ꓥꓪ ꓟꓲ ꓠꓯ ꓗꓪ ꓮ ꓫꓵ ꓑꓶ ꓓꓴ ꓢꓯ. ꓔꓬ ꓓꓴ ꓥ ꓡ?

ꓠꓬꓲ. ꓠꓬꓲ ꓟꓲ ꓠꓯ ꓗꓪ ꓠꓴ ꓢꓯ. ꓔꓬ ꓟ ꓠꓬ ꓮ ꓫꓵ ꓐꓱ ꓶ ꓮ ꓫꓵ ꓑꓶ ꓓꓴ ꓮ ꓫꓵ ꓬꓲ ꓬꓰ ꓢꓶ ꓐꓱ ꓶ ꓢꓯ. ꓔꓬ ꓡ? ꓐꓯ_ ꓟ ꓔꓯ ꓠꓴ ꓟꓽ ꓢꓷ. ꓕꓯ ꓠꓽ ꓣꓳ ꓠ ꓙꓱ ꓤ ꓡꓰ ꓐꓰ ꓗ, ꓥꓳ꓾ ꓙꓱ ꓤ ꓥ ꓠꓬ ꓮ. ꓠꓬꓲ ꓕꓲꓽ ꓟ ꓠꓬ ꓬꓲ ꓠꓬ ꓟꓲ ꓠꓯ ꓗꓪ ꓮ ꓫꓵ ꓑꓶ ꓓꓴ ꓢꓯ. ꓔꓬ ꓡ? ꓐꓰ ꓬꓲ ꓟꓽ ꓢꓷ.꓾ ꓬꓲ ꓢꓷ._ ꓟ ꓠꓬ ꓜ ꓠꓬꓲ ꓓꓳ ꓠꓬꓲ ꓬꓲꓼ ꓔ. ꓠꓬꓲ ꓕꓱ ꓡꓱ ꓐꓰ ꓦꓬꓼ ꓠꓬꓲ ꓗꓳ._ ꓟ ꓔꓯ ꓡꓰ ꓮ. ꓠꓬꓲ ꓠꓬ ꓢꓷ._ ꓡꓳ꓾ ꓙꓱꓽ ꓤ ꓠꓽ ꓢꓷ._ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓞꓳ ꓤ ꓠꓬ ꓕꓱ ꓡꓱ ꓐꓰ ꓟꓽ ꓥ꓾ ꓣꓳ ꓠꓬ ꓮ ꓫꓵ ꓑꓶ ꓓꓴ ꓠꓬꓲ ꓟꓲ ꓠꓯ ꓗꓪ ꓢꓯ. ꓔꓬ ꓓꓴ ꓥ ꓡ꓾ ꓐꓯ_ ꓟ ꓔꓯ ꓣꓳ ꓢꓷ. ꓠ ꓗ, ꓡꓳ꓿ ꓕꓱ ꓡꓱ ꓢꓷ. ꓐ ꓡ ꓓꓴ ꓥꓳ ꓐꓯ ꓠꓬ ꓣꓳ ꓠꓬ ꓣꓳ ꓞꓳ ꓤ ꓬꓲ. ꓚꓰꓺ ꓗꓪ ꓣꓳ ꓙꓰ ꓠ, ꓟ ꓥꓳ꓿ ꓣꓳ ꓞꓳ ꓤ ꓬꓲ ꓚꓰꓺ ꓠꓬ ꓮ ꓗꓪ ꓥ ꓡ꓾ ꓐꓯ ꓠꓬ ꓪꓴ‐ꓢ ꓥ ꓡꓳ꓿

