ꓠꓬꓲꓸ ꓠꓬꓲ ꓦ ꓢꓯꓼ ꓪ ꓣꓴ ꓠꓽ ꓗꓹ ꓟ ꓢꓲ ꓫꓬ ꓕꓳꓽ ꓶ ꓠꓬ ꓟ-ꓕꓲ ꓕꓳꓽ ꓶ 5ꓽ 20-26 ꓗꓪ ꓛꓲ ꓥ ꓡꓳ=
ꓒ-ꓡꓲ-ꓢꓷ ꓐꓴ ꓠꓬ ꓙꓵꓽ ꓗ ꓔꓯ ꓕꓱ ꓕꓱ ꓞꓳ ꓫꓱꓼ ꓢꓴ ꓐꓴ ꓥ ꓡꓳ= ꓖꓳ ꓡꓰ ꓐꓯ ꓥˍꓟꓲ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓠꓲꓸꓹ ꓟ ꓠꓬ ꓬꓲ ꓪ ꓞꓳ ꓫꓱꓼ ꓟ ꓕꓯ ꓢꓲ ꓞꓳ ꓫꓱꓼ ꓕꓯ ꓢꓲ꓾ ꓟꓴ ꓗꓪ ꓗꓴꓷꓼ ꓗꓪ ꓓꓵ ꓙꓰ ꓪ ꓥꓳ꓾ ꓐꓰ ꓐꓯ ꓔ ꓡꓳ=
ꓮꓽ ꓠꓱ ꓕꓯ ꓞꓳ ꓤ ꓢꓰꓼ ꓟꓽ ꓓ꓾ ꓐꓯꓹ ꓟ ꓙꓵꓽ ꓗ ꓔꓯ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓫꓬ ꓫꓬ ꓡꓰ ꓟꓸ ꓖꓶ ꓔ ꓡꓳ= ꓬꓲ ꓖ ꓟ ꓙꓳ ꓠꓲꓸꓹ ꓢꓲˍꓟ꓾ ꓠꓲꓸꓹ ꓚꓳˍꓟ ꓕꓱ ꓡꓱ ꓙ ꓟꓶ ꓬꓰ ꓔꓬ ꓟ ꓠꓬ ꓣꓳ ꓠꓲꓸꓹ ꓟ ꓗꓪ ꓐꓰ ꓞꓳ ꓤ ꓢꓰꓼ ꓗꓷˍꓟ ꓕꓲ ꓡꓰ ꓥꓳꓽ ꓠꓲꓸꓹ ꓠꓵꓸꓹ ꓟ ꓬꓲ ꓤ ꓠꓬꓲ ꓤ ꓐꓴꓳ= ꓖꓳ ꓟ ꓡꓰ ꓐꓰ ꓟꓽ ꓞꓲ ꓢꓴ ꓔꓯ ꓮ ꓫꓵꓽ ꓥˍꓟꓲ ꓬꓲ ꓖ ꓟꓽ ꓙꓳ꓾ ꓪꓴꓸ ꓠꓶꓸ ꓟꓽ ꓙꓳ ꓢꓴ ꓥ ꓐꓭ ꓐꓰ ꓕꓱ ꓡꓱ ꓐꓯˍꓟ ꓟꓲ ꓬꓲ ꓪ ꓔꓯ ꓞꓳ ꓟꓽ ꓒꓴˍꓪ ꓡꓰ ꓐꓰ ꓗꓹ ꓡꓳ= ꓢꓴ ꓔꓯ ꓞꓳ ꓟꓷꓼ ꓐꓯˍꓟ ꓕꓱ ꓡꓱ ꓐꓯ ꓔꓬ ꓢꓴ ꓠꓬ ꓚꓬ ꓟꓵ ꓮꓽ ꓔꓳꓸ ꓡꓰ ꓐꓰ ꓞꓹ ꓟ ꓝꓮꓲ ꓖꓶ ꓠꓹ ꓗꓸ ꓡꓳ ꓐꓰ ꓐꓯ ꓔꓽ ꓟ ꓙꓳ ꓡꓳ=
