꓰ ꓫꓵꓻˍ ꓟ ꓔꓯ ꓒꓬꓱꓼ ꓡꓰ ꓝꓲˍ ꓟ ꓙꓳꓺ ꓗꓽ ꓓꓴ꓾ ꓟꓽ ꓥ ꓠꓬ꓾ ꓑꓳ (ꓡꓽ ꓛꓬꓴ.) ꓐꓴ ꓕꓯꓽ ꓢꓲ ꓗꓪ ꓢꓲꓺ ꓡꓲꓺ ꓟ ꓔꓯ ꓔꓶ ꓟꓽ ꓐ ꓡ ꓟ ꓔꓯ” ꓖꓴ ꓟ. ꓖꓶ ꓗꓷꓳ꓿
“ꓠꓲ, ꓪꓴꓽ ꓠꓲ, ꓠꓬ ꓙꓳꓺˍ ꓟ ꓠꓲ, ꓟ ꓗꓪ ꓐꓰ ꓟꓽ ꓡ ꓟ ꓡꓰ ꓐꓰ꓾ ꓙꓲꓻ ꓔꓱ, ꓟ ꓔꓯ ꓠꓬ ꓟꓽ ꓓꓻ ꓟꓽ ꓞꓽ ꓬꓰˍ ꓟ ꓗꓪ ꓐꓰ ꓟꓶ ꓟꓽ ꓐ ꓡ꓿ ꓔꓱ, ꓚꓵˍ ꓟ꓾ ꓬꓰ ꓙꓲꓽ ꓙꓳˍ ꓟ ꓔꓯ ꓢꓷ.ˍ ꓟ꓾ ꓐꓰ ꓟꓽ ꓠꓽ ꓠꓽ ꓜꓲ ꓡꓯ ꓘꓳ ꓢꓲ ꓖꓪ ꓙꓱ ꓡꓯ ꓘꓳˍ ꓟ ꓡꓰꓽ ꓔꓱ, ꓚꓵˍ ꓟ ꓢꓲ ꓡꓲ ꓟ ꓗꓪ ꓙꓰˍ ꓟ ꓙ ꓖꓴ ꓔꓯ ꓒꓴ ꓖꓶ ꓐ ꓡˍ ꓥꓳ”꓾ ꓐꓰ ꓔꓲꓺ ꓒ ꓓꓽ ꓐꓴ ꓡꓰ ꓐꓯˍ ꓡꓳ꓿
ꓮꓢꓲꓮ ꓗꓴꓷꓼ ꓟꓵꓽ ꓗꓪ ꓙꓵꓻ ꓠꓲ, ꓚꓱ, ꓟꓽ ꓫꓱ. ꓡꓯ ꓘꓳ ꓟ ꓐꓰ ꓞꓳ ꓫ. ꓐꓴ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓢꓯꓼ ꓕꓵꓼ ꓔꓬ ꓪˍ ꓟ ꓔꓯ ꓡꓳ. ꓢꓲ ꓔꓲꓺ ꓒ ꓓꓽ ꓐꓴ ꓠꓬ ꓢꓲ ꓡꓲ ꓟ ꓟꓶ ꓠ, ꓟ ꓐꓱ ꓶ ꓞꓳ ꓤ ꓐꓴ ꓠꓬꓲꓽ ꓗꓴ. ꓚꓸꓼ ꓗꓪ ꓙꓲꓻ ꓔꓱ, ꓟ ꓐꓰ ꓙꓵꓻ ꓠꓲ, ꓣꓱꓽ ꓞ, ꓟ ꓔꓯ ꓐꓯ ꓖꓶ ꓗꓷꓳ꓿
“ꓢꓲ ꓡꓲ ꓟ ꓐꓯˍ ꓟ ꓠꓬ ꓓꓶꓽ ꓡꓯ ꓘꓳ ꓢꓰꓼ ꓡꓯ ꓘꓳˍ ꓟ ꓟꓽ ꓙꓳ ꓟꓽ ꓡꓰꓽ ꓟꓽ ꓞꓲꓺ꓾ ꓖꓳ ꓟ ꓗꓪ ꓐꓰ ꓟꓶ ꓡˍ ꓟ ꓬꓲ ꓢꓶꓽ ꓬꓲ ꓪꓰ꓾ ꓖꓪ ꓙꓱ ꓡꓯ ꓘꓳˍ ꓟ ꓬꓲ ꓒꓵꓽ ꓐꓰ ꓞꓳ ꓤ ꓐꓴ ꓠꓯꓸꓼ ꓗꓪ ꓙꓵꓻ ꓠꓲ, ꓔꓯ ꓠꓲ, ꓟ ꓫꓵ ꓫꓵ ꓡꓰꓽ ꓐꓰ ꓫꓬ, ꓔꓶˍ ꓟ ꓥ ꓡꓳ꓾ ꓐꓰ ꓬꓲ ꓪ ꓡꓰ ꓐꓯˍ ꓡꓳ꓿
