ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓐꓯˍ ꓟ ꓠꓬ ꓕꓱ ꓡꓱ ꓐꓰ ꓙꓳˍ ꓡꓳ꓿ ꓮ ꓫꓵꓽ ꓟꓬꓱꓽ ꓬꓰ ꓫꓵˍ ꓬꓰ꓾ ꓮ ꓡꓲ ꓗꓪ ꓙꓰ ꓫꓵˍ ꓙꓰ꓾ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓐꓯˍ ꓟ ꓠꓬ ꓣꓳ ꓟꓲ ꓠꓯ ꓗꓪ ꓕꓱ ꓡꓱ ꓐꓰ ꓙꓳˍ ꓡꓳ꓿ ꓙꓲˍ ꓟ ꓕꓲ ꓛꓱꓽ ꓗꓪ ꓬꓰ ꓠ, ꓟ ꓐꓱ ꓶ꓾ ꓧ. ꓟ ꓬꓰ ꓠ, ꓟ ꓐꓱ ꓶ ꓕꓲ ꓫꓵꓽ ꓫꓵꓽ ꓒꓵꓽˍ ꓟ ꓟꓶ ꓠ, ꓟ ꓐꓱ ꓶ ꓠꓬ ꓮ ꓡꓲ ꓘꓶ ꓢꓯꓼ ꓕꓵꓼˍ ꓥ ꓟꓲ ꓣꓳ ꓟꓶ ꓪˍ ꓟ ꓖꓳ ꓕꓲ ꓟ ꓠꓬꓲꓽ ꓗꓴ. ꓚꓸꓼ ꓗꓪ ꓠꓬ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓮ ꓟꓬ, ꓔꓳ, ꓜꓳꓽˍ ꓡꓳ꓿

ꓟꓬꓽ ꓠꓬꓲ ꓙꓲˍ ꓟ ꓬꓰˍ ꓟ ꓗꓪ ꓠꓬ ꓕꓱ ꓡꓱ ꓫꓵꓽ ꓤ, ꓠꓬꓲ ꓓꓴ꓾ ꓫꓵꓽ ꓠꓬꓲ ꓓꓴ꓾ ꓘꓶꓽ ꓡꓶꓽ ꓗꓽ ꓡꓽ ꓓꓴ ꓮ ꓕꓯ ꓟꓲ ꓔꓳ, ꓜꓳꓽ ꓟꓶˍ ꓡꓳ꓿ ꓕꓱ ꓟ ꓠꓬ ꓬꓲ ꓡꓲꓽ ꓕꓲ ꓟ ꓥ ꓡꓳ꓿ ꓢ. ꓠꓯ ꓠꓬ ꓜ ꓚꓲ. ꓧꓪꓽ ꓚꓲ.ˍ ꓟ ꓦꓬꓼ ꓠꓬꓲ ꓬꓲ ꓪꓴ. ꓕꓲ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ꓿ ꓟ. ꓟꓲꓽ ꓬꓲ ꓪꓴ. ꓕꓲ ꓔꓳ, ꓗꓪ ꓠꓬ ꓮ‐ꓓꓯ ꓐꓰ ꓰ‐ꓪ ꓪꓴ‐ꓢ ꓟꓲꓽ ꓙꓬ ꓗꓪ ꓛꓬ ꓡꓰˍ ꓟ ꓚꓱ, ꓔꓯ ꓣꓳ ꓠ ꓠ, ꓓꓴ ꓥ ꓡꓳ꓿

