ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪ ꓙꓱꓽ ꓐꓴ ꓔꓯ ꓮ ꓡꓲ ꓐꓰ ꓗꓽ ꓕꓽ ꓖꓶ ꓠ, ꓟ ꓚꓱ, (Environment program)
ꓧꓪ. ꓧꓪ ꓠꓬꓲ. ꓠꓬꓲ ꓟꓵꓽ ꓘꓳꓼ ꓐꓰ ꓫ. ꓕꓱ ꓟ ꓚꓱ, ꓗꓪ ꓐꓰ ꓣꓳ ꓔꓬ ꓟ ꓗꓴꓷꓼ ꓣꓳ ꓔꓬ ꓟ ꓟꓵꓽ ꓗꓪ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓬꓲ ꓛꓴˍ ꓟꓽ ꓞꓲ ꓡꓰ ꓠ, ꓟ ꓮ ꓡꓲ ꓐꓰ ꓗꓽ ꓕꓽ ꓖꓶ ꓠꓯˍ ꓟ ꓐꓯ ꓟ ꓚꓱ, ꓗꓪ ꓐꓰ ꓐꓯ ꓟ. ꓖꓶ ꓡ ꓥꓳ꓿
ꓟꓲ ꓠꓯ ꓗꓪ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓘꓴꓽ ꓗꓪ ꓐꓰ ꓬꓲ ꓫꓵ. ꓟꓶ ꓡꓰ ꓟ ꓐꓰ ꓬꓲ ꓛꓴˍ ꓞꓲ ꓡꓰ ꓠ, ꓟ ꓔꓳ, ꓜꓳ ꓔꓬ ꓟ ꓧꓪꓽ ꓫꓵꓽ ꓧꓪ ꓙꓰ ꓐꓴ ꓮ ꓟꓬ, ꓔꓬ ꓟ ꓥ ꓡꓳ꓿ ꓣꓳ ꓔꓬ ꓟ ꓟꓬ‐ꓟ ꓗꓴꓷꓼ ꓘꓴꓽ ꓗꓪ ꓥ ꓟꓲ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓬꓲ ꓫꓵ. ꓟꓶ ꓡꓰ ꓟ ꓮ ꓟꓬ, ꓔꓬ ꓟ ꓔꓯ ꓢꓷ. ꓠꓲ, ꓙꓳ ꓒꓽ ꓐꓴ ꓡꓰ ꓐꓯ ꓖꓶ ꓔ ꓟ ꓙꓳ ꓟ ꓥ ꓡꓳ꓿
ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓬꓲ ꓫꓵ. ꓟꓶ ꓡꓰ ꓠ, ꓟ ( ꓬꓲ ꓛꓴꓽ ꓟꓶ ꓞꓰ ꓡꓰˍ ꓟ ) ꓔꓳ, ꓜꓳ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓠꓬ ꓡ‐ꓟ꓾ ꓠꓬꓲ꓾ ꓡ‐ꓟ (ꓦ‐ꓟ) ꓪꓳ‐ꓑ꓾ ꓮ ꓟꓬ, ꓔꓬ ꓟ ꓪꓴ. ꓠꓬꓲ ꓕꓱ ꓡꓱ ꓫꓵꓽ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓔꓯ ꓮꓽ ꓔꓳ ꓔꓳ ꓟꓽ ꓢꓰꓼ ꓠ, ꓟ ꓧꓪꓽ ꓢꓰꓼ ꓟꓽ ꓓ ꓟ ꓬꓲ ꓔꓶ. ꓟꓵꓽ ꓝꓮꓲ ꓧꓪꓽ ꓢꓰꓼ ꓟꓽ ꓓꓽ ꓟ ꓦ‐ꓐ ꓔꓶ ꓖꓶ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓝꓮꓲ ꓞꓳ ꓘ, ꓡꓳ ꓒꓱ ꓗꓪ ꓔꓬ ꓟ ꓑ ꓫꓬ ꓐꓴ ꓐꓰ ꓢꓷ. ꓠꓲ, ꓙꓳ ꓢꓴ ꓐꓴ ꓐꓰ ꓕꓲ ꓠꓲ, ꓕꓲ ꓪ ꓟꓬꓱꓽ ꓬꓰ ꓢꓲ ꓠꓬꓲ ꓮ ꓡꓲ ꓐꓰ ꓗꓽ ꓕꓽ ꓠ, ꓟ ꓢꓷ. ꓠꓲ, ꓚꓴꓽ ꓬꓲ ꓖꓶ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓝꓮꓲ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓔꓯ ꓠꓻ ꓞꓲꓼ ꓐꓱ ꓶ ꓮ ꓟꓬꓽ ꓢꓰꓼ ꓗꓷ ꓚꓱ, ꓔꓯ ꓤ ꓟꓳ ꓠ, ꓟ ꓥ ꓡꓳ꓿
ꓝꓮꓲ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓔꓬ ꓠ, ꓟ ꓟꓵꓽ ꓔꓶ ꓖꓶ ꓠ, ꓟ ꓣꓳ ꓚꓵ, ꓟ ꓚꓱ, ꓥ ꓡꓳ꓿
ꓣꓳ ꓔꓬ ꓟ ꓗꓴꓷꓼ ꓗꓪ ꓬꓲ ꓙꓵ, ꓟꓶ ꓫꓵˍ ꓫꓵˍ ꓒꓬꓱꓼ ꓗꓷ ꓟ ꓫꓵꓽ ꓪꓴꓽ ꓮ ꓟꓬ, ꓑꓶ. ꓓꓴ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓔꓬ ꓠ, ꓟ ꓮ ꓘꓶ. ꓫ. ꓡꓰ ꓟ ꓥ ꓡꓳ꓿ ꓧꓪꓽ ꓫꓵꓼ ꓧꓪ ꓙꓰ ꓐꓴ ꓜ ꓓꓴ ꓓꓳ ꓥ ꓟꓲ ꓮ ꓘꓶ. ꓫ. ꓡꓰ ꓢꓲ ꓠꓬꓲ ꓠꓱ. ꓐꓯꓼ ꓟꓵꓽ ꓗꓪ ꓚꓵ. ꓙꓰ ꓟ꓾ ꓘꓰ ꓙꓰ ꓟ ꓮ ꓟꓬ, ꓙꓳ ꓟ ꓥ ꓡꓳ꓿
ꓖꓳ ꓡꓰ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓢꓷ. ꓠꓲ, ꓙꓳ ꓢꓴ ꓐꓴ ꓐꓰ ꓑ ꓫꓬ ꓐꓴ ꓞꓳ ꓘ, ꓗꓪ ꓔꓬ ꓟ ꓢꓴ ꓐꓴ ꓐꓰ ꓕꓲ ꓧꓪ ꓮ ꓡꓲ ꓐꓰ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓔꓬ ꓠ, ꓟ ꓬꓲ ꓔꓶ. ꓔꓯ ꓖꓶ ꓠ, ꓟ ꓗꓽ ꓕꓽ ꓠ, ꓟ ꓬꓰ ꓖꓶ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓝꓮꓲ ꓢꓷ. ꓠꓲ, ꓚꓳ ꓬꓲ. ꓖꓶ ꓢꓲ ꓠꓬꓲ ꓕꓲ ꓠꓲ, ꓕꓲ ꓪ ꓟꓬꓱꓽ ꓬꓰ ꓠꓯ, ꓟ ꓥ ꓡꓳ꓿
