ꓲꓣꓮꓠ ꓗꓴꓷꓼ ꓗꓪ ꓐꓰ ꓚꓮꓣꓲꓔꓮꓢ ꓜꓴꓻ ꓠꓬ ꓔꓲꓺ ꓒ ꓪ ꓔꓲ ꓡꓰ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓖꓪ ꓙꓱ ꓜꓲꓼ ꓓꓴ ꓬꓰ ꓠ, ꓟ ꓓꓰꓽ ꓟ ꓚꓱ, ꓔꓯ ꓘꓳ, ꓣꓴ ꓡꓳ ꓐꓰ ꓐꓯ ꓔ ꓟ ꓓꓳꓽ
3 ꓦ ꓟ 2 ꓠꓬꓲ 2026 ꓘꓳꓼ ꓠꓽ ꓕꓲ ꓠꓬꓲꓽ ꓕꓯ ꓟꓵꓽ ꓗꓳ ꓓꓵ ꓓꓵ ꓗꓪ ꓫ. ꓓꓴ ꓟꓷꓼ ꓢꓴ ꓐꓴ ꓔꓯ ꓬꓰ ꓙ ꓢꓴ ꓜꓴꓻ ꓚꓮꓣꓲꓔꓮꓢ ꓜꓴꓻ ꓡꓰ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓢꓰꓼ ꓡꓯꓽ ꓘꓳ, ꓟ ꓚꓱ, ꓗꓪ ꓐꓰ ꓟꓽ ꓥ꓾ ꓖꓪ ꓙꓱ ꓜꓲꓼ ꓓꓴ ꓬꓰ ꓢꓲ ꓠꓬꓲ ꓢꓲ ꓡꓲ, ꓟꓶ ꓠ, ꓟ ꓢꓯꓼ ꓕꓵꓼ ꓠ, ꓟ ꓚꓱ, ꓔꓯ ꓔꓲꓺ ꓒ ꓪ ꓔꓲ ꓡꓰꓳ (14) ꓡꓰ ꓓꓰꓽ ꓔ ꓟ ꓔꓯ ꓘꓳ, ꓣꓴ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿
ꓠꓽ ꓛꓳꓼ ꓠꓬꓲ ꓕꓯ ꓴꓢꓮ꓾ ꓬꓲ‐ꓢꓷ‐ꓡꓲ ꓟꓯꓼ ꓐꓴ ꓔꓯ ꓲꓣꓮꓠ ꓗꓴꓷꓼ ꓘꓴꓽ ꓗꓪ ꓐꓳ ꓢꓶꓽ (1200) ꓢꓶꓽ ꓟꓽ ꓞꓲ ꓞꓰ ꓩꓴ ꓡ ꓗꓷ ꓟ ꓥ ꓡꓳ꓿ ꓝꓮꓲ ꓲꓣꓮꓠ ꓗꓴꓷꓼ ꓥ ꓟꓲ ꓲꓣꓮꓠ꓾ ꓗꓴꓷꓼ ꓐꓰ ꓠꓱ. ꓐꓯꓼ ꓗꓴꓷꓼ ꓘꓴꓽ ꓗꓪ ꓙꓳ ꓟ ꓴꓢꓮ ꓟꓯꓼ ꓒꓽ ꓐꓴ ꓔꓬ ꓔꓶ. ꓗꓪ ꓐꓳ ꓢꓶꓽ ꓐꓶ ꓩꓴ ꓗꓷ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓟꓯꓼ ꓢꓰꓼ ꓡꓯꓽ ꓘꓳ ꓔꓬ ꓟ ꓪꓴ. ꓠꓬꓲ ꓗꓴꓷꓼ ꓮ ꓟꓬ, ꓗꓪ ꓢꓲ ꓡꓲ, ꓓꓴ ꓟꓽ ꓙꓳ ꓗꓷ ꓡꓰ ꓟ ꓥ ꓡꓳ꓿ ꓝꓮꓲ ꓗꓴꓷꓼ ꓮ ꓟꓬ, ꓗꓪ ꓢꓰꓼ ꓡꓯꓽ ꓘꓳ ꓓꓴ ꓮ ꓟꓬ, ꓙꓳ ꓡ ꓟ ꓑꓶ. ꓓꓴ ꓟꓲ ꓠꓯ ꓢꓲ ꓡꓲ, ꓓꓴ ꓟꓽ ꓙꓳ ꓡ ꓟ ꓥ ꓡꓳ꓿ ꓑ ꓫꓬ ꓐꓴ ꓮ ꓟꓬ, ꓥ ꓟꓲ ꓫ. ꓓꓴ ꓟꓷꓼ ꓓꓴ ꓮ ꓟꓬ, ꓔꓳ, ꓜꓳ ꓢꓲ ꓠꓬꓲ ꓟꓯꓼ ꓘꓰ, ꓟꓯꓼ ꓒꓬ ꓢꓴ ꓐꓴ ꓮ ꓟꓬ, ꓙꓳ ꓡꓰ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓚꓮꓣꓲꓔꓮꓢ ꓜꓴꓻ ꓡꓰ ꓟꓯꓼ ꓢꓰꓼ ꓡꓯꓽ ꓘꓳ ꓟ ꓙꓵ, ꓕꓯ ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓔꓬ ꓟ ꓔꓶ.꓾ ꓢꓳꓻ ꓦꓲꓻ ꓪꓽ ꓘꓴ ꓦꓲꓻ ꓔꓯ ꓐꓳ ꓟꓽ ꓞꓰ ꓖꓶ ꓠ, ꓟ ꓐꓱ ꓶ ꓓꓰꓽ ꓔ ꓟ ꓥ ꓡꓳ꓿
