ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓛꓳꓽ ꓒꓯ, ꓐꓴ ꓥ ꓟ ꓬ‐ꓗꓴ꓾ ꓒꓲ‐ꓕꓱ ꓐꓰ ꓬꓳ‐ꓦ ꓔꓯ ꓟꓴˍ ꓟ ꓪꓽ ꓚꓲ ꓗꓪ ꓘꓴ ꓔꓯ, ꓙꓰˍ ꓡꓳ꓿ ꓖꓳ ꓗꓪ ꓬꓲ ꓪ ꓟꓲꓽ ꓙꓬ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓶꓻ ꓒꓬꓱꓽ ꓑꓶ. ꓡꓰˍ ꓡꓳ꓿ ꓮ ꓘꓶ. ꓡꓬ.ˍ ꓟ꓾ ꓮ ꓘꓶ. ꓒꓴˍ ꓟ ꓞꓳ ꓤ ꓕꓲ ꓣꓳ ꓒꓬꓱꓼ ꓙꓰ ꓢꓲ ꓠꓬꓲ ꓟꓴ ꓗꓪ ꓗꓪ ꓟ ꓬꓲ‐ꓡꓲ‐ꓬ꓾ ꓟꓳ‐ꓫꓲ ꓐꓴ ꓠꓬ ꓬꓲ ꓔꓯ ꓫ. ꓕꓱ ꓡˍ ꓡꓳ꓿ ꓖꓳ ꓟ ꓔꓯ ꓟꓳˍ ꓕꓯ ꓒꓲ‐ꓕꓱ ꓠꓬ ꓮ ꓓꓲ ꓠꓲ, ꓒꓴ ꓗ, ꓛꓲꓽ ꓠꓬꓲ ꓖꓳ ꓗꓪ ꓔꓬ ꓠꓲ, ꓫꓵˍ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓠꓬ꓾ ꓢꓲꓺ ꓒꓽꓳ꓾ ꓠꓴ ꓐꓱ ꓶ ꓦꓲ ꓕꓲ ꓟ꓾ ꓥꓪ ꓐꓱ ꓶ ꓦꓲ ꓕꓲ ꓟ꓾ ꓬꓲ‐ꓡꓲ‐ꓬ ꓐꓱ ꓶ ꓦꓲ ꓕꓲ ꓟ ꓫꓬ, ꓢꓲ ꓠꓬꓲ ꓕꓱ ꓗꓪ ꓔꓬ ꓡꓯ꓾ ꓐꓰ ꓘꓴ ꓔꓴ ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ ꓖꓳ ꓗꓪ ꓮ ꓘꓶ. ꓗ, ꓛꓲꓽ ꓓꓰ ꓡꓰˍ ꓟ꓾ ꓠꓲ, ꓒꓴ ꓓꓰ ꓡꓰˍ ꓟ꓾ ꓟꓴꓽ ꓗꓪ ꓗꓴꓷꓼ ꓐꓯˍ ꓟ ꓮ ꓡꓲ ꓥ ꓐꓯ ꓟ ꓬꓲ ꓢꓷ. ꓡꓰ ꓟ ꓑꓶ. ꓓꓴ꓾ ꓪꓴ‐ꓢ ꓡꓰ ꓬꓲ ꓪ ꓔꓯ ꓟꓳ. ꓖꓶ ꓡˍ ꓟ ꓑꓶ. ꓓꓴ꓾ ꓒꓶ ꓟꓳ. ꓖꓶ ꓡˍ ꓟ ꓑꓶ. ꓓꓴ ꓗ, ꓛꓲꓽ ꓠꓬꓲ ꓐꓯ ꓔꓴ ꓡˍ ꓟ ꓥ ꓡꓳ꓿ ꓬꓲ ꓮ ꓫꓵꓽ ꓐꓯ ꓔꓬ ꓟ ꓔꓯˍ ꓟꓲ ꓬꓲ ꓟꓽ ꓢꓷ.