ꓜ ꓚꓲ. ꓧꓪꓽ ꓚꓲ. ꓦꓬꓼ ꓠꓬꓲ ꓐꓱ ꓶ ꓔꓲꓺ ꓒ ꓪ ꓔꓲ ꓐꓯ ꓘꓶꓽ

ꓠꓲ, ꓠꓵ_ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾

ꓜ ꓚꓲ. ꓚꓲ. ꓦꓬꓼ ꓠꓬꓲ ꓐꓯ_ ꓟ ꓠꓬ ꓟ, ꓟ ꓕꓲꓽ ꓣꓳ ꓡꓰ ꓐꓰ ꓠꓬꓲ ꓙ ꓡꓳ. ꓙ ꓟ ꓘꓴ ꓜꓲꓼ ꓞꓳ ꓧꓳꓽ ꓟꓳ. ꓖꓶ_ ꓟ ꓗꓪ ꓐꓰ ꓣꓳ ꓠꓬ ꓙꓵꓻ ꓠꓲ, ꓔꓯ ꓝꓮꓲ ꓬꓲ. ꓫꓵꓼ ꓫꓬ, ꓔꓱ, ꓠ, ꓟ ꓐꓰ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓠꓯꓼ ꓗꓪ ꓣꓳ ꓓꓵꓽ ꓙ ꓫ. ꓓꓴ꓾ ꓓꓵꓽ ꓙ ꓟꓬ ꓓꓴ ꓘꓴꓽ ꓠꓯꓼ ꓗꓪ ꓐꓰ ꓡꓲ, ꓙꓰ ꓠ, ꓟ ꓐꓰ ꓪꓴ‐ꓢ ꓬꓲ . ꓠꓯ. ꓟ ꓔꓯ ꓣꓳ ꓤꓶꓻ ꓠꓯꓼ ꓗꓪ ꓝꓮꓲ ꓘꓴꓽ ꓡ ꓠ, ꓟ ꓘꓴꓽ ꓔ ꓟ ꓬꓲ. ꓙꓵ, ꓥ ꓡꓳ꓿

ꓠꓲ, ꓟ ꓒꓳ, ꓡꓶ. ꓟ ꓠꓯꓼ ꓗꓪ ꓪꓴ. ꓔꓴ_ ꓟ ꓚꓱ, ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓚꓲ ꓛꓬ ꓠꓲ, ꓟ ꓠꓯꓼ ꓗꓪ ꓘꓳ, ꓣꓴ ꓢꓲ꓾ ꓪꓴ‐ꓢ ꓐꓯ ꓘꓶꓽ ꓔꓯ ꓙꓽ ꓣꓳ_ ꓟ ꓦ ꓐꓰ ꓘꓳ, ꓣꓴ ꓟ ꓗꓪ ꓐꓰ ꓪꓴ. ꓔꓴ_ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓠꓬ ꓘꓳ, ꓣꓴ ꓟ ꓐꓰ ꓕꓱ ꓡꓱ ꓘꓳ, ꓣꓴ ꓟ ꓑꓶ ꓓꓴ ꓒꓬꓱꓼ ꓡ ꓟ ꓒꓳ, ꓡꓶ. ꓟ ꓠꓯꓼ ꓗꓪ ꓙꓻ ꓡꓯ ꓘꓳ_ ꓟ ꓕꓲꓽ ꓟ ꓥ ꓡꓳ꓿

ꓖꓳ ꓟ ꓑꓶ ꓓꓴ ꓜ ꓚꓲ. ꓚꓲ. ꓟ ꓦꓬꓼ ꓠꓬꓲ ꓠꓬ ꓪꓴ‐ꓢ ꓢꓯꓼ ꓔꓯ ꓠ ꓠ, ꓠ, ꓟ ꓐꓰ ꓬꓰ‐ꓢꓴ ꓠꓯꓼ ꓗꓪ ꓛꓳ ꓫꓱꓽ ꓠ, ꓟ ꓣꓳ ꓝꓮꓲ ꓒꓳ, ꓡꓲꓼ ꓠ, ꓟ ꓬꓲ. ꓚꓱ, ꓕꓲꓽ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓫ. ꓙꓵ ꓟꓶꓼ ꓙꓵ ꓟ꓾ ꓫꓵꓻ ꓙ ꓟ ꓐꓰ ꓝꓮꓲ ꓢꓯ. ꓬꓲꓼ ꓡ ꓟ ꓬꓲ. ꓠꓯ. ꓟ ꓔꓯ ꓐꓲ ꓜꓲꓼ ꓟ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓙꓰ_ ꓟ ꓚꓱ, ꓗꓪ ꓢꓲ ꓒꓽ ꓐꓰ ꓕꓲ ꓪ ꓛꓳ ꓫꓱꓽ ꓓꓴ ꓬꓰ ꓡꓯ꓿

ꓕꓱ ꓕꓲ ꓘꓳꓼ ꓗꓪ ꓣꓳ ꓠꓬ ꓠ ꓠ, ꓟ ꓗꓪ ꓐꓰ ꓕꓲꓽ ꓝ. ꓪꓴ‐ꓢ ꓐꓯ ꓘꓶ ꓐꓱ ꓶ ꓬꓲ. ꓔꓶ. ꓙ ꓖꓶ ꓠ, ꓟ ꓣꓳ. ꓚꓵ_ ꓟ ꓔꓯ ꓓꓽ ꓪꓴ. ꓔꓱ, ꓕ ꓓꓴ ꓬꓰ ꓡꓯ꓿ ꓠ ꓠ, ꓓꓴ ꓠꓲ, ꓡꓶꓽ ꓙꓳ_ ꓟ ꓠꓬ ꓕꓲꓽ ꓣꓳ ꓣꓳ ꓐꓰ ꓠꓶꓽ ꓞ, ꓟ ꓙꓻ ꓡꓯ ꓘꓳ ꓓꓴ ꓫꓬ, ꓔꓶꓻ ꓠ, ꓟ ꓣꓳ ꓠꓲ, ꓡꓶꓽ ꓔꓯ ꓟ. ꓖꓶ_ ꓟ ꓓꓽ ꓪꓴ. ꓟ ꓬꓲ. ꓚꓱ, ꓥ ꓡꓳ꓿

ꓪꓴ‐ꓢ ꓠꓬ ꓣꓳ ꓔꓯ ꓢꓯꓼ ꓕꓵꓼ ꓐ ꓠ, ꓟ ꓠꓲ, ꓡꓶꓽ ꓙꓳ_ ꓟ ꓪꓴ‐ꓢ ꓥ ꓡꓳ꓿ ꓠꓬꓲ. ꓠꓬꓲ ꓗꓪ ꓛꓲ ꓢꓲ ꓒꓽ ꓠꓲ, ꓟ ꓠꓯꓼ ꓗꓪ ꓙꓳ_ ꓟ ꓮ ꓙꓵ ꓐꓰ ꓣꓳ ꓐꓰ ꓙꓻ ꓡꓯ ꓘꓳ ꓔꓬ ꓟ ꓥ ꓡꓳ꓿ꓖꓳ ꓟ ꓑꓶ ꓓꓴ ꓪꓽ ꓘꓴ ꓟ ꓗꓪ ꓪꓴ‐ꓢ ꓐꓯ ꓘꓶꓽ ꓕꓯ ꓠ ꓠ, ꓟ ꓠꓬ ꓮ ꓟꓶ ꓤꓶꓻ ꓔꓱ, ꓟ ꓔꓯ ꓠ ꓠ, ꓗꓴ. ꓠ, ꓟ ꓟ. ꓖꓶ_ ꓡꓳ꓿ ꓣꓳ ꓚꓲ ꓛꓬ ꓤꓶꓻ ꓐꓰ ꓠꓶꓽ ꓛꓳ ꓕꓲ ꓛꓳ ꓗꓪ ꓔꓬ ꓟ ꓢꓯꓼ ꓮ ꓟꓬ, ꓘꓴꓽ ꓠꓯꓼ ꓗꓪ ꓢꓲ ꓫꓬ_ ꓟ ꓢꓲ ꓫꓬ ꓕꓳ ꓶ ꓠꓬ ꓫ ꓙꓵ ꓟꓷꓼ ꓙꓵ ꓔꓬ ꓢꓴ ꓐꓰ ꓫ. ꓔꓬ ꓢꓴ ꓐꓴ ꓢꓯꓼ ꓔꓯ ꓢꓷ. ꓠ, ꓟ ꓬꓰ ꓙ ꓖꓶ_ ꓡꓳ꓿ ꓕꓱ ꓡꓱ ꓠ ꓠ, ꓟ ꓐꓱ ꓶ ꓠꓲ, ꓟ ꓗ. ꓘꓶꓽ ꓒꓴ ꓢꓲ ꓫꓬ, ꓔꓶꓻ ꓠ, ꓟ ꓪꓴ‐ꓢ ꓠ ꓠ, ꓖꓶ_ ꓟ ꓡꓰ ꓐꓰ ꓣꓳ ꓠ ꓠ, ꓗꓴ. ꓠ, ꓟ ꓟꓲ ꓢꓲ ꓒꓽ ꓯꓼ ꓗꓪ ꓐꓰ ꓢꓳꓻ ꓣꓴ ꓠ ꓔ ꓡꓳ꓿ “ꓫ ꓢꓴ ꓐꓴ ꓚꓱ, ꓠꓬ ꓞꓳ ꓫꓵ ꓚꓺ ꓟꓲ ꓕꓲ ꓚꓳ ꓡꓳ ꓗꓪ ꓣꓳ ꓤꓶꓻ꓾ ꓠꓶꓽ ꓛꓳ ꓕꓲ ꓛꓳ꓾ ꓗꓴꓷꓼ ꓫꓵ ꓪꓴ ꓐꓰ ꓶꓻ ꓡꓯꓼ ꓟꓬꓱꓽ ꓚꓱ, ꓡꓰ ꓟꓽ ꓞꓲ ꓘꓴ ꓜꓲꓼ ꓞꓳ ꓗꓪ ꓥ ꓟꓲ ꓮ ꓕꓯ ꓟꓲ ꓢꓯꓼ ꓘꓴ ꓠ, ꓟ ꓢꓯꓼ ꓕꓲ ꓟ ꓥ ꓟ” ꓔꓯ ꓣꓳ ꓢꓷ. ꓠ ꓔ ꓡꓳ꓿

