ꓣꓳ ꓔꓬ ꓟ ꓡꓳ ꓒꓱ꓾ ꓞꓳ ꓘ, ꓗꓪ ꓢꓲ, ꓜꓲ ꓔꓶ ꓠ, ꓟ ꓚꓱ, (Environment program)
ꓧꓪ. ꓧꓪ ꓠꓬꓲ. ꓠꓬꓲ ꓝꓮꓲ ꓕꓲ ꓧꓪ, ꓟꓵꓽ ꓘꓳꓼ ꓐꓰ ꓫ. ꓕꓱ ꓚꓱ, ꓗꓪ ꓐꓰ ꓣꓳ ꓔꓬ ꓟ ꓟꓵꓽ ꓡꓳ ꓒꓱ ꓞꓳ ꓘ, ꓗꓪ ꓢꓲ, ꓜꓲ ꓔꓶ ꓠ, ꓟ ꓚꓱ, ꓔꓯ ꓐꓯ ꓟ. ꓖꓶ ꓡ ꓥꓳ꓿ ꓠꓬꓲ. ꓠꓬꓲ ꓣꓳ ꓔꓬ ꓟ ꓟꓵꓽ ꓗꓪ ꓟꓶ ꓞ ꓞ ꓝꓲ. ꓕꓯ ꓢꓲ, ꓜꓲ ꓠꓬ ꓮ ꓘꓶ. ꓛꓲ ꓣꓳ ꓐꓱ ꓶ ꓙꓲ ꓖꓴ ꓙꓳ ꓟ ꓚꓱ, ꓔꓯ ꓢꓷ. ꓟ ꓥ ꓡꓳ꓿
ꓣꓳ ꓡꓳ ꓒꓱ ꓓꓽ ꓗꓪ ꓙꓰ ꓟ ꓙꓵ, ꓕꓯ ꓞ ꓝꓲ. ꓗꓪ ꓠꓬ ꓙ ꓖꓴ ꓫꓱ, ꓟ ꓙꓵ, ꓕꓯ ꓮ ꓘꓶ. ꓞ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓙ ꓖꓴ ꓒ ꓕꓲ ꓗꓪ ꓢꓲ, ꓜꓲ ꓔꓶ ꓔ ꓟ ꓔꓲ. ꓗꓪ ꓠꓬ꓾ ꓮ ꓘꓶ. ꓛꓲ ꓟꓽ ꓞ ꓟ ꓔꓯ ꓣꓳ ꓡꓳ. ꓟꓳ ꓟ ꓥ ꓡꓳ꓿ ꓢꓲ, ꓜꓲ ꓠꓬ ꓞ ꓢꓯꓼ ꓔꓯ ꓗꓽ ꓕꓽ ꓐ ꓡ ꓟ ꓪꓴ. ꓠꓬꓲ ꓥ ꓡꓳ꓿
ꓢꓲ, ꓜꓲ ꓕꓲ ꓢꓲ, ꓠꓬ ꓛꓬꓼ ꓢꓯꓼ ꓔꓯ ꓖꓶ ꓐ ꓡ ꓟ ꓥ ꓡꓳ꓿ ꓝꓮꓲ ꓞ ꓢꓯꓼ ꓔꓯ ꓥ ꓟꓲ ꓗꓽ ꓕꓽ ꓖꓶ ꓐ ꓡ ꓟ ꓥ ꓡꓳ꓿ ꓢꓲ, ꓜꓲ ꓠꓬ ꓟꓽ ꓙꓲ ꓟ ꓬꓲ ꓢꓯꓼ ꓮ ꓙꓵꓽ ꓔꓯ ꓣꓴ ꓔꓯ ꓙꓰ ꓢꓲ ꓠꓬꓲ ꓟꓲ ꓠꓯ ꓡ ꓞꓳ ꓐꓱ ꓶ ꓮ ꓙꓵꓽ ꓙꓲ ꓟ ꓟꓲ ꓦꓲꓻ ꓢꓯꓼ ꓔꓯ ꓖꓶ ꓟ ꓥ ꓡꓳ꓿
ꓣꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓠꓬꓲ. ꓠꓬꓲ ꓣꓳ ꓮ ꓙꓵꓽ ꓢꓴ ꓐꓴ ꓢꓲ, ꓜꓲ ꓔꓯ ꓢꓯꓼ ꓕꓵꓼ ꓢꓲ ꓠꓬꓲ ꓔꓶ ꓠ, ꓟ ꓶꓻ ꓙꓳ ꓟ ꓥ ꓡꓳ꓿
ꓓꓽ ꓪꓴ. ꓠꓬꓲ ꓢꓲ, ꓜꓲ ꓔꓯ ꓣꓳ ꓔꓬ ꓟ ꓦꓲꓻ ꓒ ꓕꓲ ꓗꓪ ꓔꓶ ꓠ, ꓟ ꓢꓯꓼ ꓕꓵꓼ ꓡꓯ꓿ ꓝꓮꓲ ꓣꓳ ꓔꓬ ꓟ ꓡꓳ ꓒꓱ꓾ ꓞꓳ ꓘ, ꓙ ꓖꓴ ꓗꓪ ꓢꓲ, ꓜꓲ ꓔꓶ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓦꓲꓻ ꓗꓪ ꓢꓲ, ꓜꓲ ꓡꓳ ꓜꓲ ꓢꓲ ꓪꓰ ꓮ ꓟꓬ, ꓔꓯ ꓔꓶ ꓔ ꓠꓬ ꓣꓳ ꓐꓱ ꓶ ꓠꓲ, ꓟ ꓢꓽ ꓝꓮꓲ ꓙꓲ ꓟ ꓟꓲ ꓦꓲꓻ ꓔꓯ ꓥ ꓟꓲ ꓣꓳ ꓪ ꓡ ꓟ ꓥ ꓡꓳ꓿
ꓙꓲ ꓟ ꓟꓲ ꓦꓲꓻ ꓔꓯ ꓣꓳ ꓢꓯꓼ ꓦꓻ ꓪ ꓠꓬ ꓣꓳ ꓖꓳ ꓓꓱ ꓠꓻ ꓒꓬ ꓓꓴ ꓟꓽ ꓙꓳ ꓡ ꓟ ꓥ ꓡꓳ꓿
ꓠꓬꓲ. ꓫꓵꓽ ꓠꓬ ꓣꓳ ꓔꓬ ꓟ ꓡꓳ ꓒꓱ ꓞꓳ ꓘ, ꓗꓪ ꓞꓳ ꓪꓴꓽ ꓟꓴ ꓖꓪ ꓙꓱ ꓡꓯꓽ ꓘꓳ ꓢꓲ ꓠꓬꓲ ꓙ ꓖꓴ ꓒ ꓕꓲ ꓗꓪ ꓢꓲ, ꓜꓲ ꓔꓶ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓝꓮꓲ ꓢꓲ, ꓜꓲ ꓔꓶ ꓠ, ꓟ ꓢꓷ. ꓠꓲ, ꓚꓴ ꓬꓲ ꓥ ꓟꓲ ꓖꓶ ꓠ, ꓟ ꓣꓳ ꓚꓵˍ ꓡꓳ꓿
ꓢꓽ ꓫꓵꓽ ꓠꓬ ꓢꓲ, ꓜꓲ ꓔꓯ ꓘꓶ ꓗꓷ ꓟ ꓟꓽ ꓬꓰ ꓢꓲ, ꓜꓲ ꓔꓯ ꓗꓽ ꓕꓽ ꓖꓶ ꓠ, ꓟ ꓬꓰ ꓠꓯ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