ꓶꓼ ꓓꓳꓽ ꓫꓱ, ꓓꓳꓽ ꓗꓪ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓲꓽ ꓪ ꓔꓲ. ꓡꓰ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓚꓱ, ꓔꓯ ꓣꓳ ꓠ ꓠ, ꓓꓴ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓡꓲ ꓛꓲ ꓟꓲ ꓗꓪ ꓙꓰ ꓢꓲ ꓠꓬꓲ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓔꓯ ꓧꓪ. ꓡꓰˍ ꓟ ꓚꓱ, ꓔꓯ ꓣꓳ ꓡꓳ. ꓟꓳˍ ꓡꓳ꓿ ꓣꓳ ꓒꓵꓽ ꓒ ꓥ ꓟ ꓮ‐ꓓꓯ ꓐꓰ ꓰ‐ꓪ ꓠꓬ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓔꓯ ꓧꓪ. ꓟꓽ ꓘꓴ꓿ ꓢꓲ ꓒ ꓬꓰ‐ꓢꓴ ꓠꓬ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓔꓯ ꓧꓪ. ꓡꓰˍ ꓡꓳ꓿ ꓖꓳ ꓡꓱ ꓠꓬꓲ ꓦ‐ꓐꓱ‐ꓣꓴ ꓕꓳꓽ ꓶ ꓗꓪ ꓐꓳ ꓔ ꓟ ꓠꓬ ꓝꓳꓼ ꓡꓰˍ ꓡꓳ꓿ “ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓰ ꓕꓲ ꓡꓰ, ꓫ. ꓙꓵ ꓟꓷꓼ ꓙꓵ ꓓꓴ꓾ ꓘꓶꓽ ꓡꓶꓽ ꓗꓽ ꓡꓽ ꓓꓴ ꓔꓳ, ꓜꓳꓽ ꓥˍ ꓟꓲ ꓝꓴꓲ. ꓠꓬ ꓟꓽ ꓬꓰ”꓾ ꓐꓯˍ ꓟ ꓚꓵ ꓚꓵ ꓔꓱ, ꓜꓳꓽˍ ꓟ ꓥ ꓡꓳ꓿

ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓤ, ꓠꓬꓲ ꓫꓵꓽ ꓠꓬꓲˍ ꓟ ꓐꓯ ꓟ ꓠꓬ ꓮ ꓡꓲ ꓫꓵꓽ ꓔꓯ ꓥˍ ꓟꓲ꓾ ꓮꓽ ꓟ ꓔꓯ ꓥˍ ꓟꓲ ꓙꓳˍ ꓟ ꓥ ꓡꓳ꓿ ꓟ. ꓒ ꓬꓰ ꓢꓴ ꓔꓯ ꓥˍ ꓟꓲ ꓙꓳˍ ꓡꓳ꓿ ꓘꓴ ꓜꓲꓼ ꓞꓳ ꓢꓲ ꓤ ꓣꓱꓽ ꓢꓴ ꓔꓯ ꓥˍ ꓟꓲ ꓙꓳˍ ꓡꓳ꓿ ꓔꓲꓺ ꓒ ꓣꓱꓽ ꓢꓴ ꓔꓲꓺ ꓟ ꓣꓱꓽ ꓢꓴ ꓔꓲꓺ ꓒ ꓪ ꓔꓲ. ꓣꓱꓽ ꓢꓴ ꓔꓯ ꓥˍ ꓟꓲ ꓙꓳˍ ꓡꓳ꓿ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓐꓯˍ ꓟ ꓠꓬ ꓪꓴꓽ ꓪꓴꓽ ꓣꓳ ꓣꓳ ꓞꓳ ꓟꓳꓽ ꓞꓳ ꓡꓯ. ꓮ ꓙꓵꓽ ꓔꓯ ꓤ, ꓠꓬꓲ ꓓꓴ ꓐꓯˍ ꓟ ꓙꓳˍ ꓟ ꓥ ꓡꓳ꓿ ꓤ, ꓠꓬꓲ ꓓꓴ ꓕꓱ ꓟ ꓮ ꓫꓵꓽ ꓑꓶ. ꓓꓴ ꓕꓱ ꓡꓱ ꓙꓳˍ ꓡ ꓐꓯˍ ꓠꓬ ꓣꓳ ꓪꓴ‐ꓢ ꓔꓯ ꓠꓵˍ ꓡ ꓟꓽ ꓠꓵ ꓡ꓾ ꓣꓳꓽ ꓪꓴ‐ꓢ ꓔꓯ ꓮ ꓙꓵꓽ ꓟ ꓕꓯꓽ ꓢꓲ ꓠꓲ, ꓠꓵˍ ꓡ ꓐꓰ ꓐꓯˍ ꓟ ꓟꓳ. ꓖꓶ ꓓꓴ ꓬꓲ ꓔꓶ. ꓕꓲ ꓟ ꓥ ꓡꓳ꓾ ꓐꓰ ꓣꓳ ꓚꓬ, ꓠ ꓗ, ꓡꓳ꓿

