ꓢꓲ ꓒ ꓬꓰ-ꓢꓴ ꓬꓲꓽ ꓟꓸ ꓟꓲ ꓚꓸ ꓪꓴ ꓓꓵ ꓕꓯ ꓓꓽ ꓪꓴ ꓬꓲꓽ ꓐꓯˍꓟ ꓫꓸ ꓪ ꓘꓶꓼ ꓠꓬ ꓢꓲ ꓒ ꓬꓲꓽ ꓢꓲ ꓫꓬ ꓟꓽ ꓦ ꓠꓬ ꓥꓪ ꓕꓯ ꓢꓲ ꓗꓪ ꓔꓬ ꓡꓳ꓾ꓫꓸ ꓢꓴ ꓟꓷꓼ ꓢꓴ ꓐꓴ ꓔꓯ ꓟꓸ ꓟꓲ ꓚ ꓟꓸ ꓖꓶ ꓠꓹ ꓟ ꓥꓪ ꓔꓯ ꓧꓪꓽ ꓞꓲ ꓟꓲꓼ ꓖꓶ ꓡꓳ ꓐꓰ ꓐꓯ ꓢꓲ꓾ ꓶꓼ ꓓꓳꓽ ꓫꓱꓼ ꓓꓳꓽ ꓚ ꓪꓴ ꓓꓵ ꓙꓰ ꓡꓳ= ꓬꓲ ꓟꓶꓽ ꓠꓷꓹ ꓗꓪ ꓐꓰ ꓓꓽ ꓪꓴ ꓕꓱ ꓩꓵ ꓡꓹ ꓟ ꓫꓸ ꓪ ꓠꓬ ꓒꓴ ꓫꓵꓸꓹ ꓟꓽ ꓥ꓾ ꓙꓵꓽ ꓪ ꓚꓱꓹ ꓟꓽ ꓥ꓾ ꓓꓶ ꓡꓯꓼ ꓘꓳꓼ ꓢꓰꓼ ꓡꓯꓼ ꓘꓳꓼ ꓚꓱꓹ ꓟꓽ ꓥ꓾ꓞꓳ ꓫꓸ ꓠꓯꓸꓼ ꓘꓴ ꓗꓪ ꓐꓰ ꓓꓳꓽ ꓡꓹ ꓟ ꓶꓼ ꓓꓳꓽ ꓫꓱꓼ ꓓꓳꓽ ꓥ ꓡꓳ=
ꓬꓲꓽ ꓬꓰ ꓠꓲꓹ ꓫꓵꓼˍꓟ ꓠꓬ ꓫꓸ ꓢꓴ ꓐꓴ ꓔꓯ ꓶꓼ ꓓꓳꓽ ꓫꓱꓼ ꓓꓳꓽ ꓚ ꓟꓸ ꓖꓶ ꓠꓹ ꓟ ꓥ ꓡꓳ= ꓮꓽ ꓫꓵꓽ ꓑꓶꓸ ꓓꓴ ꓫꓸ ꓢꓴ ꓟꓷꓼ ꓢꓴ ꓐꓴ ꓠꓬ ꓪꓴ-ꓢ ꓠꓲꓹ ꓟ ꓘꓴꓽ ꓗꓪ ꓓꓵ ꓡ? ꓐꓰ ꓐꓯ ꓠꓬ ꓬꓲꓽ ꓪ ꓠꓬ ꓫꓸ ꓔꓽ ꓟ ꓪꓴ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓡꓰ ꓦ ꓡꓱꓽ ꓖꓴ ꓥ ꓡꓳ= ꓪꓴ-ꓢ ꓬꓲꓽ ꓠꓲꓹ ꓟ ꓗꓪ ꓥˍꓟꓲ ꓫꓸ ꓢꓴ ꓟꓷꓼ ꓢꓴ ꓐꓴ ꓔꓯ ꓠꓲꓹ ꓠꓵꓸꓹꓡꓳ= ꓒꓴ ꓙꓳ ꓢꓴ ꓐꓴ ꓠꓬ ꓫꓸ ꓢꓴ ꓟꓷꓼ ꓢꓴ ꓔꓯ ꓮꓽ ꓕꓯ ꓥˍꓟꓲ ꓟꓲ ꓡꓰ ꓔꓬ ꓡꓳ꓾ ꓮꓽ ꓫꓵꓽ ꓟꓬꓱꓽ ꓬꓰ ꓥˍꓟꓲ ꓫꓸ ꓢꓴ ꓟꓷꓼ ꓢꓴ ꓔꓯ ꓟꓽ ꓓꓵ ꓙ ꓙ ꓡꓰ ꓬꓰ ꓔꓬ ꓡꓳ=
ꓟꓲ ꓠꓯ ꓗꓪ ꓠꓬ ꓒꓴ ꓫꓵꓸꓹ ꓙꓳ ꓢꓴ ꓐꓰ ꓠꓲꓸꓹ ꓟ ꓫꓸ ꓔꓬ ꓡꓳ꓾ ꓞꓳ ꓫꓸ ꓥˍꓟꓲ ꓠꓲꓸꓹ ꓟ ꓫꓸ ꓓꓴ ꓙꓳ ꓡꓳ꓾ ꓣꓳ ꓠꓬ ꓕꓲ ꓒꓳꓹ ꓒꓳꓹ ꓗꓪ ꓠꓬ ꓫꓸ ꓔꓬ ꓫꓵ ꓥˍꓟ ꓑꓶꓸ ꓓꓴ ꓪꓴ-ꓢ ꓔꓯ ꓣꓳ ꓮ ꓙꓵꓽ ꓣꓱꓽ ꓯꓬꓼ ꓫꓵꓽ ꓡꓰ ꓥ ꓡꓳ꓾ ꓪꓴ-ꓢ ꓔꓯ ꓣꓳ ꓮꓽ ꓙꓵꓽ ꓠꓲꓸꓹ ꓠꓵ ꓠꓽ ꓗꓸ ꓫꓵˍ ꓡꓰ ꓥ ꓡꓳ= ꓖꓳ ꓡꓰ ꓠꓬ ꓠꓬꓲꓸ ꓠꓬꓲ ꓠꓴ ꓥꓪ ꓫꓸ ꓢꓴ ꓟꓷꓼ ꓢꓴ ꓐꓴ ꓔꓯ ꓮꓽ ꓡꓰ ꓐꓰ ꓬꓰ ꓖꓶ ꓑ ꓡ ꓡ? ꓣꓳ ꓣꓱꓽˍꓟ Tnternet ꓗꓪ ꓐꓰ ꓬꓲꓽ ꓪ ꓐꓱ ꓶ ꓔꓬ ꓡꓳ ꓐꓯˍꓟ ꓔꓯ ꓢꓷꓸ ꓡꓰ ꓠꓹ ꓟ ꓬꓰ ꓠꓽ ꓗꓸ ꓡꓳ= ꓫꓸ ꓢꓴ ꓟꓷꓼ ꓢꓴ ꓐꓴ ꓗꓸ ꓛꓲ ꓠꓽ ꓫꓸ ꓪ ꓔꓯ ꓕꓱ ꓠꓽ ꓗꓸ ꓡꓳ=