ꓟꓲ ꓠꓯ ꓢꓷ. ꓠꓲ, ꓙꓳ ꓢꓴ ꓐꓴ ꓡꓰ ꓐꓯ ꓔ ꓟ ꓠꓬ ꓢꓲ, ꓜꓲ ꓕꓲ ꓜꓲ ꓠꓬ ꓡꓳ ꓒꓱ ꓞꓳ ꓘ, ꓗꓪ ꓞꓼ ꓢꓯꓼ ꓔꓯ (2) ꓓꓰꓖꓣꓰꓰ (8) ꓗꓪ ꓛꓲ ꓬꓲ ꓢꓯꓼ ꓧꓳꓽ ꓡꓰ ꓝꓲ ꓟ ꓟꓽ ꓞ ꓗꓷ ꓡꓰ ꓐ ꓟ ꓢꓯꓼ ꓙꓳ ꓡꓳ ꓐꓰ ꓐꓯ ꓔ ꓡꓳ꓿
ꓕꓱ ꓟ ꓠꓬ ꓣꓳ ꓦꓲꓻ ꓗꓪ ꓮꓲꓣꓚꓳꓠ ꓣꓱ ꓟ ꓕꓯ ꓢꓲ ꓛꓬꓽ ꓢꓯꓼ ꓖꓶ ꓐ ꓡ ꓟ ꓥ ꓡꓳ꓿ ꓮꓲꓣꓚꓳꓠ ꓣꓱ ꓠꓬ ꓮ ꓔꓳ. ꓒꓵꓽ ꓥ ꓟꓲ ꓮ ꓘꓶ. ꓛꓲ ꓖꓴ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓦꓲꓻ ꓗꓪ ꓢꓲ, ꓜꓲ ꓔꓶ ꓓꓴ ꓬꓰ ꓡꓯ꓿
ꓠꓬꓲ. ꓠꓬꓲ ꓗꓪ ꓐꓰ ꓣꓳ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓢꓲ ꓠꓬꓲ ꓢꓲ, ꓜꓲ ꓔꓶ ꓓꓴ ꓬꓰ ꓡꓯ꓿ ꓢꓲ, ꓜꓲ ꓕꓲ ꓜꓲ ꓣꓳ ꓔꓲ ꓖꓶ ꓗꓷ ꓠꓬ ꓡꓳ ꓒꓱ ꓗꓪ ꓟꓶ ꓞ ꓞ ꓮ ꓘꓶ. ꓟꓽ ꓞ ꓡ ꓓꓴ ꓥꓳ꓿ ꓣꓳ ꓤ ꓠꓱ ꓐꓴ ꓐꓱ ꓶ ꓗ, ꓛꓲ ꓟꓵꓽ ꓘꓳꓼ ꓔꓯ ꓣꓳ ꓖꓶ ꓐ ꓡ ꓢꓴ ꓒꓬꓱꓼ ꓠ, ꓟ ꓢꓯꓼ ꓕꓵꓼ ꓡꓯ꓿
ꓗ, ꓛꓲ ꓟ ꓡꓳ ꓒꓱ ꓞꓳ ꓘ, ꓒꓬꓱꓼ ꓡ ꓠ, ꓟ ꓝꓮꓲ ꓙꓲ ꓟ ꓟꓵꓽ ꓘꓳꓼ ꓦꓬꓼ ꓠꓬꓲ ꓔꓯ ꓣꓳ ꓖꓶ ꓐ ꓡ ꓢꓴ ꓒꓬꓱꓼ ꓡ ꓠ, ꓟ ꓢꓲ, ꓜꓲ ꓔꓯ ꓔꓶ ꓓꓴ ꓬꓰ ꓡꓯ꓿ ꓞꓳ ꓡꓱ ꓞꓳ ꓡꓯ ꓐꓴ ꓥ ꓟꓲ ꓢꓲ, ꓜꓲ ꓔꓶ ꓟ ꓗꓪ ꓮ ꓘꓶ. ꓛꓲ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓫ ꓟꓳ. ꓟꓳ ꓪ꓿