ꓠꓲ, ꓠꓵꓻ_ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓠꓬ ꓙꓳ_ ꓟ ꓮ ꓙꓵ ꓔꓯ ꓚꓰꓼ ꓡꓳ꓿ ꓖꓳ ꓡꓱ ꓚꓰꓼ_ ꓕꓯ ꓠꓬ ꓞꓳ ꓤ ꓐꓰ ꓠꓱ. ꓐꓯꓼ ꓚꓰꓼ_ ꓟ ꓔꓯ ꓟꓽ ꓫꓱ, ꓡꓯ ꓘꓳ꓾ ꓠꓱ. ꓐꓯꓼ ꓮ ꓙꓵ ꓔꓯ ꓠꓬ ꓪꓴ‐ꓢ ꓠꓬ ꓒꓬꓱꓼ ꓡ ꓝꓲ ꓐꓰ ꓕꓱ ꓡꓱ ꓚꓰꓼ_ ꓡꓳ꓾ꓖꓳ ꓡꓱ ꓥ ꓟꓲ ꓟꓲ ꓠꓯ ꓞꓳ ꓤ ꓔꓯ ꓠ ꓠꓱ. ꓦꓱ ꓡꓰ ꓐꓰ ꓣꓴ ꓢꓲ ꓠꓬꓲ ꓪꓴ‐ꓢ ꓡꓰ ꓐꓰ ꓫꓱ, ꓟ꓾ ꓬꓲ ꓒꓬꓱꓽ ꓕꓯ ꓔꓯ ꓫꓱ, ꓟ ꓡꓰ ꓚꓰꓼ ꓥꓳ꓿ ꓖꓳ ꓡꓱ ꓚꓰꓼ_ ꓕꓯ ꓪꓴ‐ꓢ ꓠꓬ ꓬꓲ ꓦ ꓗꓪ ꓐꓰ ꓞꓳ ꓤ ꓠ ꓘꓴ ꓗꓪ ꓦ ꓧꓳ ꓖꓶ_ ꓡꓳ꓿ ꓖꓳ ꓟ ꓑꓶ ꓓꓴ ꓞꓳ ꓤ ꓠꓬ ꓠꓱ. ꓦꓱ ꓖꓳ ꓟ ꓠꓬ ꓞꓳ ꓤ ꓒꓬꓱꓼ ꓡ ꓟ ꓥ ꓡꓳ꓿ ꓮ ꓫꓵ ꓑꓶ ꓓꓴ ꓒꓬꓱꓼ ꓡ ꓡ꓾ ꓪꓴ‐ꓢ ꓬꓲ ꓦ ꓧꓳꓽ ꓖꓶ_ ꓟ ꓗꓪ ꓐꓰ ꓒꓬꓱꓼ ꓡ ꓡꓳ꓾ ꓖꓳ ꓟ ꓑꓶ ꓓꓴ ꓣꓳ ꓮ ꓙꓵ ꓠꓬ ꓪꓴ‐ꓢ ꓡꓰ ꓐꓰ ꓫꓱ, ꓟ ꓒꓬꓱꓽ ꓕꓯ ꓡ ꓞꓳ ꓥ ꓠꓬ ꓪꓴ‐ꓢ ꓞꓳ. ꓐꓰ ꓐꓯ ꓠ ꓗ, ꓡꓳ꓿ ꓮ ꓫꓵ ꓑꓶ ꓓꓴ ꓥ ꓡ꓾ ꓪꓴ‐ꓢ ꓬꓲ ꓐꓬꓱ ꓡꓱ ꓡꓱ_ ꓟ ꓬꓲ ꓞꓳ ꓠꓬ ꓠꓱ. ꓦꓱ ꓖꓳ ꓟ ꓗꓪ ꓬꓲ ꓧꓳꓽ ꓖꓶ_ ꓕꓯ ꓠꓱ. ꓦꓱ ꓖꓳ ꓟ ꓠꓬ ꓡ ꓞꓳ ꓒꓬꓱꓼ ꓡ ꓡꓳ꓿ ꓞꓳ ꓤ ꓖꓳ ꓟ ꓠꓬ ꓪꓴ‐ꓢ ꓜꓳ ꓒꓬꓱꓼ ꓡ ꓡꓳ꓿