ꓞꓳ ꓘ, ꓡꓳ ꓒꓱ ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓔꓯ ꓟꓽ ꓢꓰꓼ ꓠ, ꓟ ꓗꓽ ꓕꓽ ꓖꓶ ꓠ, ꓟ ꓬꓲ ꓪ ꓞꓳ ꓙꓳ ꓢꓯ. ꓔꓬ ꓚꓱ, ꓝꓮꓲ ꓒꓴ ꓪ ꓡ ꓠ, ꓟ ꓟꓬꓱꓺ ꓖꓶ ꓠ, ꓟ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿ ꓞꓳ ꓙꓳ ꓚꓱ, ꓪꓴꓽ ꓡ ꓟꓴ ꓡ ꓠ, ꓟ ꓙꓵꓽ ꓪ ꓙꓳ ꓢꓴ ꓐꓴ ꓐꓰ ꓢꓷ. ꓠꓲ, ꓙꓳ ꓢꓴ ꓐꓴ ꓬꓰ ꓙ ꓠ, ꓟ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿
ꓝꓮꓲ ꓣꓳ ꓔꓬ ꓟ ꓟꓵꓽ ꓗꓪ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓮ ꓟꓬ, ꓔꓬ ꓡ ꓠꓬ꓾ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓐꓰ ꓛꓳꓽ ꓗ ꓡ ꓢꓴ ꓐꓴ ꓮ ꓟꓬ, ꓣꓳ ꓟꓵꓽ ꓣꓳ ꓗꓴꓷꓼ ꓗꓪ ꓛꓳꓽ ꓡ ꓟ ꓥ ꓡꓳ꓿ ꓖꓳ ꓕꓯ ꓣꓳ ꓠꓬ ꓒꓴ ꓓꓵ ꓡ ꓢꓲ ꓠꓬꓲ ꓟꓬꓱꓽ ꓙꓳ ꓡ ꓟ ꓥ ꓡꓳ꓿ ꓞꓳ ꓙꓳ ꓚꓱ, ꓥ ꓟꓲ ꓪꓴꓽ ꓟꓴ ꓡ ꓓꓴ ꓙꓳ ꓟ ꓥ ꓡꓳ꓿
ꓝꓮꓲ ꓮ ꓘꓶ. ꓛꓲ ꓣꓳ ꓚꓵˍ ꓟ ꓚꓱ, ꓠꓬ ꓢꓷ. ꓠꓲ, ꓚꓱ, ꓗꓪ ꓐꓰ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓔꓯ ꓗꓽ ꓕꓽ ꓠ, ꓟ ꓥ ꓡꓳ꓿ ꓕꓱ ꓟ ꓠꓬ ꓞꓲ ꓣꓳ ꓟ ꓤ ꓠꓱ ꓤ ꓐꓴ ꓔꓯ ꓟꓲ ꓠꓯ ꓢꓷ. ꓠꓲ, ꓢꓳꓻ ꓔꓶ. ꓗꓪ ꓟ. ꓖꓶ ꓠ, ꓟ ꓥ ꓡꓳ꓿ ꓤ ꓠꓱ ꓤ ꓐꓴ ꓐꓱ ꓢꓳꓻ ꓤ ꓐꓴ ꓔꓯ ꓟꓵꓽ ꓘꓳꓼ ꓐꓰ ꓟꓵꓽ ꓗꓪ ꓔꓬ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓔꓯ ꓠꓲ, ꓠꓵ ꓠ, ꓟ ꓟ. ꓖꓶ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿
ꓕꓱ ꓡꓰ ꓐꓰ ꓣꓳ ꓬꓰ ꓐ ꓡ ꓠ, ꓟ ꓣꓳ ꓟꓬ‐ꓟ ꓗꓴꓷꓼ ꓮ ꓘꓶ. ꓛꓲ ꓒꓵꓽ ꓡꓳ. ꓬꓰ ꓟ ꓧꓪꓽ ꓫꓵꓽ ꓧꓪꓽ ꓙꓰ ꓐꓴ ꓔꓯ ꓝꓮꓲ ꓡꓳ. ꓟꓳ ꓪ ꓡ ꓓꓴ ꓥꓳ꓿ ꓛꓲ ꓡ ꓟ ꓣꓳ ꓤ ꓠꓱ ꓤ ꓤꓶꓻ ꓗꓪ ꓥ ꓟꓲ ꓮ ꓘꓶ. ꓛꓲ ꓒꓵꓽ ꓟ ꓮ ꓘꓶ. ꓛꓲ ꓡꓳ. ꓐꓲ ꓟ ꓟꓵꓽ ꓔꓯ ꓡꓯ ꓫꓴ ꓖꓶ ꓪ ꓠ, ꓟ ꓣꓳ ꓢꓯꓼ ꓕꓵꓼ ꓡꓯ꓿ ꓕꓱ ꓡꓰ ꓐꓰ ꓬꓰ ꓠ, ꓟ ꓣꓳ ꓮ ꓙꓵꓽ ꓢꓴ ꓠꓯ, ꓗꓪ ꓶꓻ ꓙꓳ ꓟ ꓥ ꓡꓳ꓿
