ꓮ‐ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓬꓰ ꓙ ꓢꓴ ꓔꓰꓣꓔꓴꓡꓲꓮ ꓚꓺ ꓟꓲꓽ ꓔꓯ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓚꓺ ꓟꓲꓽ (Tertulia)
ꓮ‐ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓬꓰ ꓙ ꓢꓴ ꓔꓰꓣꓔꓴꓡꓲꓮ ꓚꓺ ꓟꓲꓽ ꓔꓯ ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓚꓺ ꓟꓲꓽ ꓚꓱ, ꓗꓪ ꓚꓺ ꓟ. ꓖꓶ ꓠ, ꓟ ꓥ ꓡꓳ꓿ ꓮꓓ (190) ꓘꓳꓼ ꓕꓯ ꓢꓯ. ꓔꓬ ꓗꓷ ꓢꓴ ꓔꓰꓣꓔꓴꓡꓲꓮ ꓠꓬ ꓮ‐ꓠꓱ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓘꓶ. ꓛꓲ ꓬꓰ ꓙ ꓢꓴ ꓥ ꓡꓳ꓿
ꓔꓰꓣꓔꓴꓡꓲꓮ ꓔꓯ ꓮꓓ (160) ꓘꓳꓼ ꓔꓯ ꓚꓮꓣꓔꓮꓖꓰ ꓡꓳ ꓒꓱ ꓗꓪ ꓒꓬꓱ ꓟꓳ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓖꓣꓰꓰꓗ ꓥꓳꓽ ꓫꓵꓽ ꓐꓰ ꓡꓮꓔꓔꓲꓠ ꓥꓳꓽ ꓔꓯ ꓮ ꓘꓶ. ꓓꓽ ꓢꓴ ꓕꓲ ꓣꓳ ꓥ ꓢꓲ ꓠꓬꓲ ꓐꓯ ꓟꓴꓽ ꓫꓬ, ꓒꓽ ꓓꓽ ꓕꓲ ꓣꓳ ꓥ ꓡꓳ꓿
ꓔꓰꓣꓔꓴꓡꓲꓮ ꓠꓬ ꓞꓲꓼ ꓣꓳ ꓟ ꓙꓵ, ꓕꓯ ꓪꓴ‐ꓢ ꓟꓽ ꓦꓻ ꓡꓱ ꓢꓴ ꓕꓲ ꓣꓳ ꓥ ꓡꓳ꓿ ꓝꓮꓲ ꓬꓲ ꓠꓬ ꓬꓲ ꓙꓵ, ꓟꓶ ꓫꓵˍ ꓫꓵˍ ꓣꓳ‐ꓟ ꓗꓴꓷꓼ ꓙꓵꓽ ꓢꓴ ꓢꓲꓽ ꓒ ꓐꓴ ꓐꓱ ꓶ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓮꓓ( 193) ꓘꓳꓼ ꓕꓯ ꓙꓲ‐ꓢꓴ ꓢꓲꓺ ꓤ ꓕꓲ ꓣꓳ ꓒꓬꓱꓼ ꓡꓺ ꓳ꓿
ꓖꓳ ꓗ. ꓠꓯ ꓬꓲ ꓠꓬ ꓚꓮꓣꓔꓮꓖꓰ ꓡꓳ ꓒꓱ ꓬꓯꓼ ꓡ ꓢꓲ ꓠꓬꓲ ꓙꓵꓻ ꓠꓲ, ꓔꓯ ꓟꓽ ꓙꓲꓽ ꓐꓴ ꓡꓯꓽ ꓒꓯ, ꓗꓪ ꓐꓰ ꓗꓽ ꓕꓽ ꓖꓶ ꓗꓷꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓬꓲ ꓔꓯ ꓘꓴ ꓜꓲꓼ ꓞꓳ ꓮ ꓟꓬ, ꓛꓲ ꓟꓬꓱꓺ ꓓꓳꓽ ꓖꓶ ꓟ ꓥ ꓡꓳ꓿ ꓝꓮꓲ ꓬꓲ ꓠꓬ ꓙꓵꓻ ꓠꓲ, ꓚꓱ, ꓔꓯ ꓗꓽ ꓕꓽ ꓠ, ꓟ ꓕꓳ ꓶ ꓮ ꓟꓬ, ꓔꓯ ꓐꓳ ꓖꓶ ꓗꓷꓳ꓿
ꓝꓮꓲ ꓬꓲ ꓡꓰ ꓐꓳ ꓗꓷ ꓕꓳ ꓶ ꓮ ꓟꓬ, ꓗꓪ ꓐꓰ ꓟꓬꓱꓺ ꓓꓳꓽ ꓮ ꓟꓬ, ꓙꓳ ꓟ ꓕꓳ ꓶ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓙꓵꓻ ꓠꓲ, ꓔꓯ ꓟꓽ ꓔꓱ ꓟꓽ ꓜꓳ ꓟ ꓟ. ꓟꓲꓽ ꓚꓺ ꓒꓽ ꓐꓴ ꓡꓯꓽ ꓒꓯ, ꓗꓪ ꓐꓰ ꓗꓽ ꓕꓽ ꓖꓶ ꓟ ꓕꓳ ꓶ ꓠꓬ ꓮ ꓘꓶ. ꓛꓲ ꓟꓬꓱꓺ ꓪ ꓟ ꓥ ꓡꓳ꓿
ꓕꓱ ꓡꓱ ꓐꓰ ꓬꓲ ꓠꓬ ꓙꓵꓻ ꓠꓲ, ꓔꓯ ꓗꓽ ꓕꓽ ꓖꓶ ꓗꓷ ꓢꓲ ꓠꓬꓲ ꓪꓴ‐ꓢ ꓦꓻ ꓡꓱ ꓢꓴ ꓐꓴ ꓐꓱ ꓶ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓴ ꓕꓲ ꓣꓳ ꓥ ꓡꓳ꓿ ꓝꓮꓲ ꓬꓲ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓕꓯ ꓥ ꓟꓲ ꓬꓰ ꓙ ꓢꓴ ꓢꓷ. ꓠꓲ, ꓙꓳ ꓒꓽ ꓕꓲ ꓣꓳ ꓥ ꓡꓳ꓿
