ꓫꓵꓻ ꓚꓱ, ꓔꓯ ꓬꓲ ꓔꓬ ꓟ ꓡꓰ ꓘꓳ, ꓣꓴ ꓠꓬꓲ. ꓠ. ꓓꓴ ꓬꓰ ꓡꓯ꓾
ꓜ ꓚꓲ. ꓧꓪꓽ ꓚꓲ._ ꓟ ꓦꓬꓼ ꓠꓬꓲ ꓪꓴ. ꓔꓴ_ ꓟ ꓙꓵ, ꓗꓪ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓖꓳ ꓦ ꓒꓴ ꓠꓬ “ꓮ. ꓔꓳ. ꓐꓬ ꓔꓬ ꓟ ꓟꓲ ꓠꓯ ꓗꓪ ꓗꓴꓷꓼ ꓫꓵ ꓪꓴ ꓑꓶ ꓓꓴ ꓐꓬ ꓡꓰ ꓔꓬ ꓟ ꓡꓳ ꓒꓱ ꓐꓴ꓾” ꓔꓯ ꓓꓵꓽ ꓙ ꓡꓰ ꓝꓲ ꓡꓳ꓾ ꓐꓰ ꓐꓯ ꓔ ꓡꓳ꓿
ꓣꓳ‐ꓟ ꓡꓳ ꓒꓱ ꓗꓪ ꓔꓬ ꓟ ꓢꓮꓲꓠꓔ ꓢꓮꓐꓲꓠꓮ ꓪꓽ ꓘꓴ ꓦꓲꓻ ꓓꓽ ꓗꓪ ꓬꓰ_ ꓟ ꓖꓳ ꓦ ꓒꓴ ꓟꓰ ꓟ ꓠꓽ ꓢꓽ ꓠꓬꓲ ꓟꓲ‐ꓢ ꓪꓽ ꓘꓴ ꓙꓵ, ꓔꓯ ꓧꓳꓽ ꓪꓴ. ꓢꓲ ꓔꓲꓺ ꓒ ꓪ ꓔꓲ ꓠꓬ ꓠꓲ, ꓟ ꓒꓳ, ꓡꓲꓼ ꓟ꓾ ꓫꓵꓻ_ ꓟ ꓚꓱ, ꓔꓯ ꓔꓱ, ꓕ ꓬꓲꓼ ꓠꓬꓲ. ꓐꓯ ꓖꓶ ꓔ ꓡꓳ꓿
ꓪꓽ ꓘꓴ ꓦꓲꓻ ꓗꓪ ꓜꓲꓼ ꓡ ꓢꓴ ꓐꓴ ꓠꓬ ꓘꓶꓽ ꓛꓲ ꓗꓪ ꓟꓰ ꓔ ꓟ ꓖꓳ ꓦ ꓠꓬ “ꓮ. ꓔꓳ. ꓐꓬ ꓔꓬ ꓟ ꓟꓲ ꓠꓯ ꓗꓪ ꓗꓴꓷꓼ ꓫꓵ ꓪꓴ ꓑꓶ ꓓꓴ ꓐꓬ ꓡꓰ ꓔꓬ ꓟ ꓡꓳ ꓒꓱ ꓐꓴ꓾” ꓔꓯ ꓓꓵꓽ ꓙ ꓡꓰ ꓝꓲ ꓟ꓾ ꓠꓬꓲ. ꓠꓬꓲ ꓟꓲ ꓠꓯ ꓠꓬ ꓕꓱ ꓖꓳ ꓦ ꓒꓴ ꓟꓰ ꓟ ꓠꓽ ꓢꓽ ꓠꓬꓲ ꓕꓯ “ꓫꓵꓻ ꓟ ꓚꓱ, ꓔꓯ ꓘꓳ, ꓣꓴ ꓠ, ꓟ ꓐꓰ ꓫꓵꓻ ꓟ ꓚꓱ, ꓬꓲ ꓙꓱꓼ ꓔꓯ ꓣꓳ ꓠꓲ, ꓟ ꓘꓴꓽ ꓠꓯꓼ ꓗꓪ ꓗꓷ ꓔ ꓠ, ꓟ” ꓶꓽ ꓓꓰ ꓔꓬ ꓟ ꓚꓱ, ꓥ ꓡꓳ꓿
