ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓘꓶꓽˍ ꓟ (Monday reflection)
ꓧꓪ. ꓧꓪ ꓠꓬꓲ. ꓠꓬꓲ 2 ꓦ ꓟ 23 ꓠꓬꓲ 2026 ꓘꓳꓼ ꓠꓽ ꓕꓲ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ 25ꓽ31‐46 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓞꓳ ꓫꓵꓽ ꓐꓴ ꓔꓯ ꓐꓯ ꓟꓴ ꓘꓶꓽˍ ꓟ ꓚꓱ, ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓡ ꓞꓳ ꓮ‐ꓐꓲ ꓠꓬ ꓟꓬꓱꓽ ꓓꓳꓽ ꓙꓳ ꓙꓳ ꓡꓰ ꓟꓴ ꓗꓪ ꓝꓲ ꓓꓴ ꓮ ꓙꓵꓽ ꓬꓲ ꓐꓰ ꓟꓲ ꓠꓯ ꓗꓪ ꓬꓯꓼ ꓡ ꓕꓯ ꓬꓲ ꓠꓬ ꓐꓱ ꓡꓱ ꓡꓱ ꓙꓵꓽ ꓠꓬꓲ. ꓕꓲ ꓗꓪ ꓠꓬꓲ. ꓠ. ꓢꓲ꓾ ꓟꓵꓽ ꓗꓳ, ꓓꓵ ꓓꓵ ꓞꓳ ꓫꓵꓽ ꓞꓳ ꓙꓰꓽ ꓮ ꓙꓵꓽ ꓔꓯ ꓬꓲ ꓟꓲ ꓙꓬ ꓗꓪ ꓘꓴꓽ ꓜꓲꓼ ꓔ ꓥꓳ꓿ ꓮ ꓣꓳ ꓡꓳ. ꓒꓽ ꓡꓰ ꓮ ꓣꓳˍ ꓐꓰ ꓮ ꓛꓵꓼ ꓔꓯ ꓐꓱꓻˍ ꓟ ꓡꓰ ꓐꓰ ꓬꓲ ꓪ ꓔꓯ ꓐꓱꓻ ꓥꓳ꓿ ꓖꓳ ꓡꓱ ꓠꓬ ꓮ ꓣꓳ ꓔꓯ ꓠꓬ ꓡꓯꓼ ꓙ ꓕꓲ ꓛꓱꓽ ꓗꓪ꓾ ꓮ ꓛꓵꓼ ꓔꓯ ꓠꓬ ꓡꓯꓼ ꓶ. ꓕꓲ ꓛꓱꓽ ꓗꓪ ꓔꓬ ꓝꓲ ꓥꓳ꓿
ꓕꓱ ꓢꓲꓽ ꓫꓬ ꓝꓲ ꓠꓬ ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓪꓴ‐ꓢ ꓔꓯ ꓣꓳ ꓙꓵꓻ ꓟ ꓣꓳ ꓙꓵꓻ ꓠꓲ, ꓠꓬ ꓠꓵꓻ ꓠꓲ, ꓣꓱ ꓢꓲ ꓠꓬꓲ ꓟꓬꓱꓽ ꓬꓰ ꓢꓯꓼ ꓕꓵꓼ ꓢꓲ ꓠꓬꓲ ꓢꓯ. ꓔꓬ ꓠ, ꓟ ꓚꓱ, ꓔꓯ ꓣꓳ ꓔꓯ ꓢꓲꓺ ꓒ ꓬꓰ‐ꓢꓴ ꓔꓯ ꓐꓯ ꓖꓶ ꓡ ꓟ ꓥ ꓡꓳ꓿
ꓪ ꓔꓲ ꓢꓲꓺ ꓒ ꓬꓰ‐ꓢꓴ ꓠꓬ ꓟꓴ ꓐꓯ ꓘꓶꓽ ꓒꓽ ꓥ ꓟ꓾ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓚꓲ. ꓛꓬ ꓪ ꓔꓲ ꓥ ꓟ ꓐꓰ ꓐꓯ ꓟꓴ ꓘꓶꓽ ꓒꓽ ꓥ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓠꓵꓻ ꓠꓲ, ꓢꓲꓺ ꓒ ꓥ ꓟ ꓡꓰ ꓟ. ꓛꓲ ꓬꓲ ꓠꓬ ꓔꓱ ꓚꓵˍ ꓟ ꓕꓲ ꓚꓱ, ꓗꓪ ꓐꓯ ꓟꓴ ꓘꓶꓽ ꓒꓽ ꓥ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓣꓳ ꓕꓲ ꓤꓶꓻ ꓡꓱꓼ ꓔꓯ ꓢꓲꓺ ꓒ ꓬꓰ‐ꓢꓴ ꓔꓯ ꓡꓯꓼ ꓙꓱ ꓔ ꓢꓲ ꓠꓬꓲ ꓣꓳ ꓞꓳ ꓙꓳ ꓢꓯ. ꓔꓬ ꓓꓴ ꓬꓰ ꓡꓯ꓿ ꓣꓳ ꓔꓯ ꓬꓲ ꓟꓶ ꓕꓲ ꓙꓵ, ꓗꓪ ꓐꓯ ꓟꓴ ꓘꓶꓽ ꓡ ꓟ ꓙꓵ, ꓕꓯ ꓠꓵꓻ ꓠꓲ, ꓔꓯ ꓡꓳ. ꓢꓲ ꓠꓬꓲ ꓣꓳ ꓔꓯ ꓐꓯ ꓟꓴ ꓘꓶꓽ ꓡ ꓓꓴ ꓥ ꓡꓳ꓿ ꓣꓳ ꓟꓲ ꓠꓯ ꓞꓳ ꓙꓳ ꓔꓬ ꓟ ꓙꓵ, ꓔꓯ ꓠꓵꓻ ꓠꓲ, ꓟꓬꓱꓽ ꓬꓰ ꓠ, ꓟ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿ ꓠꓵꓻꓠꓲ, ꓟꓬꓱꓽ ꓐꓯ ꓟ ꓔꓯ ꓫ. ꓕꓱ ꓘꓶꓽ ꓗꓪ ꓐꓰ ꓡꓰ ꓟꓽ ꓥ ꓚꓲ. ꓛꓬ ꓟꓬꓱꓽ ꓗꓪ ꓐꓰ ꓬꓰ ꓠ, ꓟ ꓣꓳ ꓚꓵˍ ꓡꓳ꓿
ꓫ. ꓓꓴ ꓟꓷꓼ ꓓꓴ ꓘꓴꓽ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓟꓳ ꓓ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓖꓶ ꓔ ꓟ ꓥ ꓡꓳ꓿ ꓟ‐ꓕꓲ 25ꓽ40 ꓝꓲ. ꓗꓪ ꓖꓳ ꓕꓯ ꓪ ꓔꓲ ꓡꓰ ꓬꓲ ꓪ ꓔꓯ ꓠꓴ ꓪ ꓔꓯ ꓥꓪ ꓔꓱ ꓔꓱ, ꓐꓯ ꓖꓶ ꓠꓬꓲ꓾ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓮ ꓫꓵꓽ ꓚꓬ, ꓟꓽ ꓒꓵꓽ ꓢꓴ ꓕꓲ ꓣꓳ ꓔꓯ ꓬꓰ ꓙ ꓟ ꓠꓬ ꓥꓪ ꓔꓯ ꓬꓰ ꓙ ꓬꓯꓼ ꓟ ꓥꓳ ꓐꓰ ꓐꓯ ꓖꓶ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓢꓴ ꓐꓴ ꓘꓴꓽ ꓗꓪ ꓡꓳ. ꓟꓳ ꓓ ꓟ ꓐꓰ ꓬꓲꓻ ꓙꓬ ꓢꓲꓼ ꓔꓬ ꓢꓴ꓾ ꓦꓰꓼ ꓞꓼ ꓐꓴ ꓘꓴꓽ ꓗꓪ꓾ ꓐꓯ ꓞꓶꓽ ꓟꓽ ꓙꓳ ꓢꓴ ꓐꓴ ꓘꓴꓽ ꓗꓪ꓾ ꓠꓻ ꓢꓴ ꓒꓬ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ꓾ ꓐꓱ ꓓꓵ ꓕꓳ, ꓦꓲꓻ ꓗꓪ ꓐꓱ ꓔꓬ ꓢꓴ ꓐꓴ ꓘꓴꓽ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓟꓳ ꓓ ꓡꓳ ꓐꓰ ꓐꓯ ꓔ ꓡꓳ꓿
ꓕꓱ ꓡꓰ ꓫꓵꓽ ꓔꓳ, ꓜꓳ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓬꓰ ꓙ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓟꓬꓱꓽ ꓔꓯ ꓬꓰ ꓔꓬ ꓟ ꓟꓲ ꓥ ꓡꓳ꓿
