ꓬꓲ ꓞꓲꓼ 30 ꓘꓳꓼ ꓙ ꓬꓰ ꓢꓴ ꓥ ꓕ ꓑꓳꓸꓼ ꓬꓰ ꓠ ꓔˍ ꓟ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵˍ ꓟ ꓚꓱ,
ꓤ ꓠꓱ ꓤ ꓕꓯ ꓟ ꓡꓰ ꓐ, ꓐ ꓔꓯ ꓠꓵˍ ꓥ꓾ ꓟ, ꓟ ꓔꓯ ꓠꓵˍ ꓥ꓾ ꓮ ꓑ ꓔꓯ ꓠꓵˍꓳ꓾ ꓮ ꓤ ꓔꓯ ꓠꓵˍꓳ꓾ ꓕꓱ ꓡꓰ ꓬꓰ ꓔꓬ ꓢꓲ ꓠꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵ ꓠ ꓗ, ꓟ ꓔꓯ ꓟꓽ ꓢꓷ. ꓔꓬ꓿ ꓖꓳ ꓡꓱ ꓬꓰ ꓢꓲ ꓮ ꓔꓲ. ꓤ ꓪꓴꓽ ꓡ ꓕꓯ ꓕꓲꓽ ꓦꓲ ꓢꓴ ꓡꓰꓽ ꓟꓽ ꓞꓲ ꓕꓳꓽ ꓶ ꓢꓳ ꓛꓳꓽ ꓒꓯ, ꓐꓴ꓾ ꓗꓪ ꓛꓳꓽ ꓐꓴ꓾ ꓒ ꓕꓲꓺ ꓒ ꓠꓶꓽ ꓗꓪ ꓟ ꓫꓵꓽ ꓤ ꓧꓪ ꓤ ꓐꓴ ꓐꓰ ꓠꓲ, ꓠꓵ ꓢꓴ ꓔꓯ ꓠꓲ, ꓠꓵ ꓠꓬꓲ ꓐꓰ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵ ꓠ, ꓟ ꓔꓯ ꓝꓮꓲ ꓟꓲ ꓡꓰ, ꓗꓷꓳ꓿ ꓕꓱ ꓡꓱ ꓞꓳ ꓙꓳ ꓡ ꓗꓷ ꓟ ꓮ ꓟꓬ ꓘꓳꓼ ꓙꓳ ꓡ ꓗꓷ ꓡ꓿ ꓛꓲ ꓡ ꓕꓲ ꓘꓳꓼ ꓟ ꓗꓪ 30 ꓐꓲ ꓡˍ ꓥ ꓧꓶ꓾ ꓮ ꓟꓶ ꓕꓯ ꓡꓰ 30 ꓘꓳꓼ ꓙ ꓬꓰꓳ ꓐꓯˍ ꓥ ꓧꓶ ꓕꓲ ꓙꓰꓽ ꓐꓯ ꓖꓶ ꓠꓲ, ꓫꓵˍ ꓟ ꓠꓬ ꓚꓲ. ꓛꓬ ꓒꓬꓱꓼ ꓡꓰ ꓠꓲ, ꓫꓵˍ ꓟ ꓔꓯ ꓮ ꓕꓯ ꓟꓲ ꓟꓽ ꓐꓴ ꓐꓴ ꓬꓰ ꓖꓶ ꓔꓬ ꓟ ꓚꓲ. ꓛꓬ ꓖꓳ ꓓꓱꓽ ꓔꓯ ꓥˍ ꓟꓲ ꓠꓲ, ꓠꓵ ꓖꓶ꓾ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿
ꓤꓶꓻ ꓗꓪ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵ ꓐ ꓡ ꓢꓴ ꓠꓬ ꓧꓪ. ꓡꓰˍ ꓟ ꓟꓶˍ ꓡꓳ꓾