ꓟꓯꓼ ꓢꓰꓼ ꓡꓯ ꓘꓳˍ ꓟ ꓠꓬ꓾ ꓠꓻ ꓓꓴ ꓓꓴ ꓢꓻ ꓢꓴ ꓐꓴ ꓥ ꓟ ꓞꓳ ꓫ. ꓐꓴ꓾ ꓦꓲꓻ ꓔꓯ ꓡꓳ ꓔꓲ. ꓬꓰ ꓢꓲ ꓛꓰ, ꓑꓬ ꓔꓬ ꓪ ꓢꓴ ꓐꓴ꓾ ꓤ ꓠꓱ ꓤ ꓐꓴ ꓐꓰ ꓡ ꓠ, ꓟ ꓦꓬꓼ ꓠꓬꓲ ꓗꓪ ꓦꓵꓻ ꓡˍ ꓟ ꓞꓲꓼ ꓤ ꓡꓯ, ꓤ ꓬꓲ ꓫꓵꓼ ꓐꓴ ꓔꓯ ꓪ ꓜꓲ ꓠꓻ ꓡꓰ ꓝꓲˍ ꓡꓳ꓾ ꓐꓰ ꓬꓲ ꓪ ꓐꓴ ꓡꓰ ꓬꓲꓼ ꓠꓬꓲ. ꓖꓶ ꓗꓷꓳ꓿
ꓔꓲꓺ ꓒ ꓓꓽ ꓐꓴ ꓡꓰ “ꓛꓴꓽ ꓙꓳ ꓢꓲ ꓢꓰꓼ ꓡꓯ ꓘꓳˍ ꓟ ꓔꓯ ꓠꓲ, ꓞꓼ ꓠꓽ ꓗꓷ ꓠ, ꓟ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓮ ꓙꓵꓽ ꓠꓬ ꓚꓲ. ꓛꓬ ꓬꓰ ꓔˍ ꓟ ꓕꓯꓽ ꓢꓲ ꓗꓪ ꓫꓬ, ꓔꓱ, ꓠꓲ, ꓫꓵˍ ꓟ ꓔꓯ ꓬꓰ ꓠ, ꓟ꓾ ꓪ ꓜꓲ ꓠꓯ. ꓡ ꓔꓬ ꓟ ꓫ. ꓙꓵ ꓓꓴ ꓐꓰ ꓝꓮꓲ ꓫꓬ, ꓟꓽ ꓐ ꓡ ꓐꓬ ꓡꓰ ꓟ ꓚꓱ, ꓗꓪ ꓙꓰ ꓝꓲˍ ꓟ ꓚꓱ, ꓐꓴ ꓔꓯ ꓠꓽ ꓗꓷ ꓠ, ꓟ” ꓓꓰꓽ ꓗꓷꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ “ꓟꓽ ꓧꓳ, ꓡꓯ ꓘꓳ ꓟ ꓔꓯ ꓫꓬ, ꓔꓱ, ꓠ, ꓟ ꓐꓱ ꓶ ꓧꓳ, ꓡꓯ ꓘꓳˍ ꓟ ꓚꓱ, ꓔꓯ ꓣꓱꓽ ꓠ, ꓟ” ꓕꓵꓼ ꓪ ꓖꓶ ꓗꓷꓳ꓿
