ꓔꓲꓺ ꓒ ꓪ ꓔꓲ ꓡꓰ ꓑꓮꓗꓲꓢꓔꓮꓠ ꓐꓰ ꓮꓝꓖꓧꓮꓠꓲꓢꓔꓮꓠ ꓗꓴꓷꓼ ꓐꓴ ꓢꓲ ꓡꓲ, ꓠ, ꓟ ꓐꓱ ꓶ ꓖꓪ ꓙꓱ ꓜꓲꓼ ꓓꓴ ꓬꓰ ꓐ ꓡꓰ ꓠ, ꓟ ꓪꓽ ꓘꓴ ꓖꓶ_ ꓟ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓑꓮꓗꓲꓢꓔꓮꓠ ꓐꓰ ꓮꓝꓖꓧꓮꓠꓲꓢꓔꓮꓠ ꓗꓴꓷꓼ ꓐꓴ ꓔꓯ ꓢꓲ ꓡꓲ, ꓠ, ꓟ ꓐꓱ ꓶ ꓖꓪ ꓙꓱ ꓡꓯ ꓘꓳ ꓓꓴ ꓪꓴ. ꓔꓴ ꓠ, ꓟ ꓢꓯꓼ ꓖꓶ ꓗꓷ ꓢꓲ꓾ ꓐꓣꓮꓜꓲꓡ ꓗꓴꓷꓼ ꓗꓪ ꓬꓲꓻ ꓙꓬ ꓙꓵꓽ ꓟꓶ. ꓡꓰ ꓢꓴ ꓫ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶ ꓗꓷ ꓟ ꓥꓳ꓿ ꓑ‐ꓗꓲ‐ꓢ‐ꓔꓮꓠ ꓗꓴꓷꓼ ꓠꓬ ꓬꓲ ꓪ ꓑ ꓕꓲ ꓗꓴꓷꓼ ꓥ ꓟ Afghanistan ꓠꓬ ꓒꓳ, ꓔꓴ ꓢꓴ ꓐꓴ ꓔꓯ ꓔꓬ ꓝꓲ_ ꓡꓳ꓾ ꓐꓰ ꓐꓯ ꓢꓲ꓾ ꓡꓳ, ꓬꓰ ꓟ ꓕꓲꓽ ꓫꓵ ꓠꓽ ꓕꓯ ꓠꓬꓲꓽ ꓗꓴꓷꓼ ꓢꓰꓼ ꓡꓯ ꓘꓳ ꓢꓲ꓾ ꓠꓬꓲꓽ ꓗꓴꓷꓼ ꓡꓱꓼ ꓗꓪ ꓐꓬ ꓡꓰ ꓓꓴ ꓙꓳ ꓡꓰ ꓟ ꓥꓳ꓿
ꓔꓲꓺ ꓒ ꓪ ꓔꓲ ꓡꓰ ꓮꓠꓖꓰꓡꓴꓢ ꓪꓽ ꓘꓴ ꓓꓳ ꓗ. ꓠꓯ. ꓑꓮꓗꓲꓢꓔꓮꓠ ꓐꓰ ꓮꓝꓖꓧꓮꓠꓲꓢꓔꓮꓠ ꓗꓴꓷꓼ ꓐꓴ ꓠꓬꓲꓽ ꓛꓱ ꓠꓬꓲ ꓙ ꓗꓪ ꓐꓰ ꓖꓪ ꓙꓱ ꓡꓯ ꓘꓳ ꓓꓴ ꓬꓰ ꓠ, ꓟ ꓢꓯꓼ ꓖꓶ ꓗꓷ ꓢꓲ꓾ ꓕꓱ ꓡꓱ ꓒꓬꓱꓼ ꓔꓬ ꓟ ꓫꓵ ꓪꓴ ꓐꓱ ꓶ ꓙꓬ ꓫ. ꓔꓬ ꓟ ꓔꓯ ꓐꓯ ꓔ ꓡꓳ꓿ ꓲꓢꓣꓮꓰꓡ ꓐꓰ ꓴꓢ ꓐꓴ ꓠꓬ ꓲꓣꓮꓠ ꓔꓯ ꓢꓰꓼ ꓔꓳ, ꓓꓴ ꓬꓰ ꓡ ꓢꓲ꓾ ꓲꓣꓮꓠ ꓥ ꓟꓲ ꓑ ꓕꓲ ꓗꓪ ꓔꓬ ꓟ ꓗꓴꓷꓼ ꓐꓴ ꓔꓯ ꓝꓮꓲ ꓔꓳ, ꓡ ꓟ ꓖꓳ ꓟ ꓡꓰ ꓐꓰ ꓟꓵꓽ ꓗꓳ. ꓓꓵ ꓓꓵ ꓗꓪ ꓒꓬꓱꓼ ꓔꓬ ꓟ ꓫꓵ ꓪꓴ ꓮ ꓙꓵ ꓢꓲ ꓡꓲ, ꓟ ꓐꓰ ꓕꓲ ꓠꓲ, ꓕꓲ ꓪ ꓔꓬ ꓟꓶ ꓠ, ꓟ ꓐꓱ ꓶ ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓖꓶ ꓗꓷ ꓟ ꓥꓳ꓿
“ꓟꓵꓽ ꓘꓳ ꓓꓵ ꓓꓵ ꓗꓪ ꓒꓬꓱꓼ ꓔꓬ ꓟ ꓫꓵ ꓪꓴ ꓮ ꓙꓵ ꓢꓲ ꓡꓲ, ꓐꓰ ꓗꓷ ꓡꓰ ꓢꓲ꓾ ꓕꓲ ꓠꓲ, ꓕꓲ ꓪ ꓐꓰ ꓔꓬ ꓟꓶ ꓠ, ꓟ ꓪꓽ ꓘꓴ ꓓꓴ ꓬꓰ ꓡꓯ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓖꓶ ꓟ ꓥꓳ꓾ “ꓪꓴ‐ꓢ ꓡꓰ ꓖꓶ ꓔ ꓟ ꓡꓯꓼ ꓫꓴꓻ ꓥ ꓟ ꓢꓲ ꓡꓲ, ꓟ ꓡꓰ ꓞꓳ ꓫꓵ ꓗꓳ, ꓡꓳ ꓗꓪ ꓠꓻ ꓓꓴ ꓔꓯ ꓫꓬ, ꓓꓻ ꓡꓰ ꓟ ꓥꓳ꓾” ꓐꓰ ꓐꓯ ꓔ ꓡꓳ꓿
ꓡꓳ, ꓬꓰ ꓟ ꓙꓵ, ꓗꓪ ꓬꓲꓻ ꓙꓬ ꓙꓵꓽ ꓓꓴ ꓔꓯ ꓔꓳ, ꓜꓳ ꓗꓷ ꓟ ꓐꓣꓮꓜꓲꓡ ꓗꓴꓷꓼ ꓟꓲꓠꓮꓢ ꓖꓰꓣꓮꓲꓢ ꓗꓴꓷꓼ ꓫꓴꓻ ꓗꓪ ꓔꓬ ꓟ ꓑ ꓫꓬ ꓐꓴ ꓐꓰ ꓕꓲ ꓪ ꓔꓬ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿”ꓬꓲꓻ ꓙꓬ ꓑꓶ ꓓꓴ ꓫ. ꓓꓴ ꓔꓳ, ꓜꓳ ꓢꓴ꓾ ꓔꓬ ꓦꓲꓻ ꓐꓬ ꓡꓰ ꓢꓴ ꓕꓲ ꓦꓲꓻ ꓢꓴ ꓐꓰ ꓬꓰ ꓙ ꓔꓳ, ꓙ ꓔꓬ ꓟ ꓟꓬꓱꓽ ꓗꓪ ꓢꓯꓼ ꓕꓵꓼ ꓔꓬ ꓢꓴ ꓐꓴ ꓮ ꓙꓵ ꓐꓱ ꓶ ꓪꓽ ꓘꓴ ꓙ ꓖꓶ ꓔꓬ ꓡꓳ꓾” ꓐꓰ ꓐꓯ ꓔ ꓡꓳ꓿ ꓕꓱ ꓬꓲꓻ ꓙꓬ ꓙꓵꓽ ꓟꓶ. ꓡꓰ ꓟ ꓗꓪ ꓐꓰ ꓐꓶ ꓓꓳ ꓕꓲ ꓛꓱ ꓗꓪ ꓞꓳ ꓤ 46 ꓣꓳ ꓟꓽ ꓞꓲ ꓫꓵꓻ ꓡꓰꓳ꓾ ꓐꓰ ꓢꓷ. ꓪ ꓡꓳ꓿