ꓟꓽ ꓞꓲ ꓟ-ꓕꓳ ꓶ 23-24 ꓗꓪ ꓖꓳ ꓡꓱ ꓠꓬꓲ ꓔꓲ ꓖꓴ ꓗꓪ ꓠꓴ ꓔꓲ ꓓꓴ ꓔꓲˍ ꓐꓰ ꓬꓰ ꓔꓬ ꓕꓯ꓾ ꓠꓴ ꓬꓲꓼ ꓠꓴ ꓠꓬꓲ ꓕꓲ ꓣꓳ ꓠꓴ ꓔꓯ ꓠꓲꓹ ꓟ ꓫ ꓖꓴ ꓙꓳˍ ꓟ ꓠꓴ ꓓꓵꓽ ꓙ ꓛꓲ ꓡ ꓠꓬ꓾ꓠꓴ ꓔꓲꓺ ꓓꓴ ꓠꓬ ꓔꓲ ꓖꓴ ꓛꓲ ꓔꓲ ꓗꓪ ꓗꓶ ꓔ ꓬꓰ ꓢꓲ꓾ ꓬꓲ ꓔꓯ ꓧꓶꓸ ꓕꓯ ꓙꓰ ꓢꓲ ꓠꓬꓲ꓾ ꓬꓲˍ ꓐꓰ ꓧꓳꓹ ꓡꓯꓽ ꓘꓳ ꓬꓰ ꓐꓯ ꓔ ꓡꓳ= ꓐꓯ ꓠꓲꓸꓹ ꓫꓵˍꓟ ꓠꓬ ꓪꓴ-ꓢ ꓔꓯ ꓦ ꓡꓱ ꓟ ꓐꓰ ꓔꓲ ꓖꓶˍꓟ ꓕꓯ ꓢꓲ꓾ ꓣꓳ ꓑꓶꓸ ꓓꓴ ꓠꓲꓸꓹ ꓟ ꓫꓸ ꓔꓬ ꓢꓴ ꓔꓯ ꓙꓰ ꓢꓲ꓾ ꓬꓲ ꓐꓰ ꓣꓳ ꓧꓳꓹ ꓡꓯꓽ ꓘꓳ ꓟ ꓠꓬ ꓟꓬ ꓠꓬꓲ ꓙꓵˍꓡꓳ= ꓣꓳ ꓕꓲ ꓣꓳ ꓡꓲꓽ ꓕꓲ ꓣꓳ ꓟꓽ ꓧꓳꓹ ꓡꓯꓽ ꓘꓳ ꓕꓯ ꓠꓬ ꓪꓴ-ꓢ ꓠꓯꓸꓼ ꓗꓪ ꓐꓰ ꓶꓽ ꓤ ꓫꓱꓽ ꓤ ꓘꓴ ꓣꓴ ꓟꓶ ꓪꓽ ꓟ ꓓꓽ ꓠꓲꓸꓹ ꓠꓵ ꓟ ꓮꓽ ꓐ ꓮꓽ ꓟ ꓬꓲ ꓤ ꓠꓬꓲꓽ ꓤ ꓐꓴꓳ= ꓖꓳ ꓟ ꓑꓶꓸ ꓓꓴ ꓪꓴ-ꓢ ꓠꓬ ꓕꓲ ꓠꓬꓲꓸ ꓡꓲꓽ ꓕꓲ ꓠꓬꓲ ꓣꓳ ꓬꓰ ꓔꓬ ꓟ ꓔꓯ ꓡꓳꓸ ꓔꓬ ꓡꓳ꓾ ꓣꓳ ꓦ ꓕꓲ ꓒꓳꓹ ꓗꓪ ꓕꓲ ꓠꓬꓲꓽ ꓡꓲ ꓕꓲ ꓠꓬꓲꓽ ꓪꓴ ꓟꓵ ꓡ ꓢꓲ꓾ ꓕꓲ ꓣꓳ ꓛꓳ ꓕꓲ ꓣꓳ ꓧꓳꓹ ꓡꓯꓽ ꓘꓳ ꓢꓲ꓾ ꓠꓬꓲ ꓢꓯꓼ ꓔꓬ ꓙꓰ ꓓꓴ ꓬꓰ ꓡꓯ=
