ꓪꓴ‐ꓢ ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓟꓽ ꓒꓰ, ꓗꓷ ꓡ꓾
ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓮꓠꓖꓰꓡꓴꓢ ꓪꓽ ꓘꓴ ꓙꓵ, ꓗꓪ ꓙꓲ ꓢꓴ ꓢꓲ ꓤ ꓐꓴ ꓔꓯ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓟ. ꓖꓶ ꓘꓶꓽ ꓬꓲ ꓔꓯ ꓥꓳꓽ ꓗꓪ ꓐꓰ ꓝꓮꓲ ꓔꓱ, ꓕ ꓢꓲ꓾ ꓢꓲ ꓒ ꓬꓰ‐ꓢꓴ ꓐꓰ ꓜꓲ ꓗꓷ ꓟ ꓠꓬ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓠꓯꓼ ꓗꓪ ꓔꓱ, ꓟ ꓗ, ꓛꓲ ꓓꓴ꓾ ꓬꓲ. ꓠꓯ, ꓟ ꓐꓰ ꓠꓬꓲ ꓟꓳ ꓓꓴ ꓔꓯ ꓖꓶ ꓡ ꓡꓳ ꓐꓰ ꓣꓳ ꓔꓯ ꓢꓯꓼ ꓐ_ ꓟ ꓠꓲ, ꓟ ꓣꓳꓺ ꓟ ꓙꓵ, ꓗꓪ ꓪꓴ‐ꓢ ꓡꓰ “ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓔꓯ ꓠꓬꓲ ꓡꓳ. ꓙ_ ꓡꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓐꓯ ꓔ ꓡꓳ꓿
ꓠꓲ, ꓟ ꓙꓽ ꓣꓳ ꓢꓴ꓾ ꓠꓲ, ꓠꓵꓽ ꓢꓴ꓾ ꓠꓲ, ꓟ ꓢꓲ ꓫꓬ ꓢꓴ꓾ ꓐꓰ ꓔꓱ, ꓜꓳ ꓟ ꓔꓯ ꓠꓲ, ꓥꓳ_ ꓟ ꓢꓲ ꓒ ꓬꓰ‐ꓢꓴ ꓐꓰ ꓜꓲ ꓗꓷ ꓗ. ꓠꓯ. ꓡ ꓞꓳ ꓕꓲꓽ ꓣꓳ ꓠꓬ ꓙꓲ ꓖꓴ ꓟꓽ ꓙꓳ_ ꓟ ꓤꓶꓻ ꓡꓵ ꓠꓯꓼ ꓗꓪ ꓝꓮꓲ ꓟꓽ ꓡ ꓡꓰ꓿
ꓬꓲ‐ꓢ‐ꓬ ꓢꓲ ꓫꓬ ꓕꓳ ꓶ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓟꓽ ꓔꓱ, ꓟ ꓔꓯ ꓗꓳ. ꓙꓰ ꓐ ꓡ ꓟ ꓚꓱ, ꓔꓯ ꓐꓯ ꓖꓶ ꓔ ꓡꓳ꓿ “ꓦꓯꓼ ꓟꓶꓼ ꓢꓴ ꓔꓯ ꓜ ꓖꓶ ꓜ_ ꓟ꓾ ꓫ. ꓢꓴ ꓟꓷꓼ ꓢꓴ ꓐꓰ ꓔꓬ ꓦꓲꓻ ꓟꓽ ꓙꓳ ꓢꓴ ꓔꓯ ꓚꓲ ꓛꓬ ꓦꓲꓻ ꓗꓪ ꓔꓬ ꓝꓲ_ ꓟ꓾ ꓖꓪ ꓓꓴ ꓟꓽ ꓙꓳ ꓢꓴ ꓔꓯ ꓖꓪ ꓓꓴ ꓖꓶ_ ꓟ꓾ ꓠꓶꓽ ꓛꓳ ꓕꓲ ꓛꓳ ꓐꓴ ꓔꓯ ꓠꓬꓲ ꓙ ꓡꓳ. ꓙ ꓟ” ꓥ ꓡꓳ꓿
