ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓠꓬ ꓮ ꓫꓵꓽ ꓥˍ ꓟꓲ ꓬꓲ ꓚꓰ ꓐꓯˍ ꓟ ꓙꓳˍ ꓡꓳ꓿ ꓬꓲ ꓚꓰ ꓟꓽ ꓙꓳ ꓕꓯ ꓬꓲ ꓪꓳ. ꓠꓳ꓾ ꓬꓲ ꓒꓬꓽ꓾ ꓬꓲ ꓡꓯꓼ ꓗ.꓾ ꓬꓲ ꓢꓶꓽ ꓐꓯˍ ꓟ ꓟꓽ ꓙꓳ ꓡ꓿ ꓢꓲ, ꓜꓲ ꓕꓲ ꓜꓲ ꓔꓯ ꓣꓳ ꓡꓳ. ꓡꓯ꓿ ꓬꓲ ꓚꓰꓺ ꓐꓯˍ ꓟ ꓠꓬ ꓮ ꓘꓶ. ꓬꓳ. ꓚꓰꓽˍ ꓡꓳ꓿ ꓬꓲ ꓕꓯꓽ ꓢꓲ ꓗꓪ ꓬꓲ ꓒꓬꓽ꓾ ꓬꓲ ꓡꓯꓼ ꓗ.꓾ ꓬꓲ ꓢꓶꓽ ꓐꓱ ꓶ ꓠꓯ. ꓘꓪ ꓗꓪ ꓐꓰ ꓬꓲ ꓚꓰꓺ ꓠꓬ ꓧꓪ ꓛꓵꓼ ꓬꓰˍ ꓡꓳ꓿ ꓬꓲ ꓜꓻ ꓧꓪ ꓜꓽˍ ꓡꓳ꓿ ꓬꓲ ꓚꓰꓺ ꓙꓲˍ ꓠꓬ ꓬꓲ ꓢꓶꓽ ꓥˍ ꓟꓲ ꓙꓲˍ ꓡꓳ꓿ ꓬꓲ ꓡꓯꓼ ꓗ. ꓥˍ ꓟꓲ ꓪꓴꓽˍ ꓡꓳ꓿ ꓬꓲ ꓚꓰꓺ ꓠꓬ ꓮ ꓘꓶ. ꓬꓳ. ꓚꓰꓽˍ ꓫꓵꓽ ꓔꓯ ꓣꓳ ꓡꓳ. ꓟꓳˍ ꓡꓳ꓿

ꓬꓲ ꓕꓯꓽ ꓢꓲ ꓗꓪ ꓢꓲ, ꓪꓰ ꓢꓲ, ꓜꓲ ꓮ ꓫꓵꓽ ꓥˍ ꓟꓲ ꓮ ꓡꓲ ꓘꓶ ꓛꓲ ꓐꓲꓻˍ ꓥ ꓟꓲ ꓬꓲ ꓚꓰꓺ ꓠꓯꓸꓼ ꓘꓴꓽ ꓗꓪ ꓠꓬ ꓬꓲ ꓚꓰꓺ ꓬꓲ ꓖꓽ ꓡꓯ ꓠꓬ ꓢꓯꓼ ꓕꓵꓼ ꓢꓲ ꓠꓬꓲ ꓕꓱ ꓡꓱ ꓧꓪ ꓜꓽ ꓧꓪ ꓓꓳꓻ ꓔꓬ ꓟ ꓕꓯꓽ ꓢꓲ ꓗꓪ ꓙꓳˍ ꓟ ꓐꓱ ꓶ ꓦꓰꓼ ꓞ, ꓖꓶˍ ꓟ ꓟꓬꓱꓽ ꓔꓯ ꓬꓰˍ ꓡꓳ꓿ ꓕꓱ ꓟˍ ꓡꓰ ꓐꓰ ꓮ ꓫꓵꓽ ꓗꓪ ꓥˍ ꓟꓲ ꓬꓲ ꓚꓰꓺ ꓒꓬꓱꓼ ꓡ ꓓꓴ ꓐꓯˍ ꓟ ꓙꓳˍ ꓟ ꓔꓯ ꓣꓳ ꓡꓳ. ꓟꓳˍ ꓡꓳ꓿

ꓢ. ꓠꓯ ꓛꓳꓼ ꓠꓽ ꓕꓲ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓚꓰꓺ ꓧꓪ ꓢꓲ ꓠꓬꓲ ꓬꓲ ꓚꓰꓺ ꓟꓰ, ꓢꓲ ꓟꓽ ꓙꓲꓻ ꓟ ꓔꓯ ꓡꓳ ꓩꓴ ꓢꓲ ꓠꓬꓲ ꓙꓲˍ ꓟ ꓔꓯ ꓪꓳ ꓫꓳ. ꓠ, ꓟ ꓐꓱ ꓶ ꓣꓳ ꓔꓯ ꓟ. ꓖꓶ ꓡˍ ꓡꓳ꓿ (ꓟ‐ꓕꓲ 5ꓽ17‐32) ꓗꓪ ꓟꓳꓻ ꓪˍ ꓟ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓮ ꓠꓱ ꓘꓶꓽ ꓫꓵꓽ ꓡꓵ ꓦꓬꓼ ꓠꓬꓲ ꓗꓪ ꓟꓳ‐ꓫꓲ ꓐꓰ ꓟꓷꓽ ꓠꓷ, ꓝ. ꓢꓴ ꓐꓯ ꓔ ꓟ ꓐꓯ ꓘꓶꓽ ꓔꓯ ꓐꓲ ꓜꓲꓼ ꓡꓰˍ ꓟ ꓡꓰꓽ ꓟꓽ ꓞꓲꓺ ꓬꓲ ꓚꓰ ꓟꓰ, ꓢꓲ ꓠꓬꓲ ꓮ ꓙꓵꓽ ꓢꓲꓽ ꓫꓬ ꓖꓶˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓟꓳ‐ꓫꓲ ꓙꓵꓽ ꓗ ꓗꓪ ꓠꓬ ꓞꓳ ꓤ ꓕꓲ ꓣꓳ ꓠꓬ ꓝꓴꓲ. ꓬꓰ ꓗꓷ ꓗ ꓠꓯ. ꓕꓯ ꓡꓰꓽ ꓐꓯ ꓟꓴ ꓘꓶꓽˍ ꓟ ꓟꓶˍ ꓡꓳ꓿ ꓢꓴ ꓔꓯ ꓚꓴ, ꓢꓲ꓾ ꓢꓴ ꓔꓯ ꓓꓶꓽ ꓗꓷ ꓢꓲ꓾ ꓢꓴ ꓶꓽ ꓘꓴꓽ ꓗꓷ ꓢꓲˍ ꓡꓰꓽ ꓛꓬꓻ ꓒꓵꓽ ꓟꓶˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ  ꓢꓲ ꓒ ꓬꓰ‐ꓢꓴ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓟꓽ ꓘꓴ ꓗꓷ ꓕꓯ ꓡꓰ꓾ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓬꓲ ꓚꓰꓺ ꓐꓰꓼ ꓡˍ ꓕꓯ ꓡꓰ ꓬꓲ ꓚꓰꓺ ꓙꓳ ꓡˍ ꓕꓯ ꓡꓰ꓾ ꓬꓲ ꓚꓰꓺ ꓖꓳ ꓟ ꓔꓯ ꓘꓳ ꓣꓴ ꓔˍ ꓟ ꓝꓴꓲ. ꓖꓳ ꓟ ꓙꓳˍ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓟꓳ. ꓖꓶˍ ꓡꓳ꓿