ꓞꓲꓼ ꓣꓳ ꓟ ꓤ ꓠꓱ ꓤ ꓐꓴ ꓐꓰ ꓞꓲꓼ ꓪꓴꓽ ꓡꓰ ꓢꓴ ꓞꓳ ꓟꓳ ꓐꓴ ꓔꓯ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓔꓶ. ꓗꓪ ꓐꓰ ꓡꓲ, ꓖꓶ ꓠ, ꓟ ꓖꓪ ꓙꓱ ꓔ ꓟ ꓚꓱ, ꓔꓯ ꓛꓳ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓝꓮꓲ ꓔꓲꓺ ꓒ ꓪ ꓔꓲ ꓡꓰꓳ (14) ꓡꓰ ꓮ ꓟꓶ ꓟ ꓙꓵ, ꓗꓪ ꓮ ꓘꓶ. ꓛꓲ ꓪꓴꓽ ꓟ ꓫꓵꓽ ꓪꓴ ꓓꓽ ꓟ ꓔꓯ ꓟꓲ ꓠꓯ ꓗꓪ ꓔꓳ, ꓜꓳ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓟꓯꓼ ꓢꓰꓼ ꓡꓯꓽ ꓘꓳ ꓟ ꓔꓯ ꓠꓽ ꓗꓷ ꓠ, ꓟ ꓡ ꓛꓴ. ꓣꓱ ꓢꓲ ꓠꓬꓲ ꓢꓰꓼ ꓡꓯꓽ ꓘꓳ_ ꓗꓪ ꓐꓰ ꓟꓲ ꓠꓯ ꓢꓲ ꓡꓲ, ꓓꓴ ꓟꓽ ꓪ ꓓ꓾ ꓖꓪ ꓙꓱ ꓜꓲꓼ ꓓꓴ ꓬꓰ ꓢꓲ ꓠꓬꓲ ꓢꓲ ꓡꓲ, ꓟꓶ ꓠ, ꓟ ꓚꓱ, ꓔꓯ ꓧꓪ ꓠ, ꓟ ꓓꓰꓽ ꓔ ꓟ ꓥ ꓡꓳ꓿
ꓝꓮꓲ ꓚꓮꓣꓲꓔꓮꓢ ꓜꓴꓻ ꓡꓰ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓜꓳ_ꓟ꓾ ꓢꓰꓼ ꓡꓯꓽ ꓘꓳ_ ꓟ ꓟꓶꓽ ꓡꓰ ꓠ, ꓟ ꓐꓬ ꓡꓰ ꓠ, ꓟ ꓚꓱ, ꓔꓯ ꓠꓽ ꓗꓷ ꓠ, ꓟ ꓐꓯ ꓔ ꓡꓳ꓿ ꓗꓴꓷꓼ ꓮ ꓙꓵꓽ ꓢꓴ ꓖꓪ ꓙꓱ ꓜꓲꓼ ꓓꓴ ꓬꓰ ꓠ, ꓟ ꓟꓲ ꓠꓯ ꓢꓲ ꓡꓲ, ꓟꓶ ꓠ, ꓟ ꓢꓯꓼ ꓕꓵꓼ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓚꓮꓣꓲꓔꓮꓢ ꓜꓴꓻ ꓠꓬ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓡꓰ ꓒꓴ ꓖꓶ ꓔ ꓟ ꓫ. ꓓꓴ ꓟꓷꓼ ꓢꓴ ꓐꓴ ꓔꓯ ꓞꓳ ꓫꓵꓽ ꓟꓽ ꓘꓶꓽ꓾ ꓘꓴ ꓜꓲꓼ ꓞꓳ ꓟꓽ ꓘꓶꓽ ꓬꓰ ꓙ ꓔꓳ, ꓙ ꓢꓴ ꓜꓴꓻ ꓥ ꓡꓳ꓿