ꓕꓱ ꓡꓱ ꓬꓰ ꓖꓶ_ ꓟ ꓗꓪ ꓐꓰ “ꓥꓪ ꓠꓬꓲ ꓟꓳ ꓓꓴ ꓠꓽ ꓟꓲ ꓕꓯ ꓙꓲ ꓡ_ ꓟ ꓡꓰ ꓐꓰ ꓣꓳ ꓡ ꓢꓲ꓾ ꓠꓴ ꓪ ꓔꓯ ꓫꓬ, ꓓ ꓡꓰ_ ꓥꓳ꓿” (58ꓽ8) ꓗꓪ ꓐꓯ ꓔ ꓡꓳ꓿ ꓔꓲꓺ ꓒ ꓪ ꓔꓲ ꓡꓰ ꓕꓱ ꓐꓯ ꓘꓶꓽ ꓬꓲ. ꓠꓯ, ꓟ ꓔꓯ ꓐꓯ ꓔ ꓡꓳ꓿ ꓕꓲ ꓛꓱ ꓗꓪ ꓟꓲꓽ ꓟꓲ ꓡꓰ ꓐꓰ ꓠꓯ ꓞꓲ, ꓟ ꓔꓯ ꓡꓯ ꓖꓶ ꓠ, ꓟ ꓠꓬꓲ ꓟꓳ ꓓꓴ ꓙꓳ ꓢꓲ꓾ ꓝꓮꓲ ꓕꓲ ꓒꓳ, ꓗꓪ ꓥ ꓟꓲ ꓡꓳ, ꓬꓰ ꓟ ꓙꓵ, ꓕꓯ ꓠꓻ ꓓꓴ ꓔꓯ ꓝꓮꓲ ꓓ ꓡꓰ ꓟ ꓥ ꓡꓳ꓿
“ꓚꓲ ꓛꓬ ꓐꓱ ꓶ ꓬꓲ. ꓚꓱ, ꓙꓳ_ ꓟ꓾ꓬꓲ. ꓠꓯ, ꓟ ꓟꓶꓽ ꓡꓰ ꓢꓲ ꓗ, ꓛꓲ ꓟ ꓔꓯ ꓩꓴ ꓗꓷ_ ꓟ ꓠꓬ ꓠꓲ, ꓟ ꓠꓻ ꓓꓴ ꓙꓳ_ ꓟ “ꓠꓻ ꓓꓴ ꓡꓰ ꓐꓰ ꓚꓲ ꓛꓬ ꓠꓲ, ꓟ ꓗꓪ ꓔꓬ ꓗꓴ._ ꓡꓳ꓾” ꓐꓰ ꓐꓯ ꓔ ꓡꓳ꓿ ꓶꓼ ꓓꓳ ꓫꓱ, ꓓꓳ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ ꓠ ꓠ, ꓔꓬ ꓢꓴ ꓔꓯ ꓠꓲ, ꓟ ꓟꓽ ꓐꓬ ꓠ, ꓟ ꓐꓯ ꓔ ꓡꓳ꓾” ꓬꓲ ꓢꓯꓼ ꓒꓲꓼ ꓬꓰ ꓟ ꓞꓼ ꓐꓳ ꓠꓬ ꓣꓱ ꓬꓯꓼ ꓖꓴ ꓟꓽ ꓙꓳ” ꓐꓰ ꓐꓯ ꓔ ꓡꓳ꓿
“ ꓬꓲ ꓚꓬ ꓬꓲ. ꓒꓵꓽ ꓟꓽ ꓙꓳ ꓢꓴ ꓟꓽ ꓥ ꓠꓬ ꓙꓲ ꓖꓴ ꓟꓽ ꓙꓳ ꓐꓰ ꓓꓵꓽ ꓙ ꓔꓬ ꓡ? ꓬꓲ ꓪ ꓠꓬꓲ ꓟꓳ ꓓꓴ ꓠꓬ ꓐꓲ. ꓞ, ꓡꓰ ꓔꓬ ꓟ ꓡꓰ ꓐꓰ ꓗꓷ ꓔꓬ ꓡꓳ꓾ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓥꓳ ꓡꓳ. ꓓꓴ ꓔꓯ ꓐꓯ ꓔ ꓡꓳ꓾ ꓪꓴ‐ꓢ ꓠꓬ ꓣꓳ ꓔꓯ ꓮ ꓕꓯ ꓥ ꓟꓲ ꓟꓽ ꓒꓰ, ꓗꓷ꓾ ꓢꓲ ꓒꓽ ꓠꓬ ꓣꓳ ꓟꓬꓱꓺ ꓔꓯ ꓢꓷ. ꓢꓲ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓔꓯ ꓠꓬꓲ ꓙ_ ꓡꓳ꓿” ꓮ ꓟꓬ ꓛꓲ ꓠꓯ. ꓟ ꓠꓻ ꓓꓴ ꓗꓷ ꓥ ꓟꓲ ꓶꓼ ꓓꓳ ꓫꓱ, ꓓꓳ ꓔꓯ ꓘꓳ, ꓣꓴ ꓢꓲ ꓪꓴ‐ꓢ ꓐꓯ ꓘꓶꓽ ꓠꓯꓼ ꓗꓪ ꓛꓳ ꓫꓱꓽ ꓟ ꓗꓪ ꓐꓰ ꓠꓻ ꓫꓬ, ꓓ ꓡꓰ_ ꓥꓳ꓾” ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ꓿