꓿ ꓖꓳ ꓡꓱ ꓠꓬꓲ ꓟꓴ ꓗꓪ ꓗꓪ ꓐꓰ ꓬꓲ ꓢꓯꓼ ꓕꓲ ꓟ ꓓꓳ ꓡˍ ꓟ ꓠꓬ꓾ “ꓕꓱ ꓟ ꓠꓬ ꓥꓪ ꓠꓲ, ꓫꓵˍ ꓟ ꓥꓪ ꓤ ꓥ ꓡꓳ꓿ ꓬꓲ ꓐꓯ ꓘꓶꓽ ꓔꓯ ꓠ ꓠ,꓿” ꓐꓯ ꓢꓲ ꓠꓬꓲ ꓟꓴ ꓗꓪ ꓗꓪ ꓐꓰ ꓢꓯꓼ ꓕꓲ ꓟ ꓓꓳ ꓡˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟ. ꓟꓲꓽ ꓝꓲ. ꓕꓱ ꓟ ꓠꓬ ꓢ. ꓠꓯ ꓜꓻ ꓚꓲ. ꓧꓪꓽ ꓚꓲ.ˍ ꓟ (2) ꓠꓽ ꓕꓲ ꓠꓽ ꓟ ꓘꓴꓽ ꓗꓪ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓔꓯ ꓜꓻ ꓚꓲ. ꓧꓪꓽ ꓚꓲ.ˍ ꓟ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽˍ ꓡ꓿
ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ ꓪꓴ‐ꓢ ꓠꓬ ꓣꓳ ꓐꓰ ꓮ ꓕꓯ ꓟꓲ ꓔꓬ ꓡꓳ꓾ ꓐꓯˍ ꓟ ꓬꓲ ꓪꓴ. ꓕꓲꓽ ꓟ ꓣꓳ ꓔꓯ ꓢꓷ. ꓡꓰ ꓝꓲ ꓠꓲ, ꓫꓵˍ ꓟ ꓥ ꓡꓳ꓿ ꓮ ꓡꓲ ꓔꓬ ꓡ ꓐꓰ ꓐꓯˍ ꓠꓬ ꓣꓳ ꓜꓻ ꓚꓲ. ꓧꓪꓽ ꓚꓲ. ꓢꓲ ꓠꓬꓲ ꓪꓽ ꓘꓴˍ ꓟ ꓕꓱ ꓕꓲ ꓙꓵ, ꓗꓪ ꓪꓴꓽ ꓧꓶꓻˍ ꓥꓳ꓾ ꓢꓯꓼ ꓐꓽˍ ꓥꓳ꓿ ꓣꓳ ꓝꓴꓲ. ꓐꓱ ꓶ ꓣꓳ ꓠꓲ, ꓥꓴꓻˍ ꓟ ꓑꓶ. ꓓꓴ ꓠꓲ, ꓫ.ˍ ꓥꓳ꓿ ꓮ ꓘꓶ. ꓪꓴꓽ ꓧꓶꓻˍ ꓥꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓠꓲ, ꓟ ꓕꓽ ꓙꓬ꓿ ꓡꓯꓼ ꓫꓵ ꓢꓯꓼ ꓕꓵꓼ꓿ ꓠꓴ ꓒ ꓕꓲ ꓗꓪ ꓪꓴ‐ꓢ ꓔꓬ ꓡꓳ ꓐꓯˍ ꓟ ꓬꓲ. ꓬꓲ ꓢꓲ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿
ꓮ ꓡꓲ ꓬꓰ ꓢꓲ ꓠꓬꓲ ꓪꓴ‐ꓢ ꓔꓬ ꓡ꓿ ꓚꓵ ꓚꓵ ꓐꓯˍ ꓠꓬ ꓪꓴ‐ꓢ ꓠꓬ ꓣꓳ ꓒ ꓕꓲ ꓗꓪ ꓔꓬ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓟꓬ ꓢꓶꓽ ꓗꓪ ꓐꓰ ꓟꓳꓻ ꓟꓽ ꓓꓻ꓿ ꓬꓲ ꓡꓰ ꓒꓴ ꓟ. ꓖꓶ ꓡˍ ꓕꓯ ꓡꓰꓽ ꓣꓳ ꓗꓳ ꓡꓳ ꓗ ꓪ ꓔꓬ ꓟ ꓟꓳꓻ ꓓˍ ꓡꓳ꓿ ꓣꓳ ꓮ ꓡꓲ ꓗꓪ ꓟꓳˍ ꓡ ꓐꓰ ꓐꓯˍ ꓠꓬ꓾ ꓘꓶꓽ ꓫꓵꓽ ꓡꓵ ꓥ ꓟ 2 ꓪ ꓔꓲ. 6ꓽ15‐17 ꓗꓪ ꓣꓳ ꓟꓳˍ ꓡꓳ꓿ ꓖꓳ ꓗꓪ ꓠꓬ ꓟꓯꓼ ꓜꓴ ꓮ ꓟꓬ, ꓮ ꓟꓴꓽ ꓜꓶꓽ ꓢꓲ ꓟꓷꓽ ꓠꓷ, ꓝ. ꓒ ꓬꓲ‐ꓡꓲ‐ꓫ ꓔꓯ ꓢꓰꓼ ꓠ, ꓟ ꓡˍ ꓡꓳ꓿ ꓪꓽ ꓙꓵꓽ ꓪꓽ ꓔ ꓚꓳ ꓡꓳ ꓗꓪ ꓮ ꓙꓵꓽ ꓚꓳ. ꓔ ꓢꓲ ꓠꓬꓲ ꓬꓲ‐ꓡꓲ‐ꓫ ꓔꓯ ꓢꓰꓼ ꓠ, ꓟ ꓡˍ ꓡꓳ꓿ ꓖꓳ ꓕꓯ ꓟꓷꓽ ꓠꓷ, ꓝ. ꓒ ꓬꓲ‐ꓡꓲ‐ꓫ ꓬꓲ ꓚꓳ ꓑ ꓕꓲ ꓣꓳ ꓠꓬ ꓬꓲ ꓪ ꓔꓯ ꓛꓴꓽ ꓙꓳ ꓢꓴ ꓮ ꓟꓬ, ꓚꓳ ꓡꓳ ꓗꓪ ꓚꓳ. ꓔꓬ ꓟ ꓑꓶ. ꓓꓴ ꓙꓳꓺ ꓢꓲ ꓠꓬꓲ ꓬꓲ ꓢꓲ ꓒ ꓬꓲ‐ꓡꓲ‐ꓫ ꓔꓯ ꓠꓺ ꓠꓬꓲˍ ꓡꓳ꓿ ꓣꓳ ꓮ ꓡꓲ ꓬꓰ ꓠꓯ,꓾ ꓣꓳ ꓠꓬ ꓫꓵꓻ ꓓꓴ ꓥꓳ꓾ ꓐꓰ ꓐꓯˍ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓬꓲ‐ꓡꓲ‐ꓫ ꓠꓬ꓾ ꓕꓽ ꓙꓳꓺ꓾ ꓣꓳ ꓚꓳ ꓡꓳ ꓗꓪ ꓔꓬ ꓟ ꓬꓲ ꓪ ꓟꓬ ꓟꓽ ꓛꓲ ꓙꓳˍ ꓡꓳ꓾ ꓐꓰ ꓐꓯˍ ꓡꓳ꓿ ꓖꓳ ꓕꓯ ꓬꓲ‐ꓡꓲ‐ꓫ ꓠꓬ ꓪꓽ ꓘꓴˍ ꓡꓳ꓿ ꓟꓴ ꓗꓪ ꓗꓪ ꓔꓬ ꓟ ꓐ, ꓐꓽꓳ꓾ ꓠꓴ ꓚꓳ ꓑ. ꓕꓱ ꓕꓲ ꓣꓳ ꓟ ꓔꓯ ꓬꓲ ꓟꓬ ꓢꓶꓽ ꓒꓴ ꓖꓶ ꓡꓯ꓿ ꓖꓳ ꓡꓱ ꓠꓬ ꓬꓲ ꓟꓳꓻ ꓡꓰ ꓝꓲ꓾ ꓐꓰ ꓐꓯ ꓢꓲ ꓪꓽ ꓘꓴˍ ꓡꓳ꓿ ꓖꓳ ꓕꓯ ꓞꓼ ꓐꓰ ꓚꓳ ꓑ. ꓖꓳ ꓕꓲ ꓣꓳ ꓟ ꓠꓬ ꓟꓬ ꓢꓶꓽ ꓒꓴ ꓡꓰ ꓢꓲ ꓠꓬꓲ ꓬꓲ ꓚꓳ ꓡꓳ ꓗꓪ ꓔꓬ ꓟ ꓟꓴ ꓗꓪ ꓝꓲ ꓓꓴ ꓬꓲ ꓜꓴ ꓬꓲ ꓟꓯꓼ ꓠꓬ ꓬꓲ ꓪ ꓔꓯ ꓢꓰꓼ ꓠ, ꓟ ꓐꓱ ꓶ ꓗꓽ ꓚꓳ. ꓔꓬ ꓟ ꓛꓴꓽ ꓙꓳ ꓢꓴ ꓕꓯꓽ ꓢꓲ ꓮ ꓟꓬ, ꓙꓳˍ ꓟ ꓔꓯ ꓬꓲ ꓡꓳ. ꓟꓳꓻ ꓡꓰꓳ꓿
ꓖꓳ ꓡꓱ ꓠꓬꓲ ꓟ. ꓟꓲꓽ ꓝꓲ. ꓕꓱ ꓟ ꓗꓪ ꓣꓳ ꓡꓳ. ꓠꓬꓲˍ ꓕꓯ ꓪꓴ‐ꓢ ꓠꓬ ꓣꓳ ꓒ ꓕꓲꓺ ꓗꓪ ꓬꓲ ꓜꓴ ꓬꓲ ꓟꓯꓼ ꓟ ꓟꓴ ꓗꓪ ꓝꓲ ꓓꓴ ꓮ ꓟꓬ, ꓔꓬ ꓡꓳ꓿ ꓖꓳ ꓡꓱ ꓥˍ ꓟꓲ ꓣꓳ ꓟꓬ ꓢꓶꓽ ꓔꓯ ꓬꓲ ꓡꓰ ꓚꓵ. ꓖꓶ ꓔ ꓟ ꓥ ꓡꓳ꓿ ꓬꓲ ꓡꓲꓽ ꓔꓯ ꓙꓳꓺ ꓡꓰˍ ꓟ ꓙꓳˍ ꓟ ꓑꓶ. ꓓꓴ꓾ ꓥ ꓠꓬ ꓣꓳ ꓙꓵꓻ ꓠꓲ, ꓔꓯ ꓪꓴꓽ ꓡ ꓝꓲ ꓠꓲ, ꓫꓵˍ ꓟ ꓑꓶ. ꓓꓴ ꓣꓳ ꓟꓳꓻ ꓟꓽ ꓠ ꓛꓲ ꓬꓲ ꓣꓳ ꓔꓯ ꓚꓵ. ꓔ ꓖꓶˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓕꓱ ꓟ ꓔꓯ ꓠꓬ ꓙꓵꓻ ꓠꓲ, ꓟꓬ ꓢꓶꓽ ꓗꓪ ꓐꓰ ꓣꓳ ꓟꓳꓻ ꓓ, ꓡꓳ꓿