ꓖꓳ ꓦ ꓒꓴ ꓟꓰ_ ꓟ ꓠꓽ ꓢꓽ ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓑꓮꓲ (ꓰꓮꓢꓔꓰꓣ) ꓟꓽ ꓛꓲ ꓢꓰ ꓕꓯ ꓜ ꓚꓲ. ꓧꓪꓽ ꓚꓲ. ꓟ ꓐꓰ ꓪꓽ ꓘꓴ_ ꓟ ꓔꓯ ꓬꓰ_ ꓟ (40) ꓠꓬꓲ ꓜ ꓚꓲ. ꓧꓪꓽ ꓚꓲ. ꓟ ꓬꓲ. ꓪꓴ. ꓕꓲꓽ ꓠꓬꓲ ꓟ ꓥꓳ꓿
ꓕꓱ ꓬꓲ ꓙꓵ, ꓠꓬ “ꓘꓴ ꓜꓲꓼ ꓞꓳ ꓐꓱ ꓶ ꓮ ꓘꓶ. ꓛꓲ ꓢꓯꓼ ꓙꓳ ꓠ, ꓟ ꓬꓲ. ꓙꓵ, ꓥ ꓡꓳ꓾” ꓮ ꓟꓶ ꓤꓶꓻ ꓗꓪ ꓔꓱ, ꓟ ꓬꓲ. ꓜꓴꓻ ꓬꓲ ꓟꓯꓼ ꓠꓲ, ꓟ ꓙꓳ ꓠ, ꓟ ꓫ. ꓡꓰ ꓥ ꓟꓲ ꓜ ꓚꓲ. ꓧꓪꓽ ꓚꓲ. ꓟ ꓦꓬꓼ ꓠꓬꓲ ꓠꓬ “ ꓚꓲ ꓛꓬ ꓝꓴꓲ ꓔꓯ ꓓꓵ ꓙ ꓔꓱ, ꓕ ꓠ, ꓟ ꓐꓰ ꓢꓷ. ꓙ ꓟꓳ ꓙ ꓠ, ꓟ ꓘꓴ ꓜꓲꓼ ꓞꓳ ꓕꓲꓽ ꓟ꓾ ꓐꓰ ꓡ ꓞꓳ ꓮ ꓟꓬ, ꓔꓯ ꓜꓲꓼ ꓡꓰ ꓝꓲ ꓟ꓾ ꓕꓱ ꓝꓴꓲ ꓠꓬ ꓚꓲ. ꓛꓬ ꓚꓱ, ꓐꓰ ꓮ ꓟꓬ, ꓐꓱ ꓶ ꓠꓬꓲꓽ ꓫꓵꓽ ꓡꓱꓼ ꓥ ꓟ꓾ ꓝꓴꓲ ꓠꓬ “ꓣꓳ ꓠꓲ, ꓟ ꓔꓯ ꓫ. ꓙꓵ ꓟꓷꓼ ꓙꓵ ꓢꓲ ꓣꓳ ꓠꓲ, ꓟ ꓘꓴꓽ ꓠꓯꓼ ꓗꓪ ꓔꓬ ꓟ ꓚꓱ,꓾ ꓔꓲꓺ ꓒ ꓪ ꓔꓲ ꓡꓰ ꓬꓲꓼ ꓠꓬꓲ. ꓐꓯ ꓖꓶ ꓔ ꓡꓳ꓿ꓖꓳ ꓡꓱ ꓥ ꓟꓲ ꓕꓱ ꓕꓲ ꓙꓵ, ꓠꓯꓼ ꓗꓪ ꓖꓳ ꓝꓴꓲ ꓠꓬꓲꓽ ꓟ ꓡꓱꓼ ꓠꓬ “ꓶꓻ ꓡꓯꓼ ꓟꓬꓱꓽ ꓚꓱ,꓾ ꓡꓲꓽ ꓒꓰꓼ ꓚꓱ,꓾ ꓗꓴꓷꓼ ꓫꓵ ꓪꓴ ꓚꓱ, ꓐꓰ ꓘꓴ ꓜꓲꓼ ꓞꓳ ꓚꓱ, ꓕꓱ ꓡꓱ ꓬꓲ ꓢꓷ. ꓡꓰ ꓓꓴ ꓐ_ ꓟ” ꓕꓱ ꓡꓱ ꓘꓴꓽ ꓠꓯꓼ ꓗꓪ ꓥ ꓟꓲ ꓒꓬꓱꓼ ꓡꓰ ꓔꓬ ꓟ ꓥꓳ꓿