ꓠꓱ. ꓐꓯꓼ ꓢꓴ ꓔꓯ ꓒꓴ ꓒꓴ ꓶꓯ ꓡꓯ ꓐꓰ ꓙꓻ ꓡꓯ ꓘꓳ ꓟ ꓐꓰ ꓠꓬꓲ ꓙ_ ꓟ ꓠꓬ ꓣꓳ ꓤꓶꓻ ꓘꓴꓽ ꓗꓪ ꓗ, ꓛꓲ_ ꓟ ꓔꓯ ꓝꓮꓲ ꓖꓶ ꓡ ꓡꓳ꓿ ꓕꓱ ꓡꓱ ꓬꓰ ꓟ ꓠꓬ ꓣꓳ ꓠꓬ ꓟꓲ ꓠꓯ ꓕꓲ ꓒꓳ, ꓐꓰ ꓒꓳ, ꓔꓴ_ ꓟ ꓡꓰ ꓐꓰ ꓗꓷ ꓡꓰ ꓗꓴ._ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓡꓲ ꓛꓲ ꓟꓵꓽ ꓗꓪ ꓞ, ꓠꓬꓲ ꓫꓵ ꓠꓬꓲ ꓓꓴ ꓔꓳ, ꓜꓳ ꓔꓬ ꓕꓯ ꓢꓲ ꓒꓽ ꓠꓬ ꓬꓲ ꓔꓱ, ꓟ ꓔꓯ ꓞꓳ. ꓡꓰ ꓟ ꓬꓲ. ꓚꓱ, ꓮ ꓙꓵ ꓔꓯ ꓒꓰ, ꓗꓷ ꓟ ꓥ ꓡꓳ꓾ ꓕꓱ ꓬꓲ. ꓠꓯ. ꓟ ꓠꓯꓼ ꓗꓪ ꓕꓲ ꓠꓽ ꓡꓲ ꓕꓲ ꓠꓽ ꓠꓽ ꓠꓽ ꓦꓬꓼ ꓠꓬꓲꓼ ꓠꓯꓼ ꓗꓪ ꓑ ꓑ ꓔꓯ ꓣꓴ ꓢꓲ ꓘꓰ. ꓟ ꓗꓪ ꓐꓰ ꓣꓳ ꓟꓳ ꓪ ꓟ ꓬꓲ ꓚꓲ ꓛꓬ ꓔꓲꓻ ꓖꓶ ꓗꓷ ꓟ ꓤꓶꓻ ꓐꓰ ꓢꓲ ꓡꓲ, ꓟ ꓠꓵꓻ ꓠꓲ, ꓐꓴ ꓥ ꓡꓳ꓿
ꓬꓲ. ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓡ ꓞꓳ ꓮ ꓙꓵ ꓔꓯ “ꓢꓲ ꓒ ꓬꓰ‐ꓢꓴ ꓐꓰ ꓕꓲꓽ ꓠꓲ, ꓕꓲ ꓪ ꓗꓷ ꓡꓰ ꓟ ꓗꓪ ꓐꓰ ꓢꓯꓼ ꓪ ꓣꓴ ꓠ, ꓟ ꓐꓰ ꓠꓬꓲ ꓟꓳ ꓓꓴ ꓪ ꓠ, ꓟ ꓐꓰ ꓣꓳ ꓠꓬ ꓪꓽ ꓔꓳꓻ ꓗꓪ ꓔꓬ ꓟ ꓡꓳ ꓒꓱ ꓕꓲ ꓟ ꓡꓰ ꓐꓰ ꓗꓷ ꓡ ꓥꓳ꓾ ꓕꓱ ꓡꓳ ꓒꓱ ꓠꓬ ꓟꓳ ꓓ ꓟ ꓡꓰ ꓟꓽ ꓞꓲ ꓘꓴ ꓔ ꓟ ꓐꓰ ꓠꓲ, ꓡꓱ ꓘꓳ, ꓣꓴ ꓟ ꓔꓬ ꓡꓰ ꓡ ꓥꓳ꓿ ꓕꓱ ꓟ ꓠꓬ ꓡ ꓞꓳ ꓮ ꓙꓵ ꓠꓲ, ꓟ ꓘꓴꓽ ꓠꓯꓼ ꓗꓪ ꓔꓬ ꓠ, ꓟ ꓐꓰ ꓢꓲ ꓡꓲ, ꓟ ꓔꓯ ꓧꓪ ꓠ, ꓟ ꓠꓲ, ꓡꓶꓽ ꓙꓳ_ ꓟ ꓪꓴ‐ꓢ ꓡꓳ ꓒꓱ ꓐꓰ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ꓿
ꓜꓲꓼ ꓡ ꓢꓴ ꓘꓴ ꓜꓲꓼ ꓞꓳ ꓐꓴ ꓮ ꓙꓵ ꓔꓯ “ ꓢꓲ ꓒꓽ ꓛꓳꓽ ꓒꓯ, ꓐꓰ ꓮ ꓕꓯ ꓟꓲ ꓔꓬ ꓐ ꓡꓰ ꓠ, ꓟ” ꓟꓴ ꓗꓪ ꓗ. ꓘꓶꓽ ꓥ ꓟ ꓟ, ꓟ ꓟ‐ꓡꓲ ꓠꓯꓼ ꓗꓪ ꓪꓽ ꓘꓴ ꓶꓽ ꓓꓰꓽ ꓠ, ꓟ ꓢꓯꓼ ꓖꓶ ꓢꓲ ꓬꓲ. ꓟꓶꓽ ꓢꓰꓼ ꓗꓷ ꓟ ꓥꓳ꓿
