ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ꓾ “ꓠꓴ ꓔꓯ ꓢꓴ ꓡꓰ ꓮ ꓡꓲ ꓬꓰ ꓖꓶ ꓡ ꓝꓲ ꓠꓲ, ꓫꓵˍ ꓐꓭ ꓠꓬ ꓠꓴ ꓥˍ ꓟꓲ ꓢꓴ ꓔꓯ ꓖꓳ ꓡꓱ ꓬꓰ ꓖꓶ꓾” ꓐꓯˍ ꓟ ꓟ. ꓟꓲꓽ ꓝꓲ. ꓥ ꓡꓳ꓿
ꓟ. ꓟꓲꓽ ꓝꓲ. ꓘꓴꓽ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓧꓶ. ꓕꓯ ꓕꓱ ꓡꓱ ꓫ. ꓕꓱˍ ꓡꓳ꓿ “ꓓꓰꓽ꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓖꓶ ꓡˍ ꓥꓳ꓿ ꓧꓪ꓾ ꓖꓳ ꓡꓱ ꓠꓬ ꓠꓴ ꓪ ꓠꓽ ꓧꓪ ꓟꓶˍ ꓥꓳ꓿ ꓗ ꓘꓶꓽ ꓲʼꓼ꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓒꓴ ꓖꓶ ꓡˍ ꓥꓳ꓿” ꓢꓲ ꓒ ꓬꓰ‐ꓢꓴ ꓝꓮꓲ ꓕꓲ ꓘꓶꓽ ꓐꓯˍ ꓟ ꓠꓬ꓾ “ꓠꓴ ꓔꓯ ꓢꓴ ꓡꓰ ꓮ ꓡꓲ ꓬꓰ ꓖꓶ ꓡ ꓝꓲ ꓠꓲ, ꓫꓵˍ ꓐꓭ ꓠꓬ ꓠꓴ ꓥˍ ꓟꓲ ꓢꓴ ꓔꓯ ꓖꓳ ꓡꓱ ꓬꓰ ꓖꓶ꓾” ꓐꓰ ꓐꓯ ꓔ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓣꓳ ꓡꓳ. ꓠꓬꓲˍ ꓥꓳ ꓐꓯˍ ꓠꓬ ꓫꓬꓽ ꓫꓬꓽ ꓡꓰꓽ ꓥ ꓡꓳ꓿ ꓔꓯꓺ ꓥꓳꓽ꓾ ꓢꓴ ꓔꓯ ꓣꓳ ꓠꓬ꓾ ꓟꓽ ꓜꓳꓽ ꓟꓽ ꓙꓲꓻ꓾ ꓠꓲ, ꓦꓯ.ˍ ꓟ ꓐꓯ ꓘꓶꓽ ꓕꓱ ꓡꓱ ꓫ. ꓕꓱˍ ꓡꓳ꓿ ꓢꓴ ꓔꓯ ꓣꓳꓽ ꓓꓶꓽ ꓔꓲ. ꓠꓬꓲ ꓕꓱ ꓡꓱ ꓬꓰˍ ꓡꓳ꓿ ꓢꓴ ꓔꓯ ꓣꓳꓽ ꓟꓽ ꓜꓳꓽ ꓟꓽ ꓙꓲꓻ ꓟ ꓬꓰ ꓖꓶˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓴ ꓠꓬ ꓣꓳ ꓔꓯ ꓝꓮꓲ ꓚꓱ, ꓬꓲꓼ ꓡ ꓢꓲ ꓟꓽ ꓜꓳꓽ ꓟꓽ ꓙꓲꓻ ꓟ ꓬꓰˍ ꓕꓯ ꓠꓽ ꓣꓳ ꓠꓽ ꓢꓴ ꓔꓯ ꓠꓲ, ꓙꓳˍ ꓡꓳ꓿ ꓕꓱ ꓟ ꓠꓬ ꓟꓽ ꓜꓳꓽ ꓟ ꓬꓲ ꓚꓱ, ꓥ ꓡꓳ꓿
ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓫꓬꓽ ꓫꓬꓽ ꓡꓰꓽ ꓥꓳ꓿ ꓣꓳ ꓢꓴ ꓔꓯ ꓙꓲˍ ꓟ ꓬꓰ ꓖꓶˍ ꓠꓬ꓾ ꓢꓴ ꓥˍ ꓟꓲ ꓣꓳ ꓔꓯ ꓙꓲˍ ꓟ ꓬꓰ ꓖꓶ ꓡˍ ꓥꓳ꓿ ꓕꓱ ꓟ ꓑꓶ. ꓓꓴ ꓢꓴ ꓡꓰ ꓠꓴ ꓔꓯ ꓙꓲˍ ꓟ ꓬꓰ ꓖꓶ ꓡ ꓝꓲ ꓠꓲ, ꓫꓵˍ ꓠꓬ ꓠꓴ ꓥˍ ꓟꓲ ꓙꓲˍ ꓟ ꓬꓰ ꓠ, ꓟ ꓥ ꓡꓳ꓿ ꓠꓴ ꓬꓰˍ ꓟ ꓠꓬ ꓟꓽ ꓜꓳꓽ ꓟꓽ ꓙꓲꓻ ꓟ ꓥꓳ ꓐꓯˍ ꓠꓬ꓾ ꓢꓴ ꓥˍ ꓟꓲ ꓠꓴ ꓔꓯ ꓟꓽ ꓜꓳꓽ ꓟꓽ ꓙꓲꓻ ꓟ ꓬꓰ ꓖꓶ ꓡˍ ꓥꓳ꓿ ꓕꓱ ꓟ ꓠꓬ ꓔꓱ, ꓚꓵˍ ꓟ ꓢꓲ ꓒ ꓬꓰ‐ꓢꓴ ꓬꓲ. ꓐꓯ ꓘꓶꓽ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓣꓳ ꓟꓬꓽ ꓐꓱ ꓠꓬ꓾ ꓣꓳ ꓠꓬ ꓢꓴ ꓟꓽ ꓙꓲꓻ ꓟ ꓓꓳꓽ ꓚꓺ ꓒꓬꓱˍ ꓡꓳ꓾ ꓢꓴ ꓟꓽ ꓜꓳꓽ ꓟꓽ ꓙꓲꓻ ꓟ ꓬꓰˍ ꓟ ꓔꓯ ꓣꓳ ꓐꓯ ꓒꓬꓱˍ ꓡꓳ꓾ ꓢꓴ ꓔꓯ ꓣꓳ ꓘꓶꓻ ꓤꓲˍ ꓡꓳ꓾ ꓢꓴ ꓔꓯ ꓣꓳ ꓗꓶ.ˍ ꓡꓳ꓾ ꓢꓴ ꓔꓯ ꓣꓳ ꓟꓳꓻ ꓟꓽ ꓟꓵ ꓬꓰˍ ꓡꓳ꓾ ꓖꓳ ꓡꓱ ꓐꓯˍ ꓥ ꓟꓲ ꓢꓴ ꓡꓰ ꓣꓳ ꓔꓯ ꓬꓰ ꓡˍ ꓕꓯ ꓠꓽ ꓣꓳ ꓠꓽ ꓠꓲ, ꓟ ꓟꓽ ꓗ, ꓛꓲꓽ꓿ ꓣꓳ ꓠꓽ ꓠꓲ, ꓦꓶˍ ꓡꓳ꓿ ꓕꓱ ꓟ ꓠꓬ ꓬꓲ. ꓬꓲ ꓢꓲ ꓟꓽ ꓙꓳ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓡꓱ ꓐꓰ ꓐꓯ ꓔˍ ꓟˍ ꓟꓲ ꓥ ꓡꓳ꓿