ꓮ ꓫꓵꓽ ꓑꓶ. ꓓꓴ ꓥˍ ꓐꓯ ꓠꓬ꓾ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓗꓪ ꓠꓬ ꓣꓳ ꓔꓯ ꓪꓴ‐ꓢ ꓡꓰ ꓖꓶꓽ ꓙ ꓟꓳˍ ꓠꓬ꓾ ꓥ ꓠꓬ ꓪꓴ‐ꓢ ꓡꓰ ꓣꓳ ꓔꓯ ꓙꓰ ꓝꓲˍ ꓟ ꓚꓱ, ꓗꓪ ꓐꓰ ꓧꓶ. ꓧꓶ. ꓫꓵ ꓬꓰ ꓠ, ꓗꓷ ꓟ ꓐꓱ ꓶ ꓤ, ꓠꓬꓲˍ ꓟ ꓚꓱ, ꓥ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓮ ꓡꓲ ꓫꓵꓽ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓔꓯ ꓥˍ ꓟꓲ ꓡꓳ ꓒꓰ, ꓢꓲ ꓠꓬꓲ ꓟꓽ ꓠ ꓠ, ꓢꓲ ꓪꓴ‐ꓢ ꓚꓱ, ꓔꓯ ꓡꓰꓽ ꓛꓳ ꓫꓱꓽˍ ꓡꓳ꓾ ꓐꓯˍ ꓟ ꓟꓳ. ꓖꓶ ꓓꓴ ꓬꓲ ꓔꓶ. ꓕꓲ ꓟˍ ꓟꓲ ꓥ ꓡꓳ꓿

ꓖꓳ ꓡꓱ ꓠꓬꓲ ꓤ, ꓠꓬꓲ ꓫꓵꓽ ꓠꓬꓲˍ ꓐꓯ ꓟ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓟ ꓚꓱ, ꓔꓯ ꓧꓶ. ꓙꓰ ꓝꓲ ꓠ, ꓟ ꓐꓱ ꓶ ꓠꓲꓽ ꓢ‐ꓓꓯ ꓡꓰ ꓤ, ꓠꓬꓲˍ ꓟ ꓥ ꓡꓳ꓿ ꓠꓲꓽ ꓢ‐ꓓꓯ ꓠꓬ ꓮ ꓡꓲ ꓐꓰ ꓤ, ꓠꓬꓲˍ ꓡ ꓐꓰ ꓐꓯˍ ꓕꓯ꓾ ꓢꓲ ꓒ ꓬꓰ‐ꓢꓴ ꓬꓲ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓢ ꓟ ꓔꓳ, ꓜꓳꓽˍ ꓟ ꓔꓯ ꓡꓳ. ꓠꓬꓲ ꓢꓲ ꓣꓳ ꓡꓳ. ꓟꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓜ ꓚꓲ. ꓧꓪꓽ ꓚꓲ. ꓢꓲ ꓠꓬꓲ ꓜ ꓮ ꓘꓶ. ꓦꓰꓼ ꓟꓷꓼˍ ꓕꓯ ꓠꓲꓽ ꓢ‐ꓓꓯ ꓡꓰ ꓬꓲ ꓔꓯ ꓜꓽ ꓓꓴ ꓗꓪ ꓐꓰ ꓤ, ꓠꓬꓲˍ ꓡꓳ꓿