ꓠꓲ, ꓠꓵꓻ_ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓓꓴ ꓠꓬ ꓪꓴ‐ꓢ ꓡꓰ ꓐꓰ ꓫꓱ, ꓟ꓾ ꓪꓴ‐ꓢ ꓜꓳ ꓥ ꓟ ꓑꓶ ꓓꓴ ꓪꓴ‐ꓢ ꓓꓵ ꓙ_ ꓟ ꓡꓰ ꓪꓴ‐ꓢ ꓣꓱ ꓬꓯꓼ ꓟ ꓡꓰ ꓪꓴ‐ꓢ ꓢꓪꓼ ꓟ ꓡꓰ ꓣꓳ ꓬꓰ ꓠ ꓗ, ꓡꓳ꓿ ꓕꓱ ꓟ ꓠꓬ ꓣꓳ ꓟꓲ ꓠꓯ ꓗꓪ ꓢꓯ. ꓔꓬ ꓟ ꓬꓲ ꓬꓰꓢꓷ ꓥ ꓡꓳ꓿ ꓕꓱ ꓟ ꓔꓯ ꓟꓽ ꓢꓷ. ꓥꓳ ꓐꓯ ꓠꓬ ꓣꓳ ꓠꓬ ꓣꓳ ꓬꓲ. ꓚꓰꓺ ꓔꓯ ꓟꓽ ꓢꓷ. ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓣꓳ ꓬꓲ. ꓚꓰꓺ ꓔꓯ ꓣꓳ ꓢꓷ. ꓟ ꓑꓶ ꓓꓴ ꓞꓳ ꓤ ꓕꓲꓽ ꓣꓳ ꓠꓬ ꓮ ꓗꓪ ꓐꓰ ꓡ_ ꓟ꓾ꓐꓰ ꓕꓲ ꓠꓬꓲ ꓙꓳ ꓠꓬ ꓮ ꓗꓪ ꓝꓮꓲ ꓕꓲ ꓧꓪ, ꓬꓲꓼ ꓙꓰ ꓠ, ꓟ ꓠꓬ ꓣꓳ ꓢꓷ. ꓓꓴ ꓥ ꓡꓳ꓿ ꓟꓲ ꓠꓯ ꓗꓪ ꓣꓳ ꓢꓯ. ꓔꓬ ꓟ ꓠꓬ ꓪꓴ‐ꓢ ꓡꓰ ꓐꓰ ꓣꓳ ꓔꓯ ꓣꓱ ꓝꓲ ꓠꓲ, ꓫꓵ_ ꓟ ꓮ ꓫꓵ ꓣꓳ ꓣꓱ ꓬꓰ ꓠ, ꓟ ꓥ ꓡꓳ꓿

ꓮ‐ꓓꓯ ꓐꓰ ꓰ‐ꓪ ꓔꓯ ꓪꓴ‐ꓢ ꓠꓬ ꓙꓳ_ ꓟ ꓮ ꓙꓵ ꓔꓯ ꓬꓲ. ꓟꓬꓱꓺ ꓟꓬꓱ ꓖꓶ꓾ ꓐꓰ ꓕꓱ ꓡꓱ ꓐꓯ_ ꓡꓳ꓿ ꓐꓯ ꓠꓲ, ꓫꓵ ꓠꓬ ꓚꓰꓼ ꓔ ꓟ ꓮ ꓙꓵ ꓟꓲ ꓠꓯ ꓗꓪ ꓙꓳ_ ꓟ ꓮ ꓙꓵ ꓔꓯ ꓞꓳ ꓤ ꓡꓯꓼ ꓞꓲ ꓗꓪ ꓡꓯꓼ ꓙꓱ ꓖꓶ_ ꓟ ꓥ ꓡꓳ꓿ ꓞꓳ ꓤ ꓔꓯ ꓠꓬꓲ ꓡꓳ. ꓗꓪ ꓫꓵ ꓠ, ꓟ ꓐꓱ ꓶ ꓟꓲ ꓠꓯ ꓔꓯ ꓚꓰꓼ_ ꓟ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓠꓲ, ꓠꓵꓻ_ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓮ ꓙꓵ ꓠꓬ ꓪꓴ‐ꓢ ꓠꓲ, ꓡꓶꓽ ꓙꓳ_ ꓟ ꓡꓰ ꓐꓰ ꓟꓲ ꓠꓯ ꓗꓪ ꓣꓳ ꓣꓱ ꓬꓲꓼ ꓠ, ꓟ ꓢꓯ. ꓔꓬ ꓠ, ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓟꓲ ꓠꓯ ꓗꓪ ꓔꓬ ꓟ ꓬꓲ ꓬꓲ ꓢꓷ ꓥ ꓡꓳ꓿ ꓕꓱ ꓟ ꓗꓪ ꓐꓰ ꓗꓳ. ꓙꓰ ꓗ. ꓠꓯ. ꓙꓰ ꓓ_ ꓟ ꓠꓬ ꓙꓱ ꓤ ꓡꓰ ꓐꓰ ꓙꓱ ꓤ ꓠꓬ ꓮ ꓫꓵ ꓟꓽ ꓢꓷ. ꓬꓲ ꓮ ꓗꓪ ꓠꓱ. ꓠꓬ ꓮ ꓗꓪ ꓙꓰ_ ꓥꓳ꓿ ꓮ ꓫꓵ ꓜꓽ ꓠꓲ, ꓫꓵ_ ꓠꓬ ꓮ ꓫꓵ ꓜ_ ꓥꓳ꓿ꓮ ꓫꓵ ꓣꓱ ꓠꓲ, ꓫꓵ_ ꓠꓬ ꓮ ꓫꓵ ꓣꓱ_ ꓥꓳ꓿ ꓖꓳ ꓟ ꓠꓬ ꓙꓱ ꓤ ꓢꓷ. ꓠꓲ, ꓕꓲ ꓖꓪ ꓥ ꓡꓳ꓿ ꓟꓲ ꓠꓯ ꓗꓪ ꓔꓬ ꓟ ꓮ ꓟꓬ, ꓠꓬ ꓙꓱꓽ ꓤ ꓢꓷ. ꓠꓲ, ꓕꓲ ꓒꓳ, ꓗꓪ ꓡꓰ ꓔꓬ ꓟ ꓟꓬ, ꓡꓳ꓿ ꓠꓬꓲ. ꓠꓬꓲ ꓪꓴ‐ꓢ ꓢꓷ. ꓠꓲ, ꓗꓪ ꓐꓰ ꓔꓬ ꓢꓴ ꓠꓬ ꓪꓴ‐ꓢ ꓠꓲ, ꓡꓶꓽ ꓔꓯ ꓛꓳ ꓢꓴ ꓪꓴ‐ꓢ ꓟꓬꓱꓽ ꓔꓯ ꓣꓱ ꓬꓰ ꓙ ꓢꓴ ꓥ ꓡꓳ꓿ ꓖꓳ ꓟ ꓑꓶ ꓓꓴ ꓣꓳ ꓬꓲ. ꓚꓰꓺ ꓠꓬ ꓪꓴ‐ꓢ ꓥ ꓟ ꓑꓶ ꓓꓴ ꓡꓳ, ꓬꓰ_ ꓟ ꓥ ꓟꓲ ꓪꓴ‐ꓢ ꓥ ꓡꓳ꓿ ꓕꓱ ꓠꓬꓲꓽ ꓗꓳ. ꓚ. ꓗꓪ ꓣꓳ ꓢꓯ. ꓔꓬ ꓟ ꓠꓬ ꓪꓴ‐ꓢ ꓠꓲ, ꓡꓶꓽ ꓑꓶ ꓓꓴ ꓢꓯ. ꓔꓬ ꓟ ꓥ ꓡꓳ꓿