ꓜꓲ ꓡꓯ ꓘꓳ ꓢꓲ ꓖꓪ ꓙꓱ ꓡꓯ ꓘꓳˍ ꓟ ꓠꓬ ꓮ ꓡꓲ ꓟꓬ ꓛꓲ ꓫ.ˍ ꓥ ꓟꓲ꓾ ꓞꓳ ꓤ ꓐꓴ ꓬꓲ ꓒꓵꓽ ꓐꓰ ꓗꓴꓷꓼ ꓙꓵꓽ ꓪ ꓔꓯ ꓒꓵꓽˍ ꓟ ꓕꓲ ꓚꓱ,ˍ ꓡꓰꓽ ꓟ ꓙ ꓖꓴ ꓥ ꓡꓳ” ꓐꓰ ꓬꓲ ꓐꓯ ꓑꓶ ꓘꓶꓽ ꓗꓪ ꓐꓯ ꓔ ꓡꓳ꓿
ꓝꓮꓐꓚ ꓠꓬ꓾ “ꓢꓯ. ꓫꓵꓽ ꓢꓯ. ꓙꓰꓽ ꓐꓴ ꓬꓲ ꓒꓵꓽ ꓒꓵꓽˍ ꓟ ꓔꓯ ꓕꓲ ꓠꓲ, ꓕꓲ ꓪ ꓢꓷ. ꓙ ꓟꓳ ꓙ ꓠ, ꓟ ꓐꓱ ꓶ ꓟꓵꓽ ꓠꓯꓸꓼ ꓗꓪ ꓙꓳˍ ꓟ ꓒꓵꓽˍ ꓟ ꓙꓵꓻ ꓠꓲ, ꓚꓱ, ꓠꓯꓸꓼ ꓗꓪ ꓐꓰ ꓧꓳꓽ ꓣꓱꓽ ꓢꓴ ꓐꓴ ꓠꓬ꓾ ꓙꓵꓻ ꓠꓲ, ꓚꓱ, ꓮ ꓙꓵꓽ ꓕꓲ ꓠꓲ, ꓕꓲ ꓪ ꓬꓰˍ ꓟ” ꓔꓯ ꓝꓮꓲ ꓕꓲ ꓧꓪ, ꓬꓰ ꓠ, ꓟ ꓬꓲꓼ ꓠꓬꓲ. ꓖꓶ ꓗꓷꓳ꓿ ꓖꓳ ꓟ ꓡꓰꓽ ꓟꓽ ꓞꓲ “ꓟꓵꓽ ꓦꓴꓻ ꓡꓯ ꓘꓳˍ ꓟ ꓑꓶ. ꓓꓴ ꓘꓴ ꓢꓯꓼ ꓟꓶꓽ ꓡꓰ ꓔꓬ ꓟ ꓞꓳ ꓫ. ꓐꓴ ꓐꓰ ꓟꓯꓼ ꓢꓰꓼ ꓡꓯ ꓘꓳˍ ꓟ ꓑꓶ. ꓓꓴ ꓫ. ꓙꓵ ꓔꓬ ꓢꓴ ꓐꓴ ꓐꓱ ꓶ ꓦꓰꓼ ꓔꓴ ꓖꓶˍ ꓥꓳ” ꓐꓰ ꓬꓲ ꓪ ꓡꓰ ꓪꓵꓼ ꓙꓱꓽ ꓗꓷꓳ꓿
“ꓮ ꓟꓶ ꓜꓻ ꓚꓲ. ꓧꓪꓽ ꓚꓲ.ˍ ꓟ ꓦꓬꓼ ꓠꓬꓲ ꓗꓪ ꓮꓢꓲꓮ ꓗꓴꓷꓼ ꓗꓪ ꓙꓳˍ ꓟ ꓣꓳꓽ ꓙꓲ‐ꓢꓴ ꓢꓲ ꓤ ꓐꓴ ꓮ ꓙꓵꓽ ꓢꓲ ꓡꓲ ꓟ ꓐꓱ ꓶ ꓪꓽ ꓘꓴˍ ꓟ꓾ ꓜꓽ ꓓꓴ ꓚꓲ.ˍ ꓟ ꓐꓰ ꓡꓯꓼ ꓕꓲꓺ ꓣꓱꓽ ꓬꓰˍ ꓟ ꓪꓽ ꓡꓯ ꓘꓳˍ ꓟ ꓟꓬꓱꓽ ꓐꓴ ꓔꓯ ꓟꓬꓽ ꓠꓬꓲ ꓬꓰ ꓠ, ꓟ ꓣꓳ ꓔꓯ ꓘꓴ ꓔꓬ ꓡꓳ” ꓐꓰ ꓔꓲꓺ ꓒ ꓓꓽ ꓐꓴ ꓡꓰ ꓐꓯ ꓖꓶ ꓗꓷꓳ꓿
Photo Credit : LiCAS News