ꓣꓳ ꓘꓴ ꓜꓲꓼ ꓞꓳ ꓠꓯ, ꓗꓪ ꓫ. ꓓꓴ ꓟꓷꓼ ꓓꓴ ꓐꓴ ꓔꓯ ꓬꓰ ꓙ ꓟ ꓙꓳ ꓟ ꓥ ꓡꓳ꓿ ꓟꓯꓼ ꓘꓰ ꓟꓯꓼ ꓑꓬ ꓢꓴ ꓐꓴ ꓐꓰ ꓠꓻ ꓓꓴ ꓒꓬ꓾ ꓦꓰ ꓤ ꓐꓴ ꓔꓯ ꓬꓰ ꓙ ꓟ ꓥ ꓡꓳ꓿
ꓫ. ꓓꓴ ꓟꓷꓼ ꓢꓴ ꓐꓴ ꓐꓰ ꓟꓯꓼ ꓘꓰ ꓟꓯꓼ ꓑꓬ ꓢꓴ ꓐꓴ ꓔꓯ ꓬꓰ ꓟ ꓔꓯ ꓟꓬ‐ꓟ ꓗꓴꓷꓼ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓘꓶ. ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ ꓣꓳ ꓓꓲ ꓡꓰ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓐꓯ ꓔ ꓟ ꓟꓬꓱꓽ ꓔꓯ ꓬꓰ ꓟ ꓟꓬꓱꓽ ꓮ ꓘꓶ. ꓙꓲ ꓟ ꓟꓬꓱꓽ ꓥ ꓡꓳ꓿
ꓣꓳ ꓙꓵꓻ ꓠꓲ, ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓬꓲ. ꓫꓵꓼ ꓒꓬꓱꓼ ꓡ ꓟ ꓥ ꓡꓳ꓿ ꓣꓳ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓪꓽ ꓘꓴ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓝꓮꓲ ꓠꓵꓻ ꓠꓲ, ꓣꓳ ꓢꓲ ꓠꓬꓲ ꓙꓲ ꓟ ꓟꓬꓱꓽ ꓗꓪ ꓥ ꓟꓲ ꓢꓯꓼ ꓕꓵꓼ ꓠ, ꓟ ꓫ. ꓢꓴ ꓟꓷꓼ ꓓꓴ ꓐꓴ ꓐꓰ ꓣꓱ ꓬꓯꓼ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓔꓳ, ꓙ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓝꓲ ꓓꓴ ꓬ‐ꓘꓴ ꓕꓳ ꓶ 2ꓽ 2ꓽ26 ꓝꓲ. ꓗꓪ ꓖꓳ ꓓꓱ ꓠꓬ ꓦꓻ ꓐꓰ ꓗꓳ, ꓞ, ꓕꓯ ꓫꓵꓻ ꓞ, ꓟ ꓡꓰ ꓐꓰ꓾ ꓙꓵꓻ ꓠꓲ, ꓟꓲ ꓬꓰˍ ꓟ ꓟꓬꓱꓽ ꓐꓰ ꓗꓳ, ꓞ, ꓕꓯ ꓠꓽ ꓫꓵꓻ ꓞ, ꓟ ꓥ ꓡꓳ꓿
ꓣꓳ ꓚꓲ.ꓛꓬ ꓔꓯ ꓠꓻ ꓠꓬꓲ ꓠꓯ, ꓟ ꓠꓴ ꓥꓪ ꓠꓬ ꓫ. ꓓꓴ ꓟꓷꓼ ꓢꓴ ꓐꓴ ꓔꓯ ꓣꓱ ꓬꓯꓼ ꓣꓱ ꓞ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟꓽ ꓓꓴ ꓙ ꓢꓴ ꓒꓬꓱꓼ ꓔꓬ ꓡ? ꓫ. ꓓꓴ ꓟꓷꓼ ꓢꓴ ꓐꓴ ꓘꓴ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓟꓳ ꓢꓴ ꓒꓬꓱꓼ ꓔꓬ ꓡ? ꓠꓴ ꓥꓪ ꓠꓲ, ꓟ ꓘꓴꓽ ꓟ ꓫꓱ, ꓤ ꓠꓲ, ꓙꓳ ꓢꓴ ꓠꓵꓻ ꓠꓲ, ꓙꓳ ꓢꓴ ꓒꓬꓱꓽ ꓔꓬ ꓡ? ꓠ ꓠꓬꓲ ꓠꓯ, ꓟ ꓥ ꓡꓳ꓿
