ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬ. ꓠꓬꓲ ꓠꓬ ꓡꓰꓠꓔ ꓐꓰ ꓐꓯ_ ꓟ ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓓꓵꓽ ꓙꓰꓳ꓾ ꓠꓽ ꓢ ꓠꓬꓲ ꓓꓽ ꓟ ꓥ ꓡꓳ꓾ ꓠꓬꓲ. ꓠꓬꓲ ꓠꓬ ꓜ ꓚꓲ. ꓧꓪ ꓚꓲ. ꓠ ꓔ ꓡꓳ꓿
ꓖꓳ ꓟ ꓡꓰ ꓐꓰ ꓣꓳ ꓮ ꓙꓵ ꓢꓴ ꓠꓬ ꓘꓶꓽ ꓛꓲ ꓗꓪ ꓖꓳ ꓦ ꓒꓴ ꓟꓰ_ ꓟ ꓠꓬꓲ ꓕꓲ ꓠꓬꓲ ꓟꓲ ꓥ ꓡꓳ꓾ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓠꓬ ꓘꓶꓽ ꓛꓲ ꓗꓪ ꓖꓳ ꓦ ꓒꓴ ꓟꓰ_ ꓟ ꓠꓬ ꓮ ꓫꓵ ꓬꓲ ꓢꓷ ꓥ ꓡ꓾ ꓖꓳ ꓦ ꓒꓴ ꓕꓱ ꓟ ꓠꓬ ꓮ ꓫꓵ ꓬꓲ ꓬꓲ ꓢꓷ ꓙꓳ_ ꓡ꓾ ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓠꓱ ꓬꓴ‐ꓓ ꓡ ꓞꓳ ꓐꓴ ꓠꓬ ꓮ ꓡꓰ ꓐꓰ ꓛꓬ, ꓔ ꓡ꓾ꓐꓯ_ ꓟ ꓔꓯ ꓣꓳ ꓘꓶꓽ ꓫꓵꓼ ꓡꓵ ꓗꓪ ꓡꓳ. ꓠꓬꓲ ꓠꓬ ꓢꓷ. ꓓ_ ꓡꓳ꓿ ꓬꓲ. ꓪꓴ. ꓕꓲꓽ ꓟ ꓟ ꓠꓬ ꓣꓳ ꓡꓳ. ꓠꓬꓲ ꓠ ꓔ ꓟ ꓠꓬ ꓬꓲ ꓚꓰ ꓬꓲ ꓪꓴ. ꓕꓳ ꓶ 3ꓽ 19 ꓥ ꓡꓳ꓾ ꓮ‐ꓓꓯ ꓐꓰ ꓰ‐ꓪ ꓝꓴꓲ ꓬꓰ ꓗꓷ ꓗ. ꓠꓯ. ꓪꓴ‐ꓢ ꓠꓬ ꓠꓴ ꓠꓬ ꓟꓲ ꓠꓯ ꓥ ꓠꓬꓲ ꓟꓲ ꓠꓯ ꓗꓪ ꓝꓮꓲ ꓬꓲꓼ ꓙꓰ ꓪ ꓥꓳ꓾ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓠꓬꓲ ꓟꓲ ꓠꓯ ꓐꓰ ꓐꓯ_ ꓟ ꓠꓬ ꓖꓳ ꓦ ꓒꓴ ꓐꓰ ꓕꓲ ꓡꓲ, ꓥꓳ꓾ꓠꓱ. ꓦꓱ ꓕꓱ ꓟ ꓠꓬ ꓟꓲ ꓠꓯ ꓥ ꓡꓳ꓿ ꓟꓲ ꓯ ꓕꓱ ꓟ ꓠꓬ ꓖꓳ ꓦ ꓒꓴ ꓥ ꓡꓳ꓿ ꓖꓳ ꓡꓱ ꓠꓬꓲ ꓖꓳ ꓦ ꓒꓴ ꓕꓱ ꓟ ꓟꓰ_ ꓟ ꓠꓬ ꓣꓳ ꓠꓬ ꓫꓵꓻ ꓫꓵ ꓥ ꓡꓳ꓾ ꓐꓰ ꓐꓯ_ ꓟ ꓬꓲ ꓚꓱ, ꓥ ꓡꓳ꓿ ꓮ ꓡꓰ ꓫꓵ ꓫꓵꓻ ꓫꓵ ꓥ ꓡ꓾ꓞꓳ ꓤ ꓥ ꓔ ꓑꓳ. ꓠꓬ ꓫꓵꓻ ꓥꓳ꓿
ꓖꓳ ꓡꓱ ꓠꓬꓲ ꓖꓳ ꓦ ꓒꓴ ꓠꓬ ꓣꓳ ꓮ ꓙꓵ ꓠꓬ ꓫꓵꓻ ꓡꓳ꓾ ꓐꓯ_ ꓟ ꓥ ꓡꓳ꓿ ꓬꓳ‐ꓐꓲ ꓕꓳ ꓶ 42ꓽ 6 ꓗꓪ ꓥꓪ ꓠꓬ ꓠꓲ, ꓟ ꓫ ꓠꓬꓲ ꓖꓳ ꓦ ꓒꓴ ꓘꓴ ꓠꓯꓼ ꓗꓪ ꓠꓲ, ꓟ ꓡꓶ. ꓔꓬ ꓡꓳ꓾ ꓐꓰ ꓐꓯ ꓔ ꓡꓳ꓿ ꓬꓲ ꓠꓬ ꓬꓲ ꓬꓰ ꓗꓷ ꓟ ꓝꓴꓲ ꓐꓱ ꓶ ꓠꓲ, ꓟ ꓫ. ꓟ ꓑꓶ ꓓꓴ ꓖꓳ ꓦ ꓒꓴ ꓙꓳ_ ꓟ ꓮ. ꓔꓳ. ꓑꓲꓼ ꓬꓲ ꓘꓶꓽ ꓗꓪ ꓬꓲꓼ ꓔ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓓꓵꓽ ꓙ ꓒꓳ, ꓬꓲꓼ ꓡ ꓟ ꓬꓲ ꓚꓱ, ꓕꓲ ꓚꓱ, ꓥ ꓡꓳ꓿ ꓝꓴꓲ ꓬꓰ ꓗꓷ ꓗ ꓠꓯ. ꓝꓮꓲ ꓕꓲ ꓧꓪ, ꓓꓵꓽ ꓙ ꓒꓳ, ꓬꓲꓼ ꓙꓰ_ ꓟ ꓠꓲ, ꓟ ꓡꓶ. ꓟ ꓬꓲ. ꓚꓱ, ꓕꓲ ꓚꓱ, ꓥ ꓡꓳ꓿
ꓓ‐ꓠꓲ‐ꓡꓲ ꓕꓳ ꓶ ꓗꓪ ꓣꓳ ꓡꓳ. ꓠꓬꓲ ꓕꓯ ꓣꓳ ꓠꓬ ꓜ ꓚꓲ. ꓧꓪꓽ ꓚꓲ. ꓢꓲ ꓠꓬꓲ ꓬꓲ ꓖꓳ ꓓꓱ ꓔꓯ ꓖꓳ ꓦ ꓒꓴ ꓟꓰ ꓢꓲ ꓪꓽ ꓘꓴ_ ꓡꓳ꓾ꓮ ꓫꓵ ꓑꓶ ꓓꓴ ꓪꓽ ꓘꓴ ꓡ ꓐꓯ ꓠꓬ ꓬꓲ ꓞꓳ ꓤ ꓐꓱ ꓶ ꓬꓲ ꓪꓽ ꓘꓴ_ ꓡꓳ꓿ ꓬꓲ ꓛꓳ ꓒꓯ, ꓐꓱ ꓶ ꓪꓽ ꓘꓴ ꓡꓳ꓾ꓖꓳ ꓡꓱ ꓠꓬꓲ ꓖꓳ ꓦ ꓒꓴ ꓕꓱ ꓟ ꓠꓬ ꓠꓱ. ꓐꓯꓼ ꓢꓴ ꓐꓱ ꓶ ꓪꓽ ꓘꓴ_ ꓟ ꓚꓱ, ꓐꓯ ꓥ ꓟꓲ ꓙꓳ_ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓗ‐ꓕꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓠꓬꓲ. ꓠꓬꓲ ꓠꓬ ꓘꓶꓽ ꓛꓲ ꓗꓪ ꓖꓳ ꓦ ꓒꓴ ꓟꓰ ꓢꓲ ꓠꓬꓲ ꓬꓰ_ ꓟ ꓬꓲ ꓬꓲ ꓢꓷ ꓬꓲ. ꓪꓴ. ꓕꓲꓽ ꓟ ꓟ ꓠꓬ ꓪꓴ‐ꓢ ꓠꓬ ꓮ‐ꓓꓯ ꓐꓰ ꓰ‐ꓪ ꓔꓯ ꓐꓯ ꓖꓶ_ ꓟ ꓡꓰ ꓐꓰ ꓣꓳ ꓠꓬ ꓟꓲ ꓠꓯ ꓗꓪ ꓐꓰ ꓡ_ ꓟ꓾ꓟꓲ ꓠꓯ ꓒꓬꓱꓼ ꓙꓰ_ ꓥꓳ꓾ ꓠꓱ. ꓦꓱ ꓗꓪ ꓐꓰ ꓡ ꓟ ꓠꓱ. ꓦꓱ ꓒꓬꓱꓼ ꓙꓰ_ ꓥꓳ꓿ ꓐꓯ_ ꓟ ꓔꓯ ꓣꓳ ꓣꓷꓠ. ꓔꓬ ꓟ ꓥ ꓡꓳ꓿ ꓠꓬꓲꓽ ꓫꓵ ꓕꓲ ꓫꓵ ꓟ ꓠꓬ ꓣꓳ ꓠꓬ ꓬꓳ‐ꓐꓲ ꓡꓰ ꓐꓰ ꓠꓲ, ꓟ ꓡꓶ. ꓟ꓾ ꓝꓴꓲ ꓬꓰ ꓗꓷ ꓟ ꓑꓶ ꓓꓴ ꓓꓵꓽ ꓙ ꓒꓳ, ꓬꓲꓼ ꓙꓰ_ ꓟ꓾ ꓠꓲ, ꓟ ꓥꓴ_ ꓟ꓾ ꓪꓴ‐ꓢ ꓠꓯꓼ ꓗꓪ ꓬꓲꓼ ꓙꓰ ꓟ ꓬꓲ ꓚꓱ, ꓕꓲ ꓚꓱ, ꓣꓳ ꓥ ꓟꓲ ꓬꓰ ꓔꓬ ꓡꓳ꓿ ꓣꓳ ꓜ ꓚꓲ. ꓧꓪꓽ ꓚꓲ. ꓟ ꓦꓬꓼ ꓠꓬꓲ ꓗꓪ ꓮ ꓘꓶ. ꓛꓳ ꓠ ꓔ ꓟ ꓬꓰ ꓠ ꓔ ꓟ ꓢ ꓫꓵ ꓙꓳ_ ꓡꓳ꓾ ꓬꓲ ꓪꓴ. ꓕꓲ ꓟ ꓟ ꓠꓬ ꓪꓽ ꓘꓴ_ ꓟ꓾ꓠꓬꓲ ꓫꓵ ꓟ ꓠꓬ ꓜ ꓚꓲ. ꓧꓪꓽ ꓚꓲ. ꓟ ꓥ ꓡꓳ꓾ ꓢ ꓫꓵ ꓟ ꓠꓬ ꓮꓡꓴ ꓗꓶ_ ꓟ꓾ ꓥ ꓡꓳ꓿