ꓜ ꓚꓲ. ꓧꓪꓽ ꓚꓲ. ꓟ ꓦꓬꓼ ꓠꓬꓲ ꓐꓯ_ ꓟ ꓠꓬ ꓠꓲ, ꓟ ꓒꓳ, ꓡꓲꓼ ꓟ ꓐꓰ ꓒꓳ, ꓡꓶ. ꓟ ꓗꓪ ꓐꓰ ꓕꓲꓽ ꓝ. ꓕꓱ ꓟ ꓮ ꓙꓵ ꓗꓪ ꓐꓰ “ꓡꓲ, ꓙꓰ ꓠ, ꓟ ꓢꓯꓼ ꓙꓳ_ ꓟ꓾ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿
ꓮ ꓟꓶ ꓤꓶꓻ ꓕꓲ ꓒꓳ, ꓟꓲ ꓠꓯ ꓕꓲ ꓒꓳ, ꓔꓯ ꓡꓰ ꓪꓴ. ꓔꓴ ꓔꓬ ꓟ ꓤꓶꓻ ꓗꓪ ꓕꓱ ꓟ ꓓꓳꓽ ꓠꓬ ꓞꓳ ꓡꓱ ꓤ ꓐꓴ ꓐꓱ ꓶ ꓮ ꓘꓶ. ꓘꓴ ꓟꓶ ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ꓿ “ꓘꓴ ꓜꓲꓼ ꓞꓳ ꓐꓰ ꓟꓲ ꓠꓯ ꓗꓪ ꓒꓬꓱꓼ ꓔꓬ ꓟ ꓕꓱ ꓥꓳꓽ ꓡꓰ ꓔꓬ ꓟ ꓚꓱ, ꓐꓱ ꓶ ꓢꓷ. ꓠ ꓔ ꓡꓳ꓾” ꓐꓯ_ ꓟ ꓚꓱ, ꓔꓯ ꓞꓳ ꓡꓱ ꓤ ꓐꓴ ꓠꓬ ꓢꓷ. ꓠ, ꓟ ꓬꓲ ꓡꓰ ꓐꓯ ꓔ ꓡꓳ꓿ ꓖꓳ ꓟ ꓑꓶ ꓓꓴ ꓙꓲ ꓢꓴ ꓢꓲ ꓤ ꓐꓴ ꓠꓬ ꓜ ꓚꓲ. ꓧꓪꓽ ꓚꓲ. ꓟ ꓦꓬꓼ ꓠꓬꓲ ꓔꓯ ꓚꓲ. ꓛꓬ ꓛꓳ_ ꓟ ꓘꓳ, ꓣꓴ_ ꓟ ꓕꓲꓽ ꓟ ꓡꓰ ꓐꓰ ꓡꓳ. ꓟꓳ ꓟ ꓡꓰ ꓟꓽ ꓞꓲ “ꓚꓲ. ꓛꓬ ꓤꓶꓻ ꓔꓯ ꓝꓮꓲ ꓫꓬ, ꓠ, ꓟ ꓔꓱ, ꓟ ꓚꓱ, ꓔꓯ” ꓧꓪ ꓔꓬ ꓟ “ꓠꓲ, ꓟ ꓙꓲ ꓢꓴ ꓐꓴ ꓠꓯꓼ ꓗꓪ ꓕꓱ ꓕꓲ ꓙꓵ, ꓔꓯ ꓢꓷ. ꓙ ꓟꓳ ꓙ ꓠ, ꓟ ꓬꓲ ꓚꓱ, ꓧꓪ ꓠ, ꓟ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
