ꓒ‐ꓡꓲ‐ꓢꓷ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓢꓷ. ꓡꓰ ꓓꓴ ꓕꓲ ꓟ ꓟꓳ. ꓖꓶ ꓠ, ꓟ ꓓꓰꓽˍ ꓟ (Monday reflection)
ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓟ‐ꓘꓳ 8ꓽ11‐14 ꓝꓲ. ꓗꓪ ꓒ‐ꓡꓲ‐ꓢꓷ ꓐꓴ ꓠꓬ ꓬꓰ‐ꓢꓴ ꓔꓯ ꓫꓵꓽ ꓠꓬꓲˍ ꓠ, ꓟ ꓟꓴ ꓗꓪ ꓗꓪ ꓐꓰ ꓢꓷ. ꓡꓰ ꓓꓴ ꓟꓳ. ꓖꓶ ꓠ, ꓟ ꓓꓰꓽˍ ꓗꓷ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓓ ꓡꓰ ꓦ ꓢꓲ ꓠꓬꓲ ꓕꓱ ꓕꓲꓽ ꓤꓶ ꓢꓴ ꓠꓬ ꓮ ꓫꓵꓽ ꓪꓴ. ꓠꓬꓲ ꓢꓷ. ꓡꓰ ꓓꓴ ꓧꓪˍ ꓡ? ꓕꓱ ꓕꓲ ꓤꓶꓻ ꓢꓴ ꓔꓯ ꓠꓬ ꓮ ꓫꓵꓽ ꓢꓷ. ꓡꓰ ꓓꓴ ꓟꓲ ꓟꓽ ꓖꓶ ꓐꓰ ꓐꓯ ꓔ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓒ‐ꓡꓲ‐ꓢꓷ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓙꓵꓻ ꓟ ꓪꓴ. ꓠꓬꓲ ꓙꓵꓻ ꓠꓲ, ꓔꓯ ꓓꓰꓽ ꓟ ꓥ꓿ ꓬꓲ ꓪ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓫꓵꓽ ꓠꓬꓲ ꓠꓲ, ꓫꓵˍ ꓟ ꓪꓴ. ꓠꓬꓲ ꓢꓷ. ꓡꓰ ꓓꓴ ꓔꓯ ꓟꓳ. ꓖꓶ ꓠ, ꓟ ꓓꓰꓽ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓪꓴ‐ꓢ ꓡꓰ ꓖꓶ ꓔ ꓟ ꓙꓵꓻ ꓠꓲ, ꓠꓬ ꓡꓯ ꓫꓴꓻ ꓓꓽ ꓕꓲ ꓫꓵꓽ ꓥ ꓡꓳ꓿ ꓝꓮꓲ ꓣꓳ ꓠꓬ ꓣꓳ ꓠꓲ, ꓟ ꓗ, ꓘꓶꓽ ꓔꓯ ꓒꓴ ꓠ, ꓟ ꓟꓲꓽ ꓣꓳ ꓚꓵˍ ꓟ ꓥ ꓡꓳ꓿
ꓓꓽ ꓪꓴ. ꓬꓲ ꓪꓴ. ꓠꓬꓲ ꓢꓷ. ꓡꓰ ꓓꓴ ꓟ. ꓖꓶ ꓡꓯ꓾ ꓗ, ꓠꓯ ꓥꓪ ꓢꓲꓺ ꓒ ꓔꓯ ꓙꓵꓻ ꓓꓴ ꓥꓳꓽ ꓐꓰ ꓶꓻ ꓓꓰꓽ ꓠꓬ ꓣꓳ ꓔꓯ ꓖꓶ ꓔ ꓟ ꓣꓱ ꓛꓰ ꓡꓯꓻ ꓫꓴ ꓔꓯ ꓑꓲ. ꓡꓰ ꓝꓲ ꓟ ꓟꓲ ꓥ ꓡꓳ꓿ ꓣꓳ ꓕꓲ ꓧꓪ ꓧꓪ ꓐꓯ ꓗꓴ ꓟ ꓙꓳˍ ꓡꓳ ꓢꓲꓺ ꓒ ꓬꓰ‐ꓢꓴ ꓥꓪ ꓔꓯ ꓠꓴ ꓚꓵ ꓚꓵ ꓠꓲ, ꓠꓵ ꓠꓬ ꓕꓱ ꓥꓪ ꓠꓯ, ꓗꓪ ꓔꓳ, ꓜꓳ ꓔꓬ ꓟ ꓫꓵꓽ ꓪꓴꓽ ꓔꓯ ꓬꓲ ꓡꓰ ꓫꓬ, ꓡꓰ ꓝꓲ꓾ ꓐꓰ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓢꓷ. ꓡꓰ ꓓꓴ ꓓꓰꓽ ꓗꓷ ꓟ ꓙꓳ ꓟ ꓟꓲ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓢꓷ. ꓡꓰ ꓓꓴ ꓮ ꓟꓬ, ꓫꓵꓽ ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿ ꓣꓳ ꓠꓯ, ꓗꓪ ꓔꓳ, ꓜꓳ ꓔꓬ ꓟ ꓫꓵꓽ ꓪꓴꓽ ꓠꓯ, ꓗꓪ ꓢꓷ. ꓡꓰ ꓓꓴ ꓟꓽ ꓙꓳ ꓟ ꓟꓽ ꓥ꓾ ꓣꓳ ꓢꓲꓺ ꓒ ꓬꓰ‐ꓢꓴ ꓔꓯ ꓚꓵˍ ꓚꓵ ꓟꓽ ꓙꓵꓻ ꓟ ꓡꓰ ꓥ ꓡꓳ꓿ ꓬꓲ ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓬꓰ ꓙ ꓔ ꓙ ꓔꓬ ꓢꓴ ꓢꓲꓺ ꓒ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓢꓯꓼ ꓓꓽ ꓟ ꓦꓻ ꓟ ꓠꓬ ꓬꓲ ꓠꓬ ꓠꓲ, ꓟ ꓫ. ꓔ ꓟ ꓥ ꓡꓳ꓿ ꓬꓲ ꓮ ꓘꓶ. ꓠꓲ, ꓠꓵ ꓟ ꓤ ꓠꓱ ꓐꓴ ꓬꓲ ꓔꓯ ꓟꓽ ꓙꓵꓻ ꓟ ꓔꓯ ꓢꓷ. ꓡꓰ ꓠꓬ ꓬꓲ ꓠꓬ ꓮ ꓘꓶ. ꓛꓲ ꓠꓲ, ꓟ ꓫ. ꓗꓷ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓔꓯ ꓣꓳ ꓕꓲ ꓖꓳ ꓓꓱꓽ ꓕꓲ ꓠꓲ, ꓟ ꓡꓱꓼ ꓬꓲ ꓔꓯ ꓙꓵꓻ ꓠ, ꓟ ꓠꓲ, ꓫꓵˍ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓘꓶ. ꓛꓲ ꓜꓰ ꓗꓴ ꓟ ꓢꓲꓺ ꓒ ꓥ ꓟ ꓡꓰ ꓟꓽ ꓞꓲ ꓬꓲ ꓠꓬ ꓣꓳ ꓟꓲ ꓠꓯ ꓡ ꓞꓳ ꓔꓯ ꓬꓲ ꓚꓲ. ꓛꓬ ꓢꓲ ꓟ ꓔꓯ ꓚꓱ, ꓔꓯ ꓞꓳ ꓒꓴ ꓢꓴ ꓥ ꓡꓳ꓿
ꓣꓳ ꓦꓻ ꓡꓱ ꓢꓴ ꓐꓴ ꓐꓱ ꓶ ꓮ ꓘꓶ. ꓛꓲ ꓪꓴꓽ ꓟ ꓢꓷ. ꓡꓰ ꓓꓴ ꓓꓽ ꓠꓬ ꓟꓴ ꓗꓪ ꓗꓪ ꓐꓰ ꓢꓷ. ꓡꓰ ꓓꓴ ꓓꓽ ꓟꓽ ꓥ꓾ ꓢꓲꓺ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓡꓰ ꓥ ꓡꓳ꓿
ꓮ ꓟꓶ ꓟ ꓙꓵ, ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓢꓷ. ꓡꓰ ꓓꓴ ꓠꓬ ꓢꓲꓺ ꓒ ꓬꓲ ꓫꓵꓽ ꓐꓰ ꓬꓲ ꓢꓲ ꓚꓵˍ ꓥ ꓟ ꓢꓲꓽ ꓫꓬ ꓖꓳ ꓓꓱ ꓗꓪ ꓢꓷ. ꓡꓰ ꓓꓴ ꓔꓯ ꓣꓳ ꓝꓮꓲ ꓡꓳ. ꓟꓳ ꓓꓽ ꓡꓳ꓿ ꓢꓷ. ꓡꓰ ꓓꓴ ꓠꓱ. ꓐꓯꓼ ꓟꓽ ꓛꓲ ꓟ ꓥ ꓡꓳ꓿ ꓢꓲꓽ ꓫꓬ ꓖꓳ ꓓꓱ ꓗꓪ ꓢꓲꓺ ꓒ ꓬꓰ‐ꓢꓴ ꓬꓲ ꓚꓵ ꓚꓵ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓠ ꓠꓬꓲˍ ꓔꓬ ꓟ ꓠꓬ ꓣꓳ ꓠꓯ, ꓗꓪ ꓮ ꓙꓵꓽ ꓐꓲ ꓜꓲꓼ ꓕꓯ ꓢꓲ ꓠꓬꓲ ꓣꓳ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓠ, ꓟ ꓣꓳ ꓬꓰ ꓔꓬ ꓡ?
ꓢꓷ. ꓡꓰ ꓓꓴ ꓟꓽ ꓡꓳ. ꓟꓳ ꓥ ꓟꓲ ꓣꓳ ꓬꓲ ꓔꓯ ꓙꓵꓻ ꓔꓬ ꓢꓴ ꓒꓬꓱꓼ ꓔꓬ ꓡ?
ꓠꓴ ꓥꓪ ꓙꓵꓻ ꓠꓲ, ꓠꓬ ꓮ ꓡꓰꓳ ꓫꓵꓽ ꓫꓵꓽ ꓪꓴ. ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓔꓬ ꓢꓴ ꓒꓬꓱꓼ ꓔꓬ ꓡ? ꓝꓮꓲ ꓥꓪ ꓙꓵꓻ ꓠꓲ, ꓠꓬ ꓠꓵꓻ ꓠꓲ, ꓙꓳ ꓟ ꓙꓵꓻ ꓠꓲ, ꓥ ꓡ?
ꓔꓱ ꓚꓵˍ ꓟ ꓙꓵꓻ ꓠꓲ, ꓠꓬ ꓢꓲꓺ ꓒꓽꓳ ꓠꓴ ꓔꓯ ꓥꓪ ꓟꓽ ꓢꓷ. ꓟꓽ ꓟꓳ ꓠꓬꓲ ꓥ ꓟꓲ꓾ ꓢꓲꓺ ꓒ ꓔꓯ ꓙꓵꓻ ꓔꓬ ꓢꓴ ꓙꓵꓻ ꓠꓲ, ꓥ ꓡꓳ꓿ ꓫ. ꓟꓳ ꓪ꓿
