2026 ꓘꓳꓼ 3 ꓦ 1 ꓠꓬꓲ꓾ ꓢꓲ ꓒ ꓦꓬꓼ ꓠꓬꓲ ꓕꓯ ꓑ‐ꓟ‐ꓚꓳ, ꓔꓲꓺ ꓒ ꓙꓵꓽ ꓔꓶ. ꓧꓳ‐ꓛꓬ.ꓳ ꓞꓳ ꓘ, ꓗꓪ ꓟ, ꓟ ꓟ‐ꓣꓲ‐ꓬ ꓭ. ꓘꓴ ꓫꓵꓼ ꓒꓴ ꓑꓮꓲꓽ ꓔꓯ ꓔꓲꓺ ꓒ ꓠ‐ꓔ‐ꓡꓰ ꓬꓳ‐ꓫꓴ ꓡꓰ ꓧꓳꓽ ꓪꓴ. ꓟꓴ ꓢꓲ ꓠꓬꓲ ꓬꓰ ꓗꓷꓳ꓿
ꓐꓶ‐ꓬꓲ ꓗꓴꓷꓼ ꓫꓴ ꓖꓴ ꓪꓴ. ꓡ‐ꓫꓬꓳ ꓢꓽ‐ꓢꓶ‐ꓠ꓾ ꓑ‐ꓟ‐ꓚꓳ, ꓔꓲꓺ ꓒ ꓙꓵꓽ ꓔꓶ. ꓗꓪ ꓙꓳˍ ꓟ ꓧꓳ‐ꓛꓬ.ꓳ ꓞꓳ ꓘ, ꓗꓪ ꓬꓰˍ ꓟ ꓟ, ꓟ ꓟ‐ꓣꓲ‐ꓬ ꓭ. ꓘꓴ ꓫꓵꓼ ꓒꓴ ꓑꓮꓲꓽ ꓟꓲ‐ꓢ ꓔꓯ ꓠꓬ ꓢꓲ ꓒ ꓦꓬꓼ ꓠꓬꓲ ꓠꓯꓼ ꓠꓯꓼ 9ꓽ00 ꓙꓵ, ꓕꓯ ꓬꓰ ꓗꓷ ꓟ ꓥ ꓡꓳ꓿
ꓟꓲ‐ꓢ ꓪꓽ ꓘꓴˍ ꓟ ꓠꓯꓸꓼ ꓗꓪ ꓔꓲꓺ ꓒ ꓡꓰ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓡꓴ‐ꓓꓰ ꓡꓳ ꓒꓱ ꓗꓪ ꓟ ꓙꓲꓻ ꓫꓬ ꓢꓴ ꓐꓰ‐ꓠ‐ꓓꓰ ꓔꓯ ꓦ ꓐꓬꓱꓽ ꓟ. ꓖꓶ ꓗꓷ ꓟ ꓟ, ꓟ ꓟ‐ꓣꓲ‐ꓬ ꓚꓱ, ꓔꓯ ꓚꓺ ꓟ. ꓖꓶ ꓗꓷꓳ꓿ ꓣꓳ ꓥˍ ꓟꓲ ꓙꓲꓻ ꓫꓬ ꓢꓴ ꓐꓰ‐ꓠ‐ꓓꓰ ꓔꓯ ꓔꓯꓺ ꓢꓳ ꓠ, ꓟ ꓐꓯ ꓖꓶ ꓗꓷꓳ꓾ ꓐꓰ ꓢꓷ. ꓪˍ ꓡꓳ꓿
ꓑꓮꓲꓽ ꓟꓲ‐ꓢ ꓗꓪ ꓚꓳ ꓡꓳ ꓗꓪ ꓟ ꓞꓳ ꓘ, ꓐꓴ ꓗꓪ ꓔꓬ ꓟ ꓢꓲ ꓤ ꓐꓴ ꓡꓰ ꓔꓲꓺ ꓫꓵꓽ ꓔꓲꓺ ꓙꓰꓽ ꓮ ꓟꓬ, ꓔꓯ, ꓢꓲ ꓔꓲꓺ ꓖꓶ ꓗꓷꓳ꓿
ꓑꓮꓲꓽ ꓟꓽ ꓬꓰ ꓧꓶ. ꓕꓯ 22.2.2026 ꓗꓪ ꓚꓳ. 28.2.2026 ꓗꓪ ꓛꓲ꓾ ꓑ‐ꓟ‐ꓚꓳ, ꓗꓪ ꓔꓬ ꓟ ꓢꓔ. ꓑꓮꓴꓡ ꓔꓲꓺ ꓟ ꓓꓽ ꓟ ꓐꓰ ꓡ‐ꓫꓬꓳ ꓗꓪ ꓐꓰ ꓬꓰ‐ꓢꓴ ꓬꓲ ꓫꓵꓺ ꓠꓲ, ꓟ ꓔꓲꓺ ꓟ ꓜꓴ ꓗꓪ ꓟ ꓔꓲꓺ ꓟ ꓐꓴ ꓠꓬ ꓪꓴ‐ꓢ ꓟ. ꓟꓲꓽ ꓟ. ꓖꓶˍ ꓟ꓾ ꓟ. ꓟ ꓔꓧꓮꓠꓓꓮꓣ ꓮꓴꓠꓖ ꓠꓬ ꓡꓲ‐ꓢꓴ ꓕꓳꓽ ꓶ ꓟ. ꓖꓶ ꓕꓱ ꓡꓱ ꓬꓰ ꓗꓷ ꓟ ꓥꓳ꓿
