ꓠꓵꓸꓹ ꓠꓲꓹ ꓗꓪ ꓐꓰ ꓡ,ꓟ ꓫꓸ ꓪꓽ ꓔꓯ ꓡꓰ ꓕꓱ ꓪꓽ ꓡꓰ ꓝꓲ꓾
ꓮ ꓟꓶꓽ ꓥꓪ ꓡꓰ ꓐꓯ ꓟꓸ ꓖꓶ ꓩꓴ ꓡ ꓟ ꓔꓯ ꓠꓲꓸꓹ ꓠꓵ ꓟ ꓬꓲ ꓤ ꓠꓬꓲ ꓤ ꓐꓴ ꓥˍꓟꓲ ꓫꓸ ꓪ ꓕꓱ ꓟ ꓔꓯ ꓕꓱ ꓔꓬ ꓥ ꓢꓷ꓾ ꓣꓳ ꓓꓵ ꓙ ꓓꓴ ꓬꓰ ꓡꓯ=
ꓢꓴ ꓟꓽ ꓟꓳˍꓟ ꓗꓪ ꓢꓴ ꓔꓯ ꓟꓽ ꓙꓵ ꓐꓯˍꓟ꓾ ꓟꓽ ꓙꓵˍꓟ ꓫꓸ ꓪ ꓔꓯ ꓕꓱˍꓟ꓾ ꓠꓵꓸꓹ ꓠꓲꓹ ꓟꓽ ꓙꓳˍꓟ ꓟꓽ ꓥˍ ꓠꓬ ꓫꓸ ꓪ ꓔꓯ ꓢꓴ ꓠꓽ ꓠ ꓟ ꓢ ꓠ ꓕꓱ ꓔꓬ ꓟ꓾ ꓞꓳ ꓒꓴ ꓠꓲꓸꓹ ꓟꓽ ꓙꓳˍꓟ ꓕꓱ ꓡꓱ ꓫꓵꓽ ꓔꓯ ꓐꓯ ꓔꓬ ꓟ ꓥ ꓡꓳ= ꓕꓱ ꓟ ꓘꓴꓽ ꓠꓯꓸꓼ ꓗꓪ ꓕꓲ ꓘꓶꓽ ꓘꓶꓽ ꓔꓯ ꓕꓱ ꓥꓳꓽ ꓡꓰ ꓔꓯ ꓢꓴ ꓠꓲꓸꓹ ꓟ ꓠꓯꓸꓼ ꓗꓪ ꓗꓸ ꓟꓽ ꓛꓲ ꓓꓴ ꓗꓷ ꓡꓰˍꓟ ꓔꓯ ꓣꓳ ꓐꓴ ꓟꓲ ꓡꓰꓹ ꓡꓳ= ꓖꓳ ꓟ ꓑꓶꓸ ꓓꓴ ꓣꓳ ꓫꓸ ꓪ ꓔꓯ ꓥˍꓟꓲ ꓮ ꓘꓶꓽ ꓙ ꓟꓳ ꓠꓽ ꓗꓹ ꓡꓳ= ꓣꓳ ꓕꓱ ꓡꓱ ꓟꓽ ꓓꓵ ꓙ ꓙ ꓕꓱ ꓗꓷ ꓕꓯ ꓬꓲ ꓐꓰ ꓣꓳ ꓠꓯꓸꓼˍꓗꓪ ꓧꓪꓽ ꓡꓯꓼ ꓘꓳꓼ ꓚꓱꓹ ꓠꓬ ꓮꓽ ꓤ ꓤ ꓟꓶ ꓬꓰ꓾ ꓑꓬ ꓡꓰ ꓡ ꓥꓳ= ꓕꓱ ꓟ ꓡꓰ ꓐꓰ ꓣꓳ ꓥˍꓟꓲ ꓓꓵ ꓙ ꓠꓽ ꓗꓹ ꓡꓳ꓾ ꓢꓴ ꓡꓰ ꓣꓳ ꓔꓯ ꓠꓽ ꓠ ꓟ ꓢ ꓟ ꓫꓸ ꓪ ꓕꓲ ꓘꓶꓽ ꓕꓱ ꓡ ꓕꓯ ꓣꓳ ꓥˍꓟꓲ ꓠꓲꓸꓹ ꓟ ꓗꓹ ꓟ ꓛꓲ ꓓꓴ ꓗꓷ ꓡ ꓥꓳ꓾ ꓖꓳ ꓟ ꓑꓶꓸ ꓓꓴ ꓮ ꓕꓯ ꓥˍꓟꓲ ꓠꓵꓸꓹ ꓠꓲꓹ ꓗꓪ ꓐꓰ ꓡꓹ ꓟ ꓫꓸ ꓪ ꓔꓯ ꓡꓰ ꓕꓱ ꓐ ꓡ ꓠꓹ ꓟ ꓠꓬ ꓮ ꓘꓶꓽ ꓣꓳꓸꓸ ꓚꓵ ꓡꓳ=