ꓜ ꓚꓲ. ꓚꓲ. ꓟ ꓦꓬꓼ ꓠꓬꓲ ꓠꓬ ꓠ ꓠ, ꓠ, ꓟ ꓐꓱ ꓶ ꓬꓲ. ꓙꓵ, ꓥ ꓠꓬ ꓜ ꓚꓲ. ꓟ ꓠꓬ ꓪꓴ‐ꓢ ꓐꓯ ꓘꓶꓽ ꓔꓯ ꓘꓳ, ꓣꓴ ꓠ, ꓟ ꓚꓲ ꓛꓬ ꓔꓱ, ꓚꓲ ꓛꓬ ꓙ ꓖꓶ ꓟ ꓚꓱ, ꓕꓲ ꓟ ꓥ ꓡꓳ꓿ ꓜ ꓚꓲ. ꓚꓲ. ꓟ ꓠꓬ ꓠꓲ, ꓟ ꓒꓳ, ꓡꓶ. ꓟ ꓚꓱ, ꓮ ꓙꓳ ꓟꓽ ꓓ ꓣꓱ ꓬꓯꓼ ꓟ ꓦ ꓕꓲꓽ ꓒꓳ, ꓛꓳ ꓠ, ꓟ ꓕꓲꓽ ꓟ ꓥ ꓡꓳ꓿ ꓜ ꓚꓲ. ꓚꓲ. ꓟ ꓠꓬ ꓣꓳ ꓧꓪ ꓖꓳ ꓓꓱ ꓕꓲ ꓒꓳ, ꓐꓰ ꓝ. ꓔ ꓟ ꓑꓶ ꓓꓴ ꓣꓳ ꓚꓵ ꓚꓵ ꓮ ꓫꓵ ꓔꓯ ꓢꓲꓼ ꓡ꓾ ꓦꓬꓼ ꓟꓶꓼ ꓡ? ꓣꓳ ꓢꓯ. ꓔꓬ ꓠ, ꓟ ꓐꓱ ꓶ ꓮ ꓫꓵ ꓟꓽ ꓙꓳ ꓟꓽ ꓓ ꓣꓱ ꓬꓯꓼ ꓡꓳ ꓐꓰ ꓐꓯ_ ꓟ ꓔꓯ ꓟꓬ ꓠꓬꓲ ꓡꓳ. ꓟꓳ ꓪ ꓡꓳ꓿ ꓖꓳ ꓟ ꓡꓰ ꓐꓰ ꓕꓱ ꓟ ꓠꓬ ꓣꓳ “ꓠꓲ, ꓦꓯ, ꓟ꓾ ꓠꓲ, ꓡꓶꓽ ꓙꓳ_ ꓟ” ꓔꓯ ꓢꓷ. ꓢꓲ꓾ ꓔꓱ, ꓟ ꓐꓱ ꓶ ꓦꓯꓼ ꓟꓶꓼ ꓟ ꓔꓯ ꓜꓲ ꓘꓴꓽ ꓢꓲ꓾ ꓜꓲ ꓘꓴꓽ ꓠꓲ, ꓙꓳ ꓡꓰ ꓝꓲ_ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓪꓽ ꓘꓴ ꓠ, ꓟ ꓐꓰ ꓣꓳ ꓛꓳ ꓒꓯ, ꓐꓴ ꓠꓯꓼ ꓗꓪ ꓢꓷ. ꓗꓴ._ ꓟ ꓔꓯ ꓟ. ꓖꓶ ꓖꓶ_ ꓡꓳ꓿

ꓢꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ ꓮ ꓟꓶ ꓙꓵ, ꓐꓰ ꓡ ꓠ, ꓟ ꓤꓶꓻ ꓗꓪ ꓐꓲ ꓜꓲꓼ ꓡꓰ ꓟ ꓠꓯꓼ ꓗꓪ ꓔꓬ ꓟ ꓢꓯꓼ ꓪ ꓔꓯ ꓢꓷ. ꓠ, ꓟ ꓐꓰ ꓦ ꓕꓲ ꓒꓳ, ꓚꓱ, ꓗꓪ ꓐꓰ ꓕꓱ ꓡꓱ ꓐꓯ ꓔ ꓡꓳ꓾ ꓟꓲ ꓯ ꓤꓶꓻ ꓗꓪ ꓞꓳ ꓤ ꓐꓴ ꓠꓬ ꓔꓱ, ꓟ ꓔꓯ ꓢꓲꓼ ꓟ ꓠꓲ, ꓥꓳ_ ꓟ ꓙꓵꓽ ꓪ ꓙꓳ ꓥ ꓟꓲ꓾ ꓙꓽ ꓣꓳ ꓟ ꓗꓪ ꓠꓬ ꓓꓵꓽ ꓙ ꓞꓰ ꓡꓰ ꓟ ꓡꓰ ꓥ ꓡꓳ꓿ ꓟꓴ ꓗꓪ ꓝꓲ ꓓꓴ ꓐꓴ ꓠꓬ ꓕꓱ ꓑ ꓑ ꓕꓱ ꓜ ꓐꓰ ꓜꓲ ꓘꓴ ꓔꓬ ꓥ ꓟꓲ ꓟꓲ ꓯ ꓡ ꓞꓳ ꓐꓴ ꓠꓬ ꓕꓱ ꓟ ꓔꓯ ꓦꓯꓼ ꓟꓶꓼ ꓡꓳ꓿ ꓜ ꓚꓲ. ꓚꓲ. ꓟ ꓠꓬ ꓣꓳ ꓠꓲ, ꓡꓶꓽ ꓔꓯ ꓜꓲ ꓠ, ꓟ꓾ ꓢꓲ ꓫꓬ ꓠ, ꓟ ꓐꓰ ꓡꓲ, ꓙꓰ ꓠ, ꓟ ꓬꓰ ꓟ ꓡꓰ ꓐꓰ ꓪꓴ‐ꓢ ꓠꓯꓼ ꓗꓪ ꓪꓴ. ꓔꓴ ꓠ, ꓟ ꓐꓰ ꓙꓲ_ ꓟ ꓬꓰ ꓠ, ꓟ ꓐꓱ ꓶ ꓖꓳ ꓠꓲ, ꓡꓶꓽ ꓔꓯ ꓛꓱꓻ ꓓꓳ ꓡꓰ ꓝꓲ_ ꓡꓳ꓿

ꓖꓳ ꓡꓱ ꓥ ꓟꓲ ꓪꓴ‐ꓢ ꓐꓯ ꓘꓶꓽ ꓐꓰ ꓕꓲ ꓡꓲ, ꓜ ꓚꓲ. ꓚꓲ. ꓟ ꓔꓯ ꓛꓳ ꓫꓱꓽ ꓠ, ꓟ ꓐꓰ ꓠꓲ, ꓦꓶ_ ꓟ ꓠꓯꓼ ꓗꓪ ꓪꓴ. ꓔꓴ_ ꓟ ꓤ ꓠꓬꓲ ꓫꓵ ꓠꓬꓲ ꓓꓴ ꓔꓯ ꓒꓳ, ꓔꓴ ꓠ, ꓟ ꓐꓱ ꓶ ꓙꓵꓻ ꓠꓲ, ꓐꓰ ꓙꓽ ꓣꓳ ꓠꓲ, ꓐꓰ ꓢꓯ. ꓔꓬ ꓠ, ꓟ ꓥ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓐꓰ ꓕꓲ ꓠꓲ, ꓕꓲ ꓪ ꓔꓬ ꓟ ꓠꓯꓼ ꓗꓪ ꓬꓲ ꓚꓰꓻ ꓣꓴ ꓠ ꓔ ꓡꓳ꓿”ꓪꓴ‐ꓢ ꓬꓲ ꓐꓯ ꓘꓶꓽ ꓗꓪ ꓐꓰ ꓚꓲ ꓛꓬ ꓔꓱ, ꓚꓲ ꓛꓬ ꓟꓽ ꓜ ꓖꓶ ꓐ ꓡ ꓢꓴ ꓠꓬ ꓙꓲ_ ꓟ ꓜ ꓚꓲ. ꓚꓲ. ꓢꓴ ꓟꓽ ꓗꓷ ꓡꓰ”꓾ ꓜ ꓚꓲ. ꓟ꓾ ꓜꓲ ꓘꓴ ꓠꓲ, ꓕꓲꓽ ꓟ ꓡꓰ ꓙꓲ ꓢꓴ ꓢꓲ ꓤ ꓐꓴ ꓤꓶꓻ ꓕꓯ ꓕꓶꓻ ꓞ, ꓢꓲ꓾ ꓔꓱ, ꓟ ꓗꓷ ꓡꓰ ꓝꓲ_ ꓡꓳ꓿ ꓣꓳ ꓫ. ꓕꓱ_ ꓟ ꓟꓽ ꓙꓲ_ ꓟ ꓫ ꓪ ꓘꓶꓽ ꓐꓰ ꓢꓴ ꓔꓯ ꓙ ꓘꓶ_ ꓟ ꓔꓯ ꓟꓽ ꓬꓰ ꓠ, ꓟ꓾ ꓐꓰ ꓢꓴ ꓚꓱ, ꓔꓯ ꓚ_ ꓟ ꓔꓯ ꓤ ꓟꓳ ꓠ, ꓟ ꓢꓯꓼ ꓕꓵꓼ ꓡꓯ꓿

ꓖꓳ ꓟ ꓗꓪ ꓐꓰ ꓣꓳ ꓫ. ꓕꓱ ꓘꓶꓽ ꓕꓯ ꓤ ꓟꓳ ꓠ, ꓟ ꓐꓰ ꓕꓲ ꓦꓲꓻ ꓡ ꓞꓳ꓾ ꓛꓳꓽ ꓒꓯ, ꓐꓰ꓾ ꓟꓬꓱꓽ ꓬꓰ ꓔꓶ.꓾ ꓗꓴꓷꓼ ꓜꓲꓼ ꓓꓴ ꓐꓰ ꓟꓰꓓꓲꓮ ꓐꓰ ꓙꓲ ꓢꓴ ꓢꓲ ꓤ ꓐꓴ ꓗꓳ ꓡꓳ ꓘꓴꓽ ꓠꓯꓼ ꓗꓪ ꓫꓱ. ꓤ ꓠꓲ, ꓐꓰ ꓒꓵꓽ ꓠꓲ, ꓔꓯ ꓫꓬ, ꓔꓶꓻ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓕꓱ ꓟ ꓗꓪ ꓐꓰ ꓠꓲ, ꓦꓶ_ ꓟ ꓫ. ꓕꓱ ꓘꓶꓽ ꓓꓰ ꓢ ꓥꓳ ꓡꓳ. ꓓꓴ ꓐꓰ ꓢꓲ ꓡꓲ, ꓟ ꓐꓯ ꓘꓶꓽ ꓡꓰ ꓬꓲ. ꓔꓶ. ꓣꓴ ꓡ ꓥꓳ꓿

ꓬꓲ. ꓟꓶꓽ ꓗꓪ ꓐꓰ ꓜ ꓚꓲ. ꓚꓲ. ꓦꓬꓼ ꓠꓬꓲ ꓠꓬ ꓪꓴ‐ꓢ ꓐꓯ ꓘꓶꓽ ꓕꓯ ꓠ ꓠ, ꓢꓲ ꓠꓬꓲ ꓜ ꓚꓲ. ꓧꓪꓽ ꓚꓲ. ꓠ, ꓟ ꓕꓲ ꓠꓲ, ꓕꓲ ꓪ ꓛꓳ ꓫꓱꓽ ꓠ, ꓟ ꓬꓲꓼ ꓠꓬꓲ. ꓔ ꓡꓳ꓿ ꓢꓲ ꓫꓬ ꓕꓳ ꓶ ꓗꓪ ꓕꓱ ꓟ ꓕꓯ ꓬꓲ ꓚꓱ, ꓮ ꓟꓬ, ꓐꓰ ꓟ. ꓖꓶ ꓔ ꓡꓳ꓿ ꓔꓯ ꓥꓳꓽ꓾ ꓠꓲ‐ꓬ‐ꓟ‐ꓬ ꓕꓳ ꓶ ꓗꓪ ꓞꓳ ꓤ ꓮ ꓟꓬ, ꓜꓲꓼ ꓢꓲ ꓶꓼ ꓓꓳ ꓫꓱ, ꓓꓳ ꓔꓯ ꓠ ꓠ, ꓔꓬ ꓟ꓾ ꓙꓵꓻ ꓠꓲ, ꓔꓯ ꓘꓳ, ꓣꓴ ꓟ ꓐꓰ ꓜ ꓚꓲ. ꓚꓲ._ ꓟ ꓐꓰ ꓪꓴ‐ꓢ ꓐꓰ ꓕꓵꓼ ꓪ ꓔꓯ ꓝꓮꓲ ꓬꓲ. ꓫꓵꓼ ꓗꓷ ꓡꓰ ꓠ, ꓟ ꓙ ꓖꓶ ꓔ ꓟ ꓔꓯ ꓟ. ꓖꓶ ꓔ ꓡꓳ꓿

ꓖꓳ ꓟ ꓡꓰ ꓐꓰ ꓣꓳ ꓢ‐ꓢꓲ‐ꓠ ꓟꓵꓽ ꓔꓶ.꓾ ꓕꓲ ꓦꓲ ꓡ ꓞꓳ꓾ ꓘꓴ ꓜꓲꓼ ꓞꓳ ꓜꓴꓻ ꓐꓴ ꓐꓰ ꓘꓴ ꓜꓲꓼ ꓞꓳ ꓠꓶꓽ ꓛꓳ ꓕꓲ ꓛꓳ ꓐꓴ ꓠꓬ ꓜ ꓚꓲ. ꓚꓲ. ꓟ ꓦꓬꓼ ꓠꓬꓲ ꓘꓴꓽ ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓠ, ꓟ ꓡꓰ ꓟ ꓞꓲ ꓫ. ꓢꓴ ꓐꓴ ꓐꓰ ꓟꓲ ꓠꓯ ꓗꓪ ꓐꓰ ꓘꓴ ꓢꓯꓼ ꓔꓯ ꓠ ꓠ, ꓟ ꓠꓬ ꓣꓳ ꓗꓳ ꓡꓳ ꓕꓲ ꓚꓱ, ꓗꓪ ꓕꓲ ꓚꓱ, ꓚꓱ, ꓗꓪ ꓐ ꓡꓰ ꓠ, ꓟ ꓐꓰ ꓜ ꓚꓲ. ꓚꓲ. ꓟ ꓠꓬ ꓔꓱ, ꓟ ꓒꓳ, ꓡꓲꓼ ꓓꓴ ꓗꓷ ꓡꓰ ꓠ, ꓟ ꓐꓱ ꓶ ꓬꓲ ꓚꓰꓻ ꓒꓬꓱꓼ ꓡꓰ ꓠ, ꓟ ꓐꓱ ꓶ ꓕꓲ ꓠꓲ, ꓕꓲ ꓪ ꓙ ꓫꓱꓽ ꓠ, ꓟ ꓘꓴ ꓔ ꓟꓶ ꓟ ꓥꓳ꓿