ꓖꓳ ꓡꓱ ꓪꓴ‐ꓢ ꓟ. ꓟꓲꓽ ꓟ. ꓖꓶˍ ꓟ ꓐꓰ ꓡꓲ‐ꓢꓴ ꓕꓳꓽ ꓶ ꓟ. ꓖꓶˍ ꓟ ꓗꓪ ꓢꓳꓺ ꓣꓴ ꓡ ꓢꓴ ꓞꓳ ꓪꓴꓽ꓾ ꓞꓳ ꓡꓯ. ꓤ ꓠꓱ ꓮ ꓙꓵꓽ ꓠꓬ 65 ꓣꓳ ꓛꓲ ꓙꓳˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓖꓳ ꓡꓱ ꓟ. ꓖꓶ ꓔˍ ꓟ ꓘꓴꓽ ꓠꓯꓸꓼ ꓗꓪ ꓐꓰ ꓬꓲ ꓪꓴ. ꓟ ꓢꓲꓽ ꓫꓬ ꓖꓳ ꓓꓱꓽ ꓘꓳ ꓣꓴ ꓟꓶ ꓢꓴ ꓤ ꓑ. ꓤ (6) ꓣꓳ꓾ ꓤ ꓟꓶ ꓤ (6) ꓣꓳ꓾ ꓮ ꓙꓵꓽ (12) ꓣꓳ ꓙꓳˍ ꓡꓳ꓾ ꓐꓰ ꓢꓷ. ꓪˍ ꓡꓳ꓿
ꓢꓲꓽ ꓫꓬ ꓟ‐ꓣꓲ‐ꓬ ꓭ. ꓘꓴ ꓒꓴ ꓑꓮꓲꓽ ꓬꓰ ꓓꓳ ꓡꓰ ꓗ. ꓠꓯ. ꓕꓲ ꓠꓬꓲ꓾ 3 ꓦ 2 ꓠꓬꓲ ꓠꓯꓼ ꓠꓯꓼ 7ꓽ00 ꓙꓵ, ꓕꓯ ꓠꓬ ꓑꓮꓲꓽ ꓟꓲ‐ꓢ ꓔꓯ ꓧꓪ. ꓧꓪꓸꓼ ꓐꓰ ꓬꓰ ꓓꓳ ꓡꓰ ꓟ ꓑꓶ. ꓓꓴ ꓪꓴ‐ꓢ ꓔꓯ ꓫ. ꓟꓳˍ ꓟ ꓟꓲ‐ꓢ ꓔꓲꓺ ꓪꓽ ꓘꓴ ꓙꓵ, ꓔꓯ ꓬꓰ ꓗꓷ ꓢꓲ꓾ ꓠꓯꓼ ꓜ ꓜꓽ ꓗꓷ ꓠꓬ ꓑꓮꓲꓽ ꓗꓪ ꓛꓲ ꓡ ꓗꓷ ꓟ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓠꓬ ꓚꓲ. ꓛꓬ ꓞꓳ ꓘ,꓾ ꓚꓲ. ꓛꓬ ꓡꓳ ꓒꓱ ꓗꓪ ꓬꓲꓼ ꓙꓰ ꓗꓷꓳ꓾ ꓐꓰ ꓢꓷ. ꓪˍ ꓡꓳ꓿
ꓑꓮꓲꓽ ꓐꓱ ꓶ ꓐꓲꓻ ꓫꓴꓽˍ ꓟ ꓮ ꓙꓵꓽ ꓔꓯ ꓠꓬ ꓡ‐ꓫꓬꓳ ꓡꓳ ꓒꓯ ꓙ‐ꓟꓮꓲ ꓞꓳ ꓘ, ꓗꓪ ꓙꓳˍ ꓟ ꓦ‐ꓐ‐ꓡꓴ.‐ꓡꓴ. ꓢꓳ ꓤ ꓜꓲꓼ ꓦꓲ ꓗꓪ ꓟ ꓟ. ꓒ ꓐꓬ‐ꓔ ꓝꓣꓮꓠꓚꓲꓢ ꓐꓰ ꓕꓲ ꓦꓲꓻ ꓢꓴ ꓐꓰ ꓢꓳ ꓤ ꓐꓴ ꓡꓰ ꓐꓲꓻ ꓫꓴꓽ ꓙ ꓔ ꓟ ꓥ ꓡꓳ꓾ ꓐꓰ ꓢꓷ. ꓪ ꓡꓳ꓿