ꓠꓬꓲꓽ ꓫꓵ ꓕꓲ ꓫꓵ ꓠꓬ ꓕꓲ ꓖ ꓕꓲ ꓧꓪꓽ ꓣꓳ ꓫꓵꓸꓹ ꓪꓴ ꓕꓲ ꓟ ꓒꓬꓱꓼ ꓡ ꓔꓯ ꓣꓳ ꓮ ꓘꓶꓽ ꓓꓵ ꓙ ꓢꓲ꓾ ꓫꓵꓸꓹ ꓪꓴ ꓕꓲ ꓟ ꓫꓬ ꓡꓰ ꓠꓹ ꓟ ꓐꓱ ꓶ ꓬꓰ ꓠꓽ ꓗꓸ ꓡꓳ= ꓣꓳ ꓮꓽ ꓘꓶꓽ ꓠꓲꓹ ꓢꓲ ꓔꓬ ꓟ ꓕꓲ ꓙꓵꓽ ꓗꓪ ꓫꓸ ꓪ ꓔꓯ ꓙ ꓟꓳ ꓢꓲ꓾ ꓔꓱꓹ ꓪ ꓡꓰ ꓠꓹ ꓟ ꓟꓲ ꓮ ꓘꓶꓽ ꓣꓳꓸꓸ ꓚꓵ ꓡꓳ= ꓮ ꓡꓰ ꓗꓸ ꓠꓬꓲ ꓤ ꓟꓳ ꓢꓲ ꓕꓱ꓾ ꓐꓰ ꓐꓯ꓾ ꓐꓯ ꓠꓬ ꓠꓲꓹ ꓢꓲ ꓢꓲꓽ ꓠꓬꓲ ꓕꓱ ꓩꓴ ꓗꓷˍꓟ ꓠꓯꓸꓼ ꓗꓪ ꓥꓳꓽ ꓡꓰ ꓟ ꓮ ꓟꓬꓹ ꓙꓳˍꓟ ꓪꓴ ꓠꓬꓲ ꓥ ꓡꓳ= ꓞꓳ ꓟꓳ ꓐꓴ꓾ ꓢꓷꓸ ꓠꓲꓸꓹ ꓙꓳ ꓢꓴ ꓐꓴ ꓠꓬ ꓫꓵꓸꓹ ꓪꓴ ꓕꓲ ꓟ ꓔꓯ ꓠꓲꓸꓹ ꓢꓲ ꓠꓲꓹ ꓟ ꓩꓴ ꓔꓬ ꓕꓯ ꓟꓽ ꓫꓬ ꓔꓬ꓾ ꓖꓳ ꓕꓲ ꓙꓵꓽ ꓗꓪ ꓠꓲꓹ ꓟ ꓔꓯ ꓩꓴ ꓗꓷ ꓡꓲꓽ ꓗꓷ ꓢꓲ꓾ ꓠꓲꓸꓹ ꓟ ꓮꓽ ꓕꓲ ꓤ ꓔꓬ ꓢ ꓡꓰꓳ ꓐꓯ ꓕꓯ ꓢꓲ꓾ ꓫꓵꓸꓹ ꓪꓴ ꓕꓱ ꓟ ꓔꓯ ꓫꓬ ꓔꓬ ꓟ ꓥ ꓡꓳ= ꓖꓳ ꓕꓯ ꓢꓲ꓾ ꓫꓵꓸꓹ ꓢꓴ ꓕꓱ ꓟ ꓠꓬ ꓙꓲˍꓟ ꓐꓰ ꓕꓱ ꓜꓳˍꓟ ꓒꓬꓱꓼ ꓡꓹꓟ ꓥ ꓡꓳ꓾ ꓠꓲꓸꓹ ꓠꓵꓹ ꓟ ꓮꓽ ꓐ ꓮꓽ ꓟ ꓬꓲ ꓤ ꓠꓬꓲ ꓤ ꓐꓴꓳ꓾=
ꓠꓬꓲꓸ ꓠꓬꓲ ꓥꓪ ꓡꓰ ꓐꓯ ꓟꓸ ꓖꓶ ꓗꓷ ꓟ ꓠꓬ ꓫꓸ ꓪ ꓔꓯ ꓢꓴ ꓠꓽ ꓠ ꓢ ꓠꓽ ꓮ ꓡꓰ ꓕꓱ ꓠꓽ ꓗꓸ ꓟ ꓐꓰ ꓫꓵꓸꓹ ꓪꓴ ꓕꓲ ꓟ ꓔꓯ ꓮꓽ ꓡꓰ ꓫꓬ ꓠꓽ ꓗꓸ ꓟ ꓚꓱꓹ ꓔꓯ ꓢꓷꓸ ꓙ ꓟꓳ ꓙ ꓩꓴ ꓗꓷ ꓟ ꓥ ꓡꓳ=
