ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓐꓯ_ ꓟ ꓠꓬ ꓣꓳ ꓢꓷ. ꓔ ꓟ ꓡꓰ ꓐꓰ ꓣꓳ ꓙꓵꓻ ꓔꓬ ꓟ ꓡꓰ ꓐꓰ ꓥ ꓡ?

ꓕꓲ ꓐꓱ ꓙꓳ_ ꓟ ꓠꓬ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓮ ꓖꓴ ꓡꓰ ꓐꓰ ꓮ. ꓔꓳ. ꓡꓰ ꓐꓰ ꓥ ꓠꓬ ꓟꓲ ꓦꓲꓻ ꓡꓰ ꓐꓰ ꓗ, ꓡꓳ ꓐꓰ ꓢꓷ. ꓔ ꓢꓲ ꓠꓬꓲ ꓕꓱ ꓡꓱ ꓙꓵꓻ ꓔꓬ ꓥ ꓟꓲ ꓙꓳ_ ꓡꓳ꓾ ꓖꓳ ꓡꓱ ꓥ ꓟꓲ ꓚꓵ ꓚꓵ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓮ ꓡꓰ ꓫꓵ ꓥ ꓡ ꓐꓯ_ ꓟ ꓔꓯ ꓣꓳ ꓢꓷ. ꓓꓴ ꓥꓳ꓿

ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓮ ꓡꓰ ꓫꓵ ꓥ ꓡ ꓐꓯ ꓠꓬ ꓢ ꓣꓳ ꓕꓲꓽ ꓖꓳ ꓓꓱ ꓪꓴ‐ꓢ ꓠꓯꓼ ꓗꓪ ꓟ ꓪꓴ‐ꓢ ꓕꓲꓽ ꓣꓳ ꓥ ꓡꓳ꓾ ꓮꓽ ꓐꓽ ꓐ, ꓐ ꓪꓴ‐ꓢ꓾ꓢꓲ ꓒ ꓬꓰ‐ꓢꓴ ꓐꓰ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓬꓲ ꓪ ꓢ ꓣꓳ ꓠꓬ ꓕꓲ ꓠꓲ, ꓕꓲ ꓪ ꓪꓴ‐ꓢ ꓥ ꓟ ꓑꓶ ꓓꓴ ꓮ ꓡꓰ ꓕꓲ ꓣꓳ ꓡꓲ ꓟꓽ ꓪꓴꓽ ꓮ ꓡꓰ ꓕꓲ ꓣꓳ ꓥ ꓟꓲ ꓟꓽ ꓣꓳꓺ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓠꓲ, ꓠꓵꓻ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ꓠꓬꓲ. ꓠꓬꓲ ꓣꓳ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓪꓴ‐ꓢ ꓕꓲ ꓣꓳ ꓥ ꓡꓳ꓿ ꓟꓲ ꓦꓲꓻ ꓡꓰ ꓐꓰ ꓗ, ꓡꓳ ꓫꓵ ꓟꓽ ꓥ꓾ ꓮ ꓖꓴ ꓡꓰ ꓐꓰ ꓫꓵ ꓟꓽ ꓥ꓾ ꓮ. ꓔꓳ. ꓡꓰ ꓐꓰ ꓫꓵ ꓟꓽ ꓥ꓾ ꓬꓲ ꓪ ꓪꓴ‐ꓢ ꓕꓲ ꓣꓳ ꓥ ꓟ ꓔꓯ ꓣꓳ ꓢꓷ. ꓓꓴ ꓥꓳ꓿ ꓖꓳ ꓟ ꓡꓰ ꓐꓰ ꓬꓲ ꓠꓬ ꓪꓴ‐ꓢ ꓕꓲ ꓣꓳ ꓥ ꓟ ꓑꓶ ꓓꓴ ꓬꓲ ꓠꓬ ꓣꓳ ꓡꓰ ꓐꓰ ꓠꓲ, ꓟ ꓫ. ꓗꓴ._ ꓡꓳ꓿ ꓣꓳ ꓡꓰ ꓐꓰ ꓠꓲ, ꓡꓶꓽ ꓙꓳ ꓗꓴ._ ꓡꓳ꓿ ꓣꓳ ꓡꓰ ꓐꓰ ꓣꓱ ꓬꓰ ꓐ ꓡ ꓟ ꓥ ꓡꓳ꓿ ꓣꓱ ꓟꓲ ꓣꓱ ꓬꓰ ꓔꓬ ꓡꓳ꓿

ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓪꓴ‐ꓢ ꓕꓲ ꓣꓳ ꓡꓰ ꓐꓰ ꓣꓳ ꓡꓰ ꓐꓰ ꓞꓳ ꓤ ꓕꓲ ꓣꓳ ꓡꓰ ꓐꓰ ꓣꓱ ꓬꓰ ꓔꓬ ꓟ ꓔꓯ ꓮ ꓡꓰ ꓐꓰ ꓢꓷ. ꓓ_ ꓡ꓾ ꓐꓯ ꓠꓬ ꓠꓬ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓟ. ꓟꓲꓽ ꓗꓪ ꓢꓲ‐ꓫꓬ‐ꓟ‐ꓦ ꓔꓯ ꓕꓽ ꓛꓬ ꓡꓰ ꓝꓲ꓾ ꓠꓱ. ꓐꓯꓼ ꓛꓬ ꓡꓰ_ ꓟ ꓠꓽ ꓖꓽ ꓖꓶ ꓐ ꓡ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ‐ꓫꓬ‐ꓟ‐ꓦ ꓕꓽ ꓛꓬ ꓡꓰ ꓝꓲ꓾ꓐꓰ ꓐꓯ_ ꓟ ꓠꓬ ꓢꓲ‐ꓫꓬ‐ꓟ‐ꓦ ꓠꓬ ꓠꓲ, ꓟ ꓠꓲ, ꓥꓳ ꓗꓴ._ ꓡꓳ꓿ ꓠꓲ, ꓟ ꓫ. ꓗꓴ._ ꓡꓳ꓿ ꓠꓲ, ꓦꓶ ꓗꓴ._ ꓡꓳ꓾ ꓕꓱ ꓟ ꓔꓯ ꓐꓯ ꓔꓬ ꓫꓵ ꓥ ꓡꓳ꓾ꓝꓮꓲ ꓠꓬ ꓢꓲ‐ꓫꓬ‐ꓟ‐ꓦ ꓠꓬ ꓬꓲ ꓠꓲ, ꓡꓶꓽ ꓙꓳ_ ꓟ ꓥ ꓡꓳ꓾ ꓮ ꓡꓰ ꓐꓰ ꓙꓳ_ ꓡ? ꓡ ꓞꓳ ꓔꓯ ꓬꓲ ꓣꓱ ꓛꓰ ꓖꓶ_ ꓟ ꓥ ꓡꓳ꓿ ꓣꓱ ꓛꓰ ꓮ ꓟꓬ, ꓖꓶ ꓔ ꓡꓳ꓿ ꓠꓲ, ꓗꓴ. ꓖꓶ_ ꓟ ꓣꓱ ꓛꓰ꓾ ꓠꓬꓲ ꓡꓳ. ꓔ ꓙ ꓖꓶ_ ꓟ ꓣꓱ ꓛꓰ꓾ ꓢꓷ. ꓙ ꓟꓳ ꓙ ꓖꓶ_ ꓟ ꓮ ꓙꓵ ꓬꓲ ꓣꓱ ꓛꓰ ꓮ ꓟꓬ, ꓖꓶ ꓔ ꓟ ꓥ ꓡꓳ꓾ ꓕꓱ ꓟ ꓠꓬ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓖꓳ ꓕꓲ ꓣꓳ ꓟ ꓬꓲ ꓠꓲ, ꓡꓶꓽ ꓥ ꓡꓳ꓿

ꓝꓮꓲ ꓢꓲ ꓒ ꓬꓰ‐ꓢꓴ ꓥ ꓟꓲ ꓐꓯ ꓔ ꓡꓳ꓾ ꓥꓪ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓓꓯ ꓙꓰ ꓪ_ ꓥꓳ꓾ ꓖꓳ ꓡꓱ ꓐꓯ ꓥ ꓟꓲ ꓥꓪ ꓐꓱ ꓶ ꓜꓲ ꓟꓴ ꓬꓰ ꓢꓴ ꓢꓷ. ꓙ ꓟꓳ ꓙ ꓢꓴ ꓕꓲ ꓣꓳ ꓔꓯ ꓥꓪ ꓝꓲ ꓩꓴ ꓗꓷ_ ꓥꓳ꓾ ꓬꓲ ꓪ ꓖꓳ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓥ ꓡꓳ꓾ ꓖꓳ ꓟ ꓑꓶ ꓓꓴ ꓙꓵꓻ ꓠꓲ, ꓣꓳ ꓢꓷ. ꓠꓲ, ꓗꓪ ꓣꓳ ꓕꓲ ꓡꓰ ꓐꓰ ꓡꓳ. ꓢꓷ. ꓓꓴ ꓥꓳ꓿ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓪꓴ‐ꓢ ꓕꓲ ꓣꓳ ꓥ ꓟ ꓑꓶ ꓓꓴ ꓮ ꓖꓴ ꓡꓰ ꓐꓰ ꓕꓱ ꓡꓱ ꓣꓳ ꓙꓵꓻ ꓔꓬ ꓟ ꓕꓽ ꓬꓰ ꓡꓯ꓾ ꓟꓲ ꓦꓲꓻ ꓡꓰ ꓐꓰ ꓗ, ꓡꓳ ꓐꓰ ꓣꓳ ꓕꓽ ꓢꓷ. ꓔ ꓡꓯ꓾ ꓬꓲ ꓠꓬ ꓣꓳ ꓐꓰ ꓕꓲ ꓠꓲ, ꓕꓲ ꓪ ꓣꓳ ꓒ ꓕꓲ ꓗꓪ ꓔꓬ ꓟ ꓥ ꓠꓬ ꓣꓳ ꓠꓯꓼ ꓗꓪ ꓔꓬ ꓟ ꓝꓲ ꓓꓴ ꓐꓴ ꓞꓲ ꓠꓬꓲ ꓣꓳ ꓕꓯ ꓢꓲ ꓗꓪ ꓬꓲ ꓤꓶꓻ ꓠꓯꓼ ꓗꓪ ꓓꓵꓽ ꓙ ꓢꓲ ꓠꓬꓲ ꓮ ꓙꓵ ꓣꓱ ꓬꓰ ꓐ ꓡ ꓟ꓾ ꓙꓳꓺ ꓟ ꓮ ꓙꓵ ꓗꓪ ꓐꓰ ꓡꓲ, ꓗꓷ ꓐ ꓡ ꓢꓲ ꓠꓬꓲ ꓢꓯꓼ ꓪ ꓙꓳ_ ꓟ꓾ ꓙꓵꓻ ꓠꓲ, ꓙꓳ_ ꓟ꓾ ꓝꓲ ꓓꓴ ꓐꓴ ꓒꓬꓱꓼ ꓡ ꓟ ꓡꓰ ꓐꓰ ꓠꓬꓲ. ꓠꓬꓲ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓖꓳ ꓟ ꓠꓬ ꓣꓳ ꓤꓶꓻ ꓠꓯꓼ ꓗꓪ ꓥ ꓟꓲ ꓬꓲ ꓣꓱ ꓬꓰ ꓠꓲ, ꓫꓵ_ ꓡꓳ꓿ ꓣꓳ ꓤꓶꓻ ꓠꓯꓼ ꓗꓪ ꓣꓳ ꓟꓽ ꓢꓷ. ꓓꓴ ꓮ ꓟꓬ, ꓙꓳ_ ꓡꓳ꓾ ꓮ ꓫꓵ ꓑꓶ ꓓꓴ ꓥ ꓡ꓾ꓣꓳ ꓠꓬ ꓞꓳ ꓤ ꓥ ꓟ ꓑꓶ ꓓꓴ ꓥꓳ꓾ ꓖꓳ ꓡꓱ ꓥ ꓟꓲ ꓠꓬꓲ. ꓠꓬꓲ ꓚꓵ ꓚꓵ ꓣꓳ ꓤꓶꓻ ꓔꓯ ꓠꓬꓲ ꓡꓳ. ꓔ ꓙ ꓖꓪ ꓫꓵ ꓖꓶ ꓔꓬ ꓟ ꓙ ꓖꓴ ꓟ. ꓖꓶ ꓔꓬ ꓟ ꓠꓬ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓖꓳ ꓕꓲ ꓣꓳ ꓥ ꓡꓳ꓿ ꓬꓲ ꓔꓯ ꓣꓳ ꓤꓶꓻ ꓗꓪ ꓣꓳ ꓢꓲ ꓒꓽ ꓣꓳ ꓪꓴ‐ꓢ ꓡꓰ ꓐꓰ ꓬꓲ ꓔꓯ ꓗꓷ ꓓꓴ ꓬꓰ ꓡꓯ꓾ ꓬꓲ ꓔꓯ ꓣꓳ ꓟꓶ ꓡꓰ ꓠ, ꓟ ꓬꓲ ꓔꓯ ꓘꓴ ꓡꓯ꓾ ꓬꓲ ꓠꓬ ꓣꓳ ꓒ ꓕꓲ ꓗꓪ ꓔꓬ ꓡꓳ꓾ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓝꓲ ꓓꓴ ꓐꓴ ꓔꓯ ꓣꓱ ꓬꓰ ꓐ ꓡ ꓟ ꓡꓰ ꓐꓰ ꓠꓴ ꓪ ꓔꓯ ꓥ ꓟꓲ ꓣꓱ ꓐ ꓡ ꓝꓲ꓿