ꓣꓳ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓘꓴꓽ ( Our Common Home)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓠꓬ (Our Common Home) ꓐꓯ ꓟ ꓣꓳ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓘꓴꓽ ꓟ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓡ ꓓꓴ ꓥꓳ꓿ ꓕꓱ ꓟ ꓠꓬ Pope Francis ꓡꓰ ꓐꓳ ꓔ ꓟ (ꓡꓮꓴꓓꓮꓔꓳ ꓢꓲ) ꓐꓯ ꓟ ꓕꓳ ꓶ ꓗꓪ ꓐꓰ ꓣꓳ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓘꓴꓽ ꓐꓯ ꓟ ꓚꓱ, ꓥ ꓡꓳ꓿
ꓣꓳ ꓮ ꓙꓵꓽ ꓢꓴ ꓐꓴ ꓠꓬ ꓟꓽ ꓫꓱ, ꓡꓯꓽ ꓘꓳ, ꓟ ꓟꓽ ꓪ ꓡꓯꓽ ꓘꓳ, ꓟ ꓫ. ꓕꓱ ꓚꓱ,꓾ ꓟꓽ ꓪꓽ ꓡꓯꓽ ꓟ ꓡꓲꓽ ꓒꓰꓼ ꓔꓯ ꓣꓱ ꓢꓲ ꓠꓬꓲ ꓣꓳ ꓠꓬ ꓟꓽ ꓫꓱ, ꓡꓯꓽ ꓘꓳ, ꓟ ꓗꓴꓷꓼ ꓗꓪ ꓔꓬ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓐꓴ ꓮ ꓙꓵꓽ ꓢꓴ ꓐꓴ ꓜꓲꓼ ꓡꓯꓽ ꓘꓳ, ꓟ ꓬꓲ ꓔꓶ. ꓕꓲ ꓟ ꓙꓳ ꓟ ꓥ ꓡꓳ꓿ ꓖꓳ ꓟ ꓠꓬ ꓟꓲ ꓠꓯ ꓦꓲꓻ ꓘꓴꓽ ꓓ ꓟ ꓥ ꓡꓳ꓿
ꓟꓲ ꓠꓯ ꓔꓯ ꓣꓳ ꓮ ꓡꓰ ꓐꓰ ꓡꓳ. ꓟꓳ ꓔꓬ ꓡ?
ꓘꓴ ꓜꓲꓼ ꓞꓳ ꓡꓰ ꓟ. ꓖꓶ ꓟ ꓚꓱ, ꓗꓪ ꓐꓰ ꓟꓲ ꓠꓯ ꓔꓯ ꓠꓬ ꓣꓳ ꓠꓲ, ꓫꓵˍ ꓪ ꓡꓰ ꓝꓮꓲ ꓣꓳ ꓬꓰ ꓠꓲ, ꓫꓵˍ ꓪ ꓡꓰ ꓬꓰ ꓠ, ꓟ ꓬꓲ ꓔꓶ. ꓟꓽ ꓥ ꓐꓰ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓗꓪ ꓟ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓢꓴ ꓐꓴ ꓕꓲ ꓠꓲ, ꓕꓲ ꓪ ꓔꓬ ꓠ, ꓟ ꓦꓲꓻ ꓘꓴꓽ ꓓˍ ꓕꓲ ꓦꓲꓻ ꓥ ꓡꓳ꓿
ꓠꓴ ꓥꓪ ꓓꓴ ꓙ ꓠꓬꓲ ꓡꓯ꓾ ꓣꓳ ꓔꓬ ꓟ ꓦꓲꓻ ꓔꓯ ꓠꓴ ꓥꓪ ꓦꓲꓻ ꓔꓯ ꓠꓬ ꓮ ꓘꓶ. ꓛꓲ ꓢꓲꓽ ꓢꓲꓽ ꓫꓬ ꓫꓬ ꓙꓳ ꓡꓰ ꓝꓲ ꓟ ꓥ ꓡꓳ꓿ ꓮ ꓘꓶ. ꓡꓳ. ꓐꓲ ꓠ, ꓟ ꓫꓬ, ꓖꓶ ꓢꓲ ꓠꓬꓲ ꓮ ꓘꓶ. ꓛꓲ ꓒꓵꓽ ꓠ, ꓟ ꓛ ꓔ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓟꓲ ꓠꓯ ꓡ ꓞꓳ ꓐꓴ ꓮ ꓙꓵꓽ ꓐꓴ ꓔꓬ ꓟ ꓦꓲꓻ ꓓˍ ꓥ ꓟ ꓟꓲ ꓠꓯ ꓠꓬ ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓡ ꓞꓳ ꓐꓴ ꓮ ꓡꓰ ꓐꓰ ꓙ ꓡꓯꓽ ꓘꓳ, ꓔꓬ ꓡ꓾ ꓮ ꓡꓰ ꓐꓰ ꓬꓰ ꓔꓬ ꓡ?