ꓠꓲ, ꓠꓵꓻ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓐꓰ ꓣꓳ ꓠꓬꓲꓽ ꓗꓳ. ꓚ. ꓗꓪ ꓣꓳꓺ ꓢꓴ ꓐꓴ ꓠꓯꓼ ꓗꓪ ꓟꓬ ꓠꓬꓲ ꓠꓬꓲ ꓙ ꓡꓳ. ꓙ ꓠ ꓔ ꓟ ꓕꓱ ꓜ ꓚꓲ. ꓚꓲ. ꓟ ꓦꓬꓼ ꓠꓬꓲ ꓣꓱ ꓛꓰ ꓔꓯ ꓶꓽ ꓓꓰꓽ ꓓꓴ ꓬꓰ ꓡꓯ꓿ ꓫ. ꓕꓱ_ ꓟ ꓐꓯ ꓘꓶꓽ ꓗꓪ ꓐꓰ ꓥ ꓟꓲ ꓜ ꓚꓲ. ꓚꓲ. ꓟ ꓔꓯ ꓛꓳ ꓫꓱꓽ ꓐ ꓡ ꓠ, ꓟ ꓢꓯꓼ ꓪ ꓔꓯ ꓶꓽ ꓓꓰ ꓓꓴ ꓬꓰ ꓡꓯ꓿ ꓖꓳ ꓕꓯ ꓢꓲ ꓠꓻ ꓓꓴ ꓡꓰ ꓟ ꓐꓯ ꓘꓶꓽ ꓟꓽ ꓙꓳ ꓠ, ꓟ ꓠꓱ. ꓐꓯꓼ ꓢꓴ ꓐꓯ ꓘꓶꓽ ꓭꓯ ꓶ ꓬꓲ. ꓔꓶ. ꓟꓬ ꓠꓬꓲ ꓪ ꓟꓶ ꓡ ꓟ ꓥꓳ꓿ ꓣꓳ ꓗꓳ ꓡꓳ ꓗꓪ ꓫ. ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓢꓯꓼ ꓔꓯ ꓘꓳ, ꓣꓴ ꓐ ꓡ ꓟ ꓬꓲ. ꓔꓶ. ꓗꓷ ꓡꓰ ꓠ, ꓟ ꓐꓰ ꓠ ꓠ, ꓟ ꓠꓬ ꓡꓲ, ꓙꓰ ꓟ ꓚꓱ, ꓔꓯ ꓒꓴ ꓖꓶ ꓢꓲ ꓠꓵꓻ ꓠꓲ, ꓟꓬ, ꓟ ꓟꓲ ꓠꓯ ꓔꓯ ꓫꓬ, ꓔꓶꓻ ꓟ ꓗꓪ ꓢꓯꓼ ꓕꓵꓼ ꓠ, ꓟ ꓙ ꓖꓶ ꓔ ꓓꓴ ꓬꓰ ꓡꓯ꓿ ꓠꓴ ꓪ ꓮ ꓙꓵ ꓠꓯꓼ ꓜ ꓚꓲ. ꓚꓲ. ꓟ ꓦꓬꓼ ꓠꓬꓲ ꓠꓯꓼ ꓗꓪ ꓕꓲ ꓠꓲ, ꓟ ꓡꓱꓼ ꓣꓱ ꓛꓰ ꓔꓯ ꓘꓳ, ꓣꓴ ꓟꓶ ꓝꓲ꓿