ꓕꓱ ꓗꓪ ꓐꓯ ꓠꓲ, ꓫꓵˍ ꓟ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵ ꓐꓯˍ ꓟ ꓠꓬ ꓚꓲ. ꓛꓬ ꓬꓰ ꓠꓲ, ꓫꓵˍ ꓟ ꓔꓯ ꓡꓰꓽ ꓬꓰ꓾ ꓠꓱ. ꓐꓯ ꓢꓴ ꓐꓱ ꓶ ꓕꓲ ꓔꓲ.ˍ ꓟꓲ ꓓꓵꓽ ꓙꓽ ꓖꓶ ꓟꓽ ꓛꓵꓻ꓾ ꓐꓰ ꓐꓯ ꓠꓲ, ꓫꓵˍ ꓟ ꓟꓽ ꓥ꓿ ꓕꓯꓽ ꓢꓲ ꓕꓲ ꓒꓳ,꓾ ꓢꓷ. ꓠꓲ, ꓚꓴꓽ ꓬꓲ, ꓕꓲ ꓒꓳ,꓾ ꓣꓱꓽ ꓬꓰ ꓚꓱ, ꓕꓲꓽ ꓒꓳ, ꓗꓪ ꓟꓽ ꓐ ꓡ ꓟ ꓟꓽ ꓐꓲ ꓜꓲꓼ ꓟ ꓔꓯ ꓘꓳ ꓣꓴ ꓗꓴ. ꓢꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓚꓲ. ꓛꓬ ꓚꓳꓽ ꓚꓲ. ꓛꓬ ꓝꓴꓲ. ꓓꓰˍ ꓟ ꓟꓽ ꓙꓳ ꓙꓳ ꓝ. ꓢꓲ ꓞꓳ ꓙꓳ ꓢꓯ. ꓔꓬ ꓝꓲ ꓠꓲ, ꓫꓵˍ ꓟ ꓥ ꓡꓳ꓿ ꓚꓲ. ꓛꓬ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓔꓯ ꓥˍ ꓟꓲ ꓗꓪꓼ ꓫꓵꓼ ꓢꓲ ꓠꓬꓲ꓾ ꓖꓳ ꓓꓱꓽ ꓔꓬ, ꓢꓻ ꓓꓴ ꓐꓱ ꓶ ꓬꓰ ꓙ ꓔꓳ, ꓙˍ ꓟ ꓣꓱꓽ ꓬꓰ ꓚꓱ, ꓐꓴ ꓔꓯ ꓥˍ ꓟꓲ ꓫꓬ, ꓦꓵꓻ ꓠ ꓗ, ꓡꓳ꓿
ꓖꓳ ꓡꓱ ꓠꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵˍ ꓟ ꓗꓪ ꓐꓰ ꓬꓲ ꓚꓰꓺ ꓣꓴ ꓢꓲ ꓮ ꓡꓲ ꓫꓵꓽ ꓙꓲꓻ ꓖꓴ ꓙꓳˍ ꓡ ꓐꓯˍ ꓠꓬ꓾
ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵˍ ꓟ ꓗꓪ ꓐꓰ
ꓬꓲ ꓒꓵꓽ ꓙꓳ ꓢꓲ ꓮ ꓡꓲ ꓗꓪ ꓟꓲ ꓣꓱꓽ ꓬꓯꓼ ꓢꓴ ꓕꓲ ꓣꓳ ꓒꓬꓱꓼ ꓡ ꓝꓲˍ ꓥꓳ꓾
ꓚꓲ. ꓛꓬ ꓚꓳꓽ ꓚꓲ. ꓛꓬ ꓦ ꓡꓱ ꓐꓳ ꓠꓲ, ꓪꓴꓽ ꓡˍ ꓥꓳ꓾
ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳˍ ꓟ ꓗꓪ ꓢꓻ ꓡˍ ꓥꓳ꓾
ꓠꓲ, ꓟ ꓙꓬˍ ꓟ ꓟꓽ ꓙꓳ ꓗꓷ ꓡꓰˍ ꓥꓳ꓾
ꓪ ꓜꓲ ꓗ, ꓛꓲꓽ ꓠꓲ, ꓒꓴ ꓡˍ ꓥꓳ꓾
ꓢꓰꓺ ꓢꓰꓺ ꓡꓰꓽ ꓗꓷ ꓡˍ ꓥꓳ꓾
ꓠꓱ. ꓐꓯ ꓢꓴ ꓐꓰ ꓙ ꓡꓯ ꓘꓳˍ ꓟ ꓚꓱ, ꓗꓪˍ ꓟꓲ ꓪꓴꓽ ꓡ ꓟꓴ ꓡˍ ꓥꓳ꓿
ꓬꓲ ꓞꓲꓼ 30 ꓘꓳꓼ ꓙ ꓡꓰ ꓢꓴ ꓐꓴ ꓫꓬ, ꓦꓵꓻ ꓠ ꓔˍ ꓟ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵˍ ꓟ ꓛꓳ ꓫꓱꓽ ꓚꓱ, ꓠꓬ ꓮ ꓡꓲ ꓫꓵꓽ ꓥ ꓡ꓾
ꓚꓲ. ꓛꓬ ꓣꓱꓽ ꓞ, ꓟ ꓔꓯ ꓬꓲ ꓪꓴ. ꓗꓶ ꓗꓴ. ꓠ, ꓟ ꓪꓴ. ꓔꓴˍ ꓟ ꓥ ꓡꓳ꓾
ꓚꓲ. ꓛꓬ ꓚꓳꓽ ꓚꓲ. ꓛꓬ ꓬꓲ ꓪꓴ. ꓗꓶˍ ꓟ ꓠꓬ ꓚꓲ. ꓛꓬ ꓣꓱꓽ ꓬꓰ ꓐ ꓡˍ ꓟ ꓚꓱ, ꓔꓯ ꓪꓴꓽ ꓡ ꓟꓴ ꓡ ꓝꓲˍ ꓟ ꓡꓰ ꓐꓰ ꓠꓱ. ꓐꓯ ꓢꓴ ꓔꓯ ꓥˍ ꓟꓲ ꓬꓰ ꓙ ꓔꓳ, ꓙ ꓖꓶ ꓐ ꓡˍ ꓥꓳ꓿
ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓒꓵꓽ ꓠꓲ, ꓡꓱꓻ
ꓠꓱ. ꓐꓯ ꓢꓴ ꓔꓯ ꓡꓰ. ꓠꓲ, ꓡꓱꓻ ꓖꓶ ꓠ ꓔˍ ꓕꓯ ꓠꓽ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓽ ꓮ ꓫꓵꓽ ꓑꓶ. ꓓꓴ ꓠꓲ, ꓡꓱꓻ ꓖꓶ ꓠ, ꓟ ꓟꓲ ꓡꓰ, ꓗꓷˍ ꓡ꓿ ꓞꓳ ꓤ ꓕꓲ ꓣꓳ ꓗꓪ ꓠꓱ. ꓐꓯ ꓢꓴ ꓡꓰ ꓣꓳ ꓔꓯ ꓐꓯ ꓡˍ ꓟ ꓢꓶ. ꓟꓽ ꓞꓲꓺ ꓚꓲ. ꓛꓬ ꓚꓳꓽ ꓚꓲ. ꓛꓬ ꓥꓪ ꓠꓽ ꓣꓱꓽ ꓟꓽ ꓬꓯꓼ ꓐꓰ ꓓꓵꓽ ꓙꓽ ꓪ ꓡꓰˍ ꓕꓯ ꓠꓬ ꓚꓵ ꓚꓵ ꓠꓲ, ꓟ ꓙꓬ ꓡꓰˍ ꓟ ꓥ ꓡꓳ꓿ ꓥꓪ ꓠꓽ ꓮ ꓫꓵꓽ ꓗꓪˍ ꓟꓲ ꓣꓱꓽ ꓟꓽ ꓬꓯꓼ ꓐꓭ꓾ ꓐꓰ ꓚꓲ. ꓛꓬ ꓚꓳꓽ ꓚꓲ. ꓛꓬ ꓘꓳ ꓣꓴ ꓗꓷˍ ꓕꓯ ꓚꓲ. ꓛꓬ ꓣꓱꓽ ꓬꓰ ꓐ ꓡˍ ꓟ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓦ ꓡꓱ ꓐꓳˍ ꓟ ꓒꓲꓼ ꓡꓰ ꓖꓴˍ ꓡꓳ꓿
ꓮ ꓟꓶ ꓟ ꓡꓰ ꓕꓲ ꓣꓳ ꓐꓰ ꓕꓲ ꓣꓳ ꓔꓯꓺ ꓡꓯ ꓘꓳˍ ꓟ ꓮ ꓘꓶ. ꓟꓬꓽ ꓡ ꓔꓬ ꓟ ꓦꓬꓼ ꓠꓬꓲ ꓗꓪ ꓦ ꓡꓱ ꓦ ꓐꓳ ꓠꓲ, ꓒ ꓐꓲꓸꓼ ꓐꓰ ꓞꓳ ꓙꓳ ꓢꓯ. ꓔꓬ ꓠꓲ, ꓫꓵˍ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓝꓴꓲ. ꓟꓳꓻˍ ꓟ ꓔꓯ ꓠꓽ ꓗꓷ ꓢꓲ ꓠꓲ, ꓡꓱꓻ ꓡꓱꓻ ꓡꓰꓽ ꓘꓳ ꓣꓴ ꓖꓶ꓿
ꓚꓲ. ꓛꓬ ꓬꓲ ꓙꓵ,꓾ ꓢꓯꓼ ꓪ ꓐꓰ ꓚꓲ. ꓛꓬ ꓒꓴ ꓔꓯ ꓮꓽ ꓔꓳ ꓕꓽ ꓗꓷ ꓡꓰ ꓝꓲ꓾
ꓬꓲ ꓙꓵ,꓾ ꓢꓯꓼ ꓪ꓾ ꓒꓴ ꓠꓬ ꓬꓲ ꓙꓵ, ꓬꓲ ꓬꓲ ꓝꓲ. ꓙꓳˍ ꓡꓳ꓿ ꓖꓳ ꓟ ꓑꓶ. ꓓꓴ ꓣꓳ ꓔꓯ ꓙꓳˍ ꓟ ꓬꓲ ꓙꓵ,꓾ ꓢꓯꓼ ꓪ꓾ ꓒꓴ ꓔꓯ ꓡꓯꓼ ꓕꓲꓺ ꓣꓱꓽ ꓐ ꓡ ꓠ, ꓟ ꓐꓱ ꓶ ꓬꓲ ꓙꓵ, ꓚꓲ. ꓔˍ ꓟ꓾ ꓮ ꓡꓲ ꓕꓲ ꓙꓵ, ꓕꓯ ꓮ ꓡꓲ ꓫꓵꓽ ꓔꓯ ꓧꓪ. ꓡꓰ ꓠ ꓬꓰˍ ꓥꓳ ꓐꓯˍ ꓟ ꓔꓶ ꓙꓱꓼ ꓗꓶ ꓔˍ ꓟ ꓕꓱ ꓡꓱ ꓫꓵꓽ ꓬꓰ ꓠ ꓗ, ꓡꓳ꓿ ꓒꓴ ꓔꓯ ꓥˍ ꓟꓲ ꓣꓱꓽ ꓞ, ꓖꓴ ꓗꓪ ꓡꓰꓽ ꓣꓱꓽ꓿ ꓣꓱꓽ ꓟꓽ ꓬꓯꓼ ꓟ ꓗꓪ ꓮꓽ ꓔꓳ ꓣꓱꓽ ꓒꓬ, ꓟ ꓔꓯ ꓕꓽ ꓬꓰ꓿
ꓬꓲ ꓝꓲ. ꓟꓽ ꓗꓳ. ꓬꓰ ꓕꓯ ꓡꓰꓽ ꓢꓳ ꓣꓴ ꓔˍ ꓕꓯ ꓡꓰꓽ ꓢꓻ ꓢꓻ ꓡꓳꓻ ꓡꓳꓻ ꓡꓰꓽ ꓬꓲ ꓞꓲꓼ ꓟꓳꓽ ꓐ ꓡˍ ꓥꓳ꓿
ꓬꓲ ꓝꓲ. ꓟꓽ ꓗꓳ. ꓬꓰ ꓕꓯ ꓡꓰ ꓢꓯꓼ ꓕꓵꓼ ꓔ ꓕꓯ ꓡꓰꓽ ꓢꓻ ꓢꓻ ꓡꓰꓽ ꓞꓲꓼ ꓟꓳꓽ ꓐ ꓡˍ ꓥꓳ꓿
ꓬꓲ ꓝꓲ. ꓟꓽ ꓗꓳ. ꓬꓰ ꓕꓯ ꓡꓰ ꓒꓴ ꓫꓺ ꓒꓴ ꓠ. ꓔ ꓕꓯ ꓡꓰꓽ ꓒꓴ ꓐꓱ ꓶ ꓛꓲ. ꓟꓽ ꓛꓵ ꓛꓵ ꓬꓲ ꓞꓲꓼ ꓟꓳꓽ ꓐ ꓡˍ ꓥꓳ꓿
ꓝꓮꓲ ꓠꓬ ꓮ ꓘꓶ. ꓐꓲ ꓜꓲꓼ ꓡꓰ ꓠꓲ, ꓫꓵˍ ꓟ ꓗꓪ ꓐꓰ ꓚꓲ. ꓛꓬ ꓔꓯ ꓩꓴ ꓖꓶ ꓗꓷ꓾
ꓮ ꓘꓶ. ꓐꓲ ꓜꓲꓼ ꓠꓲ, ꓫꓵˍ ꓟ ꓠꓲ, ꓟ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓔꓯ ꓝꓴꓲ. ꓟꓳꓻ ꓡꓰ ꓝꓲˍ ꓡꓳ꓿ ꓖꓳ ꓟ ꓑꓶ. ꓓꓴ ꓕꓲ ꓫꓵꓽ ꓫꓵꓽ ꓗꓪ ꓬꓰ ꓧꓪ. ꓡꓰ ꓕ ꓑꓳꓸꓼ ꓚꓲ. ꓛꓬ ꓚꓳꓽ ꓚꓲ. ꓛꓬ ꓬꓰ ꓔ ꓟ ꓟꓽ ꓐꓲ ꓜꓲꓼ ꓐꓰ ꓓꓵꓽ ꓙꓽˍ ꓟ ꓢꓶ. ꓟꓽ ꓞꓲꓺ꓾ ꓮ ꓘꓶ. ꓓꓻ ꓡꓰꓳ꓾ ꓐꓰ ꓓꓵꓽ ꓙꓽ꓿ ꓡ ꓞꓳ ꓥ ꓕ ꓑꓳꓸꓼ ꓠꓬ ꓐꓲ ꓜꓲꓼ ꓔꓬ ꓟ ꓟꓽ ꓥ ꓐꓯˍ ꓟ ꓔꓯ ꓓꓵꓽ ꓙꓽ ꓟꓶ꓿ ꓕꓲ ꓙꓰꓽ ꓙꓰꓽ ꓬꓰ ꓛꓳ. ꓡꓰ ꓕꓯ ꓥˍ ꓟꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓝꓴꓲ. ꓟꓽ ꓟꓳꓻ ꓪ ꓡꓰ ꓠ, ꓟ ꓤ ꓟꓳ ꓠ ꓔ ꓡꓳ꓿
ꓚꓲ. ꓛꓬ ꓚꓳꓽ ꓚꓲ. ꓛꓬ ꓝꓴꓲ. ꓟꓳꓻˍ ꓟ ꓔꓯ ꓡꓳ ꓩꓴ ꓗꓷ꓾
ꓝꓴꓲ. ꓙꓳˍ ꓟ ꓠꓲ, ꓟ꓾ ꓕꓲ ꓫꓵꓽ ꓫꓵꓽ ꓞ, ꓡꓳ ꓐꓰ ꓓꓵꓽ ꓙꓽ ꓟꓶˍ ꓟ ꓠꓲ, ꓟ ꓠꓬ ꓧꓪ. ꓡꓰˍ ꓟ ꓔꓯ ꓒꓬ ꓗꓷˍ ꓟ ꓥ ꓡꓳ꓿ ꓖꓳ ꓟ ꓪꓴ. ꓠꓬꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓙꓲ ꓓꓰ ꓡꓰ ꓠ ꓢꓯꓼ ꓕꓵꓼ꓿ ꓖꓳ ꓡꓱ ꓙꓲ ꓓꓰ ꓡꓰ ꓠ ꓢꓯꓼ ꓕꓵꓼ ꓗꓷ ꓥˍ ꓟꓲ ꓥꓳ ꓡꓳ. ꓔ ꓟ ꓡꓰ ꓐꓰ ꓟꓽ ꓒꓬꓱꓼ ꓡ ꓕꓯ ꓥˍ ꓟꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓝꓴꓲ. ꓟꓽ ꓓꓰꓺ ꓓꓰꓺ ꓐꓰ ꓮ ꓫꓵꓽ ꓪꓴ. ꓠꓬꓲ ꓕꓱ ꓡꓱ ꓟꓽ ꓧꓪ. ꓡꓰ ꓡ ꓐꓯˍ ꓟ ꓔꓯ ꓚꓬ, ꓠꓬꓲ ꓢꓲ ꓮ ꓡꓲ ꓕꓲ ꓚꓱ, ꓗꓪ ꓐꓰ ꓢꓯꓼ ꓕꓵꓼˍ ꓠꓬ ꓧꓪ. ꓡꓰ ꓐ ꓡˍ ꓡ ꓐꓯˍ ꓟ ꓔꓯ ꓓꓵꓽ ꓙꓽ ꓠꓬꓲ꓿
ꓖꓳ ꓓꓱꓽ ꓔꓬ, ꓢꓻ ꓠ, ꓟ ꓬꓲ ꓙꓵ, ꓖꓶ꓾
ꓠꓱ. ꓐꓯ ꓢꓴ ꓔꓯ ꓗꓪꓼ ꓫꓵꓼ ꓢꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓗꓪꓼ ꓫꓵꓼ ꓠ, ꓟ ꓕꓽ ꓟꓲ ꓡꓰ,꓿ ꓚꓲ. ꓛꓬ ꓔꓯ ꓔꓬ, ꓢꓻ ꓡꓰ ꓝꓲˍ ꓟ ꓚꓱ, ꓥ ꓟꓲ ꓖꓳ ꓓꓱꓽ ꓡꓵ ꓖꓶˍ ꓟ꓾ ꓔꓬ, ꓢꓻ ꓠ ꓜꓽ ꓓꓳꓻˍ ꓟ꓾ ꓙꓲꓽ ꓒꓶꓽ ꓐꓰ ꓬꓲꓼ ꓫꓵꓽ ꓬꓲꓼ ꓙꓰꓽ ꓜꓽ ꓓꓳˍ ꓟ ꓠꓽ ꓗꓷˍ ꓟ꓾ ꓛꓵꓼ ꓡꓵ ꓛꓵꓼˍ ꓟ ꓠꓽ ꓗꓷˍˍ ꓟ꓾ ꓕꓱ ꓡꓱ ꓫꓵꓽ ꓬꓰ ꓖꓶ꓿ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓜꓽ ꓓꓳꓻˍ ꓟ ꓗꓪ ꓬꓲ ꓒꓬꓽ ꓬꓲ ꓢꓶꓽ꓾ ꓢꓲ, ꓢꓶꓽ ꓡꓳ. ꓐꓰ ꓚꓬꓼ ꓠ ꓜꓽ ꓖꓶ꓿
ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵ ꓢꓲ ꓠꓬꓲ꓾ ꓚꓲ. ꓛꓬ ꓖꓳ ꓓꓱꓽ ꓔꓯ ꓗꓪꓼ ꓫꓵꓼ ꓖꓶˍ ꓟˍ ꓟꓲ ꓪꓴ‐ꓢ ꓠꓲ, ꓒꓴˍ ꓟ ꓕꓲ ꓫꓵꓽ ꓥ ꓡꓳ꓿
ꓮ ꓙꓵꓽ ꓢꓴ ꓚꓲ. ꓛꓬ ꓚꓳꓽ ꓚꓲ. ꓛꓬ ꓠꓲ, ꓠꓵ ꓗꓴ.ˍ ꓟ ꓞꓳ ꓤ ꓤꓶꓻ ꓠꓯꓸꓼ ꓗꓪ ꓞꓳ ꓙꓳ ꓢꓯ. ꓔꓬ ꓓꓴ ꓬꓰ ꓡꓯ꓿