ꓘꓴ ꓜꓲꓼ ꓞꓳ ꓗꓪ ꓐꓰ ꓟ. ꓖꓶ ꓔ ꓟ ꓠꓬ ꓠꓬꓲ. ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓠꓬ ꓟꓲ ꓠꓯ ꓔꓯ ꓣꓳ ꓔꓬ ꓟ ꓦꓲꓻ ꓕꓲ ꓦꓲꓻ ꓘꓴꓽ ꓐꓰ ꓟꓽ ꓢꓪ ꓢꓲ ꓠꓬꓲ ꓶꓻ ꓡꓯꓼ ꓬꓰ ꓠ, ꓟ ꓬꓲ ꓐꓴ ꓧꓪ ꓠ, ꓟ ꓬꓲ ꓔꓶ. ꓐꓰ ꓣꓳ ꓢꓪ ꓔꓬ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓲ ꓦꓰ ꓙꓲ ꓟ ꓠꓲ, ꓟ꓾ ꓒꓴ ꓫꓵ ꓔꓯ ꓡꓰ ꓧꓪ. ꓟ ꓠꓲ, ꓟ ꓠꓲ, ꓦꓰ ꓙꓲ ꓟ ꓠꓲ, ꓟ ꓑꓶ. ꓓꓴ ꓣꓳ ꓮ ꓙꓵꓽ ꓢꓴ ꓔꓬ ꓟ ꓟꓲ ꓠꓯ ꓦꓲꓻ ꓘꓴꓽ ꓓ ꓠꓬ ꓮ ꓟꓶ ꓟ ꓙꓵ, ꓗꓪ ꓮ ꓘꓶ. ꓛꓲ ꓠꓻ ꓒꓬ ꓓꓴ ꓔꓳ, ꓜꓳ ꓔꓬ ꓟ ꓥ ꓡꓳ꓿
ꓟꓲ ꓠꓯ ꓠꓬ ꓣꓳ ꓮ ꓙꓵꓽ ꓢꓴ ꓔꓬ ꓟ ꓦꓲꓻ ꓘꓴꓽ ꓐꓯ ꓟ ꓠꓬ ꓮ ꓘꓶ. ꓣꓳ ꓚꓵˍ ꓟ ꓥ ꓡꓳ꓿ ꓦꓲꓻ ꓕꓲ ꓦꓲꓻ ꓗꓪ ꓐ, ꓐ ꓣꓱ ꓢꓴ ꓠꓬ ꓚꓲ. ꓛꓬ ꓦꓲꓻ ꓔꓯ ꓟꓽ ꓢꓲꓽ ꓟꓽ ꓫꓬ, ꓔꓬ ꓡꓰ ꓝꓲ ꓠꓬ ꓤ ꓠꓱ ꓤ ꓐꓴ ꓐꓰ ꓟ, ꓟ ꓔꓯ ꓠꓻ ꓒꓬ ꓓꓴ ꓙꓳ ꓡꓰ ꓝꓲ ꓟ ꓥ ꓡꓳ꓿
ꓟꓲ ꓠꓯ ꓖꓴ ꓪꓴ. ꓕꓲ ꓒꓳ, ꓗꓪ ꓢꓲ, ꓜꓲ ꓮ ꓟꓬ, ꓘꓶˍ ꓗꓷ ꓟ ꓪꓴ. ꓠꓬꓲ ꓟꓲ ꓠꓯ ꓖꓴ ꓟꓶ. ꓕꓲ ꓒꓳ, ꓗꓪ ꓟꓵꓽ ꓘꓳꓼ ꓒꓳ, ꓡꓰ ꓝꓲ ꓟ ꓥ ꓡꓳ꓿ ꓮ ꓘꓶ. ꓛꓲ ꓒꓴ ꓫꓵ ꓙꓳ ꓢꓴ ꓐꓴ ꓗꓴꓷꓼ ꓠꓬ ꓬꓲ ꓪ ꓣꓱ ꓓꓴ ꓟꓽ ꓓ ꓠ, ꓛꓲ ꓒꓴ ꓫꓵ ꓔꓯ ꓣꓱ ꓔꓬ ꓢꓲ ꓠꓬꓲ꓾ ꓫ. ꓓꓴ ꓟꓷ ꓢꓴ ꓐꓴ ꓗꓴꓷꓼ ꓗꓪ ꓔꓬ ꓟ ꓡ ꓞꓳ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜ ꓓꓴ ꓓꓳ ꓓꓴ ꓐꓱ ꓶ ꓮ ꓘꓶ. ꓛꓲ ꓫ. ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓡꓮꓴꓓꓮꓔꓳ ꓢꓲ ꓠꓬ ꓮ ꓫꓵˍ ꓔꓯ ꓬꓰ ꓠ, ꓟ ꓐꓯ ꓔꓬ ꓡ ꓐꓯ ꓠꓬ꓾ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓠꓬ ꓚꓲ. ꓛꓬ ꓡꓰ ꓔꓬ ꓢꓴ ꓐꓴ ꓟꓽ ꓥ꓾ ꓮ ꓙꓵꓽ ꓢꓴ ꓐꓴ ꓠꓬ ꓕꓲ ꓦꓲꓻ ꓘꓴꓽ ꓗꓪ ꓔꓬ ꓢꓴ ꓐꓴ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓢꓴ ꓐꓴ ꓥ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓮ ꓙꓵꓽ ꓢꓴ ꓐꓴ ꓠꓬ ꓙ ꓡꓯꓼ ꓘꓳ, ꓔꓬ ꓟ ꓢꓴ ꓐꓴ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓮ ꓙꓵꓽ ꓠꓬ ꓦꓲꓻ ꓘꓴ ꓓꓽ ꓕꓲ ꓟ ꓗꓪ ꓔꓬ ꓢꓴ ꓐꓴ ꓥ ꓟ ꓪꓴ. ꓠꓬꓲ ꓣꓳ ꓔꓬ ꓟ ꓦꓲꓻ ꓘꓴ ꓓ ꓟꓲ ꓠꓯ ꓔꓯ ꓢꓲꓽ ꓫꓬ ꓡꓰ ꓝꓲ ꓠ, ꓟ ꓗꓽ ꓕꓽ ꓠ, ꓟ ꓟꓬꓱꓽ ꓬꓰ ꓠ, ꓟ ꓶꓻ ꓙꓳ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓣꓳ ꓔꓬ ꓟ ꓦꓲꓻ ꓘꓴꓽ ꓓ ꓟꓲ ꓠꓯ ꓗꓪ ꓠꓴ ꓥꓪ ꓠꓬ ꓙꓲ ꓟ ꓦꓲꓻ ꓘꓴ ꓢꓴ ꓒꓬꓱꓼ ꓔꓬ ꓡ ꓣꓳ ꓚꓲ. ꓛꓬ ꓔꓯ ꓠ ꓠꓬꓲ ꓠ, ꓟ ꓥ ꓡꓳ꓿
ꓟꓵꓽ ꓘꓳꓼ ꓔꓯ ꓗꓽ ꓕꓽ ꓟ ꓟꓬꓱꓽ ꓬꓰ ꓟ ꓠꓬ ꓣꓳ ꓟꓽ ꓬꓰ ꓟꓽ ꓓ ꓟ ꓟꓬꓱꓽ ꓓ ꓟ ꓕꓲ ꓫꓵꓽ ꓥ ꓡꓳ꓿ ꓪꓴ‐ꓢ ꓡꓰ ꓚꓰꓼ ꓔ ꓟ ꓔꓯ ꓗꓽ ꓕꓽ ꓟ ꓠꓬ ꓣꓳ ꓙꓲ ꓢꓴ ꓢꓲꓺ ꓤ ꓐꓴ ꓐꓰ ꓟꓲ ꓠꓯ ꓗꓪ ꓔꓬ ꓢꓴ ꓐꓴ ꓮ ꓙꓵꓽ ꓬꓰ ꓠꓯ, ꓟ ꓟꓬꓱꓽ ꓓꓽ ꓥ ꓡꓳ꓿ ꓣꓳ ꓦꓻ ꓕꓲ ꓒꓳ, ꓐꓱ ꓶ ꓬꓰ ꓠ, ꓟ ꓟꓬꓱ ꓟꓲ ꓥ ꓡꓳ꓿ ꓣꓳ ꓮ ꓙꓵꓽ ꓢꓴ ꓐꓴ ꓣꓳ ꓔꓬ ꓟ ꓟꓲ ꓠꓯ ꓔꓯ ꓠꓲ, ꓠꓵ ꓡꓯ꓿ ꓫ. ꓟꓳ ꓪ